Daniel 2
2
Ap ’gain Nebukadnezar abi hesi wene
1At ap ’gain Nebukadnezar ’gain agarikmu en mo il mesigat pam tenentarok welagarik, mo il mesik ’birenak a’ge tenentarok welat, o hup mesik pam abi hesi. Asogo hesirik, abi hesi a’ge ano,
“Ebe no a’ge paget hegi,” oluk ede perik modok welat nogo u erlagat welaga. 2Asogo welat, at ’gain ano en e, ap logon yo’go onoboluk, is ap wene pobuk om a’ge mo’gulontogwi a’ge emin, ap asuagun di a’ge yu a’ge elalin togwi a’ge emin, ele sogomerli erlak waronobogwi a’ge emin, di wene yu wene owene enaluk a’ge emin, enemin en abi hesi a’ge ano ebe,
“Disogo ema a’ge paget hegenma o,” oluk mo’gulum ebele paget yo’go louwagoluk peragenebesimu wegesa. 3Asogo wegesarik, enebe at ’gain ano ologotma edik oruakhwe, at en e, disogo mo’gulentesi,
“An nabi hegi a’ge re,
Ebe disogo ema a’ge paget hegimu hegi o, oluk naluk om a’ge re, neperlak en nede modok wiak welegi o,” oluk mo’gulentesi.
4Asogo mo’gulentesimu, is en is aphwami Aram a’ge eniak pam disogo mo’guligisa,
“Nonue ’gain hat helaluk modok wolomup o. A’ge re, nonue. Habi hegen a’ge ai, nis en e,
Ebe disogo om a’ge paget hegenma o, oluk mo’gulhum a’ge re, habi hegen a’ge ai ’beli’gogo mo’gulnentemin o,” oluk mo’guligisa.
5Asogo mo’gulegisema, at ’gain a’ge en e,
“An en tik a’ge arat nede epegirik e, mo’gulhentaik. His en an nabi hegi a’ge ai, ’beli’gogo mo’gulnogulat,
Ebe disogo om a’ge paget hegenma o, oluk mo’gulnogulat, u mia en mo’gulnorogup erlak holuk e, henebe lebik-lebeksogo werak honoboluk e, honowi werik a’ge moluk-melaksogo ’bo paik o. 6Asogo a’geat de, his en nabi hegi a’ge ai, ’beli’gogo mo’gulnogulat,
Ebe disogo om a’ge paget hegenma o, oluk hegitsogo mo’gulnogulat, togup holuk, an en o’go modok op a’ge wokhentasulat, loksogo hau wathenebiselat, tik o. Holuk e, an nabi hegi a’ge ai ’beli’gogo mo’gulnogulat,
Ebe disogo om a’ge paget hegenma o, oluk mo’gulnogulat, tip o,” oluk mo’gulentesi.
7Asogo mo’gulentesimu, is en e,
“Habi ebe hegen a’ge ai naduk ’beli’gogo mo’gulnentasuam e, nis en,
Ebe disogo om a’ge paget hegenma o, oluk mo’gulhomul o,” oluk mo’guligisa.
8-9Asogo egesema, at ’gain esa’go hwelegeirik e, disogo mo’gulentesi,
“An en e, his en nabi hegi a’ge ai ’beli’gogo mo’gulnorogup erlak holuk e, wene mesigat a’ge henebam paik, oluk egi ai en e, an en egi a’ge ai sugwi emagoluk henepenen en lalnobuogoluk mo’gulnoum a’ge henebabut arat enak togukhwe arat enak a’ge hegi o. Holuk e, his en e, an nabi hegi a’ge ai ’beli’gogo mo’gulnorogup holuk,
Habi ebe disogo om a’ge paget hegenma o, oluk hegitsogoat mo’gulnema hegi, oluk epaik o,” oluk mo’gulentesi.
10Asogo mo’gulentesimu, is ap di wene yu wene owene enaluk a’ge ebano en e,
“O di owi yu owi ’berlegat ap enebe logon di wene yu wene enaluk a’ge en hat mo’gulhemagoluk e’gen ai ’gela’ge ogwi a’ge mesik modok erlak o. Ye, ap mesik ’gain lok logo a’ge oruakhwe erliktogwi a’ge en, osi enebe wene pobuk om a’ge paget mo’gulontogwi a’ge emin, ap asuagun elalin togwi a’ge emin, di wene yu wene owene enaluk a’ge emin, at owi pam welagai a’ge en wene hat en e, nis en uagoluk mo’gulnentigen ai ’gela’ge logon ogwi modok erlak o. 11Nonue. Hat en wene u modok mia a’ge e’gen o. Nis aphwami a’ge re, at mesik en asogo mo’gulhoum a’ge mesik welago modok erlak o. We, onomu’gat dogwi asua a’ge ai en nak e, elit mo’gulhoum a’geat de, nis aphwami nene’gerlakma welago modok erlak o,” oluk mo’guligisa.
12Asogo mo’gulegisema, esa’go hwelegeirik, olot het a’bik agarik e, ap o Babel da ya a’ge enede ’gagalak welat, di wene yu wene enaluk a’ge ’berlegat waronobuagoluk tegei. 13Asogo tegeimu, wene ai aphwami ’berlegat da ya mo’gulentigisa. Asogo mo’gulentigisema, ap enede ’gagalak di wene yu wene enaluk welegesa a’ge ’berlegat waronobuogoluk togulat, Daniel arilak eneminat waronobuogolugat heraenebigisa.
Allah en e, ap ’gain ano en abi hesi a’ge ano emin, ebe pobuk om a’ge emin, Daniel mo’gulesi wene
14Asogo heraenebigisema, at ’gain ano osi at ’gwelakharok welegesa a’ge onue onuk Ariokh ai ap enede ’gagalak di wene yu wene enaluk a’ge at en warenebil laigoluk tisoma, Daniel at e’bek laga. Lagarik, wene mo’guloum a’ge ede modok ebesogo woluk lagarik disogo mo’gulesi,
15“Wene edip e’gin a’ge at ’gain en iak ningsogo lebegei ai nopaget,” oluk mo’gulesi. Asogo mo’gulesimu, at Ariokh en e,
“Disogo egei, asogo egei,” oluk ’beli’gogo mo’gulesi.
16Asogo mo’gulesimu, at Daniel ebe perleneat at ’gain ano e’bek lagarik e,
“Hat habi hegen a’ge ai, an en,
Ebe disogo om a’ge paget hegenma o, oluk mo’gulheik en e, weiyat mo oguntik o,” oluk mo’gulesi. 17Asogo mo’gulesimu, at ’gain ano en e,
“Op o,” oluk mo’gulesi. Asogo mo’gulesimu, at Daniel togolik owi pam wagarik, wene ano ’berlegat at arilak Hananya emin, Misael emin, Azarya emin, ebano mo’gulentesi. 18Asogo mo’gulentasulat,
“Is ap logon enede ’gagalak di wene yu wene enaluk a’ge o Babel da ya welagai a’ge ebano, warenebiselat, his narilak neneminat watnonobuano oluk, Allah ’bogorl pam a’ge en nenebe edeapnonoboluk, ap ’gain ano en abi hisogo a’ge hesi a’ge ai ebe dokhumsogo mo’gulnentasulat, tuagoluk heniak henerlagaiksogo yo’go pogu lomup o,” oluk mo’gulentesi. 19Asogo mo’gulentesirik huba’go nogo osoma, Allah en at ’gain ano abi hisogo a’ge ai ebe abi ’gela’ge pam Daniel mo’gulesi. Asogo mo’gulesimu, at Daniel en Allah ’bogorl pam a’ge erliktegei. 20Asogo erliktagalat, disogo mo’gulesi,
“Allah ’bogorl pam a’ge, Naik o. Enede ’gagalak welagai ai emin, enanni a’bik welagai ai emin, edip harat o. Ai en e, erlikhobogwi modok wolomul o.
21Hat en di wene yu wene agauwa tago a’ge pam takpasulat, o ai erlige eria pam takpasulat, tuagoluk hat enat taga legen ai o, Naik. Hat en ap ’gain wolom a’ge edigenebasulat, hweriogo enebasulat, taga legenat o, Naik. Hat en aphwami enede ’gagalak a’ge holuk, di wene yu wene elirat pobi togu lemagoluk tagenebasulat, enebabut wongtak a’ge holuk, di wene yu wene enaluk emagoluk mo’gulentasulat, taga legenat o, Naik. 22Hat en di wene yu wene ebe disogo ema a’ge, oluk hisogo a’ge ai ’baksogo mo’gulentasu legen o, Naik. Hat hebe o dakharakma welat, di a’ge yu a’ge o hiktakma welago a’ge ai, hat modok haluk nak o, Naik. 23Allah an ne’balak en erlikhobogu legesa a’ge ano yo, naik. Nis en, at ’gain en nis taknenebaigoluk tiso a’ge ai paget yo’go hebegema, neniak hesa’go hweligentik, an nede ’gagalak nebasulat, nanni wokneselat, tigentik, wene hisogo a’ge ai ebe at ’gain mo’guloum a’ge mo’gulnigen ai en erlikhebiselat, logo hebasulat, taga legi o, naik,” oluk erliktegei.
At Daniel en e, ap ’gain ano abi hesi a’ge ai, ebe mo’guleselat, ebe disogo om a’ge paget hegenma o, oluk mo’guleselat, tegei wene
24Asogo erliktoluk e, at Daniel ebe ap Ariokh at ’gain en ap enede ’gagalak di wene yu wene enaluk a’ge o Babel da ya welagai a’ge waronobuagoluk e’gik pam pesi a’ge ano e’bek lagarik e, disogo mo’gulesi,
“Hat en ap enede ’gagalak di wene yu wene enaluk a’ge ai enebe waronobogun no yo. Waronobu erlak welat, an en at ’gain abi hesi a’ge ai,
Ebe disogo om a’ge paget hegenma o, oluk mo’guleik en e, hat en an nebe at ’gain e’bek woknoboluk lak o,” oluk mo’gulesi.
25Asogo mo’gulesimu, at Ariokh en Daniel ebe perleneat woluk ap ’gain e’bek lagarik e, disogo mo’gulesi,
“Nue. An aphwami o Yehuda a’ge ene’gik herle wusogo wogonoboluk wege ebano a’ge, ap mesik hat habi hegen a’ge ano,
Ebe disogo ema a’ge paget hegenma o, oluk hegitsogo mo’gulhum a’ge hwiaregistik e, he’bek woluk wegi o, nue,” oluk mo’gulesi.
26Asogo mo’gulesimu, at ’gain ano en at Daniel onuk mesik Beltsazar ogwi a’ge ano, disogo mo’gulesi,
“Hat en an nabi hegi a’ge ai ebe ’beli’gogo mo’gulneselat, ebe disogo om a’ge paget hegenma o, oluk mo’gulneselat, tu elit a?” oluk hin wokhesi.
27Asogo mo’gulesimu, at Daniel en e,
“Nue, ap enede ’gagalak di wene yu wene enaluk a’ge emin, ap asuagun di a’ge yu a’ge elalin togwi a’ge emin, is ap wene pobuk om a’ge mo’gulontogwi a’ge emin, is ap hwesagal owene enaluk a’ge emin, enemin en hat habi ebe hisogo a’ge hegen a’ge ai,
Ebe disogo om a’ge paget hegenma o, oluk mo’gulhum modok mia o. 28Asogo a’geat de, Allah ’bogorl pam a’ge nak e, di wene yu wene hisogo a’ge elit ’baksogo mo’gulentasu o. Holuk e, at en wene pobuk om a’ge hat ’gain Nebukadnezar mo’gulhesimu o, nue. Holuk e, hat nogo ese legenma welat habi ebe yethasulat, habi ’gela’ge pam yethasulat, tigen a’ge ai ebe disogo hegen epegi. Asogo epegimu re, mo’gulheik o.
29’Gain a’ge, nue. Hat hebe nogosoma hebalema welat, wene o pobuk welema eria pam ema a’ge hegen o. Allah en di wene yu wene hisogo a’ge ’baksogo mo’gulentasu ai en, wene pobuk ema a’ge hil yethouwagoluk onukhiesimu yethegenma ai o, nue. 30An en hat habi hegen a’ge ebe pobuk ema a’ge hisogo oruak a’ge ai, Allah en ’baksogo mo’gulnesimu mo’gulheik ai re, ap logon enede ’gagalak a’ge ai mia a’geat de, an nak e, nede modok ’gagalak welat di wene yu wene naluk en mo’gulheik erlak o. We, hat habi hegen a’ge ai,
Ebe disogo om a’ge paget hegenma, oluk mo’gulhosoam haluk agalat, hat di wene yu wene hede eberise legen a’ge ai, pobi tagalat, tinogoluk, Allah en mo’gulnesimu mo’gulheik o.
31Eige ’gain, nue. Hat habi ’gela’ge pam yethegen ai re, disogo epegi. Hat horogolema edikhwe ap ogut hele’gik a’ge mesigat a’ge yethegen ai o. At ebe lok a’ge re, orogole il amolit delengtak onogorlok a’ge ’gela’ge yethegen ai o. 32Ebe ai a’gul e, emas il op a’ge hele’gik, ye, e’gik emin, emik emin, perak a’ge hele’gik, ye, ebagase emin, arloluk emin, tembaga a’ge hele’gik. 33Asogo a’geat de, agagu pema-pema re, ’besieme’gen a’ge pam hele’gik, ye, odua’gen pema-pema re, ’besieme’gen a’ge emin, ye, ’gwiang domul a’ge emin, ne’garlok-he’garloksogo hele’gik a’ge yethegen ai o, nue. 34Asogo yethegentik, hil yetharok oruakma re, helep lok a’ge mesigat nak agaikhen dom pam en aphwami en lebe ho erlakmayat omuat erle’bilogo ap ogut hele’gik a’ge ano sebelo ’bu agalat, odua’gen ’besieme’gen a’ge emin, ye, ’gwiang domul a’ge emin, emin ne’garlok-he’garloktak a’ge ano sebelegeimu orlo’buksogo ’goluk-’gelak eselat yarluktak oruakma yethegen ai o, nue. 35Erianoat, ’besieme’gen emin, ’gwiang domul emin, tembaga emin, perak emin, emas emin, ebano ’berlegat yarluk egei ai o. Asogo yarluk egei ai, o hebi pam aphwami en gandum e’gen hwellogulat aling hwikhai lagaiam sogwei en punsogo woluk lasu ai ’gela’ge woluk lagama re, ebale mesik oruakma hegen modok erlak ai o. Asogo a’geat de, helep aphwami onogut hele’gik a’ge ebe ’bulogo yarluksogo erlagap pesi a’ge ai nak e, lok dom ’gela’ge agarik, o ’gwiangma di owi yu owi modok sebelak oruakma yethegen ai o, nue.
36Hat habi hegen e, asogo paget hegen ai o, nue. Ye, yogodak an heragam a’ge en habi hegen a’ge ai,
Ebe disogo ema a’ge paget hegenma o, oluk mo’gulheik o, nue. 37Hebe ’gain a’ge, nue. Hat hebe aphwami o di owi yu owi welagai a’ge ’berlegat onuelak ’gain-’gain a’ge onue honuk logoat welegen ai o, nue. Asogo welegen ai, at Allah ’bogorl pam a’ge en hat ’gain welat, di aphwami yu aphwami he’gik pam welat, hanni a’bik welat, aphwami en erlikhobogulat, togu lemagoluk, edikhebesimu welegen o, nue. 38Ye, at Allah en e, hat en aphwami di owi yu owi ’berleksogo emin, wam, tue ’baik emin, ’berlegat hat he’gik pam welemagoluk tegei ai o, nue. Ye, aphwami onogut hele’gik a’gul emas a’ge hele’gik a’ge ai, hat hebeat o, nue.
39Asogo a’geat de, hat en tenentarok welegen a’ge ai erlak agokhwe re, ap muat mesik ’gain hat welegen ’gela’ge erlak. At e, anni weiyat mia a’ge inema ani o. His henebe ’biren ’gain wolomtik, erlak agaihwe re, aphwami onogut hele’gik o’gwe tembaga a’ge ai ebe re, ap mesik ’gain weleigoluk inema o. Asogo inagoam, aphwami o ’gwiangma di owi yu owi ’berlegat at e’gik pam welema o.
40Is ap enebe henagan ’gain asogo wolomtik, erlak agaiam e, pobuk ene’berlik e, ap mesik ’gain anni a’bik ’besieme’gen a’ge ’gela’ge mesik inema o. Asogo inotluk e, ’besieme’gen en di a’ge yu a’ge damuliselat, sagaliselat, tiso ai ’gela’ge, at en ap ’gain pema akhit en tenentarok welegesa a’ge ai modogat erlagapsogo ukpouwa o. 41Hat e, is aphwami ogut hele’gik ai, odua’gen ebe emin, odua’gen e’gela emin, ’besieme’gen a’ge emin, ’gwiang domul a’ge emin, emin ne’garlok-he’garlok hele’gik a’ge yethegen ai ebe re, ap henagan ’gain inotluk erlak agaiam e, pobuk inema a’ge ai en tenentarok welema a’ge ai me’gironobua o. A’geat de, hat en aphwami ogut ai oyuk ’besieme’gen erik a’ge ’gwiang domul a’ge emin ne’garlok-he’garlok hele’gikmu anni oruak hegen ai ’gela’ge, ap ’gain ai en tenentarok welema a’ge anni oruagat welema o. 42Ye, hat en aphwami ogut hele’gik a’ge ai oyuk e’gela pema akhit e, ’besieme’gen a’ge, ye, pema akhit e, ’gwiang domul a’ge, hele’gik a’ge hegen ai ebe re, ap ’gain mesigat a’ge en tenentarok oruakma pobuk me’gironobua a’ge ai re, mesik ’besieme’gen ’gela’ge enanni a’bik welema o. Ye, mesik ’gwiang domul a’ge ai ’gela’ge, enanni erlak a’ge welema o.
43’Besieme’gen a’ge emin, ’gwiang domul a’ge emin, e’birek mesikmu ne’garlok-he’garlok hele’gik oruakma hegen ai, logon e, is ap ’gain ai, enanni a’bik omogoluk hwami wil-wil wogonobogu lema o. Asogo a’geat de, ’besieme’gen ’gwiang domul a’ge emin ne’garlok-he’garlok hele’gu modok mia ai ’gela’ge, is ap ’gain ai asogo tua a’geat de, ebe demat ema modok erlak o.
44Asogo a’geat de, is ap ai ’gain otluk aphwami tenentarok welema eria hegit e, Allah ’bogorl pam a’ge ai en ap mesik ’gain modok welema a’ge edikpouwa o. Asogo edikpouwema aphwami at en tenentarok oruakma, aphwami ena’gul onuk logon en at mabenap pogulat, ap ’gain ai ebalema mesik inagalat, tua modok erlak. Asogo edikpouwema welat, at en ap logon ’gain otluk aphwami tenentarok welema a’ge ai, modok erlagapsogo ukpouwa o. 45Nue. Hat en e, helep mesik nak a’ge dom pam en aphwami ene’gik en o’borlogouk ho erlakma omuat erle’bilogo ’bu agalat, aphwami onogut hele’gik a’ge ai, ’besieme’gen emin, tembaga emin, ’gwiang domul a’ge emin, perak emin, emas emin, ebam hele’gik a’ge sebelo ’bu agalat, erlagapsogo ’bo pasumu yethegen erlak no? Asogo tisoma yethegenat o. At Allah anni a’bik a’ge ai en wene ebe pobuk ema a’ge hat hil houwagoluk onukhiesimu hil hegen o, nue. Hat habi hegen ai demat hegenma, an en ebe pobuk ema a’ge ai paget mo’gulhegis a’ge ai, hat hede en,
Demat, oluk pobi tuat o,” oluk mo’gulesi.
At ap ’gain en Daniel o’go wogosi wene
46Asogo mo’gulesimu, at ’gain Nebukadnezar ebe at Daniel eragam odogorlu pam ya’gutsogo orogole ’gwiangma sogup ’bou egeitik hau wusogo welat e, is at osi disogo mo’gulentesi,
“Daniel hau wusogo welat, wam di a’ge yu a’ge logon wusogo pogulat, di a’ge yu a’ge e’ben op a’ge logon narloumat o,” oluk mo’gulentesi. 47Asogo mo’gulentesirik e, Daniel disogo mo’gulesi,
“Daniel. Aphwami en, mu a’ge paget,
Nenaik ebe yuat o, oluk erliktogwi a’ge ai, miayat o. A’ge re, hat haik Allah ai, modok logo yo. Ap ononuk logo a’ge ’berlegat en aphwami eneragam a’ge tenentarok welagai ai, at e’gik pamat welagaimu o. Hat en e, wene hisogo a’ge ai,
Ebe disogo ema a’ge paget hegenma, oluk ’baksogo mo’gulnigen ai en, Allah en di wene yu wene hisogo a’ge ’baksogo demat mo’gulentasumu hegi, oluk pobi tegis o,” oluk mo’gulesi. 48Asogo mo’gulesirik, Daniel ebe ’gain welemagoluk edikpesi. Asogo edikpesirik, di a’ge yu a’ge modok op a’ge a’bik wogeselat, is ap enede ’gagalak a’ge at ’gain owi pam welegesa a’ge onue ’gain welemagoluk edikpasulat, o propinsi Babel eba gubernur welemagoluk edikpasulat, tegei. 49Asogo a’geat de, at Daniel en e,
“Disogo tik,” oluk at ’gain mo’gulesimu, at en e, Sadrakh emin, Mesakh emin, Abednego emin, aphwami Babel da ya welegesa a’ge onuelak welemagoluk edigenebesirik e, at Daniel nak e, at ’gain owi pam eba welemagoluk mo’gulesi.
Currently Selected:
Daniel 2: Wul
Highlight
Copy
Compare
Share
Want to have your highlights saved across all your devices? Sign up or sign in
