Kolose 3
3
1 #
Mzm. 110:1
At Allah en e, Kristus elalugaptagalat, his heneminat henelalugaphenebegeimu welegep ai en, di a’ge yu a’ge Kristus ebe ’bogorl pam Allah eragam e’gik ’bekhit akhit ’gainat welagoma eba a’ge hwerlai louwogoluk, henannisogo togu lomup o. 2-3Henebe waregeptik e, pobuk Kristus eminat henelaluk wolorogup a’ge Allah en owan selakma po erlak abel akhit hisogo oruak ai en, henede re, di a’ge yu a’ge ’gwiangma a’ge pam eberak erlak welat e, ’bogorl pam a’ge pam eberogu lomup o. 4Eberogwi oruakma, at Kristus nenebe pobuk nenelaluk modok welemagoluk taknenebasu a’ge ano selakma wagoma re, his at eminat selakma orogupmu erlikhonobua ai o.
“Henebabut naduk a’ge ukpoluk e, ’get a’ge
wemit o,” oluk mo’gulentesi wene
5Ai en e, henebabut honotogat welat, henede en di nagai yu nagai opogu legep a’ge ai wusogo ukpogu lomup o. Henebabut ai re, ’babi tenontogwi ai emin, onogola en, nagai oluk enelemak no’gwi ai ’gela’ge, enede en noluk enebam aganhan ago ai emin, enil yerontoluk onogola en nagai opogwi ai emin, dogwi asua pam he’berik wolom ’gela’ge, onogola en e,
“Di a’ge yu a’ge, an na’ge nak wellep e,” oluk opogwi a’ge ai emin, henebabut ai a’ge ’berlegat wusogo ukpogu lomup o. 6Is aphwami Allah iak enesa’go hologwi erlak a’ge en enebabut asogoat togumu, Allah olot het agalat, wiagabonobua a’ge oruak o. 7His naduk e, ai a’ge pagerat togulat, henebabut asogoat togwi modok welegep o. 8Asogo a’geat de, yogodak his henebabut logon yu a’ge ’berlegat ukpemirat o. Onolot het ago ai emin, onogola’gwe het-’bet oso ai emin, is logon wiagabonobogwi ai emin, enemde pam e, onobok wiak ’balogulat, wiak togwi a’ge esegen obok ogulat, ogwi ai emin, ukpogu lomup o. 9-10#Kej. 1:26; Efe. 4:22,24Sum naduk a’ge no’gorlogo ukpoluk e, pobuk ’get ’buktogwi ’gela’ge, his henebabut naduk togu legep a’ge ukpoluk, pobuk henebabut ’get a’ge wegeptikmu re, heniak esei ogu lorogup o. Henebabut ’get a’ge ai, Allah enat walhentesirikmu no oluk e, at u’gwarek ebabut ’gela’ge oroguptik e, ebe modok dokhumsogo henaluk emagoluk, pobuk nadugat takhenebasu ai o. 11Asogo takhenebasuam e, nenebe ’berlegat nonue ’gain Onuk Logo a’ge Kristus emategatma re, nenebe ’berlegat at emin hwedik welege ai en, ena’gul onuk Yunani a’ge ogulat, Yahudi a’ge ogulat, ogwi ai emin, enagap ene’gerlimu a’ge ’belak a’ge ogulat, ’belak erlak a’ge ogulat, ogwi ai emin, eniak o’gut ’belak a’ge ogulat, enebe eneperlak a’ge ogulat, ogwi ai emin, eneragam a’ge ogulat, enematekma a’ge ogulat, ogwi ai emin paget e, asogo il lagalom mia o.
12 #
Efe. 4:2
His henebe, Allah en u’gwarek ebaget pulogo pagathwerlesirik e,
“An nu’gwarek neiyagai o,” oluk, edesogo welago ai o. Holuk e, sum ’get a’ge ’buktogwi ’gela’ge, henebabut disogo a’ge wemit o. Enebe enedeabonobogwi a’ge ai emin, enebabut enago welagai ai emin, onu’gwarek en erlikhorlo erlakma en enede sebelak welagai ai emin, enebabut lioksogo togwi a’ge ai emin, enepe mosogo welagai a’ge ai emin, henebabut ai a’ge womup o. 13#Efe. 4:32His-his mesik en mesik wiak takhonobogwiam, wene e’gen po erlakma en henepe mosogo welat, erlagapsogo ukpogu lomup o. His wiak togu legep a’ge, nonue ’gain Onuk Logo a’ge en erlagapsogo ukpesi ’gela’ge, his-his asogoat erlagapsogo ukpogu lomup o. 14Asogo togulat, ebe logo ’gela’ge re, aphwami enebe henedesogo wolomup o. Enedesogo welagai a’ge ai pam, henebe modok mesigat la’bulogo wolom ’gela’geat wolorogup ai o. 15At Allah en Kristus ebe mesigat a’ge henemin la’bulogo hwedik wolorogup oluk yo’go henebesi ai en, di paget yu paget tuogoluk, honogola en e,
“Kristus en emin la’bulik nenebesimu welege o,” oluk, wene aiat logap pogulat e, hegitsogo togu lomup o. Asogo togulat, Allah ebe hau worogu lomup o. 16#Efe. 5:19,20Aphwami ena’ge a’bik a’ge enilmu ’bullak welagai ’gela’ge, his e, Kristus iak aiat henedemu ningsogo poluk welat e, honogola ’gagalogoat, his-his wene henesa’go wat-wat ogulat e, wene his en mo’gulontogulat, is en mo’gulhontogulat, togu lomup o. Asogo mo’gulontogulat e, Allah paget weni Mazmur weni worogulat, weni Allah erliktogwi a’ge weni worogulat, Allah Arogun en henede ’gagalisoam, weni pelalogo worogulat, togulat e, henedemu en Allah hau worogu lomup o.
17“Nenaik Allah en woknentasu a’ge ai, ebe Yesus enat woknentasu o,” oluk, Allah hau worogulat,
“Nonue ’gain Onuk Logo a’ge Yesus eragam welat togu lege o,” oluk, di a’ge yu a’ge ’berlegat tuogoluk, heniak di paget yu paget uogoluk, at Yesus onuk ’balogo togu lomup o.
Is malik emin, onowi mesikmu a’ge,
“Disogo togulom o,”
oluk enesa’go weregei wene
18 #
Efe. 5:22; 1Pet. 3:1 His hwami norokhwi. Nonue ’gain Onuk Logo a’ge emin hwedik welat henebabut tu hegitsogoat, honogunlak eneragam welat eniak hologo togu lomup o. 19#Efe. 5:25; 1Pet. 3:7Ye, his ap narilak. Honugwami wene harosogo yagonto erlakma en, henedesogo wolomup o.
20 #
Efe. 6:1
Ye, his malik, nosi o. Henialak, henaiklak en, di a’ge yu a’ge paget mo’gulhontogwiam, eniak hologo togulomma re, nonue ’gain Onuk Logo a’ge ebam liok ua ai en e, asogoat togu lomup o. 21#Efe. 6:4Ye, his enaiklak yu, narilak o. Heneiyagai enede wiak ema no oluk onolot herap pogu lorogup o.
22 #
Efe. 6:5-8
His eneragam a’ge narilak norokhwi. Honuelak ’gwiangma a’ge en, di bele yu bele tuagoluk ogwiam, enebe enil pam nak e, enede opsogo togulat, enil erlakma re, mo ogulat, togu lorogup o. At e, nonue ’gain Onuk Logo a’ge honogorloksogo henede mesigat welat, honuelak eba eniak hologo tagonobogu lomup o. 23Di bele yu bele togulat, honogola en e,
“Aphwami enebaget nak togu lege erlak o. We, nonue ’gain Onuk Logo a’ge pagerat o,” oluk, henede pam enat togu lomup o. 24Henebe re, nonue ’gain Onuk Logo a’ge Kristus at eragam welat, at ebagerat togu legep ai en, henede en e,
“Nis togu lege ai paget, o’go re, at nonue ’gain Onuk Logo a’ge Kristus en eiyerak nonobouwa a’ge oruak o,” oluk, henede pobirak poluk wolomup o. 25#Ula. 10:17; Efe. 6:9A’ge re, at nonue ’gain Onuk Logo a’ge en e, aphwami onorogole nak pobirak poluk, logon olukhwema enebasulat, logon o’borloma enebasulat, tago erlak ai en e, sa en wiak tegei a’ge paget, o’go wogoum ’gela’ge re, wiak tago ai hegitsogoat wene ebam pouwa a’ge oruak o.
Currently Selected:
Kolose 3: Wul
Highlight
Copy
Compare
Share
Want to have your highlights saved across all your devices? Sign up or sign in
