Hakim-hakim 10
10
Ap Tola en taga laga wene
1Ap Abimelekh ano ebe arat waragoam ap Isakhar a’ge mesik onuk Dodo eba Pua omlogo Tola ano en aphwami Israel a’ge enagap deluagoluk, inaga. Asogo inagarik, o Efraim dom hogorlakma o Samir eba yat welaga. 2Ap Tola ano aphwami Israel tenentarok welat, wene enebam pasulat no’gorliselat tagokhwe tahun 23 takpoluk waragoam e, o Samir eba en ’gwiang ’balogo sebeligisa.
Ap Yair en taga laga wene
3Asogo ’gwiang ’balogo sebelegisema, ebalema ap Yair o Gilead a’ge ano inagarik, aphwami Israel a’ge tenentarok welat, wene enebam pasulat, no’goreselat, tagokhwe tahun 22 at tegei. 4At eiyagai ai, enebe ap nak 30 at dagenebegei. Ye, o Gilead onowi 30 ebano re. Ye, onuam keledai ierak nak, oluktak a’ge re, 30 pamat asogo welagama re, onowi 30 ebano re, aphwami Hawot-Yair a’ge welagaimu o, oluk, o yogodak ogo ogwiat welagai o, oluk ogu legesa. 5Ap Yair ano ebe arat waragama, o Kamon eba en ’gwiang ’balogo sebeligisa.
Amon a’ge en Israel a’ge sebelogo enebegesa wene
6Is aphwami Israel a’ge ebano at ’gain Onuk Logo a’ge il oruakhweat de, wiak logon eminat til lagalat, asua Baal emin asuahwe Asytoret emin, aphwami Aram a’ge enasua emin, aphwami Sidon a’ge enasua emin, aphwami Moab a’ge enasua emin, aphwami Amon a’ge enasua emin, aphwami Filistin a’ge enasua emin, a’bigat At ’gain Onuk Logo ebalema edikpoluk, erlik onobogulat, e’berlik motluk laga legesa. At ’gain Onuk Logo e’berlik motluk lo erlakma en e, ono’borlma ukpoluk, oruakma. 7At ’gain Onuk Logo a’ge olot het aphwami Israel a’ge enebam pesirik enebe wakho aphwami Filistin a’ge enemin, Amon a’ge emin, ene’gikmu enebesi. 8-9Asogo pasuam e, tahun ai a’ge pam is aphwami ai en, Israel eneragam a’ge welemagoluk eneragam Sebelogo ugonobogulat, onoyuk en al ’besilogo ’gela’ge onobogulat, asogo tugulat, is aphwami Israel mo il liplau wago hegit eba en ik Yordan etle akhit aphwami Amori a’ge ono’gwiang o Gilead eba welagai a’ge ebano eneragam sebelogo onoboluk e’gin-pe’gin enebam pogulat, pobuk aphwami Amon a’ge en ogo re, ik Yordan ’balogo ik yu akhit liplau wotluk ena’gul onuk Yehuda a’ge emin, Benyamin a’ge emin, Efraim eiyagai wigalak a’ge emin ’berlegat, e’gin-pe’gin tagonobogwi en is aphwami Israel a’ge ebano en e, no’gosogo tu ’gela’ge agokhwe, tahun 18 at aga.
10Asogo tegeimu, Israel a’ge en e eniak loksogo At ’gain Onuk Logo a’ge mo’gulogulat, “Nis en e hat nenaik Allah ukhebegerik, hebalema asua bal a’ge edikpoluk motluk laga lege a’ge ano re, wiak modogat takhebege o,” oluk mo’guligisa.
11Mo’gulegisa a’geat de, At ’gain Onuk Logo a’ge en e, aphwami Israel a’ge ebano mo’gulentasulat, aphwami o Mesir a’ge emin, Amori a’ge emin, Amon a’ge emin, Filistin a’ge emin, ukhenegebesema henagap delegis ai henil niegep erlak a? 12Sidon a’ge emin, Amalek a’ge emin, Maon a’ge emin, is enebe a’bigat en e, his sebelak honoboluk oruak holuk his en e, letnentemin o, oluk mo’gulnorogupmu re an lethentaik o, henagap delu erlakma en ukhenebegimu yetniegep ai hegep a? 13Ukhonobo erlagat a’geat de, his en nak e, an uknebegeptik, nebalema mu a’ge edikpoluk motluk laga legepma re, an en henagap delik modok erlak o. 14His e’gin henebam oruak en, henasua mik hwerlegep a’ge ai enat henagap delhonobuak oluk ’gonu mo’gulesi laga lomup o.
15Mo’gulentesi a’ge at de, is aphwami Israel a’ge en At ’gain Onuk Logo a’ge mo’gulogulat, erlak o, “Nis demat wiak tigema re, hat en obap enebaik oluk nenebegen a’ge hegitsogoat hede ebetnentigen a’ge anoat taknonobo a’geat de, yogodak nage uknonobo ai re, mia o. Holuk e, letnentemen o, nenaik. 16Asogo mo’gulegisarik aphwami mu a’ge enasua ene’gerlakma welaga a’ge ano ukpegesarik, At ’gain Onuk Logo a’ge ano e’berlik legesa. Asogo e’berlik lagaiam e, is e’gin-pe’gin enebam oruak a’ge ebano At ’gain Onuk Logo a’ge en,” honomuat o, oluk ugonobo erlakma en lerentesi.
17Pobuk ena’gul onuk Amon a’ge en Israel a’ge enemin weim obuok oluk, inegesarik, o Gilead ebano onowi sabo ut hwerlau wagesema, Israel a’ge odoktak poluk o Mizpa ebano onowi sabo ut hwerlai legesa. 18Asogo togukhwe, ap onuelak Gilead a’ge en at mesik ebam il, mesik ebam il lagalat, “Ap sa en ogorlok erlak a’ge at naduk otluk, aphwami Amon a’ge emin, dok ’besingsogo sinelak pogwi holuk e, nis aphwami Gilead a’ge a’bigat at ai nonue tenentarok a’geat welemak o,” oluk, egesa.
Currently Selected:
Hakim-hakim 10: Wul
Highlight
Share
Compare
Copy
Want to have your highlights saved across all your devices? Sign up or sign in
