Kejadian 46
46
Yakub eiyagai enemin o Mesir legesa wene
1At Yakub a’ge-a’ge di a’ge yu a’ge ’berlegat degelogo woluk laga. Lagarik o Bersyeba eba lai legesarik e, aik Ishak en erliktaga laga a’ge Allah ano paget wam di a’ge yu a’ge wusogo odouk narlik ebesi. 2Narlik ebesirik, nogo osoma, Allah en e, abi pam disogo mo’gulesi,
“Yakub, Yakub,” oluk mo’gulesimu, at en e,
“Welegi o, naik,” oluk mo’gulesi. 3Asogo mo’gulesimu, at Allah en e,
“Hat haik en erlik nebise laga ano Allah nebe anat o. Hat en e,
O Mesir lo nogorlok, oluk epagun o. Lu o. Eba lagunmu an en hat en dogo’gwe a’ge ena’gul onuk modok lok emagoluk tagenebaik o. 4An enat hat o Mesir wokhoboluk laikmu, Yusuf emin welat, hebe arat waragoam, at e’gik en hil sogop tobolak pouwa. Ye, pobuk hat en dogo’gwe a’ge togolik o yema wogonoboluk weigat o,” oluk mo’gulesi.
5Asogo abi holuk, Bersyeba en legesa. Lagalat, is eiyagai emin, enaik emin, is eneiyagai emin, ’gwiangso ’gela’ge kuda en lisogo woluk lasu a’ge ano a’ge at ’gain onuk logo a’ge Firaun en pou waga a’ge pam ogola ’gwelabenebigisarik legesa. 6#Per. 7:15Lagalat, is wam emin, di a’ge yu a’ge emin, o Kanaan welat wegesa a’ge ’berlegat woluk o Mesir legesa. Lagalat, at Yakub en dogo’gwe a’ge ’berlegat wogonobolugat laga. 7Wogonoboluk laga ai enebe re, at en dogo’gwe a’ge ugwe malik emin, is en dogo’gwe a’ge at e’balak hwami emin ap emin ’berlegat wogonoboluk laga.
8At Yakub eiyagai wiyalak aphwami Israel a’ge o Mesir legesa a’ge ononuk e, yu o:
At Yakub omlogo naduk dogo a’ge onuk Ruben.
9Ruben at eiyagai ononuk e, Henokh, Palu, Hezron, Karmi emin. 10Simeon eiyagai ononuk e, Yemuel, Yamin, Ohad, Yakhin, Zohar emin, Simeon omlogo Saul, hwe Kanaan a’ge en deregei a’ge ano emin, 11Lewi at eiyagai e, Gerson, Kehat, Merari emin, 12Yehuda at eiyagai e, Syela, Peres, Zerah, at Yehuda ano emin, (at Er emin Onan emin o Kanaan waregesa) at Peres eiyagai Hezron Hamul e’birek emin, 13Isakhar at eiyagai e, Tola, Pua, Ayub Simron emin, 14Zebulon at eiyagai e, Sered, Elon, Yahleel emin. 15At Yakub eiyagai uyu ano re, ugwe Lea o Padan-Aram welat, emalik eiyagai ap at dagenebiselat, agalogo mesik e, hwele Dina emin deregei aiatma re, enebe la’buksogo 33 yat o Mesir lagalat, 16ye, at Gad eiyagai e, Zifyon, Hagi, Syuni, Ezbon, Eri, Arodi, Areli emin, 17Asyer eiyagai e, Yimna, Yiswa, Yiswi, Beria emin, is enerei hwele Serah ano emin, Beria at eiyagai Heber, Malkiel e’birek emin, 18at Yakub yu ano re, at Laban en agalogo Lea eragam a’ge welemagoluk, hwe Zilpa wogesi a’ge ano en emalik dagenebegei a’ge pam en wiyalak enebe la’buksogo 16 pamat o Mesir lagalat, 19ye, Yakub ugwe Rahel ano en emalik Yusuf Benyamin e’birek emin, 20#Kej. 41:50-52at Yusuf o Mesir ebano welat, ap asuagun Potifera owi Heliopolis a’ge agalogo hwe Asnat hwerlesirik eiyagai Manasye emin, Efraim emin dagenebegei a’ge. 21Benyamin at eiyagai e, Bela, Bekher, Asybel, Gera, Naaman, Ehi, Ros, Mupim, Hupim, Ared emin, 22At Yakub eiyagai yu ano re, hwe Rahel en eiyagai dagenebegei ano pam en e, wiyalak enebe la’buksogo 14 pam o Mesir lagalat, 23Dan at omlogo Husim e’birek emin, 24Naftali at eiyagai e, Yahzeel, Guni, Yezer Syilem emin, 25at Yakub eiyagai yu ano re, at Laban en agalogo Rahel eragam a’ge welemagoluk, hwe Bilha wogesi ano en e, eiyagai dagenebegei ano pam en e, wiyalak enebe 7 at o Mesir lagalat, tigisa.
26At Yakub en dogo’gwe a’ge wogonoboluk o Mesir laga ai enebe ’berlegat e, 66 pam. A’ge re, at eiyagai onugwami wenagonobu erlak. 27#Per. 7:14At Yusuf eiyagai o Mesir en enebe ’biren dagenebegeimu re, at Yakub lak o Mesir legesema, at eiyagai ’berlegat la’bulik enebe 70 legesa.
Yakub eiyagai enemin o Mesir welat tigisa wene
28Asogo o Mesir lagalat, at Yakub en is o Gosyen lagaimu Yusuf ologotma wemagoluk Yehuda yo’go naduk perakpesi. Perakpesimu, is ano o Gosyen legesema, 29at Yusuf aik emin sarlok tuogoluk ’gwiangso ’gela’ge wam kuda en lisogo woluk lasu a’ge ano a’ge pam ogola ’gwi lagarik waga. Wagarik, emin sarlok tigisarik e, aik ebagase parlik hau weriselat e, nge tago modok aregenat welaga. 30Asogo nge taga lagama, at Yakub en e, Yusuf disogo mo’gulesi,
“An hat helaluk welegenma arat nemin sarlok tigerik hebe nil domok hiegirikmu re, yogodak ya nebe waromma re, obat o,” oluk mo’gulesi.
31Asogo mo’gulesimu, at Yusuf enarilak emin, osilak uelak logon emin, disogo mo’gulentesi,
“An narilak emin, nosi nuelak emin, o Kanaan welagai a’ge arat ne’bek wegesarik oruak, oluk ’gain onuk logo a’ge Firaun aluksogo mo’gulesi laik o. 32Mo’guleselat e, disogo ik,
Is e, domba emin, sapi emin, eiye welat o’gonogumu re, onuam ’berlek emin, ena’ge-a’ge di a’ge yu a’ge ’berlegat emin, woluk wegesarik oruak o, oluk mo’guleik o. 33Asogo mo’gulomma, at en e, his worlhontoluk,
Yabuk ’ge a’ge togu legep a’ge, oluk hin wokhentasu holuk e, 34disogo mo’gulomup o,
Nis e, nene’balak wam di a’ge yu a’ge eiye welat, o’gonogu legesa ai ’gela’ge, nenebe malik wei a’ge pam enat wam eiye welat o’gonogu lege a’ge o, oluk mo’gulomup. Asogo mo’gulorogupmu, at en e,
Holuk, his o Gosyen wolomup, oluk mo’gulhontouwa o,” oluk mo’gulentesi. At Yusuf en asogo mo’gulentesi ai re, is aphwami Mesir a’ge aphwami wam eiye welat o’gonogwi a’ge enemin hwedik tu re, enebit welagai ai en mo’gulentesi.
Currently Selected:
Kejadian 46: Wul
Highlight
Copy
Compare
Share
Want to have your highlights saved across all your devices? Sign up or sign in
