Amos 5
5
Aphwami Israel a’ge enebabut heberlemagoluk mo’gulentesi wene
1His aphwami Israel a’ge yu. An en his henebaget leweni ik a’ge ai, henesa’go opsogo hwelip o.
2His aphwami Israel a’ge o,
henebe salesik ’gela’ge o,
arat ’bule dung ’bigeptik o,
pobuk inom mia o,
Henebe honu’gwarek hono’gwiang pam o,
eba arat ukhenebegesema o,
henebe edikhonobo a’ge enebe erlak o,
oluk egi.
3Nenaik ’gain Onuk Logo a’ge en e, asogo egei,
“Aphwami Israel oruakma o kota mesik e, ap tentara enebe 1.000 a’ge weim obuogoluk sinalogo ’gwi louwa a’ge de, waronobumu enebe 100 nak togolik enelaluk wema o. Ye, o kota mesik a’ge, ap tentara enebe 100 a’ge re, weim obuogoluk sinalogo ’gwe louwa a’ge de, waronobumu, enebe 10 nak togolik enelaluk wema o,” oluk egei.
4Nenaik ’gain Onuk Logo a’ge en aphwami Israel a’ge paget mesik disogo egei,
“Togolik an ne’bek manis o. Worogup holuk, henelaluk wolorogup o. 5His an nebaget tuogoluk, o Bersyeba lagup no yo. Ye, aphwami o Betel a’ge enebe erlak ema ai en e, an palo nebil, eba lagup no yo. Ye, aphwami o Gilgal a’ge enebe herle wusogo wogonoboluk louwa ai en e, o Gilgal lagup no yo,” oluk egei.
6Holuk e, his henebe togolik Nenaik ’gain Onuk Logo a’ge e’bek manis o. Worogup holuk, henelaluk wolorogup o. Asogo a’geat de, worogup erlak holuk, at ebe odouk magale melangsogo wago ’gela’ge, aphwami Israel a’ge hene’bek wotluk, henebe odouk perlengsogo no ’gela’ge wathonobua o. Asogo wagoam, aphwami o Betel a’ge en odouk ai nekhi tu modok mia o. 7His en wene hegitsogo hwalontogwi ai a’ge pobuk lagaksogo, lalonobogulat, onolot het-’bet di a’ge yu a’ge ’gwiangma ’bo pogwi ai ’gela’ge, hegitsogo togwi a’ge ai ’bo pogulat, togu legep ai en nede o, wiagaphonobua o.
8 #
Ayu. 9:9; 38:31 Nenaik ’gain Onuk Logo a’ge en e, hwesagal ’bogorl pam a’ge logon esan mesikmu logolak onuk Kartika ogwi a’ge emin, onuk Belantik ogwi a’ge emin walhesirik, o hiktak a’ge dakhasogo pasulat, o erlige a’ge huba’go heli’gogo pasulat, ik laut lok ye’gelak ai a’ge ligotluk ’gwesalogo o ’gwiangma di owi yu owi ’bise lemagoluk mo’guleselat, oso a’ge ai onuk Nenaik ’gain Onuk Logo a’geat o. 9At en e, ’besie amolit agauwa mesik erlige eden-peden hogwi ai ’gela’ge, ap enanni a’bik a’ge mesik erligeat erlagap pasulat, selei a’ge ’guano oluk o ningsogo werik welagai a’ge erlagap pou wagoluk wiak a’ge perakpou wagalat, tiso ai o.
10His e, wene ’belo’gogumu ap logon wene ’gorlo hwalentasuam wene yagogwi a’ge henebirap onobogulat, wene demat ogwi a’ge honogola en mi-miarak pogulat, togu legep ai o. 11His en aphwami ena’ge modok enerlagaik a’ge sebelogo ’belagonoboluk, onso’boru gandum a’ge hene’gik abusak horlogu legep ai o. Asogo togu legep ai en, his henebe honowi op modok werigepma eba welat, anggur owi heniabukmu yakhwerlegep a’ge op modok oruak ai, e’gen a’bosu no’gulat, togu lorogup modok erlak o.
12His henebabut e, ningsogo ’gorlo modok togulat, aphwami logon enebabut hegit op a’ge di obotut yu obotut tagonobogulat, is aphwami logon oruak o’gwe emagoluk o’go wokhontogwiam horlogulat, aphwami logon ena’ge erlak enerlagaik a’ge is logon en owene ’belingholuk wene enebam pogulat, no’gorlogulat, togumu eba en wiak tagonobuagoluk ukpogulat, wiak modok a’bik togu legep ai henebabut an naluk o. 13His henebabut wiak ’gorlo modok togu legep ai en, is ap enede modok ’gagalak a’ge enede en e,
Wiak asogo togwi ai, neniak u mia, oluk, eniak erlagat welagai ai o.
14Henelaluk weleripok oluk e, di a’ge yu a’ge horlouwogoluk motluk lagai ai ’gela’ge, ’gorlo togwi a’ge ai motluk lo erlakma en, hegitsogo togwi a’ge ai motluk laga lomup o. Henebabut asogo togu lorogup holuk, henaik Allah ’gain Onuk Logo a’ge di a’ge yu a’ge tu nak a’ge ano his en ogu legep a’ge ai hegitsogoat hene’gerlakma modok welema o. 15Enebabut wiak togwi ai henebit welat, op togwi a’ge aiyat henede pam en e, henagaisogo togu lomup o. Asogo togulat, wene ’belo’gogumu eba, wene hegitsogo hwalontogulom a’ge aiyat anniap pomup o. Asogo togup holuk, Nenaik ’gain Onuk Logo a’ge Allah di a’ge yu a’ge tu nak a’ge ano en, his aphwami hena’gul onuk Israel a’ge erlak agai erlakma en, ado henelaluk wolorogup a’ge ai edeaphonoboat wolom o.
16Nenaik ’gain Onuk Logo a’ge Allah di a’ge yu a’ge tu nak a’ge ano en disogo egei,
“Aphwami o kota ebela lak-wak ogulat, o seli’gwe lo’bok odoktak welat, togulat, onogola wiak en,
Yi, yi, oluk lo’gu marogulat, aphwami yabuk wogwi a’ge nge tuagoluk worlontogulat, leweni modok enaluk a’ge en, aphwami waregesa a’ge paget leweni uagoluk yo’go onobogulat, tua o. 17An nebe hene’gerlakma wagalat wene henebam pil weik ai en e, aphwami anggur yabukmu ’berlegat welema a’ge en lo’gu a’bik marua o, oluk an henaik ’gain Nonuk Logo a’ge en arat egi o,” oluk egei.
18Nenaik ’gain Onuk Logo a’ge owi arat dakha ua ai re, his honowi dakha uano? His henebaget o selak a’ge dakha ua puk. O higat modok dakha ua a’geat de, his en e,
O ai dakha uak e, oluk honogola henagai opogwi welegep ai nopaget.
Eige, nede a’ge o, wiagaphonobua o. 19O ai dakha eselat lai louwa re, aphwami logon singa onogorlok en ogoiyesogo hweiye louwa a’geat de, ’baik sou ’gela’ge ebabut wiak a’ge onuk beruang ai a’ge emin sarlok tu ’gela’ge agalat, togolik onowi pam wotluk ene’gik o hebat pam tenhogwiam, ’gosu herlegetie iak en ’balonobu ’gela’ge tagalat, tua o. 20Nenaik ’gain Onuk Logo a’ge owi dakha ua ai re, o telak a’ge dakha ua puk, o hik-haktak o hena soduk wiak a’ge en sebelak a’ge dakha ua o.
21 #
Yes. 1:11-14
Nenaik ’gain Onuk Logo a’ge en asogo egeitik, mesik disogo egei,
“His en,
Allah paget togu lege oluk, odoktak poluk seni sorogu legep ai nebit modok otluk e, nil honto nebit ago yo. 22His en wam, tue emin, gandum emin, an nebaget noboluk narlnomogoluk woluk worogup holuk, an en waik modok erlak o. Ye, his en an niak sagalogo wiak tigep a’ge ai paget, nemin la’buluogoluk honuam esei a’bik a’ge wusogo narlnosu orogup a’ge re, an en waik modok erlagat o. 23His en weni a’golugwiak worogu legep ai, an nilem worogulom modok nebit o. Ye, gitar worogu legep ai, pobuk worogukhwe iak nesa’go hweliselom nebirat o. 24His henebabut e, ik elaruk ’gulogo lasu ai ’gela’ge, wene hegitsogo hwalontogu lomogoluk aiyat logap pogulat, ik elaruk egeik a’ge perek ago modok erlak ai ’gela’ge, hegitsogo togu lomogoluk logap pogulat, tip o.
25 #
Per. 7:42,43 His aphwami Israel a’ge yu. An en his o lei aphwami erlak o’gwe wokhonoboluk wagokhwe 40 tahun lai laga ai o. Asogo wokhonoboluk wagokhwe, his en wam, sue, di a’ge yu a’ge an nebaget pogulat, odouk narlik nobogulat, togu legep no? Erlak o. 26-27Asogo a’geat de, yogodak his en,
Dogwi asua onuk Sakut, at ebe nonue onuk logo a’ge ’gela’ge, oluk erliktogulat, mesik onuk Kewan hwesagal a’ge asua oluk erliktogulat, hene’gik en ogut hele’gigep a’ge ai en e, an en his henebe o Damsyik en abel etleba akhit walegat eba hene’gik herle wusogo perakhenebasuam honodogwi ai honu’gwarek en horloluk lagup ani o, oluk An Henaik Allah ’gain Nonuk Logo a’ge di a’ge yu a’ge tu nak a’ge ano en arat egi o,” oluk egei.
Currently Selected:
Amos 5: Wul
Highlight
Copy
Compare
Share
Want to have your highlights saved across all your devices? Sign up or sign in
