Yosua 22
22
Is Israel a’ge pema ik Yordan etle akhit togolik legesa wene
1At Yosua en is Ruben a’ge emin, Gad a’ge emin, ena’gul onuk Manasye a’ge ado me’gerik emin, worlentesimu wegesema, 2#Bil. 32:20-32; Yos. 1:12-15mo’gulentasulat, “At Allah eragam a’ge Musa en wene le’gelogo mo’gulhentesi a’ge ano ’berlegat tenak-welat opsogo togulat, ye, an ogo, wene le’gelogo mo’gulhentegis a’ge ’berlegat henesa’go opsogo holak poluk, asogo togulat, 3henarilak Israel a’ge ado ugonobo erlakma en, at henaik Allah en wene le’gelogo mo’gulhentesi a’ge ano hegitsogo nagat til wagaihwe, o yogodak yu hwerliat aga o.
4Asogoatma re, at henaik Allah en egei a’ge ano hegitsogo henarilak Israel a’ge ado eba, enede we opsogo lielak welemagoluk, tagenebesimu oruakma re, his nak e, at Allah eragam a’ge Musa en hono’gwiang ik Yordan etle akhit wokhentesimu ebano togolik lit o. 5Liboroguptik e, at henaik Allah henede hwediktak pogwi, at en tu epasu a’ge ano nak til lagalat, disogo tip asogo tip oluk wene egei a’ge ano opsogo togulat, at ebam nak henede eberak welat, henede emin, henebe emin, ’berlegat at nak wogotluk motluk lagalat, togu lemis o, oluk at Allah eragam a’ge Musa en togulom a’ge wene le’gelogo mo’gulhentesi a’ge wene pelal wogo a’ge ai modok opsogoat togu lomup o,” oluk mo’gulentesi.
6-7Ye, is ena’gul onuk Manasye a’ge ado me’gerik ebano re, Musa en o Basan eba ono’gwiang wogentasulat, ye, ’gwiang logon me’gerik ebano re, at Yosua en o mo obuk ilasu akhit o’gwe ik Yordan yu akhit enarilak ono’gwiang wogentasulat eneminat, wogentasulat tegeimu re, at Yosua en is Ruben a’ge emin, Gad a’ge emin, ena’gul onuk Manasye a’ge ado logon emin, onowi ik Yordan etle-akhit louwagoluk, 8perak enebasulat, “His en honuam a’bik oruak a’ge eba emin, besi perak emin, emas emin, tembaga emin, ebe yaga emin, hono’bogoyum modok a’bik welago a’ge eba emin, is heneselei a’ge enemin weim hogul ’gogulat wegep a’ge pam en hena’ge hene’gikmu a’bik aga a’ge eba honowi pam laguptik henarilak logon so’burontomup o,” oluk mo’gulentesirik ede aganhan enebam poluk, onowi pamat perak enebesi.
Ik Yordan etle akhit en ik wusogo liplau wom a’ge ebelegisa wene
9Perak enebesi ano re, is Ruben a’ge emin, Gad a’ge emin, ena’gul onuk Manasye a’ge ado me’gerik ebano emin, ebano en is enarilak Israel a’ge ado logon o Kanaan kota Silo ebano ukpegesarik, o Gilead at Allah en, ono’gwiang wogentemin o, oluk, Musa mo’gulosoam, wogentesimu ebano libomogoluk, lagalat, 10’gwiang Kanaan pam o Gilead ik Yordan iak pam loluk is Ruben a’ge emin Gad a’ge emin, ena’gul onuk Manasye a’ge ado me’gerik ebano emin, ik wusogo wagaihwe ik Yordan iak pam ebano helep uak modok nogorlok a’ge weregisa,
11asogo uak wusogo ebale helo’gogumu, is aphwami Israel a’ge pema en erlak o, “Is Ruben a’ge emin, Gad a’ge emin, ena’gul onuk Manasye a’ge ado me’gerik emin, o Gelilot ik Yordan iak pam o Kanaan aphwami Israel a’ge ono’gwiang hwerli pam wusogo wogogulomma ebale hele’gegisa o,” oluk, ogwiam enesa’go hwelegisarik, 12Is Israel a’ge la’bolik ’berlegat emin, weim ti louwogoluk, o Silo ebano odoktegisa.
13Odoktegisarik, is Ruben a’ge emin, Gad a’ge emin, ena’gul onuk Manasye ado me’gerik ebano emin, o Gilead ebano oruakma, is Israel a’ge en ap Eleazar omlogo Allah eiye a’ge Pinehas emin, 14Israel ena’gul onuk hundomok dogo a’ge en dedelik enebe lo’bok ’gwelagentarok welagai a’ge onuelak mesik ’ge’gik nak enebe 10 emin, perak enebegesa.
15Perak enebegesa ano re is Ruben a’ge emin, Gad a’ge emin, ena’gul onuk Manasye a’ge ado me’gerik ebano emin, oruakma, legesarik, wene mo’gulontogulat, 16#Ula. 12:13,14Nis Allah eiyagai Israel a’ge la’bolik ’berlegat en wene ege a’ge ano mo’gulhontul o. At nenaik Israel a’ge enaik Allah ukpoluk, no oluk en at wiagap pogulat en de, henede pobirak erlakma en honolot het pam wusogo wogogulomma, ebale heling horlogu legep no? 17#Bil. 25:1-9Nis o Peor welat, wiak tige ano pam at nenaik Allah en ou obotut-nis Israel a’ge la’bolik ’berlek nenebam pesimu erlak om erlakma en louktak modok oruak ano re, mi-miarak poluk togu legep o, ia? 18His yogodak mesik eminat at Allah hono’borl akhit ukpouwogoluk, togu legep a?
His yogodak nenaik Allah henebirap pogu legep holuk e, o sonoat nis Israel a’ge nenebe la’bulogo ’berlegat olot het nenebam pouwa o. 19His hono’gwiang ai, wiak agarik oruak holuk e, o at Allah en pulogo pagathwerlesimu owi sum owi werik oruakma ik yu akhit yema nenemin wolomogoluk, liplau manup o. At nenaik Allah ebaget wusogo narlogumu pageat yema ebale hele’gigema oruak a’ge oruakhweat de nis henebirap nonobogulat, ye at Allah henebirap pogulat, asogo togulat, his henebaget mu mesik heli’gogo po ai re, mia o.
20 #
Yos. 7:1-26
At Allah en a’ge ebaget a’geatma re, wo modok mia, oruakhweat de, at Zerah eba Akhan en wesi ano pam nis Israel a’ge la’bolik ’berlegat olot het nenebam pesi ai erlak epegep? At Akhan wiak tegei pam omu nak warom erlak o. At e, nis ’berlegat warege o, oluk, egerikmu re, mo’gulhentige o.
21Asogo mo’gulontogwiam, is Ruben a’ge emin, Gad a’ge emin, is ena’gul onuk Manasye a’ge ado me’gerik ebano emin, ebano en is Israel a’ge dogoma a’ge en dedelik a’ge en ’gwelagentarok welagai a’ge onuelak ebano mo’gulontogulat, 22“At anni modok welago ai, at Allah emategat o. At modok Anni welago ai, at nenaik Allah emategat o. Nis tige a’ge At Allah emategat alukmu re, nis nenaik Allah iak sagalogo poluk, Nenede wiak welat, nenebirap honobogulat at nenaik Allah nenebirap pogulat, takpoluk, yu tige holuk, at Allah en neneli wouwa erlak his en watnonobu obat o. 23Nis en nenaik Allah ebaget wusogo e narlogwi a’ge emin, gandum e’gen wogo a’ge At ebaget pogwi emin, Allah emin hwedik wolomul oluk, wusogo wogogwi emin, ano pam louktak poluk, e narlogulomma ebale hele’gige a’ge oruakhwe, his en at nenaik Allah ukpoluk, mu mesik tul oluk, tegisa, oluk nene pegep holuk e, at nenaik Allah ematek en nonowiak o’go nenebam pasu lemak o,” oluk, his Israel a’ge henaluk emagoluk, ege o.
24Nis asogo oluk, tu erlak o, nis hele’gige yu re, pobuk his heneiyagai en nis neneiyagai mo’gulontogulat, at Allah nis Israel a’ge nenaik ai his ogo henaigat oluk opogulat en ogu legep a? Erlak o. 25At nenaik Allah en ik Yordan ’burl ogorlirak oruakhwe, nis Yema nenebasulat, his Ruben a’ge emin, Gad a’ge emin, eba henebasulat tegeimu re, at nis nenaik Allah ai, his henaik erlagat o, oluk, mo’gulontogwi holuk, nis neneiyagai at Allah onogorlok om erlakma en ukpogumu no oluk, en, hele’gige o.
26Asogo agoma no oluk, nis en, wusogo wogogulomma ebale hele’guok o, oluk ege ano re, at Allah paget wusogo e narlogulat, wusogo ebaget pogulat, togulat togu lomok oluk ebale hele’gu erlak o. 27At e, his heneiyagai en nis neneiyagai mo’gulontogulat, at Allah ai, his henaik puk erlak o, oluk, mo’gulontogulom ’gela’ge, nis en Allah ebaget wusogo e, narlogulat, wusogo ebaget pogulat, Allah emin hwedik wolomogoluk, ebaget pogulat, togulom ano re, at Allah owi sabo werikmu ebano nak ti lagalat togulom ai, his emin, nis emin, neneiyagai nene’balak dagetil laga lema a’ge emin, nis ’berlegat nenaluksogo wolomogoluk, ebale heli’gogo pege o.
28Nis en opogulat, is en nis asogo mo’gulnontogwi hwia neneiyagai dogo’gwe a’ge weiyelak en asogoat mo’gulontogwi a, togwi holuk, nis en a, neneiyagai en a, is mo’gulontogulat, nis nene’balak en at Allah paget wusogo wogogulat ogut walsogo ebale heli’gogo pegesa ai, nis nene’balak en wusogo Allah paget e narlogulat, wusogo ebaget pogulat, togu lomok oluk, ebale hele’gu erlak o. At e, nenaik Allah mesigarat, opoluk, mesikmu en nak erliktogulom e, nis emin, his emin, nenaluk otluk wolomok oluk, ebale heli’gogo pegesa, aiatma re, henil hemit o, oluk, mo’gulontogu lema ani o.
29Asogoatma re, at Allah paget wusogo e narlogulat, gandum e’gen wogo ebaget pogulat, wusogo ebaget pogulat, togulom ai, at nenaik Allah ematek ebaget wusogo e narlogumu ebalema owi werikmu ebano oruakhwe, ukpoluk, Allah nenebit o, oluk, nenede wiak welat, mu a’ge mesik togulat tuok, opoluk, tu erlak o, oluk, mo’gulentegisa.
30Wene is Ruben a’ge emin, Gad a’ge emin, Manasye a’ge emin, mo’gulentegisa a’ge ano at Allah eiye a’ge Pinehas emin, is Israel a’ge ena’gul onuk dedelik ’gwelagentarok welagai a’ge onuelak emin, ’berlegat enesa’go hwelegisarik, obat egesa, oluk epegesa. 31Epegesarik Eleazar omlogo Pinehas ano en is Ruben a’ge emin, Gad a’ge emin, Manasye a’ge emin, mo’gulentasulat, yogodak en at Allah nenemin oruak ano arat enaluk aga o. His en at Allah nenebit, “oluk, mu a’ge mesik tu erlak ai, obat tigepma re, at nenaik Allah en e’gin a’ge nis Israel a’ge nenebam po a’ge aga a’geat de, nenagap deligep o,” oluk, mo’gulentesi.
32Mo’gulentesirik, at Eleazar omlogo Pinehas Allah eiye a’ge ano emin, is aphwami Israel ’gwelagentarok welagai a’ge onuelak ebano emin, ebano en is Ruben a’ge emin, Gad a’ge emin, o Gilead ebano ukpoluk, Israel a’ge o Kanaan oruakma wegesarik, wene ebano ’beli’gogo mo’gulentegisa. 33Mo’gulentegisema, is aphwami Israel a’ge en, obat egesa o, oluk, is Ruben a’ge emin, ’Gad a’ge emin, welagaimu erlagapsogo pouwok oluk, enemin weim tuok oluk, epegesa a’ge ano, erlagapsogo poluk, at Allah ematek erlik tegisa.
34Ye, is Ruben a’ge emin, Gad a’ge emin, ebano en, “At Allah ai re, at Allah at o, oluk his emin, nis emin, nenaluk agalomogoluk, wusogo wogogulomma ebale hele’gigerikmu re, onuk enaluk aga lomma o,” oluk, tualogo pegesa.
Currently Selected:
Yosua 22: Wul
Highlight
Share
Copy
Want to have your highlights saved across all your devices? Sign up or sign in
