Peragenebesi 24
24
Ap Yahudi a’ge en wene Paulus ebam pegesa wene
1Asogo mo’gulentesirik e, agauwa huaben welegesarik agauwa agaikhen oruakma re, is ap Allah eiye a’ge onue ’gain Ananias emin, enarluedek a’ge ebano logon emin, ap mesik wene hwaliso a’ge onuk Tertulus emin, enemin o Kaisarea wegesa. Wegesarik e, ap ’gain gubernur Feliks ano e’bek ’gwigisarik, wene Paulus ebam pouwogoluk mo’gulegisa. 2Asogo mo’gulegisarik, Paulus ebe worlholuk e, Tertulus en wene ebam pou wagoluk, mo’gulegisema, at en ’gain Feliks disogo mo’gulesi,
“Gubernur Feliks nue. Hat en tennentarok oruakhwe re, nis yema page enat weim erlak lioksogo welege o. Aphwami nis a’ge paget e, hogola en ’gagalogo, hegitsogo taga legen ai pam di a’ge yu a’ge op ago. 3Hat en o da ya nin hwedik nan hwedik opsogo nak taga legen ai, nis en,
Op o, oluk, hau modok wathobogu lege. Nue. 4Asogo a’geat de, an en wene yat mo’gulhosokhwe hebit ema no oluk, wene horoksogo mo’gulheik yu, hebabut op ano re, hesa’go hologun en, wene ebe mo’gulheik. 5Ap yu en e, aphwami wiagabenebil denagoma, ebabut ’balige o. Is aphwami ap Nazaret a’ge ano e’berlik lagai a’ge onue ’gain welat e, aphwami Yahudi a’ge o di owi yu owi welagai a’ge ’berlegat onogola edikpil denago yo. 6Asogo onogola edikpil denaga lagarik e, o Allah owi werik a’ge wiagap paigoluk tagoma ebe tenak pege o. [Tenak pegerik e, wene nis aphwami Yahudi a’ge en togwi a’ge pam emdema wouwogoluk tige. 7Asogo a’geat de, ap tentara a’ge onue ’gain Lisias ano wagarik e, ebe nene’gikmu en delogo woluk lagarik yema perakpou waga ai o. 8Asogo perakpou wagarik, wene ap yu ebam pege a’ge nenebe hat he’bek wemagoluk mo’gulnentesimu wege yu i o.] Nis en wene ebam pege a’ge ai, hat en emdema wasulat, haluk emayat o,” oluk mo’gulesi. 9Asogo mo’gulesimu, is ap Yahudi a’ge pema akhit ebano en ogo re, wene at ebam pogulat e,
“At Tertulus en egei ai, demat egei yo,” oluk mo’gulegisa.
At Paulus en, u’gwarek ebe erlele wokho, ’gain Feliks mo’gulesi wene
10Is en wene asogo egesema re, at ’gain gubernur ano en wene Paulus en mesik uagoluk e’gik dum ’belinghasulat mo’gulesi. Mo’gulesimu, at en e,
“Nue. Aphwami nis a’ge, di wene yu wene enebam pogwiam e, page enat di tahun yu tahun hat en enemdema wokho wene enebam pasulat, no’gorliselat, taga legen ano an naluk o. Ai en, wene an nebam pegesa ai, erlakmayat o, oluk, nu’gwarek nebe erlele wokho harat mo’gulheik ai en, nogola nagai hasu legi o. 11An Allah erliktigoluk o Yerusalem ’gerat legirik e, agauwa 12 nak takpoluk welegi o. Welegirikmu re, hat en,
Demat a? Erlak a, oluk is hin wogentagunmu en de, haluk emayat o. 12An o Allah owi werikmu ’goluk emin, o aphwami Yahudi a’ge se’ban ogwi’gwe ’goluk emin, o seli momu lobotluk emin, aphwami muon logon enemin neniak sagalugulat, ye, is logon eniak loksogoat sagaluagoluk onogola edikpasulat, tu erlak o. Asogo tisokhwe ogo is ap Yahudi a’ge en enil nio erlagat o. 13Is ap yema en wene nebam pogwi ai re,
Demat tegeimu, oluk no a’ge onukhiouwa. Onukhio a’ge erlak ema o. 14A’ge re, wene demat taga legi a’ge ebe yuat ’baksogo mo’gulheik. Is en e,
Aphwami Yesus e’berlik lagai ai wiak, oluk ogwi a’geat de, an nak e, is en, wiak ogwi a’ge ai iak hologo, nis nene’balak naduk Allah eragam ’goluk welat erliktogu legesa ai ’gela’ge, an ogo erliktaga legi nak e, demat taga legiat o. Erliktagalat, wene Allah en nenesa’go weregei wene ai emin, ap at iak mo’gulontogu legesa a’ge eniak emin, ’berlegat pelal wokho pegesa a’ge oruak ai, demat oluk tenak welegi o. 15Is ap yu en e,
Aphwami op togwi a’ge emin, wiak togwi a’ge emin, enebe warotluk oruakma demat Allah en enelalugabonobua, oluk, enede Allah pam he’berik oruak ai ’gela’ge, an asogoat welegi o. 16Asogo welat e, nogola en e,
Wiak mesik tegis, oluk nede e’gin welema no oluk e, Allah paget emin, aphwami enebaget emin, op nak taga legi ani, oluk, nede sesogo weleigoluk, nannisogo taga legi o.
17 #
Per. 21:17-28
An o mo ligom, ’bugom, osokhwe tahun esanat o Yerusalem lo erlak welegirik e, narilak norokhwi nenebe mesik a’ge oluk, uang logon lerentasulat, Allah akhit logon pasulat, tiogoluk legi o. 18Legirik asogo tagalat, o Allah owi werikmu ’guogoluk enebetne horogwi ai ’gela’geat asogo horak poluk en ’gwegis o. Asogo tegis ai, aphwami esan nemin ’gwilo erlak o. Is logon ogo enemin neniak sagalu erlagat oruakma is Yahudi a’ge en enil niegesayat o. 19We, is ap Yahudi a’ge logon o propinsi Asia en legesarik eba welegesa. Eba oruakma nil entegismu re, is enat wene nebam po holuk e, hat he’bek ya wotluk en wene nebam po a’ge o. 20Is enebe erlak holuk e, is ap yema oruak a’ge en uak o. Aphwami en is ap Yahudi a’ge Allah paget wene edip ’belo’gogwi a’ge ene’bek nebei legesarik, eba edik oruakhwe wene edip heratigisa. Asogo heratogwiam, an wiak tegis a’ge mesik demat enesa’go hweligisa a’ge enat uak o. 21#Per. 23:6An eba edik welat, wene mesigat yu nak niak loksogo mo’gulentegis ai o,
Aphwami waragai a’ge Allah en demat enelalugabonobua, oluk pobi taga legi ai en, wene nebam pogu legep yu o, oluk mo’gulentasuam en nak e, enesa’go hweligisa ai o,” oluk mo’gulesi.
22Asogo mo’gulesimu, at Feliks aphwami Yesus e’berlik lagai wene ai alukmu no oluk e, Paulus disogo mo’gulesi,
“Yogodak wene arat ege. Pobuk ap tentara onue ’gain Lisias ano ebe wago holuk en, wene hebam pegesa a’ge ai, an en wene edip herasogo ologun werik ani o,” oluk mo’gulesi. 23Asogo mo’gulesirik, at osi tentara ’gain mesik en Paulus ebe tenak welemagoluk disogo mo’gulesi,
“Hat en Paulus ebe tenak welat holuk e, yogunat nese lemagoluk ukpomup o. Ye, aphwami at a’ge en di a’ge yu a’ge at agai a’geat, lethouwogoluk ogwi holuk e, wene yagentagun no yo. Ukpasu lomup o,” oluk esa’go weregei.
At Paulus ebe ’gain Feliks emin, hwe Drusila emin, ene’bek woluk legesa wene
24At ’gain Feliks en asogo,
“Tenak wolomup o,” oluk mo’gulesirik, agauwa weiyat welegesarik en, at ugwe onuk Drusila, hwe ebe Yahudi a’ge woluk wagarik e, osi en Paulus wai louwagoluk mo’gulentesimu legesarik ebe woluk wegesema re, at Paulus en aphwami enede Kristus Yesus ebam he’berik welagai wene ano mo’gulentasuam, ’gain Feliks ano esa’go hwelak welaga. 25Asogo hwelak oruakhwe, hegitsogo tugulom wene ano emin, enede sebelak wolom wene ano emin, pobuk Allah en aphwami nenemdema wokho poluk wene nenebam pasulat, no’gorliselat, tua wene ano emin, mo’gulentasuam, Feliks ogorlok aga. Ogorlok agarik e,
“Yogodak wene arat e’gen o. Pobuk u erlige holuk en de, worlhiaik ani o,” oluk togolik perakpesi. 26Asogo perakpesirik, ogola en e,
“Paulus en uang mesik woknema hwi a,” oluk epasulat, nin hwedik nan hwedigat worlhasulat e, weneane e’birek ogu legesa.
27Asogo ogukhwe, mo ligom ’bugom 2 tahun welegesarik en, pobuk Feliks ebalema ap mesik onuk Perkius Festus gubernur emagoluk edikpegesa. Edikpouwogoluk togumu, at Feliks en e,
“Is aphwami Yahudi a’ge onogola opsogo,” oluk Paulus e’gik herle weragat ukpesi.
Currently Selected:
Peragenebesi 24: Wul
Highlight
Copy
Compare
Share
Want to have your highlights saved across all your devices? Sign up or sign in
