Yosua 20
20
O enagap delogulomma pulogo pegesa wene
1 #
Bil. 35:9-34; Ula. 4:41-43; 19:1-13 Asogo toluk, at Allah en Yosua ano mo’guleselat.
2-3“Ap mesik, disogo tik, eberak erlakma en ebagase erlak ap mesik weriso holuk, ap weriso a’ge ano, a’gulmu worogumu no oluk, hweiye o enagap delisoma oluk pulogo pegesema eba at ’gwi laga lemagoluk, an en Musa mo’gulosokhwe, at en mo’gulhentesi a’ge ano hegitsogo, aphwami Israel a’ge en o kota-kota enagap delak wolom a’ge ano pulogo pou wagoluk, mo’gulontomup o. 4Ap ano hweiye o enagap delisoma mesik ’gwi laigoluk, ’goduk ’gwi lagaimu eriano inlai lorik, is ap onuelak o kota enagap delisolomma welema a’ge ano mo’gulogulat, wene edip disogo tegis o, oluk, opsogo ’beli’gogo mo’gulentasu holuk, is ap onuelak ebano en o kota ebano ’gwelebak poluk, enemin welemagoluk, o mesik wogema ani o.
5Wogogwiam eba oruakma, ap worua a’ge ano a’gulmu woruogoluk, heratil wagai holuk, ap hweiye louwa a’ge ono olot het en ap yu werik o, oluk ede epasu lagarigat de,” woru erlakma re, is ap onuelak ebano en ap ai woruagoluk wogentagup no yo, 6At e, o eba oruakhwe, Israel oruak a’ge ’berlegat enil pam wene uak lologulat, at ap Allah eiye a’ge onue en o agauwa ai erlige tegei a’ge ano waragalat, togwi holuk nak e, ap ano owi pam kota ’bok womma ebano, en togolik lo obat egei o, oluk mo’gulontomup o,” oluk mo’gulentesi.
7Mo’gulesi a’ge ano at Yosua en Israel a’ge mo’gulentasuam, is Israel a’ge ebano en dom pam Naftali a’ge ono’gwiang ’belakma Galilea eba o onuk Kedes at pulogo pogulat, dom pam Efraim a’ge ono ’gwiang pam o onuk Sikhem pulogo pogulat, dom pamat Yehuda a’ge ono’gwiangma o onuk Kiryat-Arba ai Hebron atma re, pulogo pogulat, takpegesa. 8Ye, o Yerikho ’gwi lagaimu o mo liplau wago akhit o’gwe ik Yordan etle akhit a’gul onuk Ruben a’ge ono’gwiang leimu do’goma o onuk Bezer pulogo pogulat, a’gul onuk ’gat a’ge ono’gwiang ’belak Gilead ebano de o onuk Ramot pulogo pogulat, a’gul onuk Manasye ono’gwiang ’belakma ebano de o onuk Golan at pulogo pogulat, takpoluk pegesa.
9O pulogo pil legesa ano re, is aphwami Israel a’ge emin, is ap ’bok a’ge ene’gerlakma welagai a’ge ebano emin, is logon enede en, ap mesik werik, opo erlakma at de, weriso holuk ap weriso a’ge ano Israel a’ge welagai a’ge ebano ’berlegat enil pam owan uak lolak erlak oruakhwe, a’gulmu togumu no oluk, hweiye o ebayat laga lemagoluk, o aiat pulogo pegesa ani o.
Currently Selected:
Yosua 20: Wul
Highlight
Share
Copy
Want to have your highlights saved across all your devices? Sign up or sign in
