Keluaran 2
2
Musa dagaga wene
1Asogo tagonobogu legesa eria hegit e, is en hwami wogonobogu legesa hegitsogoat, ap Lewi a’ge mesik en ugwe Lewi a’geat wesi. 2#Per. 7:20; Ibr. 11:23Wesimu, at hwe ano emalik ap mesik deregei. Asogo dakhwerlesirik ’gwelakhesi ’gal e, emalik ano ap a’ge modok op en hisogo poluk dugwi henagan welaga. 3Asogo hisogo poluk welaga a’geat de, emalik ano hisogo poluk modok wolom mia aga. Mia agama, at hwe ano en e, erlisabet ’gela’ge pam mul egesogwi ’gela’ge egeik a’ge wesirik e, ik ’guano oluk abel pema-pema a’bosu e sin akhwi ’gela’ge pam wusogo pesi. Asogo wusogo pesirik e, malik ano mul sum ogola yagarak poluk, ik Nil olomu woluk lagarik e, ik esa’goma erlisabet ’gela’ge e’gela a’bikmu e’gerlakma pesi. 4Asogo pesimu, at malik ano ebap hwelani a’ge en ot ano no’gosogo ema, oluk ebe walekma en il nak welaga.
5Il oruakma en, at Firaun agalogo ’gume weriogoluk lagarik, is hwelani logon ’gain owi pam eba yabuk togwi a’ge ik esa’go’gwe lak-wak osokhwe, at ’gain agalogo ano ik olomu ’begeitik il yethesi ’gal e, erlisabet ’gela’ge pam egeik a’ge ogola oruakma il hesirik e eragam welegesa a’ge hwele mesik en wogosu ’buagoluk mo’gulesi. 6Mo’gulesimu ’begeitik, wogosorlu agama, at ’gain agalogo ano en mul ogola ano hialholuk il ’gwelakhesi ’gal e, malik ano nge tegei. Asogo nge tisoma il hesirik e, ede agama disogo egei,
“Malik yu aphwami Ibrani a’ge enemalik ai o,” oluk egei. 7Asogo egeimu, at hwele malik ano ebap en e, ’gain agalogo ano disogo mo’gulesi,
“Nebab, malik ai agamu wogomogoluk an en e, hwe Ibrani a’ge mesik palo tu hagai a? Erlak a,” oluk mo’gulesi. 8Asogo mo’gulesimu, at hwele ’gain agalogo ano en e,
“I o, op at o,” oluk mo’gulesimu, at hwele ano en e, u’gwarek ia anoat worlhai laga. 9Worlhailasuam wagama, at ’gain agalogo ano en e, hwe ano disogo mo’gulesi,
“Nia. An pobuk o’go wokheik en e, malik yu woluk laguntik hagamu wogosolomup o,” oluk mo’gulesimu owi pam woluk lagarik agamu wogese laga. 10#Per. 7:21Asogo wogosoma en malik ano arat lok agama, ia en e, at Firaun agalogo ano wogesi laga. Wogesi lagama re, at emalik ’gela’ge yo’guliselat disogo egei,
“An nemalik yu ik olomu oruakma woluk orlu egi ai en e, onuk e, Musa o,” oluk tualegei.
Musa hweiye o Midian waga wene
11 #
Per. 7:23-28
#
Ibr. 11:24
Asogo onuk tualegeimu, at Musa arat lok agarik e, aphwami at a’gul a’ge yabuk modok e’gin a’ge ning-nangsogo enebam pegesema togumu il entaigoluk laga. Laga ’gal e, ap Mesir a’ge en ap Ibrani a’ge werisoma il hesi. 12Il hesirik, aphwami eragam o’gwe il orlok hesi ’gal e, erlak en e, ap Mesir a’ge ano ebe ’be’gi weregeitik, werak ano ik’berlik ogola hisogo pesi. 13Asogo hisogo poluk wagarik pobuk loruk o’gwe ogo lagayat. Laga ’gal e, ap Ibrani a’ge en are Ibrani a’geat ’go’bu werisoma il entesirik e, at ’go’bu werise laga a’ge ano disogo mo’gulesi,
“Hat hareat de, nopaget ’go’bu werise legen?” oluk mo’gulesi.
14Asogo mo’gulesimu, at ap ano en e,
“Hat nis nonue tenentarok welat, wene nenebam pasulat, no’gorliselat taga lemagoluk sa en edikhebesimu. Ap Mesir a’ge werigen ano ’gela’geat an watnebigoluk tise legen a?” oluk mo’gulesi. Asogo mo’gulesimu, at Musa ogorlok modok agarik ogola en e,
“Eige, nogorlok e. An tegis ano aphwami ’berlegat enaluk agama hegi o,” oluk eberegei. 15-16#Per. 7:29; Ibr. 11:27Asogo ede eberisokhwe, at Firaun en wene ano esa’go hwelegeirik e,
“No pam elit holuk Musa ebe werik e,” oluk ede epasu laga. Asogo a’geat de, at Musa hweiye Midian eba wagarik welaga.
Asogo oruakhwe, ap Allah eiye a’ge owi Midian eba a’ge onuk Yitro ogulani enebe sabiren welegesa. Oruakma, o Midian lagarik at Musa ik omugwe pelakma lagarik eragam hweriogo oruakma, hwelani Yitro ogulani enebe sabiren ebano ik na’gwil wagalat, enaik en a’ge kambing domba oluktak no’gwi a’ge ik nouwagoluk na’gogo pogumu ebano pogulat, tuogoluk wegesa. 17Asogo wegesa a’geat de, ap wam kambing domba o’gonogwi a’ge logon en hwelani ebano mugentigisa. Asogo mugentigisema, at Musa wagarik en, lerentasulat, onuam paget na’gogo pasulat, tegei. 18Asogo tegeimu, togolik onowi pam wegesema, enaik en e,
“His o yogodak e, perleneat wegep ai nopaget?” oluk hin wogentesi. 19Hin wogentesimu, is en e,
“Ap wam o’gonogwi a’ge en muknontogwiam, ap Mesir a’ge mesik en nis ik nangnentasulat, nonuam paget nangentasulat, tegei o,” oluk mo’guligisa. 20Asogo mo’gulegisema, at en e,
“Ap ai ebe yogodak ’geba oruak? Nopaget at ai ukpoluk wegep? Nenemin so’boru nul en e, perlene worlhai lit o,” oluk mo’gulentesi.
21Asogo mo’gulentesimu yo’go lagaiam wegesema, at Musa en e,
“Nemin yema wolom obat o,” oluk mo’gulesi. Mo’gulesirik enemin oruakma, at Yitro agalogo onuk Zipora ano Musa wogesi. 22Wogesimu, at hwe Zipora emalik ap deregei. Deregeimu, at Musa en e,
“An nebe o yema ’bok ’gela’ge welegi, ai en e, nomlogo onuk Gersom o,” oluk tualegei.
23Asogo onuk tualegeirik, tahun a’bigat welegesarik e, at ’gain Mesir a’ge ano ebe arat waraga. Asogo waraga a’geat de, aphwami Israel a’ge aphwami Mesir a’ge en eneragam a’ge ’gela’ge tagonoboluk welegesa ai en,
“Nenaik Allah o, delnenebin o,” oluk se’ban ogwi modok welegesa a’ge ai, eniak a’ge Allah oruakma ligaga laga. 24#Kej. 15:13,14Eniak asogo ligagama, Allah en eniak esa’go hwelegeirik e, Abraham emin, Ishak emin, Yakub emin, wene wusogo wogenebegei a’ge ano ede eberegei. 25Ede eberegeitik e, aphwami Israel a’ge aphwami Mesir a’ge en eneragam a’ge ’gela’ge tagonoboluk tenentarok oruakma il entesirik, is eniak hologo delonobu a’ge wene arat egei o.
Currently Selected:
Keluaran 2: Wul
Highlight
Copy
Compare
Share
Want to have your highlights saved across all your devices? Sign up or sign in
