Daniel 1
1
At Daniel arilak enemin en togu legesa wene
1:1–6:28
Ap souwe Yahudi a’ge ap ’gain Nebukadnezar owi pam welegesa wene
1 #
2Raj. 24:1; 2Taw. 36:5-7 Ap ’gain onuk Yoyakim aphwami Yehuda a’ge onue ’gain otluk mo il ’biren senentarok welagarik, mo il nin henaganak a’ge pam tenentarok oruakma, aphwami Babel a’ge onue Nebukadnezar ligagarik, o Yerusalem larenebegei. 2#2Raj. 20:17,18; 24:10-16; 2Taw. 36:10; Yes. 39:7,8Asogo larenebegeimu, Nenaik ’gain Onuk Logo a’ge en aphwami Yehuda a’ge onue Yoyakim ebe Nebukadnezar e’gik pam pasulat, di a’ge yu a’ge o’go a’bik a’ge Nenaik ’gain Onuk Logo a’ge Allah owi werikmu welaga a’ge logon hogul horlouwagoluk mo’gulesi. Asogo mo’gulesimu, aphwami enebe herle wusogo wogonoboluk wagalat, di a’ge yu a’ge o’go a’bik a’ge hogul wesi a’ge ebano woluk wagarik, at odogwi asua owi werikmu ebano pesi.
3Asogo pesirik, ap mesik, at ’gain owi pam eba at iabuk togu legesa a’ge onue onuk Aspenas ai disogo mo’gulesi,
“Aphwami Israel a’ge ene’gik herle werak a’ge ebano re, ap eneiyagai souwe is ap ononuk logo oruak a’ge en dogo’gwe a’ge holuk emin, ap logon ’gain ononuk oruak a’ge at de onuelak ’gain opma’gwe a’ge en dogo’gwe a’ge holuk emin, logon pulenebin o. 4Asogo pulenebiselat, ap souwe enebe op a’ge holuk, enebam aik ’belak erlak a’ge holuk, sekolah a’bigat tigisa a’ge holuk, di wene yu wene enaluk en elit pobitu a’ge enede ’gagalak a’ge holuk, yabuk an nowi pam togulom elit a’ge holuk, pulenebin o. Asogo poligonoboluk, nis aphwami Babel a’ge neniak mo’gulentasulat, neniak pam pelal ’belak a’ge mo’gulentasulat, taga lomup o,” oluk mo’gulesi. 5At ’gain ano en asogo mo’gulesirik, mesik disogo mo’gulesi,
“Is onso’boru emin, enegeik emin, an neiyagai nemin a’ge enebaget wogontogu legep ai ’gela’geat wogentasulat, mo il henagan arat asogo mo’gulentaguntik holuk, is yabuk An nowi pam togu lemagoluk ne’bek wogonoboluk manup o,” oluk mo’gulesi.
6Asogo mo’gulesimu, ap souwe Yehuda a’ge logon pulenebegei. Is ai re, Daniel emin, Hananya emin, Misael emin, Azarya emin, enebe eria pulenebegei. 7Ap ’gain Aspenas en, is ap eriano pulenebegeitik, ononuk ’get a’ge disogo tualenebil laga. Daniel onuk Beltsazar tualiselat, Hananya onuk Sadrakh tualiselat, Misael onuk Mesakh tualiselat, Azarya onuk Abednego tualiselat, tegei.
8-9Is ononuk asogo tualenebegeimu oruakma, Allah en e, ap ’gain osi onue ano ebabut at en Daniel edeap poluk ede hwedik welemagoluk takpoluk pesi. Asogo takpoluk pesimu oruakma, at Daniel ogola en e,
“An en ap ’gain oso’boru emin, egeik anggur a’bosu nasu a’ge emin, noluk, nebe wiagap pagathwerlaikno. Nebit o. An nasu leik erlak o,” oluk ede epesirik, ap ’gain osi onue ano mo’guleselat,
“An so’boru emin, ik emin ai a’ge noluk, nebe wiagap pagathwerlaikno oluk e, we a’ge woknosolom o,” oluk mo’gulesi. 10Asogo mo’gulesi a’geat de, at Aspenas en ap ’gain ano ogorlok en disogo mo’gulesi,
“Is onso’boru emin, enegeik emin, disogo wogontogu lomup o, oluk at ’gain ano ebe enat mo’gulnesirikmu re, mia o. Hat asogo nasulom holuk, ap ’gain ano en e,
Ap souwe pema enebe op agaihweat de, at Daniel lak nak e, enebe wiak agai ai nopaget, oluk an nebe his henebaget no’gorlop ’balogo watnobua o,” oluk mo’gulesi.
11Asogo mo’gulesimu, ap akhen Daniel arilak enebe henagan eriano enemin tenentarok welemagoluk, at Aspenas en edikpesi a’ge ano, e’birek wene ai paget ogulat disogo mo’gulesi,
12“Hebabut ’balogo re, agauwa 10 pam so’boru yorum emin, ik emin, we a’ge nak no’gu lomogoluk woknentasu lomup o. 13Asogo woknentasumu en agauwa 10 pam arat wolomultik en, ap souwe logon so’boru at ’gain en nasu a’ge hegitsogo wogontogwiam no’gu lema a’ge ai, nenemin nenebe hil pobi nenebinok o. Asogo pobi taknonoboluk en, hat hebabut ’balema a’ge hegitsogoat woknentasu lerinok o, nue,” oluk mo’gulesi. 14Asogo mo’gulesimu, ap is Daniel lak tenentarok welaga a’ge ano en e,
“Op o,” oluk egeitik e, ebabut ’balogo agauwa 10 pam walhasu laga.
15Asogo walhasu lagarik, agauwa 10 pam arat welegesarik en ’gwelakhesi ’gal e, is Daniel arilak enemin enebe op enanni modok oruakhweat de, is ap souwe logon so’boru at ’gain emin hegitsogo no’gu legesa a’ge ebano enebe wiak ’gela’ge nak agama entesi. 16Asogo entesirik en, at ap Daniel lak tenentarok welaga a’ge ano en e, so’boru emin, anggur a’bosu emin, at ’gain en is wogentasu lemagoluk mo’gulentesi a’ge hegitsogo wogonto erlakma en, we, so’boru yorum emin, ik emin, we a’ge nak wogentasu laga.
17Asogo wogentasukhwe, Allah en e, ap souwe enebe ugan eriano di wene yu wene pelal wogo a’ge ano enaluk agalat, enede modok ’gagal agalat, tuagoluk tagenebesirik, at Daniel nak e, enabi hogwi a’ge emin, enabi ’gela’ge hogwi a’ge emin,
Ebe disogo om a’ge paget hegenma o, oluk elit mo’gulentasu lemagolugat wogesi.
18Is asogo wogentesimu oruakma, nadugat at ’gain ano en e,
“Mo il henagan welat, di wene yu wene mo’gulontomup,” oluk egei a’ge hegitsogo arat mo’gulentigisarik, at Aspenas en is ap souwe eriano ’berlegat ap ’gain Nebukadnezar e’bek wogonoboluk laga. 19Asogo wogonoboluk lasuam, at ’gain ano en is enemin weneane ogulat enebabut ’balhesi ’gal e, is ap souwe pema weiyat logon eneperlak en e, is Daniel emin, Hananya emin, Misael emin, Azarya emin, eria nak e, enede modok ’gagalak welat, di wene yu wene logon emin modok enaluk nakhwe yerentesirik e, yabuk at ’gain owi pam eba togu lemagoluk mo’gulentesi. 20Asogo mo’gulentesimu yabuk togwi oruakhwe, at ’gain en di wene yu wene agoam e,
“Ebe disogo om a’ge paget aga,” oluk eselat, pobi tuagoluk dokhumsogo mo’guleselat, tuagoluk, at osi o da ya at en eragam tenentarok welago’gwe ’berlek en mo’gulemagoluk mo’gulentasu laga a’ge lo’bok, o’go mo’gulogwiam enebabut ’balise laga a’ge re, is ap pobuk om a’ge paget mo’gulontogwi a’ge emin, ap asuagun di a’ge yu a’ge elalin togwi a’ge emin, o’go mo’gulogu legesa a’ge re, mia ’gela’ge. A’geat de, Daniel lak nak e, enede modok ’gagalak welat, di wene yu wene enaluk modok welat mo’gulogu legesa a’ge ai nak e, ’berlegat op nak mo’gulogukhwe entasu laga.
21Asogo togwi welegesarik en, at Daniel e, yabuk at ’gain owi pam ebano tago modok welagarik en hwerli pobuk ap Koresh owi Persia a’ge ai, aphwami Babel a’ge at en eragam enebesirik mo il naduk tenentarok welaga eria hwerliat welaga.
Currently Selected:
Daniel 1: Wul
Highlight
Copy
Compare
Share
Want to have your highlights saved across all your devices? Sign up or sign in
