Yehezkiel 8
8
Allah owi werikmu enasua erlik tugu legesa wene
1Woknonoboluk nenebei lasuam oruakhwe, tahun 5 arat takpoluk, mesik tagalat dugwi 5 pelelak poluk, mesik pelelak a’ge tanggal 5 dugwi ai pam ap Yehuda a’ge onuelak an nowi pam nemin hweriogo oruakma at ’gain otok modok welago a’ge Allah anni nebam pasukhwe, 2#Yeh. 1:27Nabi ’gela’ge pam ap ’gela’ge mesik oruakma yethegi. At o’borl hwerli en ’belagakhit o’gwe re, odouk ’gela’ge welat, ye, abel hwerli en legeik akhit e amolit tembaga pam en yeberliso ’gela’ge welat, takhwe yethegi o. 3At ai re, ap e’gik ’gela’ge ’beli’gogo nasu tenak pasumu hegi o. Asogo holuk, nabi ’gela’ge hasumu en e, arogun en an ha’boksogo woknoboluk ’bogorl erei, ’gwiang orogou oruakhwe o ’burl eria ligagarik, woknoboluk o Yerusalem odipmu ogola akhit o’gwe ’goduk ’gogumu Allah erliktu a’ge oruakhweat de mu a’ge Erliktogwiam ebit epasu a’ge ogut hele’gik oruakma ebano nebei laga o.
4 #
Yeh. 1:28
Nebei lasuam e, Israel a’ge enaik Allah logo modok a’ge atiasogo o do’go ik Kebar iak pam naduk nabi ’gela’ge hegi ano ’gela’geat, eria oruakma hegi o. 5Asogo hasuam, at en an mo’gulneselat, aphwami en dogo a’ge yu o. O o’borl akhit o’gwe eba hil yethemen o, oluk mo’gulnosoam, yethegi ’gal e, o abel akhit o’gwe a’ge paget wusogo wogoso’gu a’ge ’goduk ’gogumu horok eriano Allah erliktu a’ge oruakhweat de, mu a’ge erliktogulat, togwi en Allah ebit epasulat asua ogut hele’gik a’ge ano oruakma hegi o.
6Hesirik, at en an mo’gulneselat, aphwami en dogo a’ge yu o. Is Israel a’ge en modok wiak enemelmel a’ge togwi ano pam an nowi werik omu degelakma ano uk po a’ge ago yu, hil hasulegen a? Hil hasulegen ai, enemelmel a’ge logoat a’geat de, wiak enemelmel modok mia a’ge tegisa a’ge mesik oruakma hagun ani o!
7Mo’gulnesirik, an woknoboluk Allah owi werikmu odipmu ’goduk ’gogumu nebei lasuam e, helep leget wogo a’ge ele lok a’ge delak oruakma hegi o. 8Asogo hasuam e, at en an mo’gulneselat, aphwami en dogo a’ge yu o! Helep ’goduk pak werikmu ele lok delak a’ge ai, hial hemen o, oluk mo’gulnesimu, godouk emde ’belak oruakma hegi o. 9Asogo hegimu, at en an mo’gulneselat ogola hial hegi gal e, eba wiak a’ge til lagalat, wiak enemelmel a’ge tugulat, togwi ano hanok oluk, ’gwilak o, oluk mo’gulnesi. 10Mo’gulnesimu, ’gwi legi’gal e, ’gosu ogum pam ’gebela lasu a’ge onogut emin, di a’ge yu a’ge onoyuk pam lagai a’ge enemelmel a’ge onogut hele’gik a’ge emin, Israel enasua onogut hele’gik a’ge emin, o hebat weling-waling ebano petne heli’gogo-heli’gogo oruakma hegi o. 11Ogut hele’gik oruak a’ge ano eragam ap Israel a’ge onuelak enebe 70 edik welat, ye, ap Safan omlogo Yaazanya is ene’gerlakma edik welat asogo tak welat, is enemetik-enematek e’ben op ago a’ge odouk e’gen orlok togwi a’ge ene’gikmu tenak oruakhwe, e’ben op ago a’ge ano odouk demak a’ge ano pam en odouk hobu ligagoma hegi. 12Asogo hegirikmu en, at en an mo’gulneselat, aphwami en dogo a’ge yu o. Is ap Israel a’ge onuelak enasua ogut hele’gik a’ge welago ’gwe lo’bok nak O hiktak nak oruakhwe togwi ano hil hegen a? Is en ogulat, At Allah il yetnonto erlakma en oruak. At Allah en nono’gwiang yu, arat ukpesirik oruakma, welat tegei o, oluk ogwi ai yet o.
13Mo’gulnesirik, mesik mo’gulneselat, “Hil hasu legen a’ge ai re, wiak, enemelmel mia a’ge a’geat de, wiak enemelmel mia a’ge mesik tugumu yerentagun ani o,” oluk, mo’gulnosoma hegi o. 14Asogo hasuam e, at en an woknoboluk Allah owi werikmu ’gwige ’gal e ’goduk ’gwi lagaimu o abel akhit hegit ebano nebesimu, eba is hwami enasua onuk Tamus ebaget lo’gu marogumu hegi o.
15Asogo yerentasuam, at en an mo’gulneselat, Aphwami en dogo a’ge yu o! Ai tugukhwe yerentigen a? Ai yerentigen ai re, wiak modok mia a’geat de, wiak modok mia a’ge tugukhwe entagun ani o, oluk, mo’gulnosoma hegi.
16Asogo hegirikmu en, at en an woknoboluk Allah owi werik a’ge edipmu ogola eba Nebei lasuam, at owi werikmu ’goduk ’gwi lagaimu selakma wene ’balogumu emin, akhit wusogo wogogumu emin, ’burlmu ebano ap enebe 25 ’gela’ge en Allah owi werik ano ono’borlma poluk onolukhwe o mo liplau wago hegit eba poluk, o mo liplau wago a’ge ano ondogorlu pam hurotluk erliktugukhwe entegis.
17Asogo ontoluk oruakma, at en an mo’gulneselat, “Aphwami en dogo a’ge yu o. Ai tugukhwe hil entigen a? Is aphwami Yehuda a’ge en wiak, enemelmel a’ge nak togwi ai, logo erlak welat tugwi epegen? Ai a’ge til lagalat, enede erlak en yogunat til lagai ano pam, o ’gwiang pam yema wiak nak bete etil lasu holuk nolot het nak ago yu op epegen? Hat modok mia o, oluk, nebam eme ukhonobogwi yu yet o. 18Asogoatma re, eniak loksogo ningtak nangtak mo’gulnema a’geat de, eniak hweliselat, enebe nedeap enebiselat, enebe nede en ugenebasulat, tik erlak Nolot het enebam paik o,” oluk, mo’gulnosoma hegi o.
Currently Selected:
Yehezkiel 8: Wul
Highlight
Copy
Compare
Share
Want to have your highlights saved across all your devices? Sign up or sign in
