Yeremia 41
41
1 #
2Raj. 25:25
Dugwi hebarligen (7) pelelak poluk, mesik pelelak a’ge ai pam ap ’gain at pam en weiyelak enesegen oruak a’ge onue ’gain ap Elisama eba Netanya omlogo Ismael ano, ap enebe 10 a’ge enemin en Ahikam omlogo Gedalya o Mizpa oruakma, e’bek wagaiam, emin so’boru owan no’gulat, 2Netanya omlogo Ismael ap enebe 10 eriano enemin, inotluk, ap o Babel a’ge onue ’gain en o Yehuda eiye welemagoluk edikpesi a’ge ap Safan eba Ahikam omlogo Gedalya ano, wa’gun pam modok ’begiat wusogo pegesa. 3Wusogo poluk, is aphwami Yehuda a’ge ap Gedalya emin, o Mizpa welagai a’ge ebano emin, is ap Babel a’ge enesegen oruak a’ge ebano emin, at Ismael libagalat, ’berlegat wusogo enebesi.
4At Gedalya werak poluk, hubet o’gwe aphwami owan eneperlak oruakhwe, 5Is ap o Sikhem en, Silo en, Samaria en, enebe la’bolik 80 atma re, enemde asu ’balogulat, onosum derle derlap tak a’ge ’buktugulat, enebetne molik 'gagalak a’ge wagalat, 6At Netanya omlogo Ismael ano emin sarlok tik oluk, o Mizpa en libagarik, nge-nge emin sarok tegisarik mo’gulentasulat, his ap Ahikam omlogo Gedalya oruakma e’bek manis o, oluk mo’gulentesi. 7Asogo mo’gulentesimu, o kota ede’burl lau wagaiam, at Netanya omlogo Ismael osilak enemin waga a’ge ano emin en libagalat, wusogo onoboluk, werak ebano wokho ik omugwe pelakma ebano ’belabonobogumu, 8Is waronobogulat enebe pema 10 en at Ismael mo’gulogulat, “gandum emin, gandum a’ge jelai emin, a’bosu emin, gin a’bosu emin, o kota o’borlma yema hisogo pege a’ge oruakma re, nis watnonobogun no yo,” oluk, mo’gulegisema, is enarilak warenebiselat, at emin a’ge pema watonobu erlakma en ugenebesi. 9At Netanya omlogo Ismael ano en ap Gedalya weriselat emin wusogo enebesi a’ge enebe ’berlegat ik omugwe pelakma ’belapenebegei ano re, ap ’gain Asa ano en ap Israel a’ge onue ’gain Baesa osilak enemin wat onobogumu no oluk, o pageat ’gwiang ele delogo pegesema ebano aphwami enebe werak a’ge ik lok pelakma ebanoat belebak enebesi.
10At ap ’gain ebe woluk no’gwi a’ge onue Nebuzaradan en ap Ahikam omlogo Gedalya en ’gwelagentarok welemagoluk, edikpesimu o Mizpa welagai a’ge aphwami pema ’bullak a’ge ’berlegat emin, ap ’gain ano ogolani emin, ’berlegat at Netanya omlogo Ismael en hogul wogenebegeitik, wogonoboluk o aphwami Amon a’ge oruakma eba enebeilasumu,
11At Netanya omlogo Ismael wiak lok a’ge tegei ano, ap Kareah omlogo Yohanan osi enesegen oruak a’ge onuelak enemin en enesago holak poluk, 12At Netanya omlogo Ismael ano, emin weim tuogoluk, onosilak ’berlegat wogonoboluk legesarik, o Gibeon ik lok yegelak ma ebano oruakma emin sarlok ti legesa. 13Legesarik, at Ismael is aphwami ’berlek wogonoboluk laga a’ge ano en at Kareah omlogo Yohanan osilak enesegen oruak a’ge onuelak enemin wagaimu enil entigisarik, enagai a’bik aga. 14Enagai hegesarik is aphwami at Ismael o Mizpa en hogul wogonoboluk laga a’ge ebano ’berlegat pobuk togolik ap Kareah omlogo Yohanan emin, agaihwe, 15At Netanya omlogo Ismael osilak enebe 8 emin ap Yohanan e’gikmu a’ge hweiye aphwami Amon a’ge oruakma legesa.
16Ye, at ap Netanya omlogo Ismael en ap Ahikam omlogo Gedalya o Mizpa wusogo pasulat, ’bullak enebegi a’ge ap enesegen oruak a’ge emin, hwami emin, logomalik-hwelani emin, ap ’gain owi pam iabuk togwi a’ge emin, o Gibeon en wogonoboluk lasumu, ap Kareah omlogo Yohanan osilak enesegen oruak a’ge onuelak emin en del enebegisa a’ge ebano wogonoboluk, 17-18ap o Babel a’ge onue ’gain en ap Ahikam omlogo Gedalya o Yehuda eiye welemagoluk edikpesi a’ge ano, at Netanya omlogo Ismael en weregei ano pam, “Is o Babel a’ge en watnonobogumu no,” oluk onogorlok en, “O Mesir hweiye louwok o,” oluk, lagalat, o Betlehem horoksogo o Kimham ebanoat molail legesa.
Currently Selected:
Yeremia 41: Wul
Highlight
Copy
Compare
Share
Want to have your highlights saved across all your devices? Sign up or sign in
