Hakim-hakim 2
2
At Nenaik ’gain Onuk Logo a’ge malaikat at a’ge o Bokhim laga wene
1At Nenaik ’gain Onuk Logo a’ge malaikat at a’ge o Gilgal en o Bokhim lagarik e, aphwami Israel a’ge disogo mo’gulentesi,
“An en his o Mesir en wokhonoboluk liplau wegirik e, o hene’balak wogentaigoluk wene wusogo wogenebegimu ebano wokhonoboluk wagalat, disogo mo’gulhentegis epegi,
An nemin wene werige a’ge ai pobuk erlagap poluk lalhenebik modok erlak o. 2#Kel. 34:12,13; Ula. 7:2-5Ai en e, his en aphwami o eba welagai a’ge logon enemin wene worogulat hwedik togup o. Mu a’ge paget uam wusogo narlogumu ai moluk-melaksogo hwikhomup o, oluk mo’gulhentegis ani o. Asogo a’geat de, an en,
Disogo togu lomup, oluk mo’gulhentegis ano ’gela’ge togwi erlak welat, an en,
Togup, egi a’ge anoat togu legep ai o. Holuk e, yogodak wene mo’gulhentaik a’ge yu opsogo henesa’go hwelit o. 3His en aphwami yema a’ge enemin weim obuogoluk togumu, an en is mukho lebigenebaik modok erlak o. We, is welat, his heneselei a’ge otluk oruakma re, aphwami en ’baik herle pogwiam wathasu ai ’gela’ge, is en mu a’ge ebam he’berik welat erliktogwi a’ge ai pam his ’gotnokla ’goluk heneminat erliktogu lorogup ani o,” oluk mo’gulentesi. 4At Nenaik ’gain Onuk Logo a’ge malaikat at a’ge en wene ano arat mo’gulentesimu re, is aphwami Israel a’ge enebe ’berlegat eniak loksogo nge tigisa. 5Asogo tigisa ai en e, o eba onuk Bokhim tualigisa ai o. Asogo tualigisarik, is aphwami Israel a’ge en wam di a’ge yu a’ge Nenaik ’gain Onuk Logo a’ge paget waregisa.
At Yosua ebe waraga wene
6Asogo tigisarik, at Yosua en aphwami Israel a’ge ebano peragenebesimu, is o wolom o’gwe lo’bok wolomogoluk legesa. 7At Yosua ebe elaluk welat, aphwami Israel a’ge Nenaik ’gain Onuk Logo a’ge eragam a’geat modok welegesa. Asogo welegesarik, Yosua ebe waragarikmu en ogo re, is aphwami Israel a’ge onuelak Nenaik ’gain Onuk Logo a’ge en is enebaget pobi tuagoluk elalin a’ge tagoma enil hegesa a’ge en tenentarok oruakhwe, Nenaik ’gain Onuk Logo a’ge eragam a’geat welegesa.
8At Nun omlogo Yosua, Nenaik ’gain Onuk Logo a’ge eragam a’ge ano waraga ai, ebe umur 110 tahun agarik en waraga. 9#Yos. 19:49,50Asogo waragama, at ebe werak e, at u’gwarek o’gwiangma o onuk Timnat-Serah o aphwami ena’gul onuk Efraim a’ge onowi dom hegit dom ebe duk onuk Gaas eba abel etle akhit o’gwe ik elaruk hegit eba ’gwiang ’balogo sebeligisa. 10Pobuk ap at Yosua emin hegit welegesa a’ge enebe ’berlegat waretil laga legesa. Asogo waregesema, aphwami pobuk a’ge re, at Nenaik ’gain Onuk Logo a’ge en is Israel a’ge enebaget taga laga a’ge ai, onu’gwarek enil dokhumsogo hogu legesa erlak ai en e, Nenaik ’gain Onuk Logo a’ge ebe eneperlagat welegesa.
Aphwami Israel a’ge Nenaik ’gain Onuk Logo a’ge ebam he’berik welat erliktogu legesarik en pobuk mo egesa wene
11-14Asogo welegesa ai, aphwami Israel a’ge pobuk Nenaik ’gain Onuk Logo a’ge iak sagalogo wiak tigisa. Asogo togulat, ene’balak enaik ’gain Onuk Logo a’ge Allah en is o Mesir en wogonoboluk liplau waga a’ge ano erliktu erlakma en ukpegesa. Asogo welat, aphwami is o esa’go’gwe eba welegesa a’ge en enede dogwi asua Baal emin, Asytoret emin, dogwi asua mu a’ge logon emin, ebam he’berik welat erliktogwi a’ge ai ebam he’berik polugat erliktigisa. Asogo togu legesema, Nenaik ’gain Onuk Logo a’ge en olot het agarik, aphwami mu a’ge en wotluk waronobogulat, ena’ge ene’gik abusak horlogulat, tuagoluk enebe ugenebesi. Asogo ugenebesimu, aphwami is eneselei a’ge is esa’go’gwe eba a’ge weim enemin obu re, is aphwami Israel a’ge enanni modok erlak aga. 15Enanni asogo erlak agarik, is eneselei a’ge enemin weim obogu legesa ai ebe lo’bok, pageat at Nenaik ’gain Onuk Logo a’ge en,
Asogo takhenebaik o, oluk is enede eberak welemagoluk mo’gulentesi ai ’gela’ge, is Israel a’ge eneselei a’ge ’gela’ge takpasu laga. Asogo tagoma no oluk e, is enebam modok wiak aga laga.
16Asogo agoam, ap yogorlia wogwi a’ge esan pulholuk wiagap onobo ’gu agaimu, pobuk-naduk at Nenaik ’gain Onuk Logo a’ge en is Israel a’ge delonobuagoluk e, onuelak yo’go onoboluk edigenebasu laga. 17Asogo a’geat de, is en ap is onuelak ai enebe eniak holu erlakma en ukpogu legesa. Asogo welat, Nenaik ’gain Onuk Logo a’ge emin lo’boksogo wolom erlakma en, aphwami logon en, mu a’ge paget de,
Nenaik ebe aiyat o, oluk ebam he’berik welat erliktogwi a’ge ai pam he’berik poluk erliktogu legesa. Asogo erliktogulat, ene’balak en Nenaik ’gain Onuk Logo a’ge en,
Disogo togu lomup, asogo togu lomup, oluk mo’gulentesi a’ge hwelak poluk hegitsogo togu legesa ai ’gela’ge, is enebabut wo erlakma en mu a’geat togu legesa. 18Asogo togwiam, is selei a’ge en, is Israel a’ge wik-wiaksogo tagonobogwiam, is en e,
“Wik-wiak taknonobogwi yema nenebit e,” oluk ogwiam, Nenaik ’gain Onuk Logo a’ge en esa’go holholuk edeap enebiselat e, enebe delonobuagoluk onue mesik yo’go poluk ene’bek perakpoluk lerentasu laga. Asogo lerentasuam, onuelak ai enebe enelalukmu holuk e, is Israel eneselei a’ge en waronobuano oluk delenebiso welaga. 19Asogo a’geat de, ap onuelak ai enebe waragai holuk, is ap naduk welegesa eria pam e, enebabut e, weiyat op ’gela’ge a’geat de, is pobuk a’ge welegesa eria pam nak e, enebabut modok wiak aga legesa. Asogo welat, mu a’ge paget de,
Nenaik ebe aiyat o, oluk ebam he’berik welat erliktogwi a’ge ai eragam a’ge agalat, ai a’ge ebam he’berik poluk erligat togu legesa. Is naduk enebabut wiak welegesa a’ge ai ukpoluk, pobuk togolik op om a’ge re, enebit modok welegesa. 20Asogo welegesa ai en e, at Nenaik ’gain Onuk Logo a’ge olot het egeitik e, disogo egei,
“An en is yu ene’balak mo’gulentasulat, wene an en wusogo wogenebegis a’ge wene ai ’goboksogo uknobo erlakma en nemin hwedigat wolomok o, oluk mo’gulentegis. Asogo mo’gulentegismu, neminat hwedik welege a’geat de, is pobuk a’ge yu, wene wusogo wogenebegis a’ge ano ’goboksogo uknebegesarik, an en,
Disogo togu lomup, asogo togu lomup, oluk mo’gulentegis a’ge wene ano sagalogo ukpogwi ai o. 21Holuk e, an en aphwami ena’gul onuk mu a’ge at Yosua ebe waragarikmu en, o yema oruak a’ge mukho lebigenebaik erlak o. 22An en,
Disogo togu lomup, asogo togu lomup, oluk ene’balak mo’gulentegis a’ge niak ai a’ge e’berlik hegitsogo togu legesa ’gela’ge, is en asogoat tua ya? Erlak a, oluk enebabut ’baligoluk, is aphwami ena’gul onuk mu a’ge eba en enede ’gagalogu lemagoluk yo’go enebaik o,” oluk egei. 23Ai en e, at Yosua ebe warom erlak oruakhwe, Nenaik ’gain Onuk Logo a’ge en aphwami ena’gul onuk eba a’ge logon e’gik pam pasu laga erlak. We, is aphwami ai perleneat mukho lebigonobo erlakma en o ebayat ugenebasu laga.
Currently Selected:
Hakim-hakim 2: Wul
Highlight
Share
Compare
Copy
Want to have your highlights saved across all your devices? Sign up or sign in
