Amos 4
4
1Asogo egeitik e, mesik disogo egei,
“His hwami Samaria a’ge sapi wam o Basan esei a’bik welago ai ’gela’ge henebe lok dakhogu legep a’ge yu. An niak ik a’ge yu, henesa’go opsogo hwelit o. His en aphwami logon enanni erlak a’ge di obotut yu obotut tagonobogulat, ena’ge erlak enerlagaik a’ge sebelogo onobogulat, honogunlak mo’gulontogulat,
Negeik naik a’ge paget anggur a’bosu honuk-honuk agai a’ge na’gogo nebasu lemin, oluk heniak uareksogo mo’gulontogulat, togu legep ai o. 2An henaik Allah ’gain Nonuk Logo a’ge degelak modok welegi a’ge en nu’gwarek nonuk ’balogo wene disogo mo’gulhentaik,
Pobuk his henebe ’besieme’gen e’gat a’ge pam lisogo wokhonoboluk lagalat, ado logon welema a’ge ’berlegat hiane iak ele wogo ai ’gela’ge pam lisogo wokhonoboluk lagalat, tua o. 3Asogo wokhonoboluk louwogoluk, leget pakleget werik ’bullak a’ge ho’gorlak ele’gwe henebe lo’bok honorogole dikhum woroksogo o Hermon hegit lebikhonobua o, oluk an henaik ’gain Nonuk Logo a’ge en arat egi o,” oluk egei.
Is aphwami Israel a’ge Allah iak sagalogo wiak tigisema wene yagentesi wene
4Nenaik ’gain Onuk Logo a’ge en asogo egeitik wene enebamsogo mesik disogo egei,
“His aphwami Israel a’ge yu. His en o Betel dogwi asua paget togu legepma eba an niak sagalogo wiagat mikhwerlemit o. O Gilgal eba loluk wiak loksogoat ti lit o. Loluk e, wam dogwi asua paget wusogo loruk-hopmu hubet siaksogo narlik obogulat, di a’ge yu a’ge owi yorogup a’ge ebe dorogulat, ’balogulat, togup a’ge hene’gik wenakho 10 lai lasuam, 9 his eiye agalat mesik ai dogwi asua paget poluk, hene’gik mo il ’biren wolotluk mesik pam wogesi lagalat, togu lomup o.
5Allah en woknentasu legen o, nenaik, oluk hau watnobogulat, roti an nebaget nobo ’gela’ge, dogwi paget roti e’gen periso a’ge emin worogo a’ge obogulat,
Nis en logon ebam louksogo pogu lege, oluk erlikhorlogulat, logo pogulat, togu lorogupmu re. His asogo togulom henagai enat togu legep ai o, oluk an henaik Allah ’gain Nonuk Logo a’ge en egi o.
6Asogo togu legep ai en, an so’boru obouk modok wiak a’ge honowi kota ’berlegat hene’bek perakpou wegi a’geat de, his togolik ne’bek wom henebit o, oluk an henaik ’gain Nonuk Logo a’ge enat egi o. 7His heniabukmu di a’ge yu a’ge yakhwerlegep a’ge e’gen owan ’belak erlak oruakhwe, moru ’belakpou wom erlakma en, mo eselat, o kota mesik moru ’belakhonobou agalat, kota logon ’belabu ago erlakma en mo eselat, heniabukmu logon moru ’belakhentau wagalat, pema akhit mo osoam ’gwiang modok ’buk agalat, tegis ai o. 8His aphwami o kota akhen welegep a’ge ik nadugat en no’gwi erlak welat, ik modok nele en, o kota akhen ik heratil laga legep a’geat de, ik eba a’ge henebam yamuksogo no ebele mia aga laga ai o. Asogo agokhweat de, his pobuk togolik an ne’bek wom henebit ai o, oluk an henaik ’gain Nonuk Logo a’ge enat egi o.
9An en e, sogwei aganhan wiak a’ge henebam punsogo perakpou agalat, ou edip wiak a’ge aphwami enebam perakpou om ’gela’ge, yabuk di a’ge yu a’ge yogo a’ge emin, anggur yabukmu emin, wiagap pou wagoluk perakpou agalat, tigis at o. Ye, e ara emin, e zaitun emin, ho’bukhak en perlengsogo ne’geiat a’geat de, his henebe an nebam togolik wom henebit o, oluk an henaik ’gain Nonuk Logo a’ge enat egi o.
10An en ou edip modok wiak a’ge aphwami Mesir a’ge ene’bek perakpegi ai ’gela’ge, henebam perakpou agalat, heneiyagai souwe a’ge heneselei a’ge emin weim obogulat, waronobuagoluk lagalat, is logon en honuam kuda ene’gik abusak horluagoluk tagalat, his weim obuogoluk honowi sum a’ge werigepma eba, an en ap werak muk e’ben hene’biang ele’gwe ’gwelakhenebasulat, taga legi a’geat de, his togolik an ne’bek wom henebit o, oluk an henaik ’gain Nonuk Logo a’ge enat egi o.
11 #
Kej. 19:24
Aphwami his a’ge logon an en aphwami o Sodom Gomora a’ge wollo’gen dagalogo erlagap enebegis ai ’gela’ge enebe erlagap enebegismu, ado logon henelaluk welegep a’ge ai, henebe odouk aro’go’go odoukmu en yegerlogo wogwi ai ’gela’ge welegep ai o. Asogo a’geat de, his togolik an ne’bek wom henebit o, oluk an henaik ’gain Nonuk Logo a’ge enat egi o. 12Asogo togu legep ai en, his aphwami Israel a’ge yu. An en wene henebam paik o. Holuk e, an en wene henebam pou weik ai en e, his an henaik Allah nologotma henebabut heberlogo wolomup o,” oluk egei.
13At Nenaik ’gain Onuk Logo a’ge en di dom yu dom walhasulat, yasobu walhasulat, tegeirik e, at ogola epasu a’ge nis aphwami mo’gulnentasu o. At en o hup ago dakha oso walhesirik, ebe o ’gwiangma yema di owi yu owi dom a’gul petne noso yo. Onuk e, nenaik ’gain Allah Onuk Logo a’ge di a’ge yu a’ge tu nak a’ge aiyat o.
Currently Selected:
Amos 4: Wul
Highlight
Copy
Compare
Share
Want to have your highlights saved across all your devices? Sign up or sign in
