Ulangan 4
4
At Musa en eselat e, “Allah en wene nenesa’go weregei wene ai hologoat togu lomup o,” oluk mo’gulentesi wene
1At Musa en aphwami Israel a’ge disogo mo’gulentesi,
“His henebe henelaluk welat, o his hene’balak enaik Onuk Logo a’ge Allah en wogentesimu eba elit sebelo ’goguptik wolorogup en e, wene an en mo’gulhentegis a’ge ai ’berlegat hologo togu lomup o. 2#Wah. 22:18,19Nenaik ’gain Onuk Logo a’ge Allah en,
Disogo togu lomup, asogo togu lomup, oluk henesa’go weregei a’ge an en mo’gulhentegis a’ge ai, his en wene mu a’ge mesik ebam lo’bok hogulat, wene ai a’ge mesik sebelogo ’belabogulat, tu erlakma en modok ’berlegat hologo togu lomup o. 3#Bil. 25:1-9Nis Nenaik ’gain Onuk Logo a’ge Allah en dom Peor pam en taknenebasukhwe henil domok arat hegep epegi. At en e, is dogwi asua Baal erliktogu legesa a’ge enebe lo’bok enebe waronobogulat, 4his nak e, enede at Allah emin lo’boktak welat iak hologoat modok oruakma ukhenebegimu hwerli yogodak henelaluk welegep ai o. 5An en, wene Nenaik ’gain Onuk Logo a’ge en,
Asogo tip, oluk, nenesa’go wusogo mo’gulnentesi a’ge hegitsogo ’berlegat mo’gulhentegis o. His en e, o ’gwi lagupmu eba sebelo ’goguptik welat, wene ai ’berlegat hologo togu lomup o. 6Wene ai henebit erlagat hologo hegitsogo togu lomup o. His en asogo togu lorogup holuk, his henede ’gagalakma re, wene ai pobirak poluk togukhwe aphwami ena’gul onuk mu a’ge en enagat pobirak honobogulat,
Eige! Wene enaluk modok enede ’gagalak welat togwi ai nogorlok e, oluk erlikhonobua ani o.
7Ye, di a’ge yu a’ge tu mia agoam, nis Nenaik ’gain Onuk Logo a’ge neneragam modok ’gwelaknentarok welago ai ’gela’ge, aphwami ena’gul onuk lok mesik ’geba a’ge en,
Nenaik mu a’ge paget, ebe yuat, oluk ogwi a’ge ai en eneragam modok ’gwelagentarok welago no? Modok erlak o. At Allah re, nis, we, o ’geba welat,
Letnentemin o, oluk yo’go pogwiam, letnentasu nak o. 8Ye, wene Allah en nenesa’go weregei wene hegit a’ge ai, an en yogodak mo’gulhentasu legi yu a’ge, aphwami ena’gul onuk logo a’ge o ’geba a’ge ’gela’ge onowene yu emin hegit oruak no? Modogat erlak o. 9His henelaluk welat, wene agoma henil domok hegep a’ge ai henede eberak modok wolorogup en e, wene mo’gulhentegis a’ge ai opsogo pobirak poluk e, henede eberak modok wolomup o. Asogo welat e, his henemalik emin, hene’balak emin, wene aga a’ge ano wene mo’gulontogu lomup o. 10Ai erlige re, his henebe Nenaik ’gain Onuk Logo a’ge Allah orogolema dom Sinai edipmu eba edik oruakma, at en e, an disogo mo’gulnesi epegi,
Is aphwami Israel a’ge enebe enelaluk welat, an niak hologo togulat, is eneiyagai enemalik en an niak hologo togu lemagoluk mo’gulontogulat, tuagoluk an en hat mo’gulhosokhwe enesa’go holuagoluk e, enebe odoksogo enebemin o, oluk mo’gulnesimu odokhenebegis epegi.
11 #
Kel. 19:16-18; Ibr. 12:18,19 His dom o hena modok soduk wiak a’ge en sebelak welago ’gela’ge hobu modok soduk wiak a’ge en sebelak oruakma odouk magale modok ’bogorl ebe pam ligagoma wegeptik edik welat hegep a’ge ano, eberak welat e,
Nis disogo tige, oluk heneiyagai mo’gulontogu lomup o. 12His asogo edik oruakma, Nenaik ’gain Onuk Logo a’ge odouk ano ogola en iak egeimu,
Ebe ’ge en iak oso, oluk henil hegep a’ge re, ebe mesik modok henil hegep erlak epegi. 13#Kel. 31:18; 34:28; Ula. 9:10Ho erlak oruakma, at en e, his wene wusogo woknenebegei wene ano emin dipsogo togulom ebele paget oluk henede ebesogo mo’gulhentesi epegi. At en wene nenesa’go weregei wene uak ebe 10 a’ge helep ebak a’ge ’biren pam odo ’balogo pesi a’ge wene ai his en hegitsogo togu lomup o. 14#Kel. 21:1Nenaik ’gain Onuk Logo a’ge en,
Is en e, o is pobuk sebelil ’gwi lultik wolomulmu eba welat, wene henesa’go weregis wene ai hologo modok togu lemagoluk mo’gulontomup o, oluk mo’gulnesimu en mo’gulhentegis o,” oluk mo’gulentesi.
Dogwi asua werik poluk erliktogu lemano oluk enede ebesogo mo’gulentesi wene
15At Musa en, disogo mo’gulentesi,
“Nenaik ’gain Onuk Logo a’ge ebe dom Sinai pam odouk magale ligaga laga a’ge ano ogola welat iak mo’gulhentesi a’geat de, ebe henil modok hegep erlak ai, henede eberak modok wolomup o. 16-18#Kel. 20:4; Ima. 26:1; Ula. 5:8; 27:15#Rom. 1:23His honu’gwarek paget, dogwi asua ebe ap a’ge de a, hwami a’ge de a, hiane de a, ’gosu de a, wam tue ’baik logon de a, erlik togulomogoluk ogut heli’gogo pagathorlogwiam wiagaphonobuano oluk mesik helo’gogup no yo o. 19His en e, ’bogorl pam welago a’ge, mo emin, dugwi emin, hwesagal emin, henil hogu legep a’ge ai eragam a’ge otluk erliktogulat wiak togup no yo. Ai a’ge Nenaik ’gain Onuk Logo a’ge Allah en,
Aphwami ena’gul onuk ’berlek wogentegis, oluk egei. 20#Kel. 19:5; Ula. 7:6; 14:2; 26:18; Tit. 2:14; 1Pet. 2:9Asogo a’geat de, his nak e, o Mesir di obotut yu obotut modok wiaksogo hogu legepma eba en delhenebegeitik, henebe yogodak at u’gwarek eiyagai welegep ai ’gela’geat welemagoluk, o eba en wokhonoboluk liplau waga ai o.
21 #
Bil. 20:12
Asogo a’geat de, an nak e, Nenaik ’gain Onuk Logo a’ge en his henebaget olot het nebam agarik,
Hat o ’gwiang modok esei op a’ge is wogentaikmu eba ’gwi laguntik, ik Yordan ’balogo ’gogun modok erlak, oluk ho’buk ’balogo mo’gulnesi ai o. 22Holuk e, agauwa ebisogo wolom erlakma enat, ik Yordan ’balogo re, o ’gwiang esei opma eba sebeli ’gwi lagup ani o. Asogo a’geat de, an nebe yema wareik ai en e, nemin ’gwi lul erlak o. 23-24#Ibr. 12:29Nenaik ’gain Onuk Logo a’ge Allah en wene wusogo woknenebegei a’ge ano meme u erlakma en henede eberak modok welat, nenesa’go weregei wene ano hologo hegitsogo togu lomup o. Nenaik ’gain Onuk Logo a’ge ebabut e, odouk en enebe modok dabopsogo nasu ai ’gela’ge welat, aphwami en at ebe ’gela’ge mesik ogut heli’gogo poluk erliktogulom modok ebit welago ai re, his en dogwi asua ebe hwedik-hwedik wusogo poluk erliktogu lomogoluk mesik worogup no yo.
25Ye, his o ’gwi lagupmu eba tahun a’biksogo logon emin welat, his en dogo’gwe a’ge hene’balak yarluk ogwi holuk, honu’gwarek paget dogwi asua ebe mu a’ge mu a’ge logon heli’gogo poluk erliktogu lorogup no yo. Asogo togupmu re, wiak henebam ema ani o. Asogo togwi ai Nenaik ’gain Onuk Logo a’ge Allah ebit modok ontoluk, modok olot het oso yo. 26His en e, o ik Yordan ’balogo ’goluk wolomma eba en, an niak hologo togup erlak holuk, Allah en henebe modok erlagap honoboma logon emin wolorogup modok erlak, oluk ’bogorl ’gwiang enesa’go hwelak oruakhwe egi ani o. 27#Ula. 28:36Nenaik ’gain Onuk Logo a’ge en e, his modok ’bogulogo o aphwami ena’gul onuk mu a’ge ene’gerlak o’gwe eba perakhonoboma re, his a’ge logon enebe wei nagat enelaluk welema o. 28His o aphwami logon oruakma eba loluk e, dogwi asua aphwami ene’gik en, e a’ge helep a’ge ogut heli’gogo poluk,
Nenaik ebe yuat o, oluk erliktogwi a’ge, ai re, il entasu erlagat. Iak oso erlagat. So’boru nasu erlagat. E’ben ’baliso erlagat a’ge at de, henede ai pam he’berik poluk erliktogu lorogup no yo. 29#Yer. 29:13Asogo togu loroguptik, henede mesigat otluk henaik ’gain Onuk Logo a’ge Allah heratil worogup holuk, at emin elit sarlok togubat o. 30His e, di obotut yu obotut ’berlegat eba henebam agoam wiak obotut arat holuk en, pobuk honolukhwe edenogo Nenaik ’gain Onuk Logo a’ge Allah e’bek wotluk iak hologo togu lorogup ani o. 31Nis Nenaik ’gain Onuk Logo a’ge Allah re, aphwami modok edeap enebiso a’ge o. Holuk e, at en his ’goboksogo ukhenebasulat, henebe erlagap henebiselat, at u’gwarek enat hene’balak wene wusogo wogenebegei a’ge ano memerak pasulat, tua modok erlak o.
32Allah en, his henebe dagom erlak oruakhwe, pageat aphwami ’gwiangma walnentesi ai hwerli en til waga a’ge henede eberit o. Wene elalin a’ge his takhenebesi ai ’gela’ge ’gwiangma di owi yu owi yema ’berlegat logon naduk tagenebesi a’ge oruak no? Asogo logon tagenebasukhwe enesa’go hologwi no? 33Nis nenaik Allah ebe odouk ogola welat, iak mo’gulnentasukhwe henesa’go hweligep ai ’gela’ge, aphwami ena’gul onuk mu a’ge logon en,
Nenaik ebe aiat o, oluk ogwi a’ge ai en wene asogo mo’gulentesimu hweligisarik e, enebe logon enelaluk oruak no? 34Nis Nenaik ’gain Onuk Logo a’ge Allah en ogorlok modok erlak his henebe aphwami Mesir a’ge en ene’gerlakma tenhentarok oruakma at u’gwarek eiyagai emagoluk wokhenebegei ai ’gela’ge, aphwami ena’gul onuk mu a’ge logon enaik en asogo logon tegei no? Modok erlak o. Nis nenaik Allah anni pam e, aphwami nis neneselei a’ge ai di obotut yu obotut enebam pasulat, weim obogukhwe warenebiselat, elalin a’ge a’bik tagalat, onogorlok a’ge a’bik tagalat, tisokhwe henil domok hegep ai o. 35#Mrk. 12:32His henil pam ’berlegat asogo tegei ai re, at en e,
Henaik ’gain Nonuk Logo a’ge Allah an nemategat o. Mesik erlak o, oluk enagat emagoluk tegei ai o. 36Wene mo’gulhentaigoluk at ebe ’bogorl pam en iak holuagoluk ’belakpou wagama henesa’go hweligep ai o. Ye, at ebe ’gwiangma en e, odouk onogorlok a’ge ai onukhontoluk, odouk ano ogola en iak mo’gulhentesi ai o. 37At en hene’balak enebe ede hwedik welago ai en, his henebe pulogo honoboluk wokhenebegeitik u’gwarek anni a’bik ano pam o Mesir en wokhonoboluk liplau waga ai o.
38Nis nenaik en, o aphwami ena’gul onuk mu a’ge onowi pam a’ge wokhentaigoluk mo’gulhentesi ano pam, yogodak ogo wokhontoma eiye wolorogupmu eba henebe wokhonoboluk wagalat, nis nena’gul onuk yu a’ge, nenebe weiyat. Nenanni erlak. A’geat de, aphwami ena’gul onuk a’bigat, enanni a’bik a’ge honologotma ’gagalak oruakma mukho lebigonoboluk wago ai o. 39’Bogorl pam emin, ’gwiangma emin, Nenaik ’gain Onuk Logo a’ge Allah emategat welago yo. Mesik erlak o. Ai en e, o yogodak yu hwerli en at ebe memerakpo erlakma en eberak modok wolomup o. 40An en wene his togulom a’ge yogodak mo’gulhentegis a’ge ai, ’berlegat henesa’go hologo hegitsogo togu lomup o. Asogo togulat, his henebe emin, his en dogo’gwe a’ge emin, enemin o Nenaik ’gain Onuk Logo a’ge Allah en his modok-modok welemagoluk wokhontouwema eba eiye otluk obat wolomup o,” oluk mo’gulentesi.
Ik Yordan eba enagap delak wolomma polik pesi wene
41-42 #
Yos. 20:8,9 Ap mesik olot het en, are werik opo erlakma en welat, weriso lomtik, agap delhorlouwak oluk, hweiye ’bogulogo o kota eba ’gwi laga lemagoluk, at Musa ene ik Yordan Yu akhit, o mo liplau wago hegit eba o erang ma ebano kota henagan polik pesi.
43Agap delak welemagoluk o kota-kota ’gwilo a’ge paget polik pesi ano re, o lei yat erang duelak pesimu o Bezer ai, ap Ruben a’ge enebaget polik pasulat, o Gilead kota, Ramot ai, ap Gad a’ge enebaget polik pasulat, ye, o Basan kota Golan ai, ap Manasye a’ge enebaget pulogo pasulat, tegei.
44-49Is aphwami Israel a’ge o Mesir en liplau wegesarik ’gebela pam wagalat, ap Amori a’ge onue onuk logo a’ge Sihon ’gwelakharok welagoma Hesybon eba at Musa emin, aphwami Israel emin, is en e, ap ano sebelogo poluk o’gwiang horlogulat, aphwami o Basan oruak a’ge onue ’gain onue Og ano sebelogo ukpoluk o’gwiang hologulat, ap ’gain enebe ’biren Amori a’ge ik Yordan o mo liplau wago hegit eba welagai a’ge ebano sebelogo onoboluk, ono’gwiang horlogulat, tigisa. Ono’gwiang hwerlegesa ano re, ik Arnon esa’goma o Aroer hwerli en ’bekhit-legesarik Siryon onuk mesik Hermon erabu nodom yat a’ge onuk mesik hwerli emin, ye, dom Pisga eragam en ’bekhit o Araba dogoma ik Yordan o Mo liplau wago hegit eba o Bet-Peor horokho oruakhwe odok o mesik ap ’gain Sihon o’gwiang sebelhwerlegesema ebano loluk, oruakma eberogulom a’ge paget emin, wene le’gelak a’ge emin, is aphwami Israel modok tugu lemagoluk, at Musa en wogentesi ano re, aiat o.
Currently Selected:
Ulangan 4: Wul
Highlight
Copy
Compare
Share
Want to have your highlights saved across all your devices? Sign up or sign in
