Hakim-hakim 1
1
Yosua waragama Israel a’ge tugu legesa wene
1Ap Yosua waragama, is ap Israel a’ge en at ’gain Onuk Logo a’ge mo’gulogulat, “Is ap Kanaan a’ge enemin weim ebilouwak oluk is naduk lo ano re, ena’gul onuk salak?” 2Asogo mo’gulegesema, at ’gain Onuk Logo a’ge en mo’gulentasulat, “Is aphwami Kanaan a’ge ono’gwiang e, is ena’gul onuk Yehuda a’ge ebano arat wogentigismu re, is nadugat louwak o,” oluk, mo’gulentesi.
3Mo’gulentesimu, is Yehuda a’ge en enarilak ena’gul onuk Simeon a’ge ebano mo’gulontogulat e,
“Sa horlouwa oluk ’gwiang ’balogo nebesimu am hwerlegimu ebano is aphwami Kanaan a’ge welagai ai en e, mukho lebik onobul en e, his nenemin louwak o. Nenemin lulmu re, pobuk en e, his nemin otluk hono’gwiang sa horlouwa oluk ’balogo pegesema hwerlegep a’ge amo is o is Kanaan a’ge oruak a’ge ai mukho lebik onobouwok oluk, womok o,” oluk mo’gulentegisema, is Simeon a’ge ebano eneminat weim til legesa. 4Weim til legesarik, enemin weim obogukhwe at ’gain Onuk Logo a’ge en aphwami Kanaan a’ge emin, Feris a’ge emin is ene’gikmu pasuam e, o Bezek eba aphwami enebe 10.000 at wusogo enebegesa. 5Asogo waronobogulat, o Bezek eba ap Kanaan a’ge onue onuk logo a’ge Adoni-Bezek emin la’boligisarik, at emin weim obogulat, is ap Kanaan a’ge emin, ap Feris a’ge emin ’berlegat mukho lebik enebegesa. 6Asogo mukho lebik obogwiam e, ap Adoni-Bezek ano hweiye libagoma, motluk legesarik, ebe tenak poluk e’gik huap ’biren emin, oyuk huap ’birenakho emin, ’balogo pegesa. 7Asogo ’balogo pegesema at Adoni-Bezek en eselat,
“An en ap ononuk logo a’ge modok nak enebe 70 ano ene’gik huap nak ’biren emin onoyuk huap nak ’biren emin, ’balogo enebegimu welat, nosoboru nasulat nagat e delak hwikhasu a’ge ebano a’ge dorlhegeik no’gu legesa eragam aling ’bisokhwe sebelak poluk hogu legesa ano ’gela’ge Allah en o’go taknebasu o,” oluk, osoam at ebe o Yerusalem woluk legesema re, ebayat waraga.
O Yerusalem emin o Hebron a’ge emin, sebelogo enebegesa wene
8Asogo takpoluk is Yehuda en o Yerusalem a’ge enebam ’gogulat, o odouk pogulat, onua’gun pam aphwami waronobogulat, asogo takpoluk sebelhwerlegesa. 9Sebelhwerlegesarik, is ap Yehuda a’ge ebano en aphwami o Kanaan dom ho’gorlakma welagai a’ge ebano emin, o lei erang dualogo pesimu welagai a’ge ’ebano emin dom e’biang legenakma welagai a’ge ebano emin, enemin en weim tigisa. 10Is ena’gul onuk Yehuda a’ge ebano en, warenebil lagalat, aphwami Kanaan a’ge o Hebron naduk en onuk Kiryat-Arba tuelak welagama ebano is aphwami Sesai a’ge emin, Ahiman a’ge emin, Talmai a’ge emin, sebelogo enebil legesa.
Ap Otniel en Debir sebelogo enebesi wene
11Pobuk o eba ukpoluk, is ap Yehuda a’ge ebano en, is aphwami o Debir eba naduk onuk Kiryat-Sefer, oluk ogu legesema ebano oruakma is enemin weim ti louwak oluk, tugulat. 12Ap Kaleb en ap sa en is Kiryat-Sefer a’ge wusogo onoboluk o ano sebelogo pasu holuk e, nagalogo hwele Akhasa ano at ugwe horlouwak oluk, wogeik o, oluk egei. 13Asogo egeimu, ap Kaleb ano ot Kenas omlogo onuk Otniel en o kota ai sebelogo pasuam e, Kaleb en agalogo hwele Akhsa ano at Otniel ugwe horlouwak oluk, at Otniel wogesi. 14Wogesimu agauwa ogun e’bek waga erlige hwe ano en ogun mo’guleselat, naik o’gwiang ’belak mesik woknemak oluk mo’gulesi louwok o, oluk legesarik hwe ano keledai o’borl pam en ’gwiangma ’bu agoam e, at aik Kaleb en mo’guleselat, “Hat no’gosogo takhobouwak oluk en wege no?” mo’gulesimu at hwele ano en e, 15“Naik o. Hat o lei pasogo pesimu o eba akhit o’gwe hegit ’gwiang a’bosu erlakma leimu woknigenma at de, an homlogo hedeap nebaguntik, ik eraluk akhit ’gela’ge holuk emin woknemin o.” Mo’gulesimu at Kaleb en o ’gwiang ’belak ik eraluk Abel ligakhit libagoma emin opma akhit libagoma emin, ’biren akhoat wogesi.
Yehuda a’ge emin, en enanni egesa wene
16Ap Musa e’basi Keni a’ge onuk Hobap e’balak weim til o Yehuda legesa Musa owi lei erang duelak ano onuk Hobab dok o e’balak wigalak a’ge ebano, is Yehuda a’ge emin, o kurma en is aphwami Yehuda ono’gwiang ’belakma o lei perakma o sogweik akhit pesimu o hegitsogo Arad horoksogo welagaimu oruak a’ge eba, en emin wolomok oluk legesa. 17Asogo legesarik, is enarilak en a’gul onuk Simeon a’ge emin lagalat, ap Kanaan a’ge o Zefat kota welagai a’ge ebano ’berlegat enebam ’gogulat onowi kota ano modok erlagapsogo enebegesa. Asogo aga ai en e, o Zefat ano onuk ulagapsogo enebegesema o, oluk ogu legesa. 18Asogo takpegesarik, is ap Yehuda a’ge en o kota-kota Gaza emin, Askelon emin, Ekron emin, Sebel horlogulat, ono’gwiang o’borl-o’borl wi-waling welago a’ge ebano ’berlegat hwerlegesa. 19Is ap Yehuda a’ge ano At ’gain Onuk Logo a’ge en ’gwelagentarokhwe, o dom hogorlakma eba han hwerlegesa a’geat de, is aphwami o dogo erang mesik pam welegesa a’ge ebano nak e, ono’gwiangso weim togwi a’ge nage besi a’ge hele’gik oruakma re, mukho lebik onobo a’ge miayat aga. 20#Yos. 15:13,14At Musa en e, o Hebron wokheik o, oluk nadugat ap Kaleb mo’gulesi a’ge ano hegitsogoat at Kaleb wogosoam e, ap Enak eiyagai enebe henagan en, wigalak a’ge ebano mukho lebik enebegesa a’geat de, 21#Yos. 15:63; 2Sam. 5:6; 1Taw. 11:4is ena’gul onuk Benyamin a’ge en nak e, is aphwami Yebus a’ge o Yerusalem welegesa a’ge ebano mukho lebik onobo erlakma re, is enemin la’bolik yogodak hwerli ogo oruagat o.
Yusuf e’balak wigalak a’ge en o Betel sebelogo pegesa wene
22At a’gul onuk Yusuf e’balak wigalak a’ge ebano en o Betel ai naduk onuk Lus ogu legesa ano a’ge enemin, weim tuok oluk togukhwe, At ’gain Onuk Logo en ’gwelagentarok welaga ano yuat o. 23Enarilak ado pema o Lus onuk ebano mesik, Betel ogu legesema enil pobirak enebei louwak oluk, perak enebegesa a’ge ebano legesema, 24ap mesik o eba en liplau wagoma enil hegesarik, ogulat disogo egesa, “Nis no’gosogo toluk en o kota yema ’gwilo a’ge ano mo’gulnentagunmu re, nis nenare o, oluk ukhobul ani oluk egesa.” 25Asogo egesema, “At en ebela ’gwe ai at ’gwi lit o,” oluk mo’gulentesimu, is enari oruakhwe legesa a’ge ebano ’berlegat ene’bek lagaiam enemin ’gwigisarik is aphwami o Betel a’ge ebano ’berlegat onua’gun pam wat onobogulat, ap ebela mo’golik enebesi a’ge ano ue ari enemin nak ’bogoluak oluk ugenebegesa ma, 26is ap ebano aphwami Het a’ge welagaimu ebano legesarik, eba o weregisarik arat kota agama re, a ano onuk e, Lus tualigisa. Ye, o ai o yogodak hwerli onuk Lus ogulat welagaiat o.
Israel a’ge en di aphwami yu aphwami lebik onobo erlak wene
27 #
Yos. 17:11-13
Is aphwami Kanaan a’ge ebano enede ’buksogo mo egesema re, ena’gul onuk Manasye a’ge en is aphwami o kota Bet-Sean a’ge emin, Taanakh a’ge emin, Dor a’ge emin, Yibleam a’ge emin, o Megido emin, onowi Legeik ’belak ’berlegat, mukho lebik onobo erlakma en ugenebegesa. 28Asogo ugenebegesarik is ap Israel a’ge enanni agalat, is ap Kanaan a’ge mukho lebik onobo erlakma en ugonoboluk enebaget yabuk e’gin wiak tugu lemak pam, eneragam a’ge ’gela’ge ugenebegesa.
29 #
Yos. 16:10
Ena’gul onuk Efraim a’ge ebano en ogo re, ap Kanaan a’ge o Gezer welagai a’ge ebano ogo eba en mukho lebik onobo erlakma en enemin modogat mo egesarik welegesa.
30Is ena’gul onuk Zebulon a’ge ebano en, is ap Kanaan a’ge o Kitron emin, Nahalol emin, mukho lebik onobo erlakma en enemin welagai a’ge ebano a’ge enebaget yabuk tagonobogu lemagoluk eneragam a’ge ’gela’ge tagenebegesa.
31Ye, ena’gul onuk Asyer a’ge ebano en is aphwami o Ako emin, Sidon emin Ahlab a’ge emin, Akhzib emin, Helba emin, Afek emin, Rehob a’ge emin, is aphwami o eba welagai a’ge ebano ’berlegat mukho lebik onobo erlakma re, 32is aphwami Kanaan a’ge onowirak a’ge ai re, is Asyer a’ge eneminat ene’gerlakma welegesa.
33Is Naftali a’ge en is aphwami Kanaan a’ge o Bet-Semes emin, o Bet-Anat emin, welagai a’ge ebano mukho lebik onobo erlakma re, is Kanaan a’ge onowirak a’ge ebano is Naftali a’ge enemin welat, enebaget is eniabuk tugu lemagoluk eneragam a’ge sogo ugenebegesa.
34Ye, is ap Amori a’ge en ena’gul onuk Dan a’ge ebano mo’gulontogulat e, o do’goma yema ’buorogup no yo. A’geat de, dom hogorlok a’ge petne eba nagat honowirak oroguptik wolomup o, oluk mo’gulentigisa. 35Mo’gulentigisarik, is ap Amori a’ge ebano enede ’buksogoat, dom Heres emin, o Ayalon emin, Saalbim emin, nis yema nak wolomok o, oluk, eniak annisogo mo’gulentigisarik, eba yat welegesa a’geat de, is Yusuf e’balak wigalak a’ge ano en enanni egesarik, is Amori a’ge ebano ogo re, enebaget yabuk tugu lemagoluk, eneragam a’ge ’gela’ge tagenebegesa.
36Is aphwami Amori a’ge ono’gwiang ’belak welaga a’ge hwerli ai re, dom Akrabim eming holuk e, o Sela en ’bekhit o abel akhit o’gwe hwerliat welaga.
Currently Selected:
Hakim-hakim 1: Wul
Highlight
Share
Compare
Copy
Want to have your highlights saved across all your devices? Sign up or sign in
