Yehezkiel 40
40
Allah owi ’get a’ge werikmu hesi wene
Pasal 40-45
Yehezkiel o Yerusalem woluk lasumu il hesi wene
1-2 #
Wah. 21:10
O kota Yerusalem sebelil ’gu egesarik welat, tahun 14 arat takpoluk, mesik tak a’ge pam nis woknonoboluk nonobou wegesema oruakhwe, tahun 25 arat takpoluk, mesik tegeimu re, tahun ai a’ge pam dugwi iluak pelelak tanggal 10 dugwi ai pam Allah anni nebam pasukhwe nabi ’gela’ge pam Allah en woknoboluk O Israel a’ge welagaimu nebei lagarik dom mesik yat a’ge pam nebasumu hegi o. Asogo hegirik an oruakma norogolema o sogweik akhit eba en o kota ’gela’ge werik oruakma hegi o. 3#Wah. 11:1; 21:15Eba nebesimu welat, ap mesik ebe ’besi tembaga pam hele’gik a’ge ’gela’ge welat herle mu ebeletak a’ge emin, wa’gun walhogwi a’ge emin, e’gikmu tenakho ’goduk ’gwi lagaimu edik oruakma hegi o.
4Asogo hasuam e, ap ai en e, an mo’gulneselat, “Aphwami en dogo a’ge yu o, hil pobirak pasulat hesa’go opsogo hweliselat habi pam mo’gulheselegi a’ge ’berlegat ai, modok pobirak pasulat, taga lorogun en, wokhoboluk o yema hobou wegimu re, mo’gulhosokhwe pobirak pasu lomup o. Asogo pobirak pasu logoguntik wene ’berlegat ai is Israel a’ge mo’gulentagun ani o,” oluk, mo’gulnosoma hegi o,
O mo porlu ago akhit o’gwe eba ’goduk ’gwi lagalomma il hesi wene
5 #
1Raj. 6:1-38; 2Taw. 3:1-9 Asogo hasulat, ’gwiang ’belak Allah owi werik oruakma wi-waling ’berlegat ai, helep pak wogo oruakma nil hegi o. Ye, ap e’gikmu wa’gun elira’ge tenakho oruak a’ge ai re, meter ologun horok a’ge pam e erlak o. A’geat de, meter ologun horok weisogo yat a’ge ’gela’ge pam walhegeik meter henaganatma re, wa’gun ai pam helep pak wogo a’ge walhasulat, eliko weiyelak akhit e, wa’gun yat a’ge mesik pam walhasulat, ye, erei akhit logo a’ge ologun ano re, wa’gun yat a’ge mesik pam walhasulat, tagoma hegi o. 6Asogo hasuam e, ’goduk ’gwi lagalomma orogole o mo porlu ago hegit oruakma eba lagarik ’gwi lagalom o’gwe yel’berla pam ligotluk, onoyuk pil-pil ’gogulomma en ologun yat a’ge walhil lasulat, wa’gun walhogwi a’ge mesik pam walhasulat, 7is ap o enil ’gwelakharok wolom a’ge wolomma walhasulat, ologun yat akhit wa’gun mesik pam walhasulat, emde wigalak o’gwe wa’gun mesik pam walhasulat, o ogorlitak pema-pema oruakhwe ologun lisogo helep pam werik a’ge ano, eliko weigelak a’ge ai meter ’biren takpoluk mesik ’burl emin walhasulat, ye, onoyuk poluk libotluk wene ’balogulomma eriano Allah owi werik akhit oruak a’ge ano ologun yat akhit walhil lagalat, wa’gun walhogwi a’ge mesik pam nak walhasulat, tagoma hegi o. 8Asogo tago hegirikmu en, Allah owi werik akhit o’gwe hegit ’godukmu libagalat, wene ’balogulomma ebano, walhil lasulat, 9Emde wigalak ai re, meter 4 pam walhasulat, ye, ’goduk pema-pema helep lagabak a’ge emde ’belak eliko ano meter mesik pam walhasulat, tagoma hegi o. 10O mo porlu ago akhit o’gwe hegit eba ’goduk ’gu aga lomma ogola akhit pema-pema ai re, is o enil ’gwelabogo wolomma onowi ogorlitak henagan, nak oruakma re walhasulat, ogun ligakhit-’belagakhit legeik ’belak emin, emde legeik ’belak emin, hegit-hegit nak walhasulat, o ogorli pema-pema oruakhwe ologun lisogo helep pam werik a’ge emin hegitsogoat walhasulat,
11Ai tegeirik, ’goduk ’gogulomma o ogorli yatma ’guogoluk ’gogulomma ologun yat e, meter 5 pam walhasulat, ye, emde lok ano re, meter 7 pam walhasulat, tegei 12Is o ’gwelabogo wolomma onowi ogorli-ogorli legenak e, ologun erei akhit oro’gu akhit, emde ’belak meter 3 pam waltak a’ge oruakhwe, ’goduk ’gwi lagalomma o’borl akhit helep pam werik sebelogo meter mesik ’burl ’gela’ge walhasulat, eli’go lok a’ge meter mesik e, ’burl ’gela’ge walhasulat, tegei. 13Asogo tegeirik, ’goduk ’gwi lagalomma o ogorli yat a’ge ano re, le’gik-’belak walhasulat, ap o enil ’gwelabogo wolom a’ge onowi ogorlitak pema ogola en e, walhil libotluk ’bekhit hwerli enil ’gwelabogo wolomma onowi ogorli pema ogola ene walhil lasulat, meter 12 setengah pam walhasulat, 14’Goduk ’gwi lagalomma ogorli yat a’ge ano re ligakhit ’belagakhit walhasulat, libomogoluk wene ’balogulomma ogola eba en ’bekhit libagalat, Allah owi werik akhit eba wene ’balogulomma hwerli ogola eba re, meter 10 pam walhasulat. 15’Goduk ’gogulomma ogorli yatma re, ’gwi lagalom hwerli en ’bekhit, Allah owi werik akhit eba wene ’balogulomma libaga lomma hwerli ai, meter 25 pam walhasulat, tagoma nil hegi o. 16Is o ’gwelabogo wolomma onowi ogorlitakma re, helep pam wetil ligaga a’ge lekho yendela emde pare akhit en hedin-hedin weiyap pil-pil ’bu aga lagarik weiyal pesi a’ge emde ’belak welat, wene ’balogulomma asogo nagat yendela nagat ’belak welat, ye, ’goduk ’gwi lagalomma ogorli yatma re, ’gwi lagalomma helep pam wetil ligaga a’ge pema-pema ebano, e korma ogut hele’gik oruakma hegi o.
Allah owi werik odipmu en o’borl akhit il yethesi wene
17Pobuk togolik an woknoboluk Allah owi werikmu odipmu ’burl eba nobou wagoma re, odipmu de o sabo ’gela’ge eba helep loksogo delakma ogorli-ogorli a’ge 30 pam oruakma nil hegi o. 18Helep delak ai re, odipmu ’goduk ’gwi lagalomma ogorli yat a’ge eba emin, hegit-hagatsogo demak welat, o eli’go wigalak ai re, ogorli yatma re, ’gwi lagalom a’ge ologun yat a’ge ano ’gela’geat welat, ye, odipmu logo a’ge ’gela’ge delakhweat de, helep mu ebeletak a’ge delak ai re, sebelogo ’gela’ge delak, oruakma nil hegi o.
19Asogo hasuam e, ap ano en e, odipmu ’burl ’goduk ’gwi lagalomma sebelogo pare akhit en ’bekhit parema odipmu emde pare akhit ai hwerli walhasulat, o mo il liplau wago hegit eba emin, abel akhit o’gwe hegit eba emin, ai emin meter 50 pam nak walhasumu hegi o.
O abel akhit o’gwe hegit ’goduk ’gwi lagalomma walhesi wene
20Asogo yethasuam odipmu ’burl ’goduk ’gwi lagalomma olukhwe o abel akhit en tak a’ge ano ologun yat a’ge emin, eli’go weiyelak a’ge emin, walhasumu hegi o. 21Odipmu de ’burlmu ebano ’gwi lagalom a’ge ’goduk ’gogulomma pema-pema o enil ’gwelabogo wolomma o ’ogorli henagan nak welat, ogorli pema-pema oruakhwe helep pam dipsogo werik a’ge ano emin, wene ’balogulomma emin, ’goduk ’gwi lagalomma ogorli yatma re, ’gwi lagalom a’ge o mo il liplau wago hegit eba walhesi a’ge ano hegitsogoat ologun yat akhit e, meter 25 hwerli walhasulat, emde wigalak a’ge ai re, meter 12 setengah hwerli walholuk mesik ’burl walhasulat, tagoma hasu o, 22O ogorli-ogorli a’ge emde ’belak emin, wene ’balogulomma emin e korma ogut hele’gik a’ge emin, ai re, ’goduk ’gogulomma ogorli yatma re ’gogulom a’ge o mo orlu ago hegit welaga a’ge ano ’gela’ge oruakma hasulat, ligotluk yel ’berla 7 hwerli a’ge oruakhwe, ye, wene ’balogulomma ai ’goduk ’gogulomma ai ogorli yatma re ’gwi lagaimu yel ’gwi lagalom a’ge ano ogola eba at oruakma hasulat, tegis o. 23Ye, odipmu en o ogola ’gwi lagalomma abel o o’borl akhit o’gwe en tak ai re, o mo liplau wago hegit eba en tak ’gela’ge welagama re, ap ai en ’goduk odipmu ’burl o’gwe ebane ’gwi lagalomma eba hwerli en ’bekhit, ’goduk odipmu ebano en o ogola ’gwi lagalom a’ge walhasulat, meter 50 hwerli walhasumu nil hegi o.
O sogweik hegit en ’goduk ’gwi lagalomma walhesi wene
24Asogo toluk an woknoboluk o sogweik akhit eba nebei lasuam e, ’goduk ’gwi lagalomma olukhwe o sogwei akhit hegit eba hele’gik oruakma hegi o. At ap ano en ’goduk helep pam heli’gogo lagabak a’ge emin, gogulat wene ’balogulomma emin, walhasulat ado walhesi a’ge ano hegitsogoat walhasumu hegi o. 25’Goduk ’gwi lagalomma o ogorli yatma re, emin, ’gwilotluk ’gogulom a’ge emin, wene ’balogulomma emin, yendela emde ’belak weiwei a’ge heli’gogo legenak a’ge ebano ’goduk ’gwi lagalomma ogorli yatma re ’gwi lagalom a’ge pema ’belak ano ’gela’ge ’belak oruakma hasulat, ’goduk ’gwi lagalomma ogorli yatma re, ’gwi lagalomma ologun yat a’ge ai re, meter 25 pam walhegeik hele’gik oruak, ye, emde wigalak ai re, meter 12 hwerli walholuk mesik ’burl o’gwe walhegeik tak oruakma hegi o. 26Ligotluk ’gwi lagai a’ge 7 hwerli en tak a’ge yel’berla oruakhwe wene ’balogulomma ai re, ’goduk ’gwi lagalomma o ogorli yatma re, ’gwi lagalom ano re ogola ebayat oruakhwe yethasulat, o ogorli pema-pema oruakhwe helep pam dipsogo werik ligakhit ’belagakhit o’gwe ’belagakhit re, e korma ogut hele’gik a’ge wago oruakma hasulat, tegis o. 27Odipmu en ogola eba re, ’goduk ’gogulomma abel sogweik akhit o’gwe o hegit hele’gik oruakma re, at ap ano en e, ’goduk ai pam en ’bekhit odipmu ’burl ’goduk ’gwi lagalomma o sogweik akhit o’gwe hegit takma ebano walhasulat, meter 50 hwerliat walhasumu nil hegi o.
Odipmu en toluk o ogola ebano abel ’belagakhit ’goduk ’gwi lagalom hegit il hesi wene
28Pobuk an woknoboluk Allah owi werik odipmu eba ’goduk ’gwi lagalom akhit o abel ’belagakhit-o’gwe eba en da’gwil toluk nobo ’guagalagarik, ’goduk ’gwi lagalomma o ogorli yatma re ’gogulomma o abel ’belagakhit o’gwe ano walhesirik, pema meter pam walhil laga a’ge ano hegit nagat walhasulat, 29Is ap o ’gwelabogo wolom a’ge onowi ogorli-ogorli legenak a’ge emin, ogorli pema-pema oruakhwe helep pam dipsogo werik a’ge ano emin, ’gwilotluk wene ’balogulomma emin, meter pam walhil pema naduk walhegeik walhil laga ano ’gela’ge nak walhasumu hasulat, ’goduk ’gogulomma ogorli yat odip akhit en o ogola ’gogulom a’ge ano emin, ’gwilotluk wene ’balogulom emin, ebano re, yendela ebale nak emde ’balogo-balogo oruakma hasulat, ye, ’goduk ’gogulomma o ogorli yat ano re, meter 25 hwerli walhasulat, ’goduk eliko lok a’ge meter 12 hwerli walholuk mesik ’burl o’gwe walhasulat, tagoma hasulat, tegis o. 30Allah owi werik odipmu en ogola ebano ’gwi lagalomma ’goduk gogulom ’gwi lagalomma o ogorli yatma ’gwilotluk, wene ’balogulomma ’berlek ebano re, jendela ele eliko lok a’ge meter 12 hwerli walholuk mesik ’burl o’gwe waltak a’ge welat ye, ologun yat ai re, meter ’biren takpoluk, mesik ’burl waltak a’ge welat, asogo takhegi o. 31Odipmu otlobuno en o ogola ’gwi lagalom a’ge wene ’balogulomma olukhwe re, odipmu ’burl hegit eba ebelak oruakma nil yethasulat, ’goduk lagabak esa’go pema-pema petne e korma ogut hele’gik a’ge nil yethasulat, ye, ligotluk da ’goluk ’gogulomma yel berla ano 8 pam tak a’ge oruakma nil hasulat, tegis o.
Odipmu en o ogola ebano mo il pou wago hegit eba ’goduk ’gwi lagalom o’gwe il hesi wene
32Asogo tegeimu, Allah owi werik odipmu o mo il porlu ago hegit eba woknoboluk nobo’gwegeirik ’goduk ’gogulomma ogorli yatma ’gogulom ano re, ’gwi lagalom a’ge ano walhasulat, ado walhil laga a’ge ano hegitsogo nagat walhasumu nil hasulat, 33Is ap o ’gwelabogo wolom a’ge onowi ogorli-ogorli legenak a’ge ebano emin, onowi ogorlirak pema-pema helep pam dipsogo werik a’ge ano emin, ’gwilotluk wene ’balogulomma emin, elira’ge pema walhil laga a’ge ano hegitsogo nak walhasulat, ’goduk ’gwi lagalomma o ogorli yatma, ’gwi lagalom a’ge ano emin, ’gwilotluk wene ’balogulomma emin, ano re yendela emde ’belak a’ge nak heli’gogo oruakma nil hasulat, ye, ologun yat a’ge ai re, meter 25 hwerli en walhasulat, ’goduk eliko meter 12 hwerli walholuk mesik ’burl delnasogo walhasulat, tagoma nil hasulat, 34’Gwilotluk wene ’balogulomma abel e, odipmu ’burl hegit eba akhit op oruakma hasulat, ’gwi lagalomma ’goduk legeik lagabak pema-pema akhit e korma ogut hele’gik a’ge hasulat, ye, ligotluk ’gogulom a’ge yel berla ano 8 pam oruakma hasulat, tegis o.
Odipmu eba o abel akhit hegit eba ’gwi lagalom a’ge il hesi wene
35Asogo e tegismu, ap ano en, an woknoboluk ’goduk ’gwi lagalomma o o’borl akhit o’gwe eba nebei lagarik ’goduk ’gwi lagalomma o ogorli yatma ’gwi lagalom a’ge ai walhasulat, pema walhil laga ano ’gela’geat, walhasumu nil hegi o. 36Is ap o enil ’gwelabogo wolomma onowi ogorli-ogorli legenak a’ge emin, onowi ogorli pema-pema helep pam dipsogo werik a’ge ano emin, ’gwilotluk wene ’balogulomma emin, pema walhil laga a’ge ano emin hegitsogo nak walhasumu nil hasulat, yendela emde ’belak a’ge nak heli’gogo oruakma hasulat, ’gwi lagalomma o ogorli yatma nak ’gwi lagalom a’ge ologun yat a’ge re, meter 25 walhegeik nak oruakma hasulat, ye, ’goduk eliko lok e, meter 12 walholuk mesik ’burl walhegeik oruakma nil hasulat, asogo takpoluk, 37’Gwilotluk wene ’balogulomma olukhwe re, odipmu ’burl eba hegitsogo oruakma hasulat, ’gwi lagalomma ’goduk yel’berla lagabak pema-pema re e korma ogut hele’gik a’ge hasulat, ye, ligotluk ’gwi lagalom a’ge yel’berla 8 pam oruakma hasulat, tegis o.
Allah ebaget wusogo wogogulomma ebale ogorlitak a’ge oruakma il hesi wene
38Odipmu en o ogola eba ’goduk ’gwi lagalomma o ogorli yatma re, ’gwilotluk wene ’balogulomma hundomok pema ebano Allah ebaget wusogo odouk narlumu ik pam ho togulomma o ogorlirak yel hele’gik oruak nakma hasulat, 39Allah ebaget wusogo oduk narlogulat, onowiak erlagapsogo pou wagoluk ebaget wusogo wogogulat, Allah ebaget pogwi a’ge lelak poluk enede ebet ago holuk ebalema pogulat tugulomma o ogorli yatma ’gwi lagalomma wene ’balogulomma eba pema-pema e ebale, ’biren pam delak oruakma nil hasulat, 40O o’borl akhit o’gwe hegit eba o ogorli yatma re, ’gwi lagalomma yel’berla takma wene ’balogulomma helep pak werik a’ge o o’borl akhit o’gwe hegitsogo ebano, e delak ’biren a’ge oruakma hasulat, ye, yel ’berla takma pema-pema e delak a’ge ’biren oruakma hasulat, 41Asogo tegistik, o ogorli yatma ’gwilotluk wene ’balogulomma pema e 4 pam delak, ye, pema e 4 pam delak, a’ge ai, la’buksogo 8 pamatma re, Allah ebaget wusogo wogoum a’ge ano ai pam warogulom a’ge hegi o. 42Allah ebaget wusogo oduk narloum a’ge paget helep ebak a’ge 4 pam delak a’ge ai emde le’gik en ’belak ai re, meter mesik e ’burl o’gwe o’borl walhe’gik tak a’ge nak welat, emde wi-waling e, hegit ai re, hegitsogo nak meter mesik ’burl o’gwe o’borl pam walhegeik nak tak a’ge welat, ye ologun yat akhit, logo a’ge re, meter mesik ’burl nak walhegeik nak tak a’ge oruakma hegi o. Allah ebaget wusogo odouk narlogulat, pema ebaget wusogo wogogulat, togulat tugulom a’ge di a’ge yu a’ge ano, helep delak a’ge ai pam pogulom a’ge paget hasulat. 43Ye, helep pam werik a’ge weling-waling ap ene’gik ogut a’ge ’gela’ge ’get ’biren hele’gik a’ge nak sepnogo oruakma hasulat, e delak a’ge pam emin, helep duelak a’ge pam emin, ai re, Allah ebaget wusogo wogogulat, einnyo po a’ge paget oruakma hasulat tegis o.
Allah eiye a’ge onowi ogorlitak oruakma il hesi wene
44Allah owi werik odipmu en o ogola eba ’gwilo a’ge o ogorli yat a’ge ha’gogulomma o’borl o’gwe eba o ogorli ’biren ogorlitak oruakma hegi, Asogo hegi ano re, mesik e, ’goduk ’gwi lagalomma o o’borl akhit o’gwe eragam oruak a’ge ano sogweik abel akhit o’gwe opsogo oruakma nil hasulat, ye, mesik, ’goduk ’gwi lagalomma o sogweik akhit o’gwe hegit eba eragam oruak a’ge ano, o o’borl akhit o’gwe o op a’ge oruakma hasulat, tigis o. 45Asogo tigismu re, ap ano en an mo’gulneselat, o ogorlitak abel sogweik akhit o’gwe hegit eba opsogo oruak ano re, is Allah eiye a’ge en Allah owi werikmu en togulom a’ge ano enebagerat o. 46Ye o ogorlirak mesik o abel sogweik akhit o’gwe opsogo, oruak ano re, is ap Allah eiye a’ge en Allah ebaget wusogo oduk narlogulom a’ge ano enebagerat o. Is Lewi a’ge en e, Allah eragam wotluk il pam nak ebaget pogulat, tu ano re, ena’gul onuk Zadok a’ge en nagatma re, o ogorli ai at pam weiyelak a’ge eiyagai ano enebaget at o. 47Asogo mo’gulnesirik, Allah owi werik odipmu ebano walhasulat, ologun yat a’ge emin, eliko lok a’ge emin, ebaget e’birek ai ’gela’geat emin hegitmu re, ologun yat akhit e, meter 50 hwerli walhasulat, eliko lok ai re meter 50 hwerli walhasulat, tagoma hasulat, ye, Allah ebaget wusogo odouk narlogulomma ai re, Allah owi werik selakma eria oruakma nil hasulat, tigis o.
Allah owi ’get werik a’ge il hesi wene
48Asogo il yethasuam e, ap ano en an woknoboluk Allah owi werikmu ’gwi lagalom wene ’balogulomma ebano nebei lagarik, wene ’balogulomma ’goduk lagabak a’ge ano walhasulat, ologun yat pema-pema ano re, meter ’biren takpoluk, mesik ’burl me’gisogo, walhasulat, ’goduk ’gwi lagalomma, eliko lok ai re, meter 7 at walhasulat, ye, helep pam wetil ligaga a’ge pema-pema lagabak a’ge eliko lok wigalak ai re meter mesik takpoluk mesik ’burl me’gisogo, walhasulat, 49Allah owi werikmu ’gwi lagalom wene ’balogulomma eliko lok wigalak le’gik ’belak ai re, meter 10 hwerli walhasulat, ye ologun yat le’gik ’belak ai re, meter 6 walhasulat, tago hegi o. Allah owi werikmu ’gwi lagalom wene ’balogulomma ligagai a’ge yel’berla ano re 10 hwerlitak a’ge welat ye yel’berla lagabak a’ge pema-pema agorak a’ge legeik ’belak o’gwe emin lagabak welat, tak oruakma hegi o.
Currently Selected:
Yehezkiel 40: Wul
Highlight
Copy
Compare
Share
Want to have your highlights saved across all your devices? Sign up or sign in
