Yakobus 4
4
“Aphwami ’gwiangma a’ge enebabut onotogat welat togwi a’ge ai, enemin hwedik togup o,” oluk mo’gulentesi wene
1His en wene ’balogulat, yeik pogulat, togu legep ai, edip no pam en togu legep no. Weim enebam libomogoluk, weim obok, “Ebela’gwe ai lu, ’go yu lu,” il-il enebe waronobogwi ai ’gela’ge, henede en noluk,
“Di nagai, yu nagai,” opogu legep ai enat togu legap epegi o. 2Di a’ge yu a’ge honogola en henagai opogu legep a’ge ebe horlo erlakma en, aphwami enebe waronobogu legep ai o. Honogola en is logon ena’ge henegai opogu legep e’geat de, ebe horlo erlakma en ’bourak poluk en yeik pogulat, weim obogulat, togu legep ai o. Asogo, di a’ge yu a’ge horlo erlakma en henerlagaik welegep ai, Allah ’gonu mo’gulogu legep erlak ai enat o. 3Ye, mesik e, Allah ’gonu mo’gulogu legep a’geat de, honu’gwarek henebaget nak henede en nasuam horlouwogoluk ’gonu u puk a’ge wiagat mo’gulogu legep ai en, wokhentasu erlak o. 4Hwami en onogunlak enil salogwi ai ’gela’ge, Allah il salogu legep yema re! Aphwami ’gwiangma a’ge yema enebabut onotogat welat togwi a’ge ai henemin hwedik welegep holuk e, Allah emin il ’belak ’gela’geat welegep ai, henererlak no? His logon en aphwami ’gwiangma yema a’ge enebabut onotogat welat togwi a’ge ai enemin hwedik tuogoluk togu legep holuk e, honu’gwarek en at Allah emin il ’balogu legep o. 5Pageat Allah iak logon pelal wokho pogulat e, disogo egesa,
“Hwami enedesogo welat erlele wokho modok welagai ai ’gela’ge, Allah en Arogun nonogola pesimu nenebe edesogo welat, erlele wokho tennentarok welago,” oluk pelal wokho pegesa ai, his honogola en e,
“We, ’burlat egesa,” oluk opogu legep a? ’Burlat egesa erlak o? 6#Ams. 3:34Asogo tiso ai en disogo egesa,
Aphwami onu’gwarek en erlikhorlogwiam at allah en ebirabenebiso yo.
A’geat de, onu’gwarek enede sebelogo welema holuk, at ebabut op en edeabenebiso,”
oluk pelal wokho pegesa.
7Ai en e, Allah eragam henede sebelogo ’goluk iak hwelak welat, Iblis iak ai sagalogo ukpogu lomup o. Ukpoma re, at en ukhonoboluk hweiye libemayat o. 8His Allah emin lo’boksogo lagup holuk e, at ogo re, henebam lo’boksogo wemayat o. His wiak togu legep a’ge ai, hene’gik petne hosogo ukpogu lomup o. Henede ’biren agorak ai, honogola wiak a’ge hosogo hwikhogu lomup o. 9Honogola wiak agalat, nge hwedik togu lorogup o. Asogo togulat, eida togu legep a’ge ai, nge togu lomup o. Ye, honogola henagai hogu legep a’ge ai, henede wiak otluk wolomup o. 10Nonue ’gain Onuk Logo a’ge eragam ’goluk henede sebelogo wolorogup holuk e, at en logo honobouwayat o.
“His-his henarilak honorokhwi enemin nobok-hobok ogup o,” oluk mo’gulentesi wene
11Narilak norokhwi. His-his nobok-hobok ogulom mia o. Henarilak honorokhwi logon onobok ’balogulat, wene enebam pogulat, pogu lorogup holuk e, wene Allah en nenesa’go weregei wene ano wiak oluk u ’gela’geat ogu legep ai o. Ye, wene ai wiak oluk ogu legep holuk e, wene ai henesa’go holoho togu legep puk. We, his en e,
“Wene ai wiak. Ebe op e, disogo u a’ge egeimu,” oluk u ’gela’ge ogu legep ai. 12A’ge re, at Allah ematek en wene nenebam pasulat, no’gorliselat, tiso yo. Holuk e, at enat obapnenebiselat, wiagapnenebiselat, tu elirat a’geat de, his logon en henarilak honorokhwi a’ge wene enebam pogu legep ai nopaget. His en asogo tu a’geat togu legep a? Mia o.
“Loruk o’gwe om a’ge heneperlak welat, erlikhwerlagup no yo,” oluk mo’gulentesi wene
13 #
Ams. 27:1
His logon en e,
“Yogodak de a? Loruk de a. O momu lorik e, tahun mesigat ’gela’ge welat, di a’ge yu a’ge o’go ’balogulat, saborogulat, togu lomul,” oluk ogu legep eba re! 14Loruk o’gwe nis wenen nenebam disogo ema, oluk heneperlagat welat ogu legep eba re! Nis nenebe ai re, no ’gela’ge welagai no. ’Gwiang a’ge weiyat wolomtik e, perleneat erlak ago ai ’gela’ge, nenebe asogoat welege ai o. 15His en ’bekhitsogo u re, disogo epegi,
“Nonue ’gain Onuk Logo a’ge ede en disogo yusogo epasu holuk e, nenebe nenelalugat welat, di a’ge yu a’ge togu lomul o,” oluk ogulom a’geat de, 16honu’gwarek en erlikhorlogulat, logo pagathorlogulat, til no’gu legep eba re! Asogo erlikhorlogu legep ai re, dagan togu legep o. 17His honogola en e,
“Hegitsogo tu re, disogo,” oluk henaluk welerat de, yabuk ebe togwi erlak holuk e, his wiak togulat wene henebam pagathorlogu legep o.
Currently Selected:
Yakobus 4: Wul
Highlight
Copy
Compare
Share
Want to have your highlights saved across all your devices? Sign up or sign in
