Hosea 6
6
Is aphwami Israel a’ge en, we, enemde pam nak en, “Nenebabut heberlomok o,” oluk egesa wene
1Nenaik ’gain Onuk Logo a’ge en asogo mo’gulentesimu, is aphwami Israel a’ge en disogo egesa,
“Mene orlomene en lebilenebiso ai ’gela’ge, Allah en nis lebilnenebise laga a’geat de, pobuk obap nonobuayat o. Aphwami en ’go’bu waronobogwi ai ’gela’ge, at en warenebise laga a’geat de, pobuk e’gela pam hetnonobuaat o. Holuk e, nis at e’bek pobuk togolik louwogoluk manis o. 2Agauwa ’biren de a, henagan de a, wolotluk e, at en nis nenebe obapnonobua o. Asogo obap nonoboluk e, nenebe at eragam nonobouwama wolomul o. 3Ai en e, nis at ebe pobisogo nenaluk omok oluk e, demat nenannisogo togu lomok o. O hirl pou wago ai ’gela’ge, at ebe nene’bek wagalat, moru ’bu agalomtik, ologun pam ’gwiang sakhorak pasu ai ’gela’ge, nenebe obapnenebiselat, til wema o,” oluk egesa.
4Asogo egesema, at Nenaik ’gain Onuk Logo a’ge en e,
“His aphwami Israel a’ge emin, Yehuda a’ge emin, henemin henebaget an en no’gosogo takhenebaik? His en an henedeapnebigep ai re, o hena emin, lil a’bosu emin, heksogoat erlak ago ai ’gela’ge nalago yo. 5Asogo togu legep ai en, an en pobuk wene henebam poluk erlagap henebik a’ge wene ai mo’gulhontouwagoluk, ap an niak mo’gulhontogwi a’ge yo’go onoboluk, hene’bek perakpou waga legi ai o. His en tu ebele an nagai a’ge, obinal yebekhasuam enagat ago ai ’gela’ge enagat oruak yu i o. 6#Mat. 9:13; 12:7His en wam sapi, di a’ge yu a’ge an nebaget wusogo narliknobogu legep ai nebit ’gela’ge o. We, an nebe dokhumsogo henaluk agalat, an henede hwedik modok welat, togulom ai nak e, an nagai modok o,” oluk mo’gulentesi.
Efraim a’ge onowiak ukpo a’ge enebit aga wene
7At Adam niak sagalak poluk wiak tegei ano ’gela’ge, is nemin wene arat daksogo horak pegi a’ge ano sagalogo ukpogulat, O eba en opsogo muknonoboluk wom pukmu en uknonobogulat, tegisa o. 8O Kota Gilead ai, ap wiak togwi a’ge nak ’betesogo welat! Aphwami waronobogumuatma re, onoyuk a’gul pam e, enemep egelik nagat welagai o. 9Is ap an nebe eiye a’ge ano re, ap uan hisak onobogwi a’ge ’gela’geat welat, ebela Sikhem lagaimu eba en aphwami wusogo onobogulat, asogo togwi erlakhweat, enegerli erlak til no’gulat, togwi o. 10Is Israel welagai a’ge ene’gerlakma eba enemelmel wiak a’ge tugukhwe yerentesi ano re, Is Efraim a’ge en hwami we yogunat tenentil no’gu legesa ano ’gela’ge, an uknoboluk wiak til lagalat, ye, is Israel a’ge onomu enat wiagapsogo pogulat, togwi aiat o.
11Is Yehuda a’ge ogo re, wiak togwi o’go enebam po a’ge o agauwa polik oruak egeimu re, mo’gulhentegis ai o.
Currently Selected:
Hosea 6: Wul
Highlight
Copy
Compare
Share
Want to have your highlights saved across all your devices? Sign up or sign in
