Yehezkiel 47
47
Allah owi werikmu en ik lok a’ge liplau wagoma hegi wene
1 #
Zak. 14:8; Yoh. 7:38; Wah. 22:1 Toluk, ap ano en an woknoboluk Allah owi werikmu ’goduk ’gwi lagalomma nobou wagoma hegi o. Wago hegirikmu en e, owi werikmu abel o mo il porlu ago hegit oruakma ’goduk ’gwi lagalomma eragam eba en ik lok a’ge mesik lebagarik, o mo porlu ago akhit hegit eba lasumu hegi o. Ik ano re, Allah owi werik a’ge eragam o sogweik hegit eba en libagarik, ebaget wusogo oduk narlogulomma o sogweik akhit hegit eragam eba en abel o mo il porlu ago hegit eba lasumu hegi o. 2Lasukhwe nil hegirikmu en, at en ’goduk ’gwi lagalomma o o’borl akhit o’gwe hegit eba en e, an woknoboluk libagarik, odipmu eba en woknoboluk wi-waling togolik ’goduk ’gwi lagalomma pare akhit abel o mo il orlu ago hegit eba nebei lasuam e, ik ano o sogweik akhit o’gwe hegit eba en lasumu nil hegi o. 3Asogo hasukhwe, ap ai herle walhegeik e’gikmu wik-wok o mo orlu ago hegit eba lagarik, ik ano meter 500 pam walhesirik, woknoboluk ik ano ogola nebei lagarik nebasuam e, ik ano hwerli noyuk pam at agoam a nil hegi o. 4Asogo hasumu en e, pobuk at en ik ano meter 500 pam mesik eminat walhesirik woknoboluk ik ano ogola pobuk emin nebei lasuam ik herim tago a’ge ano re, nodogorlu hwerliat agoma hasulat, pobuk nin meter 500 hwerliat mesik emin walholuk woknoboluk ik ano ogola pobuk nin nebei lasuam e, ik herim tago a’ge, ano, nodogorlu hwerli ligagama nil hasulat, takpoluk, 5Pobuk emin meter pam 500 hwerli walhesirik, ik ano arat lok aphwami en ’balogo libom a’ge mia agalat tegimu re, aphwami en ’gume woru a’ge elirat agama hasulat, 6At en e, an mo’gulneselat, aphwami en dogo a’ge yu o. Yu tago ano re, hil hegen a? Erlak a, oluk, mo’gulnesirik pobuk togolik woknoboluk ik ano esa’goma nobou waga. 7Asogo nobou wagoam e, ik ano esa’go yu petne etle petne e a’bigat modok oruakhwe nil hegi. 8Asogo nil hegerik oruakma, at en an mo’gulneselat, Ik yu o mo porlu ago hegit eba lasumu re, o Yordan do’goma loluk ik lok a’ge ye’gelak mayu orlouk oruakma o’go ’balilasuam e ik orlouk a’ge ano re, obapsogo pouwa o. 9Ik yu lasumu ogola di a’ge yu a’ge enarogun ’gwia ogulat denaga lema a’ge holuk ’berlegat a’bik weiyal etil laga lema ani o. Ik yu re, lok mia a’ge ye’gelakma re, ’gwi lagalat, ik orlouk ano, obapsogo pouwama re, di hiane yu hiane a’bigat lek-sebel agan no’gulat denagalat, Ik yu lasumu eba ogola a’gul onuk lo’bok ’berlegat enelaluk welat tugu lema o. 10Asogoat takpouwama re, is ap hiane wogwi a’ge ebano ik ai esa’go’gwe o En-Gedi horoksogo, en ’bekhit, o En-Eglaim hwerliat ’bete otluk hiane yagarogwi a’ge sum ai ’bela’bil loluk, esa’go’gwe ebano eri’gogo pil laga lema o. Ik lok ye’gelak Laut pam hiane ilmu muat welago ai ’gela’ge, ik yu pam hiane il mum a’geat welema ani o. 11Asogo tua a’geat de, sip-sipmu emin, ik a’bosu lebagalomma emin, ai nak e, op ema erlakma re, mayu wogulomma at welema o. 12#Wah. 22:2Ik esa’go yu akhit emin, etle akhit emin, di agan yu agan il mu-mu nak e’gen op egesiso a’ge welemama re, e’ge la’buk om erlakma en, un nagat welat, ye, e’gen egesik a’ge erlak om erlakma enat e’gen egeik nagat welat, taga lema ani o. Ik Allah owi werikmu en liplau wagalat, wogeselemama re, dugwi mesik peleliselat tago ano pam e’gen egesiso modok nagat welema o. E’gen egesiso ai pam e, is aphwami onso’boru eniorum ’gela’geat agalat, Ye, e’gela ai pam e, aphwami obap enebasu a’ge e’genat agalat, taga lema o, oluk, mo’gulnosoma nil hegi o.
Israel ono’gwiang hwerli po wene
13’Gain onuk logo welago a’ge Allah en egei ano re yuat o. Is Israel ena’gul onuk 12 a’ge ono’gwiang enemining a’ge ’gela’ge eiyerak pagathorloluk poluk welemagoluk so’busogo hwerli ’balogo wogentasulat, at Yusuf ’gwiang ’biren ’balogo wogoum ai ’gela’ge, wogonto ano re, yu at o. 14’Gwiang yu re, ’Baal hegeik ’balu erlakma en e, hegitsogoat ’balogo wogontogu lemak o. His demat wokhentaik o, oluk, nonuk ho’buk ’belakpoluk ho’buk ’baliselat, ene’balak wogentigismu re, ’gwiang yu re enemining a’ge ’gela’ge is ono’gwiangat ema o.
15’Gwiang lok legenak a’ge hwerli pil lo ano re yuat o.
O o’borl akhit o’gwe hegit eba hwerli po a’ge ai, ik lok ye’gelak laut horoksogo en ’bekhit ’gebela o Hetlon louwagoluk lagaimu, o Hamat oruakhwe, o Zedad oruakhwe.
16O Berota oruakhwe, ’bekhit o Damsyik emin, o Hamat emin, ’burl kota Sibraim en ’bekhit, o Hauran ’gwiang hwerli ’belak oruakma kota Hazar-Enan ai hwerli pei lo yo.
17O o’borl akhit eba hegit po ai re, ik lok ye’gelak Laut horoksogo eming holuk, ’bekhit o Hamat ’gwiang hwerli ’belak o o’borl akhit hegit eba oruakhwe, o Damsyik ’gwiang hwerli oruakma o o’borl akhit hegit eba motluk o Hazar-Enon hwerliat pei lo yo. O o’borl akhit hegit eba ’gwiang hwerli po ano re, aiat o.
18A’geat de, o mo orlu ago hegit eba hwerli po ano re, o Hauran emin, o Damsyik emin, ’Burl oruakhwe kota Hazar-Enon en o Gilead emin, o Israel ono’gwiang pam emin ’burl oruakhwe, ik Yordan som dedilluk lik ik mayu orlouk a’ge oruakma ye’gelak en ’bekhit ik ye’gelak ologunmu O Tamar hwerli at pei lo yo. O mo orlu ago hegit akhit ’gwiang hwerli po ano re, aiat o.
19O sogweik akhit hegit eba ’gwiang hwerli po ano re, o Tamar horoktak poluk, ’bekhit, O Kadesh horoksogo ik elaruk esan a’ge lebago akhit Meriba en ’bekhit o Mesir hwerikmu ik lasu a’ge ano motluk ik lok ye’gelak laut hwerliat pei lo yo. O sogweik akhit hegit eba ’gwiang hwerli po ano re, aiat o.
20A’geat de, o mo il obuk ilasu hegit eba ’gwiang hwerli po ano re, ik lok ye’gelak Laut esa’go ’gwe en ’bekhit o Hamat ano lagaimu hwerli pei lo yo. O mo obuk ilasumu eba hegit en ’gwiang hwerli po a’ge ano re, ai at o.
21’Gwiang yu re, is Israel en ena’gulonuk polik a’ge nak so’busogo horlouwak o. 22Asogo so’but horlogulat, is Israel emin is aphwami pema mu a’ge enemin welagai a’ge ebano enemin, eneminat welat, dagonobogwi a’ge ebano emin. Is ai, nis Israel a’ge en dagonobu a’ge ’gela’geat o, oluk, enede opogulat, Israel ena’gul onuk polik a’ge enemining a’ge ’gela’ge, ’gwiangso’but horlogulat, is eneminat eiye otluk welemagoluk, so’burontouwak o. 23Ye, is aphwami mu a’ge mesik is Israel ena’gul onuk mesik ene’gerlakma oruak holuk e, ’gwiang is Israel enemining a’ge ’gela’ge horlogwi ano a’ge is enemining a’ge ’gela’ge eiyerak pagathorlouwagoluk, pema ’gwiang ’balogo is wogontogu lemak o, oluk at ’gain otok modok welago a’ge Allah enat osoma nil hegi o.
Currently Selected:
Yehezkiel 47: Wul
Highlight
Copy
Compare
Share
Want to have your highlights saved across all your devices? Sign up or sign in
