Yehezkiel 20
20
“Allah en mo’gulnentasu a’ge, tu nenebit o,” oluk egesa wene
1Woknonoboluk nonobou wegesema oruakhwe, tahun 7 arat takpoluk, mesik togulat dugwi 5 pelelak poluk, mesik pelelak a’ge tanggal 10 dugwi ai a’ge pam is Israel a’ge onuelak enebe meren ’gela’ge en, “At Allah en egei a’ge ano mo’gulnontouwak o,” oluk, wegesarik, an neragam huregesa. 2Huragaiam, at Allah en an mo’gulneselat,
3“Aphwami en dogo a’ge yu o. Israel onuelak ai mo’gulentasulat, At otok modok welago a’ge Allah en egei oluk mo’gulonto ano re, yuat o. An oso a’ge niouwogoluk, wegep a? An en eselegi a’ge is logon houwa erlagat o, oluk, An nelaluk notok modok welago a’ge an Allah enat egi o. 4Aphwami en dogo a’ge yu o. Hat en is onowene a’bosu ’balu a? Hat en is onuak lolonobu op epegen a? Op holuk e, is ene’balak en wiak enemelmel a’ge tugu legesa a’ge ano modok ’beli’gogo mo’gulontomup o. 5#Kel. 6:2-8Mo’gulentasulat, At otok modok welago a’ge Allah en wene egei ano re yu o, oluk, is mo’gulonto ano yuat. An en is Israel migenebegis a’ge agauwa ai pam, wene yu demat o, oluk, at Yakub en dogo’gwe a’ge wigalak ano nemin hwedik-takpoluk ’balegis o. Is o Mesir pam eba oruakma re, nanni niouwagoluk, tagalat, An Henaik Allah ai re, anat o, oluk, ho’buk ’balegis o. 6Agauwa ai erlige is mo’gulentasulat, His o Mesir en wokhonoboluk liplau wotluk, di owi yu owi e’gerlakma ’gwiang modok op nak agamu a’bosu emin, gin a’bosu emin, ik elaruk ’gela’ge horluk-horluk ’bu agoma ’gwiang an en his henebaget polik pegimu ebano wokhonoboluk henebei laik o, oluk, mo’gulentesirik, ho’buk ’balegei. 7Ho’buk ’balegeirik, is mo’gulentasulat, An henaik Allah anat oruakhwe, letnontouak o, oluk, enapseri a’ge asua ogut hele’gik a’ge erliktogwi ano hun-hundomok enat ukpemit o. Is Mesir a’ge enasua motluk lagai ano pam wiagaphorlogumu no oluk, motluk lo mia o. 8Mo’gulentegis a’geat de, an en mo’gulentasu a’ge ano tu a’ge enebit epegesarik, an niak holu erlakma en ukpoluk, letnontouwak o, oluk, enapseri a’ge ogut hele’gik erliktogwi a’ge ano ukpogulat, is Mesir a’ge enasua ano ukpo erlakma en, togwi holuk, an nolot het herlilogo enebam pasulat, is o Mesir oruakma enebam pasulat tik o, oluk eberegis. 9Asogo eberegis a’geat de, di aphwami yu aphwami enil pam an en is Israel a’ge, o Mesir en wogonoboluk liplau wom wene egimu re, di aphwami yu aphwami is enemin welagai a’ge ai en an nonuk op a’ge ano wiagapsogo pogumu no oluk, eberegis a’ge ano tu erlakma en ukpoluk,
10O Mesir en wogonoboluk liplau wegirik, o leimu onobou wegi o. 11#Ima. 18:5Onobou wegimu oruakhwe, wene le’gelak a’ge emin, nowene ’belak a’ge emin, togwi holuk e, enelalugat welemma re, enelaluk welemagoluk, wene le’gelogo mo’gulentasulat, togulom wene ano mo’gulentasulat, tigis o. 12#Kel. 31:13-17Allah an enat is poligenebegi a’ge ano enaluk agalat wene nemin ege a’ge ano eberogulat, togu lemagoluk enaluksogo nogo 6 takpoluk, nogo 7 pam Set hwalogo wolom wene ano ogo mo’gulentegis o.
13Ai tegis a’geat de, is aphwami Israel o leimu en an mo’gulentasu a’ge ano tu enebit opogulat, niak mo’gulentasu a’ge ano togwi holuk, enelaluk welema a’geat de, oruakhwe wene le’gelogo mo’gulentegis a’ge ano sagalogo pogulat, tugulom wene mo’gulentegis a’ge ano ukpogulat, ye, nogo 6 nogoluk, hubet o’gwe set hwalhorlogu lomma pulogo pagathwerlegi a’ge ogo re, wiagapsogo pogulat, tigisa o. Asogo tegisema, o leimu ebayat nolot het modok enebam poluk enebe erlagapsogo enebaigoluk epegi a’geat de, 14di aphwami yu aphwami enil oruakhwe, Israel a’ge wogonoboluk liplau wegi ai en nonuk op a’ge ano wiak aga a’ge niogumu no oluk, tu a’ge eberegis a’ge ano erlagap pegi o. 15-16#Bil. 14:26-35Enasua ogut hele’gik a’ge ano nak motluk lo a’ge nak enede epegesa ano pam tugulom wene mo’gulentigis a’ge ano ukpogulat, wene le’gelogo mo’gulentigis a’ge ano motluk lo erlakma en selangtak pogulat, ye, nogo 6 nogoluk, tono ’gela’ge set hwalhorlogu lomma pulogo pagathwerlegi a’ge ano sagalogo pogulat, togu legesema re, is mo’gulentasulat di owi yu owi ’berlegat e’gerlakma ’gwiang modok op a’ge wokhentegismu, agamu a’bosu emin, ’gin a’bosu emin, ik elaruk ’gela’ge horluk-horluk libagoma eba henebei laik erlak o, oluk, wene ai, is demat opou wagoluk, o leimu eba ho’buk ’balegis.
17Ho’buk ’balegis a’geat de, nil yetholuk is enebe nedeap onoboluk, o leimu eba enebe erlagapsogo enebasulat, ena’guluak arat erlagapsogo enebasulat, tu erlak o. 18Is eneiyagai o leimu oruak a’ge ebano mo’gulontogulat, henaiklak en wene le’gelogo mo’gulhontogu legesa a’ge ano motluk lagalat, togulom wene ’balogo pegesa a’ge ano til lagalat, ye, is enasua ogut hele’gik a’ge ano alik worogwi ano pam henebam wiagap pagathorlo ’gela’ge, til lagalat, tu mia o. 19An henaik Allah ai re, anatma re, an en wene le’gelogo mo’gulhentasu a’ge ano motluk lagalat, tugulom a’ge niak mo’gulhentasu legi a’ge ano opsogo togulat, 20Hene’gik hebarligen pam his en a’ge di a’ge yu a’ge tugulom obat a’ge at de, agauwa sabit a’ge pam An Henaik nebaget erliknobogu lemagoluk polik pagathwerlegimu re, An his henaik Allah Anat oluk enaluk ema ai en e, mo’gulentegis ai o.
21Mo’gulentegis a’geat de, is eneiyagai ai en an en mo’gulentasu a’ge ano, tu a’ge enebit opoluk, niak mo’gulentasu a’ge togwi holuk e, enelaluk welema a’geat de, takhweat, wene le’gelogo mo’gulentegis a’ge ano motluk lo erlakma en selangtak pogulat, tugulom a’ge niak mo’gulentegis a’ge ano opsogo tu erlakma en ukpogulat, ye, nogo 6 nogoluk, loruk o’gwe Set hwal horlogulom a’ge pulogo pagathwerlegi a’ge ano ogo re, wiagapsogo pogulat, tigisa o. Asogo tegisema, o leimu eba nolot het enebam herlelik pasulat, nolot het pasulat, odouk ’gela’ge enebam pasulat, tak paik oluk nede eberegis a’geat de, 22ne’gik orlou holuk, moat egi o. Di aphwami yu aphwami enil pam Israel a’ge ’gela’ge wogonoboluk liplau wegi ai en nonuk op a’ge ano wiak agoma niogumu no oluk, tagonobo a’ge eberegis a’ge ano erlagap pegi o. 23-24#Ima. 26:33Enaiklak enasua ogut motluk lo a’ge enagai modok hogulat, tugulom a’ge niak mo’gulentegis a’ge ano tu erlakma en ukpogulat, wene le’gelogo mo’gulentegis a’ge ano Sagalogo pogulat, nogo 6 nogoluk, loruk o’gwe Set hwal horlogulom a’ge pulogo pagathwerlegi a’ge ano wiagapsogo pogulat, tegisema re, is mo’gulentasulat, di aphwami yu aphwami ene’gerlakma peragenebasulat, di owi yu owi ’berlegat ’gwelap enebiselat tik o, oluk, o leimu eba en mo’gulentesirik, wene ai demat opou wagoluk, ho’buk ’balegis o.
25Asogo tugu lemagoluk, wene wiak a’ge mo’gulentasulat, tugulom a’ge wiak hweat de, togu lemagoluk, wene mo’gulentasulat, 26Ye, an Allah at enaluk otluk, enapseri hil laga lemagoluk eneiyagai naduk dogo a’ge enasua ebaget wusogo, wogontogwi ai pam enebam wiagap pagathorlouwagoluk, ukpasulat, tegis o.
27Asogoat takpegimu re, aphwami en dogo a’ge yu o. At otok modok welago a’ge Allah nak wene disogo egei o, oluk is aphwami Israel mo’gulonto a’ge ano yuat o. Is ene’balak en an uknoboluk mi-miarak nobogulat mesik tegisa ano re yuat o. 28An en ’gwiang wokhentaik o, oluk, ho’buk ’balegismu ebano wogonoboluk enebeil lasuam e, is en dom-dom yat a’ge pam e e’gik dal-paltak a’ge edipmu ebano yethogwi ’gal e lekho edipmu ebano enasua uam wusogo wogogulat, nolot het emagoluk, enebaget pou wagalat, enasua paget e’ben op a’ge odouk narlogulat, enebaget a’bosu herlilogo pogulat, tigisa. 29Asogo togwiam e, an en is mo’gulentasulat, dom yat a’ge ai pam no houwogoluk ligagalegep? oluk, mo’gulentegis o. Dom ai onuk, dom yat a’ge asua togumu o, oluk o yogodak ogo ogwiat oruak o.
Wiak o’go tagenebasulat, wiak erlagapsogo enebasulat, tago wene
30Asogoatma re, at otok modok welago a’ge Allah en wene disogo mo’gulhentesi o, oluk, is aphwami Israel a’ge mo’gulonto egei ano re yuat o, ai ’gela’ge e ’balak enebam wiagapsogo pagathwerlegesa ai ’gela’ge, is ene’balak yu, tak pagathorlogulat, ene’balak enasua ogut hele’gik a’ge ano motluk lo opogwi a? 31Enasua ebaget wogontogulat, eneiyagai naduk dogo a’ge wusogo enasua ebaget odouk narl onobogwi ano pam e, o naduk en ’bekhit, o yogodak hwerli enebe wiagap at tak pagathorlogwi o. Asogo togulat, is Israel a’ge ai, At Allah en oso a’ge ai mo’gulnontouwak o, oluk, an neragam wagai holuk an en, his an mo’gulnemis o, oluk, mo’gulonto op a? An asogo mo’gulentaik modok erlak o, oluk, nelaluk notok welegi a’ge an Allah enat, egi o. 32Is en ogulat e, nis di aphwami yu aphwami mu a’ge ’gela’ge, di owi yu owi aphwami ena’gul onuk lo’bok en emin, helep emin, erliktogwi ’gela’ge, tu nenagai, opogu lege o, oluk ogukhwe entegis ai, ’gela’ge ema modok erlak o.
33Niak anni pam en wene le’gelogo mo’gulentasulat, ne’gik anni pam takpasulat, nolot het enebam pasulat, wene enebam a’ge erlagap pasulat, tik o, oluk, nelaluk notok welegi a’ge an Allah enat egi ai o. 34Niak anni pam en, ne’gik anni pam en is di aphwami yu aphwami oruak a’ge ene’gerlakma en wogonoboluk liplau wagalat, di owi yu owi ’bullak no’gumu ebano en odoksogo enebasulat, tik o. 35O lei o’gwe wogonoboluk wegi ano ’gela’ge, is wogonoboluk di aphwami yu aphwami ene’gerlak o’gwe enebeil lotluk, ebayat nenil yet ’ben ’bogulat, disogoat tigepma o, oluk, wiak enebam a’ge no’gorliselat wiak o’go enebam paik ani o. 36O leimu ’gwiang o Mesir pam eba an en ene’balak onowiak erlagap tagalat wiak o’go tagenebegi ’gela’ge, is asogoat tagenebaik o, oluk, An notok modok welago a’ge, An Allah enat egi o.
37 Domba enebe opsogo wenagonobogwi ai ’gela’ge, is nua’gun eragam ’guagalat togukhwe nemin wene ’balige a’ge ano ’gela’ge togu lemagoluk, nolot het pam onolukhwe hwelak enebaik o. 38Is an mo’gulentasu a’ge ano tu enebit opogwi a’ge emin, niak sagalogwi a’ge emin, ene’gerlakma en ogorlirak onoboluk, o is welagaimu en wogonoboluk liplau weik a’geat de, Israel ono’gwiang pam ’gwi louwa erlak o. Asogo tagoam e, An Allah at enaluk ema o.
39Is Israel a’ge ai nak e, An notok modok welegei a’ge an Allah en wene mesik mo’gulonto a’ge mo’gulheselegi a’ge ano yuat o. Is Israel a’ge ai re, enebe hun-hundomok en enasua ogut hele’gik a’ge erliktil laga lemak o. Asogo til laga lemarik, ologun pam an niak enesa’go hwelak poluk, enasua ebaget pogulat, uam wusogo wogogulat, togwi ano pam an nonuk modok omu degelak a’ge wiagapsogo pogwi ano mesik emin wiagapsogo pouwa erlak o. 40An nebabut omu degelak a’ge Israel welagaimu modok logo eba is Israel a’ge ’berlegat an erliknobogu lema o. Ye, ebayat nebaget pou wagai holuk, nogola nagai en enat wasu leik o. Is an nebaget wusogo woknogwi a’ge emin, e’gen naduk-naduk daganak nebaget pogwi a’ge emin, nebaget o muat pulogo poluk, woknogwi a’ge emin, o ebayat nebaget pou wagalat, togulom, oluk mo’gulentaik o, oluk, An notok modok welegi a’ge Allah enat egi ai o. 41Is di aphwami yu aphwami ene’gerlakma en lebik onobou wagalat, di owi yu owi yarluk egesarik oruakma ebano en odoksogo onobou wagalat, asogo tagalat, e’ben modok op a’ge ’gela’ge nagai en enebe asogoat wogenebiselat, di aphwami yu aphwami enil oruakhwe an modok op degelak welagoma ebano oruakma niouwagoluk, takpasulat, tik o. 42’Gwiang wokhentaik o, oluk, ene’balak mo’gulentasulat, ho’buk ’belakma Israel ono’gwiangma ebano onobou wagoam e, An Allah at enaluk ema o. 43O eba welat, enebabut welegesa a’ge emin til lagai ano pam wiagapsogo pagathorlo a’ge emin eberak poluk, wiak nakhweat de, togu lege, ogu legesa ano pam nis enapseri a’geat welegema hege o, oluk, ua o. 44Is Israel a’ge ai wiak til lagalat, enapseri a’ge til lagalat, togwi ano an o’go hegitsogo tagenebaik erlak nonuk wiak agoma naduk op welemagoluk, takpasu holuk, An Allah at enaluk ema o, oluk, notok modok welago a’ge an Allah enat egi o,” oluk mo’gulnesimu mo’gulhentegis o, oluk, mo’gulentegis.
O sogweik akhit hegit eba en odouk magale dainsogo waga wene
45At Allah en an mo’gulneselat,
46“Aphwami en dogo a’ge yu o. Hil o abel sogweik akhit orogobune yetharok wolomup o. Yetharok woloroguntik, Sogweik akhit eba yetharok welat ’gwiang ai wene yageselat, o Sogweik akhit e’gela eba en, disogo takhobouwa o, oluk, mo’guleselat, tin o. 47O Sogweik akhit o pare eba mo’guleselat, e, At otok modok welago a’ge Allah en, wene disogo, mo’gulhosoma re, At Allah en mo’gulhoso a’ge yu hesa’go hwelise lomup o. Di agan yu agan un oruak a’ge emin, ’buk oruak a’ge emin, odouk nil louwagoluk an en odouk mu’gwelak paigoluk taga legi o, mu’gwalogo paik a’ge ano nekhisogo po miayatma re, o Sogweik akhit en ’bekhit o abel akhit hegit en e e’gela herle e’gela ’berlegat odouk en nil louwa ani o. 48Odouk ai nekhisogo po mia holuk e, At Allah enat odouk mu’gwelakpesimu hegi o, oluk, di aphwami yu aphwami ’berlek enat ua o.”
49Mo’gulnosoam e, an en at mo’guleselat, hat hotok modok welegen a’ge Allah o! An en mo’gulentasuam e, is en nobok ogulat e, at yu re, wene ebam elitsogo nak mo’gulnentasu a’ge ano erlak no? oluk, ogwi o, oluk, mo’gulegis o.
Currently Selected:
Yehezkiel 20: Wul
Highlight
Copy
Compare
Share
Want to have your highlights saved across all your devices? Sign up or sign in
