Yeremia 42
42
Enebaget se’ban uagoluk, Yeremia mo’gulegisa wene
1Asogo toluk ap enesegen oruak a’ge onuelak emin, at ap Kareah omlogo Yohanan emin, Hosaya omlogo Azarya emin, ononuk oruak a’ge erlak a’ge emin, ’berlegat en, 2Allah en mo’gulosokhwe mo’gulentasu a’ge Yeremia ano e’bek wegesarik, at mo’gulogulat, “Nis naduk aphwami a’bigat welege a’geat de, nenebe we wei nak ’bullak nenebegesema welege a’ge ano hil enat nentigenma re, nis ’bullak a’ge ’berlegat nenebaget haik ’gain Onuk Logo a’ge Allah gonu mo’gulorogun en, hat he’bek wege ai o. 3Nis o geba lo a’ge emin, nis no ’gwe-a’ge tu a’ge emin, haik At ’gain Onuk Logo a’ge Allah en mo’gulnontouwagoluk, mo’gulemin o,” oluk mo’gulegisa.
4Asogo mo’gulogwiam, At ’gain Onuk Logo a’ge Allah en mo’gulosoam mo’gulentasu a’ge Yeremia en is mo’gulentasulat, “Haik Allah mo’gulemin o, oluk, mo’gulnigep ano, an arat nesa’go holegismu re, At Allah en an mo’gulnesi a’ge we wei nak mesik nedemu sebelogo po erlakma en ’berlegat ’baksogo mo’gulhentaik o.”
5Mo’gulentasuam, is en Yeremia mo’gulogulat, “Wene hat haik At ’gain Onuk Logo a’ge Allah en, mo’gulentemin o, oluk mo’gulhosoam, nis mo’gulnentasu a’ge ano opsogo togwi erlak holuk, at iagesei erlak demat nak oso, a’ge ano pobirak poluk hegitsogo nak eselat, tago a’ge At ’gain Onuk Logo a’ge Allah en ilen woknenebise lemak o. 6Nis opsogo wolomogoluk, nenebaget haik At Allah mo’gulemin o, oluk, mo’gulheige a’ge ano wene ai op a, wiak a? Mo’gulnentasu legen a’ge ai, nenesago hologu lomul o. Nenaik At ’gain Onuk Logo a’ge Allah iak hwelak poluk, opsogoat togu lomul o,” oluk, mo’gulegisa.
Se’ban egei a’ge ogo mo’gulesi wene
7Mo’gulogwiam, at Yeremia en se’ban osoam, agauwa 10 pam wolotluk, At ’gain Onuk Logo a’ge Allah en wene Yeremia disogo mo’gulesi. 8Mo’gulosoam, at Yeremia en Kareah omlogo Yohanan emin, ap enesegen oruak a’ge onuelak at emin oruak a’ge ebano emin, aphwami ononuk oruak erlak emin, ’berlegat worlentesimu odoktu agaiam e, 9Is mo’gulentasulat, “Nenebaget mo’gulemin o, oluk mo’gulnigep a’ge ano mo’gulosoam, Israel a’ge enaik At ’gain Onuk Logo a’ge Allah en mo’gulnesi ano re, yuat o. 10Egin enebam pasu laga ano pam nede wathwerlasumu re, is o yema modok welema holuk, An en is o moluktogwi ’gela’ge tak paik erlak, o worogwi ’gela’ge takpasulat, ye, edip henokho lebikpogwi ’gela’ge henakho lebikpo erlakma en di owi yu owi yorogwi ’gela’ge takpasulat, tik o, oluk, egei. 11At ’gain Onuk Logo a’ge Allah en eselat, at ap Babel a’ge onue ’gain ebe onogorlok hogwi a’ge ebano, onogorlok hogumu no yo. An en is enemin oruakma, An enat enagap deliselat, ye, at e’gikmu en delogo enebasulat, tuama re, onogorlok ho mia o. 12An en is nede agalat tago a’ge ano lasuam, at ede en ono’gwiangma welemagoluk, ugonobouwa o, oluk, egei a’geat de,
13His en, nis o yema wolom nenebit o, oluk, henaik At ’gain Onuk Logo a’ge Allah iak holu, nenebit opogulat, 14Ye, his en erlak o. Nis o Mesir weim togulat, iak loksogo bakoso a’ge trompet weim tu a’ge paget ano iak osokhwe hologulat holuk e, yogodak weim tuagoluk oso hegi oluk opogulat, so’boru nele en nonouk togulat, togwi erlakma eba lultik wolomok o, oluk, ogulat, togwi holuk. 15His aphwami Yehuda pema ’bullak a’ge yu o. At Allah en egei a’ge ano henesa’go opsogo hologu lemis o. At ’gain Onuk Logo anni modok welago a’ge Israel enaik Allah en eselat, is o Mesir lo a’ge nak opogulat, ye, laga lomultik, eba ap ’bok a’ge ’gela’ge omultik wolom a’ge opogulat lagaihwe,
16wa’gun pam waronobu a’ge onogorlok hogwi a’ge ano arat enebam agalat, ye, so’boru obouk nenebam agoma no yo, nogorlok o opogwi a’ge ano arat enebam etil o Mesir ebanoat waretil lagalat, tua o. 17Is aphwami ’berlegat o Mesir loluk eba han otluk wolom o’gwe lo’bok enede opogwi ano mesigat nak ogo mesik ukpasulat, e’gin enebam pasulat tisoam, mesigat nak mesik agap delhorloluk libagalat tua modok erlak o. At e wa’gun pam emin, so’boru obouk pam emin, ou pam emin, ’berlegat warema egeimu en mo’gulhentegis o.
18At ’gain Onuk Logo anni modok welago Israel enaik Allah en egei ano re, yuat o. Is o Yerusalem welegesa a’ge ebano nolot het emin, nebam haro emin enebam pegi ’gela’ge, is o Mesir louwarik oruakhwe, nolot het enebam paik o. Enebam pasuam, aphwami enebe wiak agalat, onogorlok wiaksogo agokhwe ontogulat, ononuk ’balholuk hweim onobogulat, mi-miarak onobogulat, togulomma re, ono’gwiang yu enil mesik emin houwa modok erlak o,” oluk egeimu en mo’gulhentegis o. 19His aphwami Yehuda pema ’bullak a’ge yu o. At ’gain Onuk Logo a’ge Allah en, “O Mesir lo mia o,” oluk, egeimu re, demat epagup ene an en o yogodak hoso’bi mo’gulhentasu legi a’ge yu, pobi tit o. 20His en, “Nis nenebaget At ’gain Onuk Logo a’ge Allah mo’gulemin o. Mo’gulosoam, mo’gulhema a’ge ’berlegat mo’gulnentagunmu re, nis ogo tulat o,” oluk, “Haik ’gain Onuk Logo a’ge Allah mo’gulemin o,” oluk mo’gulnigep ano re, henarogun liphorlouwogoluk mo’gulnigep o. 21At Henaik ’gain Onuk Logo a’ge Allah en, mo’gulontomup, oluk mo’gulnesi a’ge ’berlegat an yogodak mo’gulhentegis a’geat de, tu, nenebit epegepma re, 22wene demat epagup en mo’gulhentasu legi a’ge yu, pobi tit o. His ap ’bok ’gela’ge omultik wolomul epagupmu ebano oruakma, wa’gun pam, so’boru obouk pam, ou pamat, waretil laga lorogup ai en mo’gulhentegis o.
Currently Selected:
Yeremia 42: Wul
Highlight
Copy
Compare
Share
Want to have your highlights saved across all your devices? Sign up or sign in
