Yehezkiel 18
18
“Enaiklak wiak tua ai pam eneiyagai wene enebam ema erlak o,” oluk egei wene
1Nenaik ’gain Onuk Logo a’ge en e, disogo mo’gulnesi,
2 #
Yer. 31:29
“O aphwami Israel oruakma da ya en eniak agamsogo ogulat e,
Enaiklak anggur e’gen esigwiak a’ge no’gwiam e, eneiyagai eniak emi lung oso, oluk ogwi modok welagai ai nopaget.
3An henaik Allah ’gain Nonuk Logo a’ge nelaluk welago a’ge nebegilsogo re, his aphwami Israel a’ge en e, eniak lagaksogo ogwi a’ge ai, pobuk ogu lema modok erlak o. 4Aphwami ’berlegat enebe lo’bok, enaiklak emin, eneiyagai emin, enebe an en a’ge o. At wiak tua a’ge oruak aiat ebe warema ani o. 5Aphwami logon enebabut op, enesa’go werak welat, hegitsogo togwi a’ge paget enebam elit haik o. 6Is enebabut hegitsogo togwi a’ge ai re, ondogwi enasua uam wusogo sagogumu enemin no’gulat, aphwami Israel a’ge logon ondogwi enasua erliktogulat, hwami ap logon onugwami enemin nogo ogulat, hwami enemep lasukhwe enemin nogo ogulat, togwi modok erlak o. 7Aphwami logon lalonobogulat, ena’ge-a’ge delogo horlogulat, togwi modok erlagat o. Ye, is ena’ge-a’ge aphwami logon lodu paget wogontogulat, is en a’ge logon edip sioksogo tenak poluk wolomtik en, eiye om erlakma en pobuk ’berlegat togolik wogontogwi o. Aphwami logon onso’boru nele oruak holuk e, is onso’boru a’ge wogontogulat, aphwami logon onosum erlak a’ge oruak holuk e, ’buktak onobogulat, togwi o. 8Di a’ge yu a’ge is logon lodu paget wogontogulomtik, ebe togolik wogulat,
Logon emin ebam lo’boksogo woknentemit o, oluk ogwi erlak. Is logon wiak tuogoluk togumu, ogoiyesogo ukpogulat, is logon en is logon enemin wene ’balogumu, is en wene hegitsogo hwalontogulat, togwi o. 9#Ima. 18:5Is e, enebe an nebam lo’boksogo welat, an en e,
Disogo togu lomup, asogo togu lomup, oluk enesa’go weriselat, mo’gulentasulat, tegis a’ge ano hegitsogo hologo togwi o. Aphwami enebabut op, hegitsogo asogo togulomma enelaluk modok welemaat o, oluk an henaik Allah ’gain Nonuk Logo a’ge en arat egi o.
10Asogo a’geat de, is ai eneiyagai logon dagonobua a’ge enebabut wiak en, aphwami logon ena’ge-a’ge delogo horlogulat, enebe onorogulat, di wiak yu wiak logon togulat, 11is enaiklak togwi erlak a’ge asogo togulat, togulat e, wam, di a’ge yu a’ge ondogwi enasua uam sorogumu enemin no’gulat, hwami ap logon onugwami a’ge enemin nogo ogulat, togwi o. 12Is e, aphwami enerlagaik a’ge lalonobogulat, ena’ge-a’ge delogo horlogulat, is ena’ge-a’ge aphwami logon lodu paget wogontogulat, is en a’ge logon edip sioksogo tenak poluk wolomtik en, togolik wogonto erlakma en modok horlogulat, ondogwi enasua an en napseri a’ge erliktogulat, 13ena’ge di a’ge yu a’ge is aphwami logon lodu paget wogontoluk, ebe hegitsogo a’ge wogulat,
Akhen ebam sebasogo woknentemit o, oluk ogulat, togwi o. Is aphwami enebabut asogo togwi a’ge ai pobuk enelaluk welema epegen a? Erlak o. Is en e, enebabut an modok napseri a’ge togwi ai pam, onu’gwarek ene’gik ologun pamat enebe waremaat o.
14Asogo a’geat de, is ap enebabut modok wiak togwi a’ge ai, eneiyagai dagonobua a’ge ai en, enaiklak enebabut wiak togwi a’ge ai enil holuk, pobitak poluk, is enebabut wokho tu erlakma en ukpogu lema o. 15Asogo welat, aphwami Israel a’ge onodogwi enasua erliktogwi erlak, wam, di a’ge yu a’ge ondogwi enasua uam warotluk no’gumu eba en enemin no’gwi erlak, ukpoluk, hwami ap logon onugwami a’ge enemin nogou erlakma en, mo oluk, 16is aphwami logon wik-wiak tagonobogulat, ena’ge-a’ge delogo horlogulat, togwi erlak o. Di a’ge yu a’ge aphwami logon lodu paget wogontogulat, is ena’ge mesik edip sioksogo tenak poluk wogonto erlakma modok horlogwi erlak o. Ye, aphwami logon onso’boru nele oruakma, is onso’boru a’ge wogontogulat, onosum erlak a’ge oruakma ’buktak onobogulat, togwi o. 17Is logon en wiak tuogoluk ogwiam, ogoiyesogo mo ogulat, is en di a’ge yu a’ge is logon lodu paget wogontogulomtik, ebe togolik wogulat,
Logon emin ebam mangnosogo woknentemit o, oluk ogulat, togwi erlak o. Asogo togulat, an en e,
Disogo togu lomup, asogo togu lomup, oluk henesa’go weriselat, mo’gulhentasulat, egi wene ai hegitsogo togulat, hologo togulat, togwi o. Is malik enebabut asogo togu lema a’ge holuk, enaiklak wiak togwi ai pam is warom e, erlak o. We, is enebam selak enelaluk op welema o. 18A’geat de, enaiklak enepenen en is logon lalonobogulat, is logon ena’ge-a’ge delogo horlogulat, aphwami onue enari a’geat enemin welat, di wiak yu wiak logon togulat, togu lema ai pam en ene’gik ologun pam onu’gwarek enebe warema o.
19Asogo a’geat de, his logon en e,
Eneiyagai enaiklak wiak togwi ai pam wene enebam ema erlak ai nopaget, oluk hin wokhoat o. Asogo ogwi holuk e, o’go disogo mo’gulonto yo,
Is malik ai enebabut e, op, hegitsogo togulat, an nemin lo’boksogo welat,
Disogo togu lomup, oluk henesa’go weregis wene ai hegitsogo togulat, togu lema ai pam enelaluk opsogo welema o, oluk mo’gulonto yo. 20#Ula. 24:16At wiak a’ge oruak aiat ebe warema o. Holuk e, enaiklak wiak togwi ai pam, wene enebam agalat eneiyagai enebam aga lema erlagat o. Ye, eneiyagai wiak togwi ai pam, wene enebam agalat, enaiklak enebam aga lema erlagat o. Is aphwami enebabut op togu lema ano pam, pobuk op agalat, is logon enebabut wiak togu lema ai pam wiak agalat, tua ai o.
21Asogo a’geat de, aphwami wiak togwi a’ge ai ukpoluk, enebabut heberlotluk e, wene an en,
Disogo togu lomup, asogo togu lomup, oluk henesa’go weregis wene ai hologo togulat, hegitsogo nak togu lorogup holuk, enebe pobuk enelaluk op welema o. 22Is wiak togwi a’ge ’baksogo ukpouwa a’ge ai pobuk nogola eberise leik erlak o. Ye, is enebabut op, hegitsogo togu lema ai pam pobuk enelaluk welema o. 23Hat hogola en e,
Nenaik ’gain Onuk Logo a’ge en e, aphwami enebabut wiak togwi a’ge ai enebe waragaiam ogola agai hasu, oluk epasu legen a? An asogo nogola nagai hasu legi erlak o. An nogola en e,
Aphwami wiak togwi a’ge ai ukpoluk enebabut heberlotluk, enebe pobuk enelaluk wolom aiat nagai epasu legi o.
24Asogo a’geat de, is logon enebabut op togwi a’ge ai tu erlakma en ukpoluk, enebabut pobuk wiak togulat, aphwami wiak togwi a’ge en di wiak yu wiak togwi ai ’gela’ge, an napseri a’ge ai togulat, togu lema holuk e, is pobuk op enelaluk welema epasu legen a? Modok erlak o. Is enebabut naduk op togu legesa a’ge ai ’berlegat pobuk nede eberik erlak o. Is an nebam lo’boksogo wolom erlakma en wiak togu lema ai pam enebe warema o.
25Asogo a’geat de, his logon en disogo ogu legep o.
Nenaik ’gain Onuk Logo a’ge en ’gorlo tiso, oluk ogu legebat. His aphwami Israel a’ge yu, an en taga legi ai ’gorlo taga legi a? Hisat ’gorlo togu legep ai o. 26Aphwami logon enebabut op togwi a’ge ai ukpoluk, wiak togu lema holuk, pobuk enebe wiak togu lema ai pamat warema o. 27Asogo a’geat de, aphwami logon enebabut wiak togwi a’ge ai, pobuk wiak togwi erlakma en ukpoluk, pobuk op togulat, hegitsogo togulat, togu lema holuk e, pobuk enebe op enelaluk welema o. 28Is enede en e,
Di wiak yu wiak taga legi ai wiak, oluk onogola en pobitak poluk, pobuk wiak tu erlakma en welema holuk, pobuk enebe warom erlakma en enelaluk op welema o. 29Asogo a’geat de, his aphwami Israel a’ge yu! His en e,
Nenaik ’gain Onuk Logo a’ge en ’gorlo tago yo, oluk ogu legep ai o. An taga legi ai ’gorlo no? Modok erlak o. We, his en togu legep aiat ’gorlo yo,” oluk egei.
30Nenaik ’gain Onuk Logo a’ge Allah en asogo egeitik mesik disogo egei,
“His aphwami Israel a’ge yu. An en e, aphwami enebe lo’bok enebabut togwi hegitsogoat wene enebam pasulat, no’gorliselat, tik o. Ai en e, his henebabut di wiak yu wiak togu legep ai en henebe wiagaphonobuano oluk e, wiak togu legep a’ge ai ukpoluk henebabut heberlomup o. 31His henebabut di wiak yu wiak togu legep a’ge ai ukpoluk, henede ’get omup o. His henebe waromat ai nopaget o. 32An aphwami logon mesigat holuk waragoam nogola nagai hasu legi puk. Nebit o. Holuk e, his pobuk henelaluk wolorogup en e, di wiak yu wiak togu legep a’ge ai ukpoluk henebabut heberlomup o, oluk an henaik ’gain Nonuk Logo a’ge en arat egi ai o,” oluk egei.
Currently Selected:
Yehezkiel 18: Wul
Highlight
Copy
Compare
Share
Want to have your highlights saved across all your devices? Sign up or sign in
