Yakobus 3
3
“Aphwami enemage ai enat enebe wiagabenebiso yo,” oluk mo’gulentesi wene
1Narilak norokhwi. Nis wene mo’gulontogwi a’ge en wiak togwi holuk e, pobuk Allah en aphwami logon enemdema wokho wene weiyat ’gela’ge enebam pouwa a’geat de, nis nak e, wene logat nenebam pouwa a’ge henaluk ai en, henebe esanat wene mo’gulontogwi a’ge omogoluk epagup o. 2Nis aphwami ’berlegat op togu lege ’gela’ge di paget yu paget, wiagat togu lege ai o. A’geat de, sa iak pam en wene wiak a’ge logon u erlakma en ha’buksogo nak oso holuk e, e’gik oyuk ebe ’berlegat ha’buktak pasulat ede ’garoksogo hurleat oruak o. 3Ai ’gela’ge, nis en wam kuda emde erlan pam herle erlelik poluk, nis ebela ’go yu lul oluk, opul holuk, herle ano lishogwiam, demat lasu ai o. 4Ye, ik so ik ogum petne lasu a’ge, ai ebe lok a’ge, sogwei en annisogo woluk lasu a’geat de, at so woluk lasu a’ge ai ede en e,
“Ebela’gwe ai laik,” oluk, opoluk, a’gul hwaliso a’ge wei a’ge ai ’gwani hasu holuk e, ebela’gwe ano at hegitsogo woluk lasu ai pobi tit o! 5Ai ’gela’ge, nenemage ebe wei a’ge a’geat de, aphwami onu’gwarek en erlikhorlogwi ai ’gela’ge, nenemage ai en wene nak logap pagathorlogwi ai o.
Ye, odouk e’gen wei a’ge deksogo ’biselat o ogwei lok a’ge nil lasu ai pobi tirat o. 6Nenemage ai ebe re, odouk ’gela’geat o. Nis aphwami ’gwiangma yema di wiak yu wiak togu lege ai ’gela’ge, nene’gik nonoyuk yu oruakhweat de, nenemage yu en nenebe ebesik wiagapnenebiso ai o. Asogo wiagapnenebiso ai re, odouk ai edip e, odouk orloukmu welema a’ge ai a’geatma, nenemage pam mu’galagalat, nenebe welege a’ge yu ebesigat e nasulat welago ai o. 7Aphwami en e, di ’baik yu ’baik, di tue yu tue, di ina’ge yu ina’ge, di hiane yu hiane, il hweiye a’ge elirat il worogwiam ena ago ai o. 8Asogo a’geat de, nenemage ai re, sa en il woru epegep. Modok mia o. Nenemage ai esa’go werak erlagat o. Herlegetie en aphwami warenebisoam waragai ’gela’ge, nenemage ai pam wiak a’ge ’beterak welat, is logon enebe warenebiso ai o. 9#Kej. 1:26Nenemage ai pam Nenaik ’gain Onuk Logo a’ge Allah erliktogulat, aphwami at ebe ’gela’ge walentesi a’ge heman onobogulat, togu lege ai o. 10Edip nenemde mesigat ai enat, Allah erliktogulat, aphwami heman onobogulat, togu lege ai o. Narilak norokhwi. Asogo tu puk a’geat de, togu lege o. 11Ik elaruk mesik a’ge en ik oduk op a’ge emin, wiak a’ge emin, mesik o’gwe wago no? Mia o. 12Narilak norokhwi. Eremna uak pam en saik egesu no? Ye, saik uak pam en eremna egesu no? Ai ’gela’geat de, mayu egeik elaruk o’gwe en, ik we a’ge logon libom no? Modok miayat o.
“Allah en enede ’gagalisoam, enede ’gagalogo togwi o,” oluk mo’gulentesi wene
13His logon henede ’gagalak welat, di wene yu wene loksogoat henaluk holuk e, aphwami en enagat pobirak honobouwagoluk henebabut enago welat, henede ’gagalogo opsogo togu lomup o. 14A’ge re, henede wiak otluk ’bou togulat, honu’gwarek henebaget nak eberogulat, togulat e, honu’gwarek en,
“An op,” oluk erlikhorlogu lorogup o. Asogo togup holuk, Allah iak dem wene ai a’ge sagalak poluk henepenen enat ogup no yo. 15Asogo togwi ai re, Allah en enede ’gagalisoam togwi puk. We, edip at Iblis enat enede ’gagalisoam aphwami ’gwiangma a’ge enebabut onotogat welat enagai opogwi a’ge togwi o. 16Enede wiak otluk ’bou togulat, onu’gwarek enebaget nak eberogulat, togwiam e, eniak logat sagalogulat, di wiak yu wiak togulat, togwi ai o. 17Asogo a’geat de, aphwami Allah en enede ’gagalisoam, enebabut op a’ge logo re, wiak mesik tu erlakma en, enil ha’buksogo welagai aiat o. Asogo welat, aphwami logon enemin la’bulik welat, enebabut enago welat, eniak hologo togulat, e e’gen op a’ge oso ai ’gela’ge, opsogo togulat, aphwami modok enedesogo welat, aphwami logon onolukhwema onobogulat, logon ono’borlma onobogulat, tu erlakma en, enede ’biren wolom erlakma enat, opsogo nak togwi ai o. 18E op a’ge owi yorogwiam, e’gen op oso ai ’gela’ge, aphwami enebabut lioktak welat, is logon enemin lioksogo welemagoluk la’bulik onobogwiam enebabut hegitsogo op nak togwi ai o.
Currently Selected:
Yakobus 3: Wul
Highlight
Copy
Compare
Share
Want to have your highlights saved across all your devices? Sign up or sign in
