Ibrani 3
3
“At Musa ebe abel pam ’gela’ge a’geat de, at Yesus nak e, ebe logo,” oluk mo’gulentigisa wene
1Ai en e, Allah eiyagai at u’gwarek paget pagathwerlesi a’ge narilak norokhwi. At Allah ’bogorl pam enat his neneminat yo’go nenebesimu wene wegerik ’baksogo ogu lege ai paget, at Yesus ebe Allah eiye a’ge ’gain welemagoluk, Allah enat perakpou wagama oruak ai holuk e, his henede pam enat pobi togu lomup o. 2#Bil. 12:7At Musa en e, Allah eiyagai enebe re, Allah owi werik ’gela’ge, oluk is enebaget ebabut he’bisogo taga laga ai ’gela’ge, Allah en Yesus asogoat tuagoluk edikpesimu ebabut he’bisogo tiso ai o. 3Is aphwami logon en o werik a’ge weisogo ’gela’ge erliktogulat, is ap o worogwi a’ge enebe ai nak e, loksogo erligonobogwi ai ’gela’ge, at Musa weisogo ’gela’ge erliktogulat, at Yesus nak e, loksogoat erliktogulom o. 4O werik ebe lo’bok e, is ap o worogwi a’ge enebe oruak a’geat de, di a’ge yu a’ge ’berlegat e, Allah ematek en o woru ’gela’ge walhesi o. 5At Musa ebe Allah eragam a’ge welat, Allah eiyagai enebe at owi werik ’gela’ge oluk, is enebaget ebabut he’bisogo tagalat, disogo ese laga,
“Allah en di wene yu wene pobuk disogo mo’gulnontouwa a’ge oruak,” oluk obok mo’gulentasu laga. 6A’geat de, at Yesus nak e, Allah ebe omlogo no oluk e, at eiye a’ge enat tiso. Nis obapnonobua wene ai paget nenede ningsogo ebam he’berik modok wolomul holuk e, Allah owi werik ai, nis nenebeat o.
“Aphwami Allah eiyagai a’ge, pobuk set hwalua,” oluk mo’gulentigisa wene
7 #
Mzm. 95:7-11
Ai en e, Allah Arogun en disogo mo’gulnentasu,
“O yogodak ya pam Allah iak henesa’go hweligep holuk e,
8hena’bu hene’balak o leimu aphwami erlakma no’gulat, enede anni agarik, is en e,
Allah nenebit, oluk,
Anni oruak a? Erlak a, oluk ebabut ’balogulat no’gu legesa ai ’gela’ge,
his asogo togup no yo.
9-10At Allah en e,
O eba en o mo ligom, ’bugom, osokhwe 40 tahun welat, an en his hene’balak tagenebasuam enil domok hogu legesa a’geat de,
At anni oruak a? Erlak a, oluk lalnobogulat,
nebabut ’balogulat, togu legesa o.
Asogo togu legesa ai en,
an nolot het enebam pasulat e, disogo mo’gulentegis,
Henebabut dong-pongtak welat niak opsogo wo henebit ai en,
11an nolot het agalat ho’buk ’balogo wene yagentasulat,
An en,
His set hwalogup, oluk obok mo’gulhentegis ano,
set ebe hwalogup modok erlak o, oluk mo’gulentegis,”
oluk egeimu Allah Arogun en mo’gulentesimu pelal wokho pegesa.
12Holuk e, narilak norokhwi. His logon henebabut wiak agalat, henede Allah elaluk modok welago a’ge ebam he’berik po erlak welat, at ebe ukpoluk togolik leborogupno oluk, henebabut heberlogo wolomup o. 13His logon wiak togulat honu’gwarek lalogo henede anni ema no oluk Allah iak pam,
“O yogodak ya pam,” oluk egei ai erlak om erlakma en oruakhwe, his-his nin hwedik nan hwedik henede ago wat-wat togu lomup o. 14Asogo togulat, nadugat nenede at ebam he’berik pege a’ge aiat, nene’gik ’gennesogo hwerli ologun pam tenakho wolomul holuk e, nis Kristus arilak orokhwi egerik welege o. 15#Mzm. 95:7-8Allah iak pam pelal disogo wogo oruak,
“O yogodak ya pam, his Allah iak henesa’go hweligep holuk e, hena’bu hene’balak en,
Allah ebe nenebit, oluk ogu legesa ai ’gela’ge, his en,
At ai nenebit, oluk henede anni orogup no yo,”
oluk pelal wokho pegesa. 16#Bil. 14:1-35Aphwami Allah iak enesa’go hologu legesarik enat de,
“At ebe nenebit,” oluk ogu legesa ai salak no. Is ai re, at Musa o Mesir en wogonoboluk liplau waga a’ge enebe ’berlek ebanoat epegi o. 17Ye, o mo ligom, ’bugom, tagokhwe, 40 tahun pam welat, Allah olot het salak enebam pasu laga no. Is ai re, wiak togu legesema, o leimu aphwami erlakma modok waretil wegesa ebano epegi. 18Allah en wene yagentasulat ho’buk disogo ’balegei,
“An en,
His set hwalogup, oluk obok mo’gulhentegis ano,
set hwalogup modok erlak o,”
oluk mo’gulentesi ai salak no. Ai re, is aphwami Allah iak hwelakpoluk hegitsogo tu erlakma en ukpogu legesa a’ge ebano epegi. 19Is ai enede Allah pam he’berik po erlakma en welat togu legesa ai en, set hwal-hwerla ’gwilo modok mia aga, oluk nis yogodak pobi togu lege o.
Currently Selected:
Ibrani 3: Wul
Highlight
Copy
Compare
Share
Want to have your highlights saved across all your devices? Sign up or sign in
