Ibrani 4
4
1Ai holuk e, Allah en eiyagai set hwaluagoluk obok mo’gulentesi a’ge ai erlak om erlakma en oruak a’ge ai, pobuk nis set hwaluagoluk woknontouema eba his logon ’gwilo erlakma en mo ogupno oluk honogorloksogo welat hegitsogo togu lomup o. 2Wene op wene ai is naduk mo’gulentesi ai ’gela’geat, nis asogo mo’gulnentesiat. A’ge re, wene mo’gulentesi a’ge ai, is enesa’go hweligisarigat de, pobirak erlakma en togu legesa ai pam, wene ai is enebaget e, mia aga ai. 3#Mzm. 95:11Is enebaget asogo mia aga a’geat de, nis nenede Allah pam he’berik pogu lege a’ge nak, at en e,
“His set hwalogup,” oluk egei ano nisat set hwalul o. Wene ai paget e, Allah en disogo egei epegi,
“An nolot het agalat ho’buk ’balogo wene yagentasulat,
An set hwalogo welegi ai ’gela’ge, is set hwalua modok erlak o,”
oluk egei ai re, ’bogorl ’gwiang at en walhesirik set hwalogo welat egei. 4#Kej. 2:2O agauwa sabit pam welagai ano a’ge paget, Allah iak pam disogo pelal wogo oruak,
“Allah en di a’ge yu a’ge ’berlegat walhil lasu lagarik e,
agauwa sabit a’ge pam set hwalegei,”
oluk pelal wokho pegesema oruak o. 5#Mzm. 95:11Wene ai paget, Allah en disogo egeimu pelal wogo oruagat,
“An set hwalogo welago ai ’gela’ge, is set hwalua modok erlak o,”
oluk egeimu pelal wokho pegesa. 6Naduk naduk e, is en op wene ai enesa’go hweligisarigat de, hwelakpoluk hegitsogo tu erlak ai en, Allah en e,
“Is set hwalua,” egei ai, set ebe hwalu erlak. Ai holuk e, is aphwami mu a’ge logon elirat set hwalua, oluk pobitu o. 7#Mzm. 95:7-8Wene ai obok mo’gulentesirikmu en, o mo ligom, ’bugom, osokhwe tahun a’bigat welagarik e, pobuk,
“Ai pam,” wolomul oluk at Daud mo’guleselat,
“Yogodak ya pam,” oluk mo’gulesi a’ge naduk egi ’gela’ge pelal disogo wogo oruak,
“Yogodak ya pam Allah iak henesa’go hweligep holuk e,
henede anni orogup no yo,”
oluk egeimu pelal wokho pegesa ai.
8 #
Ula. 31:7; Yos. 22:4 Allah en,
“His set hwalogup,” oluk obok mo’gulentesi ai, at Yosua en wogonoboluk ’gu aga ai pam, arat ebe demat elepma re, is ’gu egesa eria pam pobuk Allah en,
“Ai pam, set hwalogup,” oluk egei ai, elip erlagat o. 9-10#Kej. 2:2Allah en di a’ge yu a’ge walhasu lagarik e, pobuk daksogo agauwa sabit a’ge pam set hwalegei ai ’gela’ge, nis at eiyagai set hwalul a’ge nenebe lo’bok di a’ge yu a’ge nonu’gwarek paget togu lege a’ge arat daksogo set hwalul a’ge oruagat o. 11Is naduk Allah iak hwelakpoluk hegitsogo tu erlakma en, set hwalu erlak ai ’gela’ge, nis logon is ene’berlik-ene’barlik set hwalu erlakma en mo uano oluk, nenannisogo togu lomul o.
12At Allah iak oso ai re, ’garok e’gat pema-pema mago ai ’gela’ge, erlak o. We, at iak ai re, elaluk a’ge anni a’bik e’gat modok melangtak welat, onuak e’gerlim elema ’gwi lasulat, onomo’gok elema ’gwi lasulat, tu ’gela’ge re, onogola enedemu tenhai lasulat e, enede opogwi a’ge emin, enede en nagai opogwi a’ge emin, il elirat ’beneriso yo. 13Allah il pam e, di a’ge yu a’ge at en walhesi a’ge logon hisogo oruak no? Modok erlak o. We, at il pam e, di a’ge yu a’ge ’berlegat e, selakma ’baksogo modok welago ai en, nis togu lege a’ge, at alukmu re, nonomu enat emin ul o.
Yesus ebe ’gain Allah eiye welago wene
14Nis nonue ’gain Allah eiye a’ge Allah omlogo Yesus ’bogorl eming holuk, ’bogorl abel o’borl akhit Allah oruakma ligagarik nis nenebaget oruak ai en e, nis nenede at ebam he’berik poluk neniak ’baksogo ogu lege a’ge ai, nene’gik ’betesogo tenak wolomok o. 15Nis nonue ’gain Allah eiye a’ge welago ai re, nis nenanni erlak mia ai, at eperlak puk o. At nis nenebabut wesirik oruakma, wiak a’ge ano en nis wiak tuagoluk nenede ’gagaliso ai ’gela’ge, at asogoat di paget yu paget ede ’gagalu waga laga a’geat de, at wiak mesik tu erlak welat e, nenebabut aluk o. 16Ai en e, nis wiak om ’gela’ge oruakma, panoasuak, nenaik Allah ebabut op en edeapnenebiselat, letnentasulat, tuagoluk, at Allah ’gain welagoma eba welat ebabut op ebam hianesogo tiso ai en, nonogorlok erlagat e’bek horoksogo ’guok o.
Currently Selected:
Ibrani 4: Wul
Highlight
Copy
Compare
Share
Want to have your highlights saved across all your devices? Sign up or sign in