Yeremia 40
40
At Yeremia ap Gedalya emin welaga wene
1Ap ’gain ano ebe woluk no’gwi a’ge onue Nebuzaradan en at Yeremia o Rama herle werak oruakma, herle hebilogo lebikpou wagama oruakma, At ’gain Onuk Logo a’ge en ap Yeremia wene mo’gulesi ano re yuat o. Ap Nebuzaradan en aphwami Yerusalem a’ge emin, Yehuda a’ge emin, hogul wogonoboluk o Babel hwik entail laik oluk tagalat, at Yeremia ano ene’gerlakma kawat herle pam e’gik herle werak oruakma hesi.
2Is ap ’gain ebe woluk no’gwi a’ge onue en Yeremia oruakma hesirik, at mo’guleselat, “Haik ’gain Onuk Logo a’ge Allah en o yema e’gin modok lok a’ge ebam po a’ge arat eberegeitik oruak o. 3At Allah en eberegei a’ge hegitsogoat takpoluk pesimu re, at en takpoluk pesi yu re, his aphwami yu en At Naik ’gain Onuk Logo a’ge Allah wiagap pogulat, at iak henesa’go holu erlakma en ukpogulat, togwi en, tegei a’geat de, 4Hat yogodak he’gik kawat herle pam hettak welegen yu, an en lologo hebegi o. Hat an nemin o babel lo hagai epasulat holuk, neminat louwok o, nemin lagun holuk, an en ’gwelakhiarok weleik o,” ye, o Babel eba an nemin lo, nebit, epasulat holuk, ai re op nagat o. O yema hat wolom op nak oruakma re, o yema ’berlek denagalat, an yema wolom obat hegi, epasulat holuk, eba at wolorogun ani o, oluk mo’gulesimu. 5Mo’gulesimu, at Yeremia ano laigoluk, olukhwe eden hasumu, “Ap Nebuzaradan en mesik emin mo’guleselat, ap is o Babel a’ge onue ’gain en o Yehuda kota-kota ’gwelabogo welemagoluk ap Safan eba Ahikam omlogo Gedalya edikpesirik oruakma, togolik hai lak o. Hail laguntik, hemin aphwami enemin oruak a’ge eba enemin wolom holuk, eba at welat, ye, erlak holuk, laik epagun mu eba at lasulat, taga lorogun ani o,” oluk, mo’gulesi. Mo’gulesirik ap onue ai en so’boru goma a’ge wogeselat, a’ge-a’ge mesik we wogoselat, takpoluk, louwagoluk perakpesi. 6Perakpasuam, at Yeremia ano ap Ahikam omlogo Gedalya o Mizpa oruakma, e’bek loluk, emin is aphwami o eba ukpoluk legesa a’ge ebano eneminat welegesa.
Ap Gedalya o Yehuda eiye wolom a’ge paget edikpegesa wene
7 #
2Raj. 25:22-24
Ap Babel a’ge onue ’gain en ap Ahikam omlogo Gedalya ano, o Yehuda ’gwelabogo welemagoluk edikpasulat, ye, is ap emin hwami emin, hwelani-malik emin, mesik tak pagathorlo modok mia en, o Babel wogonoboluk lo erlakma en ugenebegesa a’ge ebano senentarok welemagoluk edikpasulat, tegei o oluk ogwi ano re, is Yehuda enesegen oruak a’ge onuelak emin, enarilak enesegen oruak a’ge emin, gerat o’borlma lebegesarik welagai a’ge ebano en enesago holak poluk, 8Ap Netanya omlogo Ismael emin Kareah eiyagai Yohanan Yonatan emin, Tanhumet omlogo Seraya emin ap Netofa a’ge Efai eiyagai emin, at Maakha omlogo ap Yezanya emin, is onosilak ’berlegat emin, at Gedalya o Mizpa oruakma ebek wegesa. 9E’bek wegesema, at Safan eba Ahikam omlogo Gedalya ano en is onosilak enemin wegesa a’ge ebano mo’gulentasulat, “Is ap Babel a’ge eneragam a’ge welat, enalik worogulat honogorlok ho mia o. At e, o yema welat, ap o Babel a’ge onue ’gain eragam welat, alik worogwi holuk, henebe obat wolorogup ani o. 10An ogo o Mizpa yema welat, is aphwami o Babel a’ge ne’bek wagaiam, his en ogwi a’ge ebano an mo’gulentasu leik a’geat de, his yu nak e, e’gen ’balu erlige lau wago holuk, anggur e’gen ’balogulat, e’gen pema mu a’ge ’balogulat, zaitun a’bosu na'gogulat, takpoluk, ebale pogumu pogu loroguptik, o kota-kota sebelhwerlegepma ebanoat honowirak oroguptik wolorogup ani o,” oluk, mo’gulentesi. 11Ye, is aphwami Israel a’ge ’berlegat o Moab emin, o Amon emin, o Edom emin, di owi yu owi pema o mu’gwe logon ’berlegat emin, ene’gerlak o’gwe welagai a’ge ebano en ogulat, “Ap o Babel a’ge onue ’gain en aphwami pema o Yehuda welagai a’ge ebano o Yehuda welemagoluk mo’gulentasulat, ye, ap Safan eba Ahikam omlogo Gedalya ano en ’gwelagentarok welemagoluk edikpasulat, tegei o,” oluk, mo’gulogwi a’ge ano enesago holak poluk, 12Is aphwami ene’gerlak o’gwe yarluk egesarik o di owi yu owi oruak a’ge ebano ’berlegat, togolik o Yehuda ap Gedalya o Mizpa oruakma e’bek wegesa. E’bek wegesarik, anggur e’gen emin, e’gen pema mu a’ge emin, a’bigat ’balogo odoksogo pegesa.
Ap Gedalya weregisa wene
13Agauwa mesik pam ap Kareah omlogo Yohanan emin, is o’borlma libegesa a’ge enesegen oruak a’ge onuelak ’berlegat emin, en at Gedalya o Mizpa oruakma e’bek wegesarik, 14at mo’gulogulat, aphwami Amon a’ge onue ’gain Baalis en, ap Netanya omlogo Ismael en hat wathebuagoluk, perak pou waga ano haluk a? oluk mo’gulegisa a’geat de, at Ahikam omlogo Gedalya en is en mo’gulogwi a’ge ebano demat opo erlak. 15Demat epasu erlak en e, ap Kareah omlogo Yohanan ano en ap Gedalya o Mizpa oruakma hisakho ogulat, hat wathebiso holuk, is aphwami Yahudi a’ge ’berlegat hebek odoktu egesarik oruak a’ge ebano ’bullugulat, ye, is Yehuda a’ge pema ’bullak a’ge ebano erlak agalat, togumu no oluk, an en aphwami eneperlak oruakhwe, ling-longat at ap Netanya omlogo Ismael ai wusogo pei laik en in o.
16Oluk mo’gulesimu, at Ahikam omlogo Gedalya en wene ogo at Kareah omlogo Yohanan ano mo’guleselat, “Erlak o. Ap Ismael en wathebik oluk tago e’gen ai hiak eseiatma re, wesilo mia o,” oluk mo’gulesi.
Currently Selected:
Yeremia 40: Wul
Highlight
Copy
Compare
Share
Want to have your highlights saved across all your devices? Sign up or sign in
