Ibrani 10
10
1Is aphwami Yahudi a’ge wene Allah en nenesa’go weregei wene ai hegitsogo togulat e, demat a’ge togu legesa puk. We, ebe pobuk obapnonobua a’ge oruakhwe, ebam elitsogo togulat, ogut walsogo togulat, togu legesa. Is asogo togulat, o mo ligom, ’bugom osokhwe, di tahun yu tahun wam Allah warogu legesa a’ge ai a’ge nak warogwi modok welegesa ai en e, is aphwami wam Allah warosu aga legesa a’ge ai pam en ’garoksogo obabonobu a’ge mia aga laga ai. 2Is ’garoksogo modok-modogat hoenebelipmu re,
“Nis wiak tige,” oluk enede e’gin welat, wenemennei eberogu legesa a’ge ai, erlak agalat e, onuam wusogo Allah wogosu wagallep erlak o. 3-4Aphwami wiak togwi a’ge ai wam sapi emin, kambing emin, emep pam hoonobu mia ai en e, nin hwedik nan hwedik wam wusogo Allah wogogu legesa ai pam, aphwami wiak togu legesa a’ge onogola eberogu legesa ai o.
5 #
Mzm. 40:6-8
Asogo togu legesa ai en, at Kristus ’gwiangma ’bu agalat, Allah disogo mo’gulesi,
“Hat e, aphwami en wam wathogulat, di a’ge yu a’ge wokhogulat, togwi ai a’ge wokhogulom e, hebit ai en e,
an nebe aphwami ’gela’ge heli’gogo nebegen yu o.
6Hat hebaget wam wusogo odouk narlik hobogwi ai emin,
wiak togwi a’ge hoenebinogoluk wam wusogo wokhogwi ai emin, hebirat o.
7Ai en e, naik Allah. An en wene mo’gulheik.
Hat hiak pam e, wene an en mo’gulhom ’gela’ge,
An en hat hogola hagai a’ge tiogoluk weik, oluk wene an nebaget pelal wokho pegesema oruak a’ge ai,
ebe tiogoluk nebe wegirik welegi yu o,”
oluk mo’gulesi. 8At Kristus en wene naduk nadugat mo’gulesi ai re,
“Aphwami en hat wam wathogulat, di a’ge yu a’ge wokhogulat, odouk narlik hobogulat,
wiak togwi a’ge hoenebinogoluk wam wathogulat, togwi ai, hat hebirat o,”
oluk egei ai, Allah en nenesa’go weregei wene ai hegitsogo togu legesa a’ge paget egei o. 9Wene asogo arat mo’gulesirik pobuk disogo mo’gulesi,
“Naik Allah o. An en hat hede hagai a’ge aiat tiogoluk nebe wegerik welegi o,”
oluk mo’gulesi. Asogo mo’gulesi ai re, at Allah en is naduk togu legesa wene ai erlagap poluk, pobuk Kristus warema a’ge aiat welemagoluk egei ai en asogo mo’gulesi. 10Ye, at Yesus Kristus Allah ogola agai a’ge ai tagalat, at ebe mesik erlige lebeksogo waragalat, Allah wogesi ai pam, nis nenebe Allah paget modok pesimu welege.
11 #
Kel. 29:38
Is ap Allah eiye a’ge enebe lo’bok en aphwami enebaget togulat e, nin hwedik nan hwedik pobuk naduk wam warogu legesa ai a’ge nak wusogo Allah wogogu legesa ai en, Allah en is wiak togu legesa a’ge no’gorlogo wokho re, modok mia aga ai o. 12#Mzm. 110:1Asogo a’geat de, at Kristus nak e, nis aphwami en wiak togwi a’ge paget agauwa mesik erlige waragalat, ebe modok-modok Allah wogesirik, eragam e’gik ’bekhit akhit inla ’gwi lagarik ’gainat oruak ai o. 13Asogo welat e, at eselei a’ge Allah en eragam odoksogo onobou wagoam oyuk en al ’besilonobua ai nak owan en, yetharok oruak o. 14At Kristus mesik erlige lebeksogo waragalat e, ebe Allah wogosi ai pam, nis aphwami nenebe Allah paget pasu a’ge ’garoksogo modok honenebegei o. 15At Allah Arogun en, wene ai paget obok mo’gulnentasulat e, wene naduk nadugat disogo egei,
16 #
Yer. 31:33
“At Allah en,
Pobuk, an en is wene ’get a’ge wusogo wogenebik ai re,
wene ebe yuat wusogo wogenebik,
Enesa’go weriso wene ai onogola enebasulat,
enedemu pelal wasulat, tik o,”
oluk egeirik e,
17 #
Yer. 31:34
“An en is wiak togulat, enesa’go werak erlakma en wiak togulat,
togwi a’ge ai arat memerak poluk, nede eberak weleik modok erlak o,”
oluk pobuk egeimu pelal wokho pegesa ai o. 18Ai en e, nis aphwami nenesa’go werak erlak wiak togu lege a’ge, at Allah en arat erlagapsogo ukpesi ai en e, nis wiak togu lege a’ge hononobuagoluk nonuam wusogo Allah paget pobuk po miayat o.
“Nis nonogorlok erlaksogo Allah e’bek horoksogo ’gogulom,” oluk mo’gulentigisa wene
19Narilak norokhwi. At Yesus emep enamogo waraga ai pam, nis Allah u’gwarek owi pam eba nonogorlok erlaksogoat ’guok o. 20Nis asogo ’gu ai re, o ogorli sum a’ge pam hwerlirak ai, at Yesus ebeat o. Ebeatma re, nis aphwami nenelalugapnonobuema eba ’guagoluk, ebela at Yesus ebe waraga ai pam, ebela ’get a’ge nis nenebaget yeregei o. 21Yeregeitik, at ebe Allah owi pam ebayat eiye nis nenebaget ’gain welago yo. 22#Ima. 8:30; Yeh. 36:25At ebe eba oruakma, nis nonogola en e,
“Nis wiak tige o,” oluk nonogola wenemennei oborogu lege a’ge opsogo honenebiselat, nenagap petne ik orogole op a’ge pam emetnenebiselat, tegei ai en e, nenede mesigat at ebam he’berik poluk nonogorlok erlaksogo, at e’bek horoksogo ’gogu lomok o. 23At ebabut e,
“Wokhentaik,” oluk obok mo’gulnentasu lomtik, ebe woknentasu ai, nis en e,
“Demat dipsogo woknontouwa,” oluk aphwami enil pam neniak ’baksogo ogu lege a’ge ai ogwi modok welat, ningsogo tenak wolomok o. 24Asogo tenak welat, nis-nis nede-hedesogo welat, let-let togu lomogoluk, nenede ago wat-wat togu lomok o. 25Nonue agauwa wolom erlakma enat wema oluk nenaluk ai en e, nis odoktogwiam is logon mo ogwi ai ’gela’ge, nis mo u erlakma en e, ebam ebet-ebet nis-nis nenede ago wusogo nenesa’go wat-wat togu lomok o.
26Dem wene Allah iak mo’gulnentigisa a’ge nenaluk welarat de, nenepenen enat wene ai sagalogo ukpoluk modogat wiak togu lomul holuk e, nis pobuk nonuam Allah waromma hononobua modok erlagat o. 27#Yes. 26:11Allah olot het agalat o ologun pam wene enebam pasulat, no’gorliselat, tua ai pam, at eselei a’ge enebe odouk orlouk pam warenebiselat, nis at iak ukpoluk wiak togu lomul holuk, neneminat watnonobuano oluk, nis en pobirak poluk nonogorloksogoat wolomok o. 28#Ula. 17:6; 19:15Wene Allah en nenesa’go weregeimu, at Musa en mo’gulnentesi wene ai, is aphwami en hwelakpoluk hegitsogo tu erlakma en sagalogo ukpogwi holuk, aphwami enebe ’biren de a, henagan de a,
“Nis nenil pam is en demat wene ai sagalogo ukpegesa o,” oluk ’baksogo ogwi holuk, enedeabonobo erlakma en enebe modok waronobogu legesa epegi o. 29#Kel. 24:8Ai ’gela’ge, is aphwami en Allah omlogo a’geat de, onoyuk en sobut-sebat hogulat, Allah en nis emin hwedik takpouwogoluk Kristus waraga ai en emep pam opsogo hoenebegei a’geat de, pobuk onogola mi-miarak pogulat, Allah ebabut op a’ge Arogun ano eniak esegen wokhogulat, ogwi holuk e, wene modok e’gin a’ge enebam poluk wiagabonobua o.
30 #
Ula. 32:35-36
“A’gulmu an en warenebiselat, o’go an en pasulat, tik o,”
oluk egei ai, sa en egei no. Allah enat egei ai nenaluk. Ye, wene mesik e, disogo egei,
“An enaik nomu en neiyagai wene enebam pasulat, no’gorliselat, tik o,”
oluk egeiyat. 31Wene asogo enebam pouwa ai, nis wiak togumu nenebe Allah elaluk modok welago a’ge e’gik pam nenebasu holuk, nonogorlok modok ema ai o.
32Narilak norokhwi. His naduk Allah en henebe atiarak henebesimu oruakma di obotut yu obotut wiaksogo takhonobogukhwe, henepe mosogo welat ningsogo welegep ai honogola eberip o. 33Asogo welat, his logon aphwami odoktakma en hononuk mimiasogo wiagaphonobogwiam, his logon en,
“Nis neneminat wiagapnonobuak,” oluk ene’bek ’gogwiam heneminat wiagaphonobogulat, 34is logon herle wusogo ’gwelebak onobogwiam henedeabonobogulat, togu legep ai. Asogo togulat honogola en e,
“Nis a’ge ningsogo op modok welema a’ge oruak o,” oluk opogulat e, his en a’ge di a’ge yu a’ge horlogwiam henede wiak om erlakma en henagai hogu legep ai o. 35Holuk e, naduk wiagaphonobogukhwe henede ’buk welegep a’ge ai ’goboksogo ukpo erlakma en, yogodak ya asogoat wolorogup holuk e, o’go lok a’ge wokhontouwa ai en e, ningsogo wolomup o. 36His en Allah ogola agai epasu a’ge togwiam, at en,
“His wokhentaik,” oluk obok mo’gulhentesi a’ge ai wagup en e, henepe mosogo togulom o. 37#Hab. 2:3-4Allah iak pam pelal disogo wogo oruak,
“At wema ai re, il mesik nak welemarik en wema.
Aregen welemarik en wema erlak o. We, elalueat wema o.
38At wema ai, owan wom erlak oruakhwe, is an neiyagai wene enebam a’ge no’gorlogo an nemin hwedik takhenebegi a’ge enebe lo’bok,
enede nebam he’berik poluk welema ano pam enelaluk welema o.
A’geat de, aphwami is a’ge logon togolik lebema a’ge enebe lo’bok,
is an nebam lioktak erlak o. We, nebirat o,”
oluk egeimu pelal wokho pegesa. 39Asogo a’geat de, nis e, is aphwami logon alemaromogoluk togolik lebema a’ge ai ’gela’ge welege puk. Erlak o. Nis e, nenebe delnonobuagoluk nenede at ebam he’berik welege a’ge nak welege o.
Currently Selected:
Ibrani 10: Wul
Highlight
Copy
Compare
Share
Want to have your highlights saved across all your devices? Sign up or sign in
