Yehezkiel 43
43
Allah lok logo welat togolik owi werikmu waga wene
1Asogo loluk, ap ano en an woknoboluk ’goduk ’gogulomma o mo liplau wago akhit o’gwe oruakma ebano nobou wagoam e. 2#Yeh. 10:3,4,18,19; 11:22,23; Wah. 1:15Israel enaik Allah modok logo a’ge en atiarak hwe o mo orlu ago akhit o’gwe en wagoma hasumu, at modok logo a’ge en atiasogo ’gwiang pam pasulat, ik hurl o’borlogouk orlu oso ’gela’ge, iak osoma hegi o. 3Nabi ’gela’ge pam hegi ano re, o kota Yerusalem erlagapsogo po a’ge paget wagoma hasulat, naduk ik Kebar esa’goma welat hasulat, tegis ano ’gela’ge hegirik, nonorogole sogup ’gwiang pam ’bou tegis o. 4’Bou tegistik oruakma, At Allah modok logo dakha tak a’ge ano ’goduk ’gogulomma eriano o mo orlu ago akhit o’gwe ai pam en at owi werikmu ’gwisoma hegi o.
5Hasumu, arogun en an ha’boksogo woknoboluk odipmu otlobuno nebei lasuam e, At Allah modok logo atia tak welago a’ge ano, at owi werikmu eba modok elit tak pasumu hegi o. 6Ap Allah owi werik elira’ge pam meter walhasu laga a’ge ano, nemin edigonuak hwe, Allah owi werikmu ogola ebano en iak mesik mo’gulnosoma nesa’go holegis o. 7Holiso oruakma, at en an mo’gulneselat, “Aphwami en dogo a’ge yu o. An wene mo’gulentasulat, noyuk poluk welat, tagalom ai re, yemaat o. Aphwami Israel a’ge ene’gerlakma an modok-modok wolomma yuatma re, is Israel a’ge emin, onuelak ononuk logo a’ge emin, ebano en hwe ogun ukpoluk, ap mu a’ge emin til lasu ’gela’ge, an oruakhwe uknoboluk mu a’ge motluk lagalat, is onuelak ’gain woruak dom-dom petne daintak a’ge ebano erlik enebi lagalat, togwi ano pam nonuk modok op omu degelak a’ge wiagapsogo pogu legesa ano pobuk logon emin togu lema modok erlak o. 8Is onodogwi asua ogut onogorlogap pogumu ’goduk ’gogulom ano, an erliknobogumu ’goduk ’gogulomma, emin saplisogo pogulat, is onodogwi asua ogut onogorlok wap pogulomma goduk ano, an erliknobogulomma ’goduk emin saplirak pogulat, toluk, o hebat mesigat a’ge ano pam an ogoiye taknoboluk, onogorlok ho a’ge til laga legesa ano pam nonuk modok op omu degelak a’ge ano, wiagap pegesa ano pam an nolot het agalat, is ena’guluak erlagapsogo pegi ani o. 9Asogoatma re, o yogodak yu pamat, hwe ogun ukpoluk, ap mu a’ge emin til lasu ai ’gela’ge, an oruakhwe mu a’ge moluk lagai a’ge ano ukpogulat, onuelak ’gain woruak oluk daintak a’ge onogorlogap pogwi ano henokho hwikhogulat, togwi holuk, an is ene’gerlakma modok-modogat weleik o,” oluk, mo’gulnosoma hegi o.
10Mo’gulnosoma hegirikmu en, mesik emin mo’gulneselat, “Aphwami en dogo a’ge yu o. Is Israel a’ge en, wiagat togu legema hege o, oluk, opou wagoluk, Allah owi disogo woru o, oluk mo’gulentasu lomup o. Wene mo’gulentagun a’ge ano, pobitak poluk, 11Disogo takhwe togu legema o, eige oluk, opogulat togwi holuk, nowi weriselat, disogo woru o. Mo’gulentasulat, o ogorli til lo a’ge emin, ’goduk libagalat, ’guagalat, togulom a’ge emin, woru a’ge ogut walsogo hele’gik a’ge emin, mo’gulentasulat, ye, werik poluk togulom wene ’belak a’ge emin, disogo togulom yusogo togulom oluk wene le’gelak a’ge emin, ’berlegat mo’gulentasulat, tip o. Ogut hele’gik a’ge hegitsogo opsogo motluk lagalat, wene tak a’ge ’berlegat hegitsogo togulat, togu lemagoluk, mo’gulentagun a’ge ano enil pam odo ’balogo pomup o. 12Allah owi werikmu en togulom wene ’belak ano re yuat o. O dom kirin o’borl-o’borl ’berlegat eba re, omu degelak modok asua at welagoma o. Allah owi werikmu en wene togulom ano re aiat o,” oluk, an mo’gulnosoma hegi o.
Ebaget wusogo e narlogulomma walhesi wene
13 #
Kel. 27:1,2; 2Taw. 4:1 Mo’gulnosoma hegirikmu en, at ano en an mo’gulneselat, at ebaget wusogo e narlogulomma ebale hele’gik a’ge ano re, meter walhegeik ologun weiyat yat eriano pam walhasulat, oyukmu duelak a’ge elagaret ’belak a’ge opma ’gwe ’gela’ge ano re, meter ’burl a’ge pam walhasulat, elagaret lok akhit ’belak eliko lok akhit weiyelak ano re, meter ’burl o’gwe walhasulat, ye, oyukmu duelak a’ge emde po’gwegei a’ge weling-waling aphwami ene’gik mesigat pogwi ’gela’ge walhasulat, tisoma hegi o. Ye erei akhit lekho walhesi ano re yuat. 14Oyuk mu ’gwiang pam demak a’ge hwerli en o’borl pam naduk demak a’ge ereinnyo logo ano re, meter mesigat pam walhasulat, demak a’ge emde po’gogwi a’ge wi-waling ano meter ’burl a’ge pam walhasulat, nin pobuk ai pam ene ’burl demak welat ereiya logo ano re, meter ’biren pam walhasulat, ye, ’burl demak a’ge emde po’gwegei mu weling-waling meter ’burl hwerli pam walhasulat, tisoma hegi o. 15Ai pam demak hwerli en ereinnyo Allah paget e narlogulomma demak a’ge logo ano re, meter ’biren nakma re, ogut 4 ano a’ge pam iak din-dainsogo oruak. 16Ye, at ebaget odouk narlogulomma demak a’ge emde erei akhit-orogou akhit emin wi-waling emin, ai, meter hegitmu re, ologun erei-orogou e. Meter 6 pam walhasulat, emde wi-waling ai meter 6 nak walhasulat, tisoma hegi o. 17Odouk narlogulomma demak a’ge eragam demak ano ogo, erei akhit orogou akhit emin, wi-waling emin e, meter hegitmu re, emde wi-waling ai meter 7 walhasulat, ye, ologun erei akhit-orogou akhit e, meter 7 walhasulat, tegeitik, demak a’ge ai, ogo wi-waling a’bosu ’bisolomma ebale takpesi a’ge ai, meter ’burl o’gwe walholuk, ’bisolomma emde pam logo pil laga a’ge ano re, ap ene’gik demogo pil lagai ’gela’ge walhasulat, ye, ebaget, wusogo e narlogumu de’galim ano re, o mo orlu ago akhit o’gwe welat, tagoma hegi o.
Ebaget e narlogumu ebale ai, hosogo pogumu hegi wene
18 #
Kel. 29:35-37
Asogo hasuam e, at ano en an mo’gulneselat, “Aphwami en dogo a’ge yu o. At otok modok welago a’ge en egei ano re yuat o. Wusogo e narlogumu e’belo’go hele’gik poluk, ai a’ge pam wusogo ebaget e narlogulat, emep e’gerlik pogulat, togulat togulom a’ge wene ’belak ano re yuat o. 19Is ap Allah eiye Lewi a’ge ena’gul onuk Zadok pam en weiyelak a’ge ai en nak an nil pam aphwami enebaget togulat umu re, aphwami onowiak erlak emagoluk, sapi ierak ot ’gela’ge holuk, wik-wok wogentau wagaiam e, 20Werak poluk, emep pema wogu lemarik, wusogo odouk narlogwi a’ge ologun dain eselat 4 pam emin, odouk narlogulom a’ge demak ano eragam demak a’ge o’gut 4 tak a’ge pam emin, wali’gogo emde logo pil laga a’ge pam emin, egelik pil louwak o. Asogo togwiam wusogo e narlumu ebale helo’gu ai wiak hosogo pogwi ai ’gela’ge hosogo pogulat, ye, ai pam nebaget wusogo e narlogwiam e, an wasu leik en e, iak daintak a’ge ebano petne pogulat, togu lomul o,” oluk. At otok modok welago a’ge Allah enat egei o. 21“Asogo togu lemarik, onowiak erlagapsogo onobo a’ge nebaget po a’ge sapi ierak a’ge ai wokho an nowi werik asua welagoma o’borl akhit en togulom a’ge ’belakma ebano enat odouk narlogu lemak o. 22Asogo togu lemarik, hubet o’gwe onowiak erlagapsogo po a’ge paget kambing ierak ebetne yebil erlak a’ge holuk, wusogo poluk ebaget e narlogumu ebale hele’gikmu ano, sapi ierak a’ge emep pam hosogo pogulom hegitsogo, kambing emep pam hosogo pogu lemak o. 23Arat hosogo pogu lemarik, is en sapi ierak ot a’ge emin, domba enegerlakma en ierak a’ge mesik emin, emin-emin enebetne yebil erlak a’ge holuk, wokho wusogo pogu lemak o. 24Wusogo poluk, werak woluk At Allah il pam pou wagaiam e. Is at ebe eiye a’ge en mayu enebe petne gellik poluk, At Allah paget e narlik pogu lemak o. 25Onowiak erlagapsogo po a’ge paget kambing ierak emin, sapi ierak a’ge ot emin, domba enegerlakma ierak mesik egelik a’ge ano emin, enebetne aik ’belak erlak a’ge holuk, loruk hopmu wusogo woknogukhwe, agauwa 7 lail louwak o. 26Nebaget wusogo e narlogumu ebale hele’gik a’ge ai pam nebaget wusogo e narlogwiam e an wouwagoluk togulat, sobul hosogo pogulat togukhwe, agauwa 7 lail louwa ai pam nebaget pulogo pouwa o. 27Nogo 7 pam nogoluk, hubet o’gwe en ’bekhirat, wusogo nebaget odouk narlu agalat, nemin la’bolik wolom a’ge paget woknosu agalat, togwi holuk, is an nebe eiye a’ge en e narlogwi a’ge ebale hele’gikmu eba odouk narlogu lemak o. Asogo togwiam, woluk an woknosu agai, a’ge ano, nagai pam wasu leik o,” oluk, at otok modok welago a’ge Allah en osoma hegi o.
Currently Selected:
Yehezkiel 43: Wul
Highlight
Copy
Compare
Share
Want to have your highlights saved across all your devices? Sign up or sign in
