Hakim-hakim 16
16
Simson o Gaza en tegei wene
1At Simson agauwa mesik erlige re, o Gaza laga. Lagarik, hwe mesik danian nil denago a’ge emin sarlok tigisarik e, emin nogo i legesa. 2Asogo tegeimu, aphwami en e,
“Simson o ai oruak o,” oluk egesema aphwami o kota Gaza welagai a’ge enesa’go hweligisa. Asogo holholuk e, o eba legesarik e, at ebe libagoma no oluk, o kota leget pakleget emde ’belakma ebano hup hwedik-hwadik ’gagalak welegesa. Asogo welat onogola en e,
“O mo wago holuk en de, Simson ebe woruok,” oluk epegesarik en, o hup eriano pam disogo yusogo mesik tu erlakma en welegesa. 3Asogo oruakma, at Simson nogo ese lagarik hup ede ’burl siaksogo re, o kota leget pakleget emde ’belakma libagarik e, ’goduk hele’gik a’ge, osok daintak a’ge emin, ’goduk emin, ’goduk ’gorlok emin, mamhamik moluksogo emarlo pam woluk e, o Hebron abel etle akhit duk ebe pam pei ligaga.
Simson hwe Delila emin en togu legesa wene
4Asogo tegeirik, at Simson ogola en e, hwe mesik owi o Sorek do’go eba a’ge onuk Delila nagai epesirik ede en e, modogat ne’gei. 5Asogo ne’geimu, ap Filistin a’ge onuelak ’gain enebe huaben a’ge en, hwe ano e’bek wegesarik e, disogo mo’guligisa,
“Simson en e,
An disogo pam en nanni egirik taga legi o. Holuk e, disogo taknoboma nak e, nanni erlak om o, oluk wene hisogo a’ge ai mo’gulhemagoluk e, orlumamit tip o. Asogo mo’gulhema a’ge ai pam, nis en ebe woruogoluk e, elirat tenak pomul ani o. Asogo togunmu, nis nenebe lo’bok en uang perak lok a’ge 1.100 pam hat wokhomul ani o,” oluk mo’guligisa.
6Asogo mo’gulegisema re, at hwe Delila en e, at Simson ano disogo mo’gulesi,
“Simson. No pam en hat hanni a’bik welegen o. Ye, hat hanni ai erlak emagoluk no pam he’gik herle wathobu o. We, hogola hisogo a’ge ai mo’gulnemin da,” oluk mo’gulesi.
7Asogo mo’gulesimu, at Simson en e,
“An ne’gik herle segen e’gale owan ’bugom erlak a’ge ebe sabiren a’ge pam watnobumu nak e, nanni erlak omtik, aphwami enanni ’gela’geat om o,” oluk mo’gulesi.
8-9Asogo mo’gulesimu, ap Filistin a’ge onuelak ebano en herle segen e’gale owan ’bugom erlak a’ge ebe sabiren en, hwe Delila ano wogigisa. Asogo wogigisarik, is ap Filistin a’ge enebe o ogorlirakma ebale mesik momu oruakhwe, at hwe Delila en at Simson e’gik herle ebano pam werak poluk iak loksogoat disogo mo’gulesi,
“Simson! Ap Filistin a’ge wegesa o,” oluk mo’gulesi. Asogo mo’gulosokhwe erianoat, at Simson e’gik herle werak a’ge ano herle tuelak odouk en daksogo ’biso ai ’gela’ge, dak-paksogo ’belakpesi. Asogo tegei ai pam, at Simson wene hisogo a’ge ogola oruakma anni a’bik welaga a’ge ano nam om erlagat. 10Asogo agama, at hwe Delila en Simson disogo mo’gulesi,
“Ah, hat hiak eseiyat an lalnebigen. Hat no pam elit he’gik herle woru. ’Baksogo an mo’gulnemin da,” oluk mo’gulesi. 11Asogo mo’gulesimu, at en e, disogo mo’gulesi,
“An herle ’get ’belak a’ge aphwami en di a’ge yu a’ge owan hettu erlak a’ge pam hetnobumu nak e, nanni erlak omtik, aphwami enanni ’gela’geat om o,” oluk mo’gulesi.
12Asogo mo’gulesimu, ap Filistin a’ge enebe o ogorlirakma ebale momu oruakhwe, at hwe Delila en herle mesik ’get a’ge wai lagarik, Simson e’gik herle weregei. Asogo e’gik herle weregeitik, iak loksogoat disogo mo’gulesi,
“Simson! Ap Filistin a’ge wegesa o,” oluk mo’gulesi. Asogo e’gik herle weregei a’ge ano, at Simson en e’gik herle werak a’ge ebano aphwami en herle tuelak a’ge dakhogwi ’gela’ge e’gik pam eriano en dakhesi.
13Asogo dakhesimu, at hwe Delila en Simson disogo mo’gulesi,
“Ah, hat hiak esei enat an lalnebigenma hegi o. Ai a’ge pam en nak de, an elit herle watnobu, oluk mo’gulnemin o,” oluk mo’gulesi.
Asogo mo’gulesimu, at Simson en e,
“An nasu ebe sabiren tuelak a’ge yema ’berlek la’buksogo herle ’gerelak poluk e, e sum kain ogosogwi a’ge pam ’geralumu nak e, an nanni erlak omtik aphwami enanni ’gela’geat om o,” oluk mo’gulesi.
14Asogo mo’gulesimu, at hwe Delila en Simson nogouwagoluk takpesirik, asu sabit pam tuelak welaga a’ge ebano ’berlek la’bulogo herle ’gerelak poluk e, e sum kain ogosogwi a’ge pam hettak pesi. Asogo pesirik e, iak loksogoat disogo egei,
“Simson a! Ap Filistin a’ge wegesa o,” oluk mo’gulesi. Asogo mo’gulesimu at Simson inagarik a’gul edenhaik ’galma re, e sum kain ogosogwi a’ge pam hettak pesi a’ge ano ’goboksogo waga.
15Asogo tegeimu, at hwe Delila en e,
“Ah. Hat hede muat oruakhweat de, hemde pam en nak e,
An hat nede hwedik welegi ese legen ano hiak eseiyat hegi. Hat en e, he’gik henagan pam hiak eseiyat lalnebiselat,
An ai pam en nanni a’bik welegi, oluk hwerli yogodak hwerli ya pam en ogo dokhumsogo mo’gulnigen erlagat o,” oluk mo’gulesi. 16Asogo mo’gulesirik, o nin hwedik nan hwedik orlumamit ebam tiso modok welat, ming-ming tiso modok welagama, at Simson ebam derleliso en e, pobuk esa’go holu a’ge ebit ’gela’ge aga.
17Asogo taga lagarik en, pobuk en nak e, wene ogola hisogo a’ge ano ’baksogo mo’guleselat e, disogo mo’gulesi,
“Nebe Allah u’gwarek ebaget welemagoluk, an nebe dagegimu, nebe Allah paget pegesema welegi u ’gela’ge, Nazir a’ge welegi ai en e, nasu ’balnobogwi modok erlak o. Holuk e, an nasu ’balnobumu nak e, nanni erlak om o. Asogo nanni erlak agoam, aphwami enanni ’gela’geat om o,” oluk ’baksogoat mo’gulesi.
18Asogo mo’gulesimu, at hwe Delila ogola en e,
“Simson wene ogola hisogo a’ge arat ’baksogo mo’gulnesi hegi,” oluk pobi tegei. Asogo pobi tegeirik, wene ap Filistin a’ge onuelak ene’bek wene wusogo peragenebasulat e, disogo egei,
“At Simson en wene ogola a’ge arat ’baksogo mo’gulnesi o. Holuk e, we, agauwa yogodak yuat manis o,” oluk wene wusogo peragenebesi. Asogo peragenebesimu, is en uang hwe Delila wogoum a’ge woluk wegesa. 19Asogo wegesema, at hwe Delila en Simson nogouwagoluk iak opsogo mo’gulese lagama re, ogo pam nogosimu, ap mesik worlhasuam wagama re, Simson asu sabit pam tuelak a’ge ebano ’baluagoluk mo’gulesimu re, ’balegei. Asogo ’balisoam, anni erlak aga ai en, at hwe Delila en ’go’bu pam weregei. 20Asogo erlak agama, iak loksogo disogo mo’gulesi,
“Simson! Ap Filistin a’ge wegesa o,” oluk mo’gulesimu, at Simson inagarik, Nenaik ’gain Onuk Logo a’ge en ebe ukpesi ano eperlak welat, ogola en e,
An naduk taga legi ebano ’gela’ge hebelik, oluk epesi. 21Asogo agama, ap Filistin a’ge ’gwigisarik, Simson e’gik herle werigisarik e, il hwelilogo wokhegesa. Asogo tigisarik, at ebe o Gaza woluk legesarik, herle ’besieme’gen tembaga a’ge ebe ’biren a’ge pam e’gik herle wusogo pegesarik, o aphwami ene’gik herle werak a’ge onobogumu ebano ’gwelakpegesa. ’Gwelakpegesema, eba welat e, di a’ge yu a’ge e’gen damulise lemagoluk mo’gulegisema, damulise laga. 22Asogo tigisa a’geat de, Simson asu daintiogoluk lekhasu laga.
At Simson ebe waraga wene
23At Simson asogo oruakhwe, agauwa mesik erlige re, is ap Filistin a’ge onuelak ’gaindek seni onodogwi asua paget togulat, is en e,
“Nenaik ebe Dagon yuat o,” oluk enede ebam he’berik welegesa a’ge ano paget wam loksogo wusogo pouwogoluk enebe odoktigisa. Asogo odoktigisarik e, weni disogo werigisa,
“Nenaik en o, nenasua o,
neneselei a’ge o, Simson ano yo,
At ebe o, mabenap poluk o,
ebe woknentesimu oruak o,”
oluk weni werigisa. 24-25Asogo worogulat, onogola enagai en disogo egesa,
“Nis en at Simson eida obogu lomogoluk e, ebe wai lit o,” oluk mo’gulentigisa. Asogo mo’gulontogwiam, Simson ebe wai legesarik, o ene’gik herle wusogo onobogumu ebano en woluk wegesema re, at Simson eida obogu lomogoluk pegesa. Asogo pegesarik, at Simson ebe o dum ago lok a’ge ’burl ’biren pema-pema daintak oruakhwe ’burl ho’gorlakma ebano edikpegesa. Asogo edikpegesema oruakhwe, aphwami a’bik ebano en Simson enil yetholuk e, enaik Dagon ano erliktogulat, weni disogo werigisa,
“Simson neneselei a’ge o,
nonowi pam yema wiagap pasu laga a’ge o,
aphwami nis a’ge warenebise laga a’ge o,
nenebe modok a’bik watnenebise laga a’ge o.
Nenaik en nonodogwi en o,
nenanni emagoluk o,
Nene’gikmu pou wagama oruak o,”
oluk weni werigisa. 26Weni asogo werigisema, at Simson en e, malik souwe a’ge en at e’gik tenakho woluk ’gwegeitik tenak welaga a’ge ano disogo mo’gulesi,
“O dum ago lok lagabakma re, o elit werik oruak, oluk opogwi a’ge ai nebe ebam he’bisogo welat ne’gik tenak weleik en e, he’gik obokniemen o,” oluk mo’gulesi. 27O ano ogola re, aphwami Filistin a’ge modok a’bik onuelak ’gaindek enebe huaben ebano emin, o modok hoposogo welegesa. Ye, o ai hweli’bo ’gela’geatma re, aphwami enebe 3.000 ’gela’geat welegesa. Asogo welat, is enebe ’berlek en Simson yetharok welat, eniak esegen wokholuk wene yagogu legesa.
28Asogo welat, at Simson wene yagogukhwe erianoat, at Simson en se’ban pam Allah disogo mo’gulesi,
“Naik ’gain Honuk Logo a’ge, an nebam hede eberin o. Naik Allah. Aphwami Filistin a’ge yu en an nil pema-pema hwelilogo wokhegesa ai paget, o’go warenebik en e, hanni we, yogodak yayat mesik woknemin at o, naik,” oluk yo’go pesi.
29Asogo yo’go pesirik, at Simson o dum ago a’ge ’burl ’biren daintak welat, o ningsogo werik welaga a’ge eriano e’gik tenak pesi. Asogo tenak pasulat, e’gik ’bekhit akhit o dum ago daintak a’ge mesik ano pam, ye, e’gik hware akhit e, o dum ago daintak a’ge akhen ano pam, ningsogo tenak pesirik, 30iak loksogoat disogo egei,
“An nebe aphwami Filistin a’ge enemin warom e, obat o,” oluk annisogoat o dum agorak a’ge eriano erlang-perlang hesi ’gal sonuk-senak eselat, aphwami Filistin a’ge ’berlegat onuelak ’gaindek enebe huaben eriano emin, o ano welegesa a’ge sebelenebegei. Asogo sebelenebiselat, Simson ebe eminat waraga. Naduk at ebe elaluk welat aphwami warenebise laga ai re, enebe weiyat ’gela’ge a’geat de, at ebe waragalat, warenebegei ai nak e, modok a’bigat warenebegei.
31At Simson ebe asogo waragama, aphwami at ue ari emin, aphwami at oruak o’gwe ’berlegat emin, ebe werak wouwogoluk legesa. Asogo wai legesarik, woluk wegesarik e, aphwami werak a’ge ’gwiang ’balogo salonobugumu eba o onuk Zora ho’gorlak, Esytaol ho’gorlak, ho’gorlakma eba aik Manoah sebeligisema ebanoat ’gwiang ’balogo sebeligisa.
At Simson ebe elaluk welat, aphwami Israel a’ge onue ’gain 20 tahun welagarik, ebe waraga.
Currently Selected:
Hakim-hakim 16: Wul
Highlight
Share
Compare
Copy
Want to have your highlights saved across all your devices? Sign up or sign in
