Yakobus 1
1
Hau warenebegei wene
1 #
Mat. 13:55; Mrk. 6:3; Per. 15:13; Gal. 1:19 An Yakobus nenaik Allah nonue ’gain Onuk Logo a’ge Yesus Kristus e’birek eneragam a’ge ano en, wene yu his hena’gul onuk 12 a’ge di owi yu owi ’bogulogo legeptik welegep a’ge ’berlegat hene’bek perakpou wegi o. Narilak norokhwi.
Enede hurlesogo welemagoluk mo’gulentesi wene
2Narilak norokhwi o. E’gin-pe’gin henebam ago holuk honogola henagai hogu lomup o. 3Asogo henebam agoam, Allah en e,
“Enede an nebam he’berik oruak a? Erlak a,” oluk, henebabut ’baliso ai pam henede ha’buksogo wolom a’ge takhenebasu ai henalugat o. 4Henede owan ’gela’ge mesik wolom erlakma en ’berlek elitsogo hurle emagoluk e, henede ’bugom erlakma en henede ha’buksogo wolomup o. 5A’ge re, at Allah ebabut op en aphwami ’berlegat ede welat wene yagonto erlakma en wogentasu ai en, his logon henede ’gagalak erlak holuk, at ’gonu mo’gulorogupmu henede ’gagaluayat o. 6Aphwami pema en e,
“Allah en woknema ya? Erlak a,” oluk, wenemennei eberugulat ’gonu mo’gulogwi a’ge ai, sogwei en ik yogun a’ge hererim hau wagalat weriso ai ’gela’ge mo’gulogwi ai en, his asogo ’gonu ogu lorogup holuk e,
“Woknema ya? Erlak a,” oluk, wenemennei eberu erlakma en, henede Allah pam he’berik poluk en ’gonu mo’gulogu lomup o. 7-8Aphwami asogo ’gonu mo’gulogwi a’ge ai, enede ’biren agorak welat di a’ge yu a’ge tuogoluk,
“An disogo tik,” oluk ’garoksogo u mia ai en,
“Nonue ’gain Onuk Logo a’ge en mesik woknemayat o,” oluk opo mia o.
“His Allah eiyagai hena’ge erlak a’ge emin, oruak a’ge emin, henede disogo opo yo,”
oluk mo’gulentesi wene
9His Allah eiyagai hena’ge erlak en henerlagaik welat e,
“An Allah en ’gainapnebesimu welegi o,” oluk honogola henagai ho yo. 10-11#Yes. 40:6,7A’ge re, mo putsogo yeriselat e, e e’gela sawet agalat, e owil lologo ’boluk orogole wiak agalat, tago ai ’gela’ge, asogoat, is ap ’gain ’gain ena’ge a’bik a’ge ai, di a’ge yu a’ge owan tak erlak oruakma enebe erlak om a’ge oruak ai en e, his logon hena’ge a’bik henebe ’gainat welat e, e owil lologo ’biso ai ’gela’ge,
“An na’ge a’bik a’ge yu erlak emayat o. Allah en nonuk sebelogo pesimu welegi o,” oluk, honogola henagai hoat o.
“Wiak togwi ai, onu’gwarek en onogola ’gagalogo wiak togwi o,” oluk mo’gulentesi wene
12His logon di e’gin yu e’gin henebam agokhwe, henepe mosogo wolorogup holuk, pobuk honogola henagai hagup o. Asogo henepe mosogo wolorogup holuk e, Allah en e,
“An nebe henede hwedik a’ge nak henelaluk modok wolorogup a’ge wokhentaik o,” oluk, obok mo’gulnentesi ano his henebabut ’belakpoluk enat wokhentaigat o. 13At Allah wiak tuagoluk aphwami en ede ’gagalogwi erlak o. Ye, at en ogo re, aphwami logon wiak tuagoluk enede ’gagaliso erlagat ai en e, his ado honogola en e,
“An wiak tuagoluk Allah enat nede ’gagaliso yo,” oluk opo mia o. 14Asogo a’geat de, nenebe lo’bok nonu’gwarek nonogola en di a’ge yu a’ge nenagai oluk, wiak opogu lege ai enat nenebe woknenebiselat, ming-mingnenebiselat, tagalat e, nenede ’gagaliso ai o. 15Pobuk nonogola en di a’ge yu a’ge nenagai wiak opogu lege a’ge ai, hwami en enemalik dagonobogwi ai ’gela’ge, nonogola ago holuk, emalik dakho wiak togu lege ai o. Ye, wiak togu lege a’ge ai hurle ago holuk e, emalik dakho nenebe waraga lege ai o.
16Narilak norokhwi. Henebe nede o. Honu’gwarek en henebe lalogupno oluk mo’gulhentegis ai o. 17Nenaik Allah ’bogorl pam a’ge ano enat di a’ge yu a’ge pok a’ge woknentasulat, modok op a’ge woknentasulat, ’belapnentau wago ai o. At enat ’bogorl petne atiarak welago a’ge ai walhesirik e, at ebe muat agalat, pobuk agamsogo hik eselat, atiarak pasulat, tiso erlak o. 18Di a’ge yu a’ge walhesi a’ge ’berlegat malik naduk dogo a’ge ’gela’ge re, nis at welemagoluk, at u’gwarek ede opoluk iak dem wene ai pamat dogo nenebesimu welege o.
“Wene henesa’go hwelakpoluk, hegitsogo togulom,” oluk mo’gulentesi wene
19Narilak norokhwi. Henebe nede o. Wene yu henede eberak wolomup o. Henebe lo’bok wene henesa’go perleneat hologuptik e, heniak pam en orogat ogulat, honolot het lau wagoam henede sebelogo wolomtik en orogat ogulat, ogu lomup o. 20Aphwami onolot het wiak togwi a’ge ai, Allah ogola agai epasu a’ge togwi erlak. 21Ai enat, di wiak yu wiak hene’gerli erlak til no’gu legep a’ge ai ukpogulat, wiak logat til no’gu legep a’ge ai ukpogulat, togu lomup o. Wene op wene Allah en honogola owi yakho pesi a’ge ai pam elirat delhonobu ai en e, at eragam ’gogulat, at en wene henede ’gagaliso a’ge ai wogu lomup o.
22Wene Allah iak ai henesa’go nak hwelakpoluk mo ogupmu re, honu’gwarek en lalhwerlagup ai en, henesa’go hologulat, dokhumsogo togu lomup o. 23-24Aphwami logon wene Allah iak ai enesa’go nak hologulat, wene ai hegitsogo togwi erlak holuk e, aphwami onorogole napunak pam yetholuk e, enebe wema lagalat,
“Nebe ategenik hegi ani,” oluk, eberak wolom erlakma en perleneat meme oso ai ’gela’geat o. 25Nis aphwami nene’gik herle werak ’gela’ge oruakma, wene op wene Allah en nenesa’go wusogo leik-louksogo mo’gulnentasu ai pam hebilnenebiso yo. Holuk, sa en wene ai esa’go nak hwelakpoluk e, memerak pasu puk. We, dokhumsogo pobirak poluk, ebam eberak modok welat, wene ai hegitsogo tiso holuk, di a’ge yu a’ge tisoma, Allah en ogola agaisogo lethasu lema o. 26Ye, ap sa en,
“An Allah eragam welat hegitsogo taga legi,” oluk, epasularat de, iak ologun werak erlak yogun-yagan oso holuk e, u’gwarek en lalhwerlasulat, Allah ogola opsogo taga legi oluk, we ’burlat tago yo. 27Nenaik Allah en e,
“Aphwami en an nogola opsogo hegitsogo op modok togulom e, disogo yo. Malik se’bin a’ge emin, hwami sugwe a’ge emin, nal otluk oruakma lerontogulat, aphwami ’gwiangma wiak togwi a’ge ai enebabut wo erlakma onu’gwarek en degelogulat, togulom o,” oluk ede epasu ai o.
Currently Selected:
Yakobus 1: Wul
Highlight
Copy
Compare
Share
Want to have your highlights saved across all your devices? Sign up or sign in
