Daniel 9
9
Daniel en aphwami at emin ena’gul onuk mesigat a’ge paget Allah yo’go pesi wene
1-2 #
Yer. 25:11; 29:10 Ap Media a’ge onuk Ahasyweros ai, omlogo Darius ebe aphwami Babel a’ge onue ’gain agarik, tahun naduk tenentarok welaga eria pam, an en Nenaik ’gain Onuk Logo a’ge iak onuk mo’guliselat e, at en Yeremia at iak mo’gulentasu laga a’ge ano mo’guleselat, disogo egei a’ge hegi,
Kota Yerusalem moluktak oruakhwe 70 tahun ema, oluk mo’gulesimu, mo’gulentesi a’ge pelal wogo a’ge ai onuk mo’gulegistik, nede eberegis. 3Asogo eberegistik, naik Allah ’gain Onuk Logo a’ge enedeap nonobuagoluk sum ’garum a’ge ’buksogo, so’boru no erlakma en, nebe ul pam hweriogo welat, se’ban niak nerlagaiksogo Allah yo’go pegi. 4-5Asogo naik Allah ’gain Onuk Logo a’ge yo’go pasulat e, aphwami an nemin nena’gul onuk mesigat a’ge nenemin en Allah iak sagalogo wiak tige a’ge ai ’baksogo pogulat, disogo mo’gulegis,
“Nenaik Allah honuk lok ai en, nis hat nonogorloksogo welat erlikhobogu lege o, naik. Heiyagai en, hat en,
Disogo togu lomup, asogo togu lomup, oluk nenesa’go werigen wene ai hegitsogo togulat, hebe enedesogo welagai a’ge ai, hat en enebe hedeap enebasu modok welat, wene wusogo nenebe woknonobua ai wene hegitsogoat tenentarok welat, taga legen o, Naik. A’geat de, nis hat heragam lo’boksogo wolom nenebit en e, hiak sagalogo wiak togulat, dagan togulat, togulat e, hat en,
Disogo togu lomup, asogo togu lomup, oluk nenesa’go werigen wene ai, hiak pelal ’belak pam louktak tu erlakma en ukpoluk, mu a’ge paget tige ai o, Naik. 6Asogo togulat, is ap hat heragam a’ge hiak mo’gulnontogu legesa a’ge ai en, Hat honuk oluk wene hat en mo’gulentasu legen wene ai, nene’balak ’berlegat mo’gulontogulat, nonuelak ’gain-’gain logon mo’gulontogulat, nonuelak ’gaindek logon mo’gulontogulat, aphwami ’berlegat mo’gulnontogulat, togu legesa a’geat de, nenesa’go holu erlakma en ukpogu lege ai wiagat togu lege o, Naik. 7Asogo togu lege ai pam, hat en hegitsogoat taknenebasu legen a’geat de, nis nenebe aphwami Israel a’ge ’berlegat, o yogodak nene’gerli hogu lege. Aphwami o Yehuda a’ge emin, Yerusalem a’ge emin, horok eba welagai a’ge emin, nis nenebe hat hemin hwedik wolom pukmu en togu lege ai pam, ’bogulogo o walegat peraknonobou egenma da ya welege a’ge eminat e, nene’gerli hogu lege o, Naik. 8Ap nis nene’balak en emin, nonuelak ’gain-’gain en emin, nonuelak ’gaindek logon en emin, hat Nenaik ’gain Onuk Logo a’ge hiak sagalogo wiak modok togu lege ai en, nene’gerli hogu lege o, Naik. 9Naik Allah, nis hat hemin hwedik wolom nenebit en wiak togu lege a’geat de, hat nis nenebe hede en nis wiak togu lege a’ge sagalogo erlagap pasu legen ai o, Naik. 10Hat en e,
Nenaik ’gain Onuk Logo a’ge, hat en e disogo togu lomup, asogo togu lomup, oluk nenesa’go werigenma, hiak ai, is ap heragam a’ge en hiak mo’gulnontogu legesa a’ge ai en, mo’gulnontogu legesa a’geat de, nenesa’go hologo hegitsogo tu erlakma en, ukpege ai o, Naik. 11Nis aphwami Israel a’ge ’berlegat en e, hat en,
Disogo togu lomup, asogo togu lomup, oluk nenesa’go werigen wene ai nenesa’go hologo tu erlakma en ukpoluk, mu a’ge de, togu lege o. Hat hiak sagalogo wiak togu legema, hat en e,
Heman henebaik o, oluk ho’buk ’balogo mo’gulnentigen a’ge heragam a’ge Musa en pelal wokho pesi ai a’ge nenebam pegenma o, Naik.
12Hat en e, nis nonuelak tenentarok welagai a’ge emin mo’gulnentasulat e,
Aphwami o ’gwiangma di owi yu owi welagai a’ge logon ’berlegat wene modok wiak a’ge enebam po erlak a’geat de, his aphwami o kota Yerusalem a’ge nak hene’bek perakpou weik, oluk e’gen hegitsogoat taknenebegen o, Naik. 13Nenaik ’gain Onuk Logo a’ge, Hat en e,
Modok wiak a’ge henebam paik, oluk egenma, wene Musa en pelal ’balogo pesi a’ge ai ’berlegat nis nenebam pegen a’geat de, nis en hat hede op emagoluk mesik tu erlak. Nenebabut wiak togu lege a’ge ai ukpoluk, hat en ebe wene mo’gulnentasu legen a’ge ai hegitsogoat, tu ebele nenebirat welege ai o, Naik. 14Naik, Hat hebabut hegitsogo nak tago ai en e, hat en,
Modok wiak a’ge hene’bek perakpou weik oluk e’gen a’ge arat pulogo leik-louktak pegentik, nenebam hegitsogoat perakpou wegen o. A’geat de, nis en hat hiak nenesa’go hologo togulom modok nenebit ai o, Naik. 15Nenaik Allah ’gain Honuk Logo a’ge naik. Heiyagai o Mesir en he’gik anni pam wogonoboluk liplau wegen ai pam yogodak hwerli ogore honuk da ya lasu ai o. A’geat de, Naik. Nis nenebabut wiak togulat, dagan togulat, togu lege ai o, Naik. 16Naik, Hat en nadugat, hedeapsogo delnenebise legen ai ’gela’ge, yogodak holot het agalat, o kota Yerusalem emin, hu’gwarek hodom pam emin, wiagap pegen ai, hogola op omup o. Nis nenebe emin, nene’balak emin, nenebabut ’gorlo togulat, wiak togulat, togwi ai pam, aphwami neneragam o’gwe welagai a’ge en e, nis heiyagai onogola en mi-miarak nonobogulat, ye, o kota Yerusalem onogola en e, mi-miarak onobogulat, togwi o, Naik. 17Naik Allah. An en yo’go hebegi a’ge emin, ’gonu mo’gulhegis a’ge emin, niak hesa’go hwelip o, Naik. Howi arat wiagaregisa a’ge ai, pobuk hebam lo’buktak toluk hat hebaget togolik obap pomup o, Naik. 18Naik Allah, hesa’go lang oguntik e, neniak hesa’go hweliselat, hil dek otluk e, nenebe emin, nonowi kota Yerusalem,
Allah oruakma, oluk honuk ogwi a’ge emin, modok wiagap nenebegesema wiak welege ai yetnentasulat, tip o, Naik. Nis nenebabut op togu lege, oluk hat yo’go hobogu lege puk. We, hat en nis modok hedeap nenebasu legen ai en yo’go hobogu lege o, Naik. 19Niak hesa’go holholuk e, nis wiak togu lege a’ge sagalogo ukpomup o, Naik ’gain Onuk Logo a’ge o. Hat howi kota emin, heiyagai nenebe emin,
At en a’ge, oluk hat honuk a’ge ogwi ai en e, hat hebaget ho’borlogouk erlak wolom erlakma en perleneat ho’borlogouk hemin o, Naik,” oluk yo’go pegi.
Malaikat Gabriel en wene ebe pobuk om a’ge paget Daniel mo’gulesi wene
20An en Allah yo’go asogo pasulat, an nu’gwarek emin, aphwami Israel nena’gul onuk mesigat a’ge emin, enemin en Allah iak sagalogo wiak tige a’ge ’baksogo ukpoluk, Allah ’gain Onuk Logo a’ge u’gwarek owi moluktigisa a’ge ai pobuk togolik ebalema woruagoluk ’gonu mo’gulegis. 21#Luk. 1:19,26Se’ban asogo osoam, aphwami en o hopmu’gwe Allah uam wusogo narlik obogwi eria hegitsogo, malaikat onuk Gabriel an nadugat nabi ’gela’ge pam nil hegi a’ge ano ne’bek hegit darak waga. 22Asogo wagarik e, disogo mo’gulnesi,
“Daniel. An e, wene pobuk ema a’ge ai pobi togun en e ebe se’geksogo mo’gulheigoluk wegi o. 23Hat en e, Allah en lethontouwagoluk yo’go paik en e edipmu en naduk e’gen a’ge ano, hiak holegeitik o’go arat egeitik oruak o. Asogo hwelegeirik, hebe ede modok ai en, an en wene pobuk ema a’ge mo’gulheigoluk wegirik mo’gulheik ai en e, habi ’gela’ge pam hil hegen a’ge ai,
Ebe disogo ema a’ge paget hegenma o, oluk mo’gulhosokhwe hesa’go opsogo hwelip o.
24Agauwa di deng ’gobok yu deng ’gobok ’goboksogo ene’gik wenarogwi ’gela’ge, 7 kali 70 tahun wolomul ai ebe re,
Aphwami hat hemin hena’gul onuk mesigat a’ge henebe o kota Allah u’gwarek owi hat oruakma eba welat, Allah iak sagalogo togulat, ’gorlo togulat, togu legep a’ge ai, Allah en ukpasulat, sagalogo erlagap pasulat, hegitsogo togwi modok welemagoluk logap pasulat, tagoam e,
Disogo ema, oluk habi ’gela’ge pam hegen a’ge ai demat agalat, Allah u’gwarek owi degelak modok welaga a’ge wiagap pegesa a’ge ai, pobuk obap pasulat, tua a’ge paget, Allah enat hwerli wusogo pesirik pobuk ebe ai hwerli pam en tua a’ge paget hegenma o. 25Wene mo’gulheik a’ge yu, haluk emagoluk opsogo pobi tip o. O Yerusalem moluktak a’ge ai pobuk togolik woruagoluk wene edip lebegei ai hwerli en, ap ’gain Onuk Logo a’ge Allah en Pulogo Edikpouwa a’ge ai wema hwerli, ene’gik 7 kali 7 tahun welema o. Asogo welemarik, pobuk ene’gik 62 kali 7 tahun welat, o kota ai togolik worogulat e, o selisogo heli’gogo worogulat, leget ye’ban wogulat, tua a’geat de, modok wiak welat, worua o. 26Asogo 62 kali 7 tahun wolotluk, ap Allah en pulogo edikpouwa a’ge ai wiak tago erlak a’geat ebe worua o. Asogo woruama, ap ’gain onuk logo a’ge anni a’bik a’ge osi tentara a’ge en o kota Yerusalem emin, Allah owi werik ai emin, moluksogo modok erlagap pouwa o. Asogo welema eria pam o ologun ’goboksogo re 62 kali 7 tahun wolotluk, Allah en egei hegitsogoat, ik ebe wagalat di a’ge yu a’ge woluk lasu ’gela’ge weim obogulat, di a’ge yu a’ge modok wiagarogulat, tua ani o. 27#Dan. 11:31; 12:11; Mat. 24:15; Mrk. 13:14Ap ’gain a’ge ai en e,
tahun sabirenam disogo wolomul, oluk aphwami enebe a’bigat wene pobuk muat u puk a’ge weragonobua o. Ye, asogo welat, tahun henagan wolotluk, dugwi logon 6 en wolotluk e, wam di a’ge yu a’ge Allah paget wusogo narlik obogulat, wogogulat, togulom mia o, oluk ua. Asogo oluk, pobuk e, enemelmel a’ge togwiam ogoiyesogo ’bogolua a’ge Allah owi werikmu eba edikpou wama welema o. Asogo oruakma, hwerli pageat Allah en e,
Asogo ema, oluk egei hegitsogoat, at ap enemelmel a’ge pesimu oruak a’ge ai wiagap pouwa hwerli enemelmel a’ge ai erlak ema o,” oluk mo’gulnesi.
Currently Selected:
Daniel 9: Wul
Highlight
Copy
Compare
Share
Want to have your highlights saved across all your devices? Sign up or sign in
