Efesus 6
6
Malik enialak enaiklak enemin welat
enebabut togulom wene
1 #
Kol. 3:20
His malik henebabut e, nonue ’gain Onuk Logo a’ge emin hwedik welat, henialak henaiklak, eniak hologo togulom ai en e, asogoat togu lomup o. 2#Kel. 20:12; Ula. 5:16Wene Allah en nenesa’go weregei ano pam, wene naduk nadugat nenesa’go weriselat e,
“His en e, disogo tu, asogo tu,” oluk eselat,
“Asogo togulomma pobuk obaphenebik o,” oluk, obok mesik emin u erlak. We,
“Henialak henaiklak hau do’goksogo waronobogu lomup o,”
oluk, egeitik e, 3obok disogo mo’gulentesi,
“Asogo togu lorogupmu, henebe op welat, ’gwiangma yema henelaluk mesik eminsogo welat, wolorogup o,”
oluk, mo’gulentesi aiat o.
4 #
Kol. 3:21
Ye, his enaiklak en ogo re, di bele yu bele togulat henemalik onolot het om a’ge togup no yo. At e, nonue ’gain Onuk Logo a’ge en nenesa’go weriselat, nenede sebeliselat, tiso ’gela’ge, his en henemalik asogoat takpoluk enebe yo’gulonobogu lomup o.
Eneragam a’ge onuelak enemin en, enebabut togulom wene
5 #
Kol. 3:22-25
His aphwami eneragam a’ge en e, Kristus iak hologo henede mesigat honogorloksogo welat togu legep ’gela’ge, honuelak ’gain eniak hwelakpoluk hau do’goksogo waronobogu lomup o. 6Is en yethentarok oruakhwe nak aphwami a’ge onogola opsogo togu lorogup o. We, honogola en e,
“Kristus eragam a’ge welat, Allah ogola agai epasu a’ge aiat togu lomok o,” oluk, honogola eberak poluk enat togu lomup o. 7Henede en e,
“An aphwami a’ge nak eneragam welegi puk o. We, nonue ’gain Onuk Logo a’ge eragam ogo welegiat o,” oluk, honogola henagaisogo togu lomup o. 8Henebabut op togu lorogup holuk, nonue ’gain Onuk Logo a’ge en, his heneragam a’ge, henematekma welegep a’ge heneminat, henebe lo’bok o’go wokhontouwa o.
9 #
Ula. 10:17; Kol. 3:25; 4:1 Ye, his onuelak ’gain a’ge en ogo re, heneragam a’ge enebaget e, asogoat togu lomup o.
“Wathebik,” oluk mumlang ogu lorogup. Henede en e,
“An neragam a’ge eminat e, nonue ’gain Onuk Logo a’ge ’bogorl pam oruak a’ge ano en, nis nenebaget e,
At ai ’gain o. Ye, at ai uo yo, oluk, oso erlak o. Nenemin hegitsogoat taknenebasu o,” oluk, henede eberak wolomup o.
At Iblis emin weim obogu lomogoluk di a’ge
yu a’ge nenagap pam ’buktu wene
10Ologun pam e, wene yu mo’gulhentaik. Nonue ’gain Onuk Logo a’ge emin hwedik welat e, at anni a’bik ano pam, henanni oroguptik welemis o. 11At Iblis ebabut aphwami lalnenebiso a’geatma re, wiagap henebigoluk wagoam, weim obuogoluk sing ’buktogwi ai ’gela’ge, his henebe edigat wolomogoluk e, at Allah en di a’ge yu a’ge woknentasu a’ge ai ’berlegat henagap pam ’buksogo wolomup o. 12Nis weim ’gela’ge obogu lege ai re, aphwami a’ge enemin obogu lege puk. Erlak o. At e, ’gain a’ge, eniak oruak a’ge, o hiktakma ’gwiangma yema tenentarok welagai a’ge, mu’gat enebabut wiak a’ge ’bogorl lik ’gwiang ’belap holuk ’burl ho’gorlak o’gwe oruak a’ge enemin obogu lege o. 13Holuk e, wiak a’ge en wiagaphonobu wagoma weim henil harowiak edik woloroguptik, arat obogulat edik wolomogoluk, sing ’buktogwi ’gela’ge Allah en di a’ge yu a’ge woknentasu a’ge ano ’buktip o.
14 #
Yes. 11:5; 59:17 Enemin obogup en ’buktak poluk edik wolom a’ge, ebe re, yu. Mul ’bagaluk ’buktu ’gela’ge, wene dem wene aiat ’buktogulat, henemik pam sing ’buktu ’gela’ge, Allah ogola agai epasu a’ge nak togwi ai a’ge ’buktogulat, 15#Yes. 52:7honoyuk sepatu ’buktu ’gela’ge, Allah en nenebe la’bulogo nenebasu oluk, op wene ai woluk louwogoluk, enebabut,
“I o. An laik o,” oluk ogwi ai a’ge ’buktogulat, tip o. 16Dok ’besingontogwiam ’boloksogo louwagoluk, e saintak a’ge ene’gigem woluk lagai ’gela’ge, enede Allah pam he’berik welagai ai a’ge nin hwedik nan hwedigat woluk no’gu lomup o. Woluk no’gumu, Iblis ebabut wiak a’ge ano en odouk dok ologun pam hwederik poluk ’besinghontogwiam, henede Allah pam he’berik wolorogup ano pam elirat nekhi togulomat o. 17#Yes. 59:17Ena’gul pam waronobuano oluk, ena’gul sum erik a’ge ’buktogwi ’gela’ge, Allah en delnenebiso a’ge aiat waguptik ’buktip o. Asogo ’buktoguptik e, weim obuogoluk ’garok ene’gikmu woluk lagai ai ’gela’ge, Allah iak, Arogun en woknentasu a’ge ai woluk laga lomup o. 18Asogo ’berlegat togulat e, Allah en lethentasu lemagoluk se’ban ogu lomup o. At Arogun honogola welat henede ’gagalu ’gela’geat, nin hwedik nan hwedik se’ban Allah yo’go pogulat, ’gonu mo’gulogulat, ogwi modogat wolomup o. Asogo ogulat, henede ’bugom erlakma en, henebabut heberlak modok wolomup o. Asogo welat e, Allah eiyagai ’berlegat enebaget se’ban pam Allah yo’go pogu lomubat o. 19Asogo yo’go pogulat, an en op wene Allah ogola hisogo welaga a’ge ai, at en mo’gulnosokhwe, niak ’baksogo mo’gulentasu leik en e, his en yo’go pogu lomubat o.
20Wene ai mo’gulentasu lemagoluk at Kristus en yo’go noboluk peraknobou wagama an wegirik mo’gulentasu legi ai paget ne’gik herle wusogo nebegesema welegi o. Asogo welat, an nogorlok erlaksogo op wene ai mo’gulentasulom hegitsogoat mo’gulentasu leik en, se’ban ogu lomubat o.
Wene ologun wusogo hau warenebegei wene
21 #
Per. 20:4; 2Tim. 4:12 #
Kol. 4:7,8 Wene an nebe yema welegi a’ge emin, taga legi a’ge emin, his henaluksogo, nenare Tikhikus nede a’ge, nonue ’gain Onuk Logo a’ge paget ebabut he’bisogo welat tago a’ge ano en ’berlegat mo’gulhentauma ai o. 22Nis ya welat togu lege a’ge henaluk oroguptik e, henede sebelogo wolorogup en hene’bek perakpou wegi ai o.
23Naik Allah emin, nonue ’gain Onuk Logo a’ge Yesus Kristus emin, e’birek enat, his narilak norokhwi Allah eiyagai ’berlegat opsogo la’bulik honobogulat, aphwami enedesogo welagai a’ge ai wokhontogulat, enede at ebam he’berik welagai a’ge ai eminat wokhontogulat, tuak o. 24His nonue ’gain Onuk Logo a’ge Yesus Kristus ’goboksogo ukpo erlakma en, henede hwedik modok wolorogup a’ge ’berlegat, Allah ebabut op ano en tenhentarok welemak o.
Currently Selected:
Efesus 6: Wul
Highlight
Copy
Compare
Share
Want to have your highlights saved across all your devices? Sign up or sign in
