Kolose 1
1
Hau warenebegei wene
1-2His Allah eiyagai o Kolose odoktugu legep a’ge Kristus emin hwedik welat, at ebaget henebabut he’bisogo togu legep a’ge, narilak norokhwi. An Paulus Allah ede epesi pam, Kristus Yesus en yo’go noboluk peraknobou wagama wegi a’ge ano, nonot Timotius ne’birek en wene yu pelal wokho hene’bek perakpou wege ai o. Nenaik Allah ebabut op ano en, op a’ge wokhentasulat, henede ha’bugaphenebasulat, taga lemak o.
Is Allah eiyagai Kolose a’ge enebabut togu legesa pam, Allah hau weregei wene
3-6Is logon en his mo’gulhontogulat e,
“His hena’ge op a’ge Allah en wokhontouwa a’ge ’bogorl pam henebesimu oruak o,” oluk mo’gulhentigisema, henede Kristus Yesus ebam he’berik poluk, togwiam, is logon en e,
“Is enede Kristus ebam he’berik poluk Allah eiyagai logon ’berlegat enedesogo togwi o,” oluk, honobok ogukhwe nenesa’go hweligerik e, nin hwedik nan hwedigat se’ban his henebaget ogulat, nonue ’gain Onuk Logo a’ge Yesus Kristus aik Allah at hau worogu lege o. His wene op wene, Allah ebabut op en tagenebasu wene ano naduk nadugat mo’gulhentau wegesema, henesa’go hweligeptik e, demat oluk pobi tigep ai hwerli, Allah en obaphenebiso ’gela’ge, op wene ai o di owi yu owi wiyaletil lasulat, Allah en aphwami asogo obabenebisoat o. 7#Kol. 4:12; Flm. 1:23Op wene ai, at Epafras nenare nenede hwedik a’ge en mo’gulhentasukhwe mo’gulhwerlegep ai o. At ebe re, Allah eragam a’ge nis nenemin hegirat welat, Kristus en yo’go poluk, perakpou wagama, nis en mo’gulhonto ’gela’ge nenebalema ebabut he’bisogo welat mo’gulhentasu ai o. 8At ebe nene’bek wagarik en e, disogo egei,
“Is enebabut e, aphwami logon enedeabonobogwi ai a’ge, Allah Arogun en wogentasuam, aphwami logon enedesogo togwi o,” oluk, honobok dokhumsogo mo’gulnentau waga ai o.
9Honobok asogo osokhwe nenesa’go hweligerik e, nis en his henebaget se’ban ogulat, Allah yo’go pogulat, mo u erlakma en ogwi modogat welege o. Asogo ogulat Allah Arogun en henede ’gagalisoam, henede modok ’gagalogo wene pobirak poluk e, at Allah ogola agai epasu a’ge ai his en, dokhumsogo henaluk welemagoluk yo’go pogu legeat o. 10Asogo henaluk oroguptik e, nonue ’gain Onuk Logo a’ge ogola opsogo re, at agai epasu a’ge hegitsogo togulomat o. Di a’ge yu a’ge owi yorogwiam edip lok agalat e’gen egesiso ’gela’ge, his Allah ebabut henaluk agalat, di a’ge yu a’ge op a’ge nak togulom ai o. 11Nenaik Allah anni a’bik erliktogwi a’ge ano henanniaphenebisoam, his henannisogo modok wolorogup en yo’go pogu legeat o. Asogo henanniaphenebasuam, di a’ge yu a’ge e’gin henebam agokhwe, henede ’bugom erlakma en, henepe mosogo welat, honogola henagai hogulat, 12nenaik Allah hau worogulat, togulom ai o. At nenaik en, at eiyagai logon eneminat o dakharakma honowirak a’geat welemagoluk takhenebesimu welegep ai en, arat hau worogulom ai o. 13Nis naduk o hiktakma wiak a’ge en eragam herle wusogo tennentarok oruakma, Allah en herle hebilogo woknonoboluk e, omlogo ede hwedik a’ge ano tennentarok welemagoluk eragam nenebesimu welege o. 14#Efe. 1:7Allah en asogo herle hebilogo delnenebegei ai, ebe re, at omlogo enat herle hebilogo delnenebegeitik, di wiak yu wiak togu lege a’ge ano, arat hosogo erlagaptegei ai o.
“Ebe logo re, Kristus at o,”
oluk mo’gulentesi wene
15-16Allah ebe nenil hogwi modok erlak a’geat de, at ebe nenil ho ’gela’ge re, Yesus aiat o. At Allah en, di a’ge yu a’ge, ’bogorl pam a’ge emin, ’gwiangma a’ge emin, nenil hogu lege a’ge emin, hogu lege erlak a’ge emin, walhesi ai o. Nenil hogu lege erlak a’ge logon e, malaikat enanni a’bik welat eneragam tenentarok oruakma eniak hologo welagai a’ge aiat o. Allah en asogo ’berlegat walhesi ai, ebe re, at Kristus enat, u’gwarek ebagerat walhesi ai en, di a’ge yu a’ge ’berlek eba, abel akhit ’gela’ge oruakhwe, logo re, Allah omlogo naduk dogo a’ge Kristus aiat o. 17At Allah en di a’ge yu a’ge owan walho erlak oruakhwe welagarik e, yogodak di a’ge yu a’ge ebale’gwe lo’bok oruak ai, at enat tenak oruakma re, op oruak o. 18#Efe. 1:22,23Nis Allah eiyagai nonue ’gain at Kristus welat, nenebe nenelalugapnenebiso ai en, at ebe e’gik oyuk ’gela’ge welege o. Di a’ge yu a’ge abel pam ’gela’ge oruakhwe, at Allah en,
“Logo re, an nomlogo naduk dogo a’geat welemak o,” oluk, at ebe waragama re, elalugaptegei ai o. 19At Allah en,
“An nogola nagai e, an nebabut notok modok welegi ai ’gela’ge, an nomlogo asogoat ne’birek hegit modogat welemak o,” oluk, ogola epesi hegitsogoat welago ai o. 20#Efe. 2:16Di a’ge yu a’ge ’gwiangma a’ge emin, ’bogorl pam a’ge emin, ’berlegat Allah emin wiak egesarik, il ’belak ’gela’ge oruakma, at Allah u’gwarek emin la’bulogo enebesi ai ebe re, Yesus e pam edikpoluk werigisema emep namogo waraga ai pam la’bulik enebesi ai o.
21Naduk e, his henede wiak wene eberogulat, henebabut wiak togu legep ano pam, Allah emin hektak welat il ’belak ’gela’ge welegep ani o. 22Asogo a’geat de, his henebe at Allah u’gwarek paget pagathorloluk, at il pam wene henebam erlaksogo op degelak welemagoluk, omlogo ebe waraga ai pam, u’gwarek emin la’bulogo henebesimu welegep ai o. 23Holuk e, op wene henesa’go hweligeptik e, honogola en,
“Pobuk op ema o,” oluk, epegep a’ge ai, henede o’borlogouk oluk ’goboksogo ukpo erlakma en ningsogoat tenak wolomup o. Op wene ai, at en o di owi yu owi aphwami enebe ’berlegat mo’gulentesi wene ai mo’gulentil nese lemagoluk, an Paulus yo’go nebesi ai o.
At Paulus en Allah eiyagai enebaget
taga laga wene
24An yogodak ya re, at Kristus en e,
“Allah eiyagai ’berlegat an nebeat o,” oluk nis nenebaget di obotut yu obotut hil-hil waraga ai, logon ho erlak a’ge ebalema, an nebe his henebaget di obotut yu obotut taknobogwi ai en nogola nagai a’bik hasu legi o. 25An e, Allah en, his henebaget, at eiyagai a’ge ’berlegat eneragam a’ge welemagoluk yo’go nebesimu, wene Allah en egei wene ai ’berlegat mo’gulentil denagalom hegitsogoat, mo’gulentil denaga legi ai o. 26Wene ai, o edamat edipmu en di tahun yu tahun agalat, aphwami dagetil wagaihwe, Allah en aphwami mo’gulonto erlakma en at ogola hisogo welaga. A’geat de, yogodak nis at eiyagai a’ge holuk, selakma ’baksogo mo’gulnentesi ai o. 27At Allah ogola en e, is aphwami o’borl o’gwe a’ge ’berlegat modok op tagonobouwa wene ai logo a’ge erliktu a’geat epesirik e, ogola hisogo welaga a’ge, at eiyagai holuk selakma ’baksogo mo’gulentaigoluk egei. Wene ai ebe re, Kristus his honogola oruak holuk, pobuk obaphenebasukhwe erlikhonobua aiat o. 28Ai en, nis en e, wene Kristus obok ai ’baksogo aphwami ’berlegat enebe lo’bok mo’gulentil laga lege. Asogo mo’gulentil laga lege ai pam, enebe lo’bok Kristus emin hwedik welat, enede hurle agaiam, Allah e’bek wogonoboluk womogoluk, nenede ’gagalak modok welat, enesa’go worogulat, wene mo’gulontogulat, til laga lege ai o. 29An wene ai paget ologun ’balogo tigoluk, at Kristus anni a’bik a’ge ano an nogola welat nanniapnebisokhwe, nannisogoat ningsogo taga legi ai o.
Currently Selected:
Kolose 1: Wul
Highlight
Copy
Compare
Share
Want to have your highlights saved across all your devices? Sign up or sign in
