Yehezkiel 17
17
E, Anggur emin, tue kerra’lu emin, walhegeik egei wene
1At Allah en wene an mo’gulneselat,
2“Aphwami en dogo a’ge yu o. Wene walhegeik mo’gulentasulat, wene ebam elitsogo is Israel a’ge ’beli’gogo mo’gulentasulat, taga lomup o. 3At odok modok welago a’ge Allah en egei ano re, yuat o, oluk, mo’gulentasulat, tue kerra’lu lok agapsaburl yat, asu dape’gek-yape’gektak a’ge darak o dom Libanon pam loluk e aras a’gum tenak pesirik, 4e, ede’bi ano deksogo poluk, woluk is aphwami ena’ge-a’ge o’go ’balhorlogumu o erang mesikmu pei lagarik, is aphwami ena’ge o’go ’bal horlogumu o kota-ma mesik ebano yeregei. 5Yogo pesirik e’gela owi mesik Israel o’gwiang ai pam en wokho yabuk modok wogoma e’gela owi ano ’gwiang esei mu e hosu ’gela’ge ik eraluk lebago modok welagoma ebano yeregei. 6Yerisoam e, owi ano ’baktegeirik, e anggur ’gela’ge horoksogoat ligagalat e’gik dualogo pesi. E’gik duelak ano pam tue ano oruak o’gwe hegit ebano perakpasulat, eme’gen ’belak ’belabu agalat tegei. Asogoat tegeirik, e anggur ’gela’geat otluk, e’gik delak pasulat, erlit op a’ge sebeliselat tegei.
7O agauwa ai erlige nagat tue kerra’lu lok a’ge mu mesik agapsaburl e yat asu modok ma’bu a’ge wagama re, at tue ai en ik a’bosusogo woknemak o, oluk, yogoma ebano en eme’gen tue ano oruak o’gwe hegitsogo lagabak peligagalat, e’gik delakma tue ano oruakma perakpil lasulat, tegei.
8E, anggur ano re, e’gik didual tak pasulat, e’gen op a’ge ikho ’belakpou wagalat, asogo tagalat, e anggur op esei modok a’ge ’gwiarak ligagalemagoluk, ik eraluk porlolu tisoma eba ’gwiang esei modok o a’ge pam yeregei, oluk, mo’gulontomup o.
9Mo’gulentasu loroguntik, at otok modok welago a’ge Allah en egei a’ge oluk mo’gulonto ano re, mesik yuat o. E, anggur ai re, ebe modok ligema ya? erlak a. Aphwami en eme’gen henekho hwikhogulat, e’gen ’balogo pogulat, togwi-holuk e, we elalinat erlit owan hebeliso a’ge ano ’buk ema ano erlak? ’Buk ema atma re, eme’gen henokho hwikho ai re, logoatma re, ap e’gik anni pam ap enebe pam en tu epegep? erlagat o. 10E yogo a’ge ai, ebe momu yoru a’geat de op ligema epegep? O yasobu o mo liplau wago hegit en wetil wagalat, aganhan en ebe yorumu ebano at sawet-otluk, ’buk ema ano erlak no? oluk, mo’gulentemin o, oluk mo’gulnesimu re, mo’gulhentegis o,” oluk mo’gulentesi.
Wene ebam elitsogo egei ai telakmasogoat mo’gulesi wene
11Mo’gulentesirik, At Allah en wene mesik emin an mo’gulneselat e,
12 #
2Raj. 24:15-20; 2Taw. 36:10-13 “Is ap an niak tu enebit opogwi a’ge en wene mo’gulonto ano re, yuat o. Wene ebe elitsogo egei a’ge ebe ai re, henaluk a? erlak a, mo’gulentasu loroguntik, is mo’gulentasulat, ap onuk logo a’ge o Babel a’ge en o Yerusalem lagarik, is Yerusalem welagai a’ge onue onuk logo a’ge wasulat, ap onu’gwarek a’ge o Yerusalem welagai a’ge ebano wogenebiselat, taga lagarik, wogonoboluk o Babel togolik onobou weik oluk, tagalat, 13-14Is Yehuda a’ge at eragam tenentarok welagoma eba inom erlakma en Sebelak nak welat, ye, wene disogo togu lomok o, oluk, ’belak oruak a’ge ano nak til lagaiam e, enebe op nak welat, togu lemagoluk, ap ’gain Yehuda a’ge ebam en wigalak a’ge mesik wesirik, hat hiak nak hwelise leik en e, ho’buk ’balin o, oluk, mo’guleselat, ye, is ap o ai, tenakho welegesa a’ge ano wogenebegeirik, wogonoboluk lasulat, tegei. 15Asogo tegei a’geat de, ap onuk logo o Yehuda a’ge en inagalat, is Mesir a’ge en kuda emin, Ap enesegen oruak a’ge osilak enemin perak onoboumak o, oluk, wene wusogo osi peragenebesi. Tu a’ge epesirik, perak enebesi a’ge ebano re, demat ema ya? erlak a. Is asogo togwi holuk, enagap delhorloluk ’bogologulat, ye, wene ’belak a’ge ano sagalogo pogwi holuk e, enagap delhorlogulat, tua epegep? erlagat o.
16At asogo tegei ai, ap ’gain ai en at ap ai, ’gain welemagoluk, edikpasuam e, hat hiak nak hwelise leik o, oluk, ho’buk ’balholuk, pobuk, ai lok logo erlak o, oluk, sagalogo pesimu re, ap ’gain welagoma o Babel eba wareik o, oluk, nelaluk An notok-modok welegi a’ge Allah enat egi o. 17-18At wene emin ’belakpoluk ho’buk ’balegei ai, logo erlak o, oluk, sagalogo pasulat, wene demat togu lomok o, oluk, ene’gik hau wat-wat ogulat, hwalogo pegesema at de, is ’berlegat tagalat, tegeimu re, is Babel a’ge en aphwami enebe a’bigat wusogo onobouwok oluk, helep pak wogo a’ge eragam leget wokho pogulat, ’gwiang pil ligagalat togwi ai erlige at Firaun en lerentaik oluk, osi enesegen oruak a’ge a’bigat perak onobou wagalat, aphwami a’bigat perak onobou wagalat, tua erlakma re, agap delhorlouwa erlagat o,” oluk egei.
19Asogoatma re, at otok modok welago a’ge Allah en egei ano re yuat o. At nemin en wene hwalogo poluk, ho’buk ’balegis ai, lok erlak o, oluk, epasulat, Nemin en wene ’balogo pegi ano sagalogo pasulat, tegei a’ge o’go e’gin at ebam pasulat, 20tue hol pam ’gotnok uagoluk hol pogwi ai ’gela’ge nosum emde larak paikmu at ebe hol ’gotnok oso holuk, an niak pobirak poluk, tu erlakma re, ebe woluk o Babel pou weik tik, yema en owene a’bosu ’balogo taga laga ano o’go tak paik ani o. 21Ye, at osi enesegen oruak a’ge ’berlegat hweiye ’bogologukhwe wa’gun pam enebe werak waragalat, ye, ’bullak enebegesema ’bogolil lagai a’ge ebano re, o yasobu en e’gela herle’gela woluk lasuam nal palsogo yarluk oso ai ’gela’ge, di owi yu owi yarluk ogulat tua o. Asogo togwi holuk e, is en At Allah en egei a’ge anoat tago hege o, oluk enaluk ema, egei o.
22At otok modok welago a’ge Allah en egei ano re, yuat o.
“An nematek enat e, aras yat modok e di’bi hwedikmu re, ’baliseleik tik, owi yerik o, erlit nak owan sebeliso a’ge ano logon daksogo woluk dom mesik yat ’bogorl pam diptak a’ge pam nomu enat owi yerik o.
23Israel onodom yat a’ge petne, yogo paik a’ge ano e’gik ede’bi didual takpasulat, e’gen ikho pasulat, e aras ebe owan logagalat tago holuk tue il hunhun di tue yu tue ’berlegat e ano petne onowi wetil ’gogulat egik ede’bi duelak a’ge ano petne lekho opsogo wolomok oluk odok togulema o.
24Asogo tak paikmu ’gain Nonuk Logo a’ge en, e yat a’ge holuk e horogapsogo pasulat, e horok a’ge holuk e, yarapsogo pasulat, e un a’ge holuk e, sawerap poluk ’bugap pasulat, ye, e ’buk a’ge holuk e esemis libemagoluk unap pasulat tagalegi a’ge ano di agan yu agan o’gwiang pam di owi yu owi yogo a’ge ebano en ogo enalugat ema o. Wene yu ’Gain Nonuk Logo a’ge, an Allah enat egimu re, tik at oluk mo’gulhentegis o.”
Currently Selected:
Yehezkiel 17: Wul
Highlight
Copy
Compare
Share
Want to have your highlights saved across all your devices? Sign up or sign in
