Peragenebesi 8
8
1At Stefanus ebe modogat werigisa ai, at Saulus ogola en obat epesi.
At Saulus en Allah eiyagai o Yerusalem a’ge di obotut yu obotut tagenebasu laga wene
At Stefanus ebe werigisa ai erlige re, is Allah eiyagai o Yerusalem odoktugu legesa a’ge enebe di obotut yu obotut wiaksogo tagonobogukhweat de, is ap Yesus en yo’go onoboluk peragenebesi a’ge ebano nak, o Yerusalem oruakhwe re, Allah eiyagai ado enebe lok o’gwe ’berlegat ’bulogo re, o propinsi Yudea Samaria da ya eba mukho lebigenebegesa. 2Asogo lebigenebegesema, is aphwami at Allah iak hologo togu legesa a’ge logon en e, Stefanus ano ebe werak ’gwiangma sebeligisarik e, ebaget nge a’bik togu legesa.
3 #
Per. 22:4,5; 26:9-11 Allah eiyagai asogo lebigonobogulat, at Saulus ano Allah eiyagai a’ge wollo’gen dagalenebigoluk e, onowi lo’gwe lo’bok da ’gwil, ya ’gwil, denagalat, ap et, hwami et, ene’gik lisogo wogonoboluk e, o aphwami ene’gik herle wusogo onobogumu ebano enebei lasu laga.
At Filipus en op wene o Samaria mo’gulentau waga wene
4Asogo tagenebasukhwe, is ’bogulogo legesa a’ge ebano o di owi yu owi lagalat e, op wene ano mo’gulentil ’bogoligisa. 5Asogo mo’gulentil ’bogolugulat e, at Filipus o kota Samaria eba wagarik, wene disogo mo’gulentesi,
“Allah en e,
Ap mesik delhonobuagoluk perakpou weik, oluk obok mo’gulnentesi ano, ebe perakpou wagama wagarik disogo tegei o,” oluk obok mo’gulentasu laga. 6-7Wene asogo mo’gulentasulat e, is en wene pobi tuagoluk mu’gat enebabut wiak a’ge aphwami enebe esan onogola ’goluk welegesa a’ge eniak loksogoat ogukhwe henokho lebikpasulat, is logon esanat onoyuk soborak a’ge emin, onoyuk il heberlak a’ge emin, obabenebiselat, elalin a’ge tagenebasu laga. Asogo tagenebasu laga ai en, aphwami ebano enebe ’berlegat odoktak welat, enil holuk, enesa’go pobisogo hologu legesa. 8Asogo tagenebasuam e, is aphwami o Samaria a’ge eba, onogola enagai a’bik hogu legesa.
9O Samaria eba ap asuagun a’ge mesik onuk Simon welaga. Page enat at ebe asuagun welat asua ebele tagalat e,
“’Gain asuagun nebe anat o,” oluk osoam e, is aphwami o Samaria a’ge en,
“Eige! Nonogorlok o,” oluk, at erliktogu legesa. 10Erliktugulat e, is aphwami ’gain a’ge, we a’ge, ’berlegat at iak pobisogo enesa’go hologu legesa. Asogo holugulat, is en e,
“Allah anni modok a’bik oluk ogwi ano re, ebe yuat o,” oluk ogu legesa. 11Ap ai page eba enat asua tiselat e, onogorlogap pogwiam e, at iak dokhumsogo enesa’go hologu legesa ani o. 12Asogo a’geat de, at Filipus en op wene Allah en eragam enebasu wene ai mo’gulentasulat, Yesus Kristus onuk ano mo’gulentasulat, wene op wene ano ese lagama re, aphwami ebano en e,
“Wene ai demat o,” oluk wegesa a’ge, ap et, hwami et, ik olomu ’belabenebise laga. 13At Simon ebe ogo re, eneminat,
“Wene ai demat o,” oluk wesimu, ik olomu ’belakpesiat. Asogo ’belakpesirik e, aphwami wene pobi tuagoluk, Allah anni pam elalin tu puk a’ge tisokhwe re, at Simon ai Filipus e’berlik modok neselat, il holuk e, ogorlok aga laga.
14Asogo tigisema, aphwami en e,
“Aphwami o Samaria a’ge Allah iak wegesa o,” oluk ogu legesema, is ap Yesus en yo’go onoboluk peragenebesi a’ge ebano, o Yerusalem welat, enesa’go hweligisarik e, Petrus Yohanes e’birek aphwami Samaria a’ge ene’bek peragonobou wegesa. 15-16Peragonobou wegesema wegesarik e, aphwami o eba a’ge en e,
“Allah iak demat o,” oluk wegesa a’ge, nonue ’gain Onuk Logo a’ge Yesus onuk ’balogo ik olomu nak ’gerat ’belabenebigisema, Allah Arogun owan enebam ’buom erlak welaga ai re, Allah en Arogun wogontouwagoluk yo’go pegesa. 17Asogo Allah yo’go pogulat, ene’gik enebam sebelak pogwiam e, Allah en Arogun wogentesimu hwerlegesa. 18Asogo hwerlegesema, at Simon il ontoluk ogola en e,
“Aphwami re, is ap Yesus en enebe yo’go onoboluk peragenebesi a’ge en, ene’gik enebam sebelak onobogwiam nak e, Allah Arogun wogonto hegi o,” oluk epesirik e, Petrus Yohanes e’birek o’go wogentaigoluk, ene’bek uang woluk waga. 19Woluk wagarik e, disogo mo’gulentesi,
“An ne’gik aphwami logon enebam sebelisoam e, Allah en Arogun asogoat wogentasuam horlogu lemagoluk, an neminat eiye omogoluk, his togu legep a’ge ai owene mo’gulnemis o,” oluk mo’gulentesi. 20Asogo mo’gulentasu lagama, at Petrus en e,
“Hat hogola en e,
Allah ebabut op en woknentasu a’ge ai, hat en o’go poluk eiye om, epegen a? Mia o. Asogo epegen ai en, hat ho uang ai nalagalat, hebe nalagalat, tuak o. 21Allah ilem hogola modok wiak a’ge eberise legen ai en, nis togu lege a’ge ai, hat hemin eiye omul erlak o. 22-23Hat hebabut e, is logon enebam ’bou taga legen ai, wam omotukhwe esik wiak ai ’gela’ge hogola ’beterak oruak o. Oruakma, wiak tigoluk hede eberise legen ai en, herle ’gela’ge wusogo tenhiarok oruak ai, hebabut pobi hebegis o. Wiak tigoluk e’gen ai, ukpoluk, hebabut heberlip o. Heberlogunmu re, hat hede epegen a’ge ai nonue ’gain Onuk Logo a’ge en erlagapsogo ukpou wagoluk yo’go pomup o,” oluk mo’gulesi. 24Asogo mo’gulesimu, at Simon en e, disogo mo’gulesi,
“His egep ai ’gela’ge, an nebam ema no oluk e, an nebaget nonue ’gain Onuk Logo a’ge yo’go pomup o,” oluk mo’gulentesi.
25Asogo mo’gulentesimu, is Petrus Yohanes e’birek en e, wene enaluk a’ge pobisogo ogulat, nonue ’gain Onuk Logo a’ge iak mo’gulontogu legesarik, o eba en e, op wene ai, o Samaria seli esan da mo’gulontogulat, ya mo’gulontogulat, takpoluk, togolik o kota Yerusalem legesa.
At Filipus en ap ’gain o Etiopia a’ge wene mo’gulesi wene
26O kota Yerusalem legesarikmu re, malaikat nonue ’gain Onuk Logo a’ge ano en yo’go peragonobou wago a’ge mesik Filipus e’bek ’bu agarik wene mo’guleselat e,
“Hat hebe siaksogo, ebela o Yerusalem en o Gaza ik obut hegit ’bogwi’gwe, aphwami enebe erlak o’gwe aiat ’bi lu o,” oluk mo’gulesimu re, siaksogoat ’bi laga. 27’Begei ’gal e, ap owi Etiopia a’ge mesik, owi pam ’biogoluk ebela’gwe ’bise laga. Ap ai re, hwe o Etiopia a’ge ’gain onuk Kandake ai en, at ena’ge di a’ge yu a’ge pekharok welemagoluk, e’gikmu pesimu re, ’gain welaga a’ge. At ebe ’gainat welat e, Allah eragam ’gwegeitik, se’ban o Yerusalem il orlu aga. Orlu agarik e, 28pobuk togolik owi pam ’biogoluk, ’gwiangso ’gela’ge hele’gik a’ge wam kuda en lisogo woluk lasu a’ge ano pam huragarik ’bi lasulat e, wene Allah iak at Yesaya en mo’gulentasu lagarik, pelal wesi a’ge ai onuk mo’gul mo’gul ’begei. 29Asogo mo’gulil ’bisokhwe re, at Allah Arogun en Filipus mo’guleselat e,
“’Gwiang so ’gela’ge ai ’bisoma agap tenhai laguntik e’bek horoksogo lu o,” oluk mo’gulesi. 30Asogo mo’gulesimu, at Filipus pungtak e’bek ’begei ’gal e, ap ano en wene Allah iak Yesaya en mo’gulentasu lagarik, pelal wokho pesi a’ge ano onuk mo’gulisoma re, esa’go hwelegei. Esa’go hwelegeitik e, disogo mo’gulesi,
“Nue. Onuk mo’gulise legen ai, wene ebe pobi taga legen a? Erlak a,” oluk mo’gulesimu, 31at en e,
“Wene ai ebe sa en se’geksogo mo’gulnomma en pobitu o,” oluk mo’gulesirik e,
“Hat ne’birek ’buogoluk, ya hutlarli suk o,” oluk mo’gulesi. 32#Yes. 53:7-8Asogo mo’gulesimu, e’bek hutla ’gwi lagarik il ’gwelakhesi ’gal e, ap ano pelal disogo oluk wogo a’ge onuk mo’gulisoma il hesi,
“At e, domba wam woruogoluk woluk lagai ai ’gela’ge woluk legesa o.
Woluk legesarik, domba emalik asu ’baluogoluk tugukhwe,
iak erlak ensogo mo oso ai ’gela’ge,
at ai ogo iak mesik u erlakma en mo egei o.
33Ye, at e’gerli worogulat, erlele wo erlakma en wiagapsogo pogulat, togu legesa ai o.
Asogo tugulat, worogwiam waragarik ebe ’gwiangma yema wolom erlak ai en,
aphwami logon en at en dogo’gwe a’ge paget onobok ogulom e, erlak aga o,”
oluk pelal wokho pesimu oruakma onuk mo’gulise laga ai o.
34Asogo onuk mo’gulise lagarik e, ap ano en Filipus disogo mo’gulesi,
“Wene yu, at ap Allah iak mo’gulentasu laga a’ge ai en egei ai re, at u’gwarek paget egei a? At e, ap mu a’ge paget egei a. Hat en wene ebe se’geksogo mo’gulnemin, nare,” oluk mo’gulesi. 35Asogo mo’gulesimu re, at Filipus en op wene Yesus taga laga a’ge wene mo’guleigoluk, wene edip pelal wogo a’ge ai pam en ’beli’gogo mo’guletil ’begei. 36Mo’guletil modok ebela’gwe ’biselat e, ik lolumu ’bigisarik, at ap ’gain ano en e,
“Ik yu yethemen. An ik olomu ’belapnobu epasu legi o. Ye, at e, ’ge a’ge on owan welegi epegen,” oluk mo’gulesimu, [ 37at Filipus en e,
“Nue. Hede mesigat welat, Yesus ebam he’berik pegentik e’gen holuk e, ik olomu ’belaphobuat o,” oluk mo’gulesimu, at ap ano en e,
“At Yesus Kristus ai, demat Allah omlogoat o, oluk nogola epegi,” oluk mo’gulesi.] 38Asogo mo’gulesirik e, eragam a’ge en ’gwiangso ’gela’ge kuda en lisogo woluk ’begei a’ge ano eriano mo uagoluk mo’gulesirik e, Filipus e’biregat ik lolumu ’bigisarik, ik olomu ’goluk ’belabegei. 39Ik olomu ’belakpesirik, ik iak pam liplau wagoma, at Allah Arogun en e, Filipus ano ha’boksogo woluk o momu pou wagama re, ap ’gain ano en Filipus ebe pobuk il ho erlak. Asogo ho erlak a’geat de, ogola agai holuk e, ebela ’biogoluk ’bi laga’gwe anoat ’bekhit ’bi laga. 40Ye, at Filipus Allah Arogun en woluk o Asdod eba pou wagama welat, ede e’gat agarik, o eba en e, o seli ’berlegat o lo’gwe da ’gwil, ya ’gwil, wene op wene mo’gulentil, o kota Kaisarea orlu aga.
Currently Selected:
Peragenebesi 8: Wul
Highlight
Share
Compare
Copy
Want to have your highlights saved across all your devices? Sign up or sign in
