Peragenebesi 23
23
1Asogo edikpesimu, at Paulus is ap Yahudi a’ge Allah paget wene edip ’belo’gogu legesa a’ge enebe odoktigisa a’ge ebano, il pusogo enebam pasulat e,
“Nue nari o. An Allah il pam, page enat hwerli yogodak hwerli taga legi ai re,
Wiak taga legi, oluk nogola wenemennei eberise legi erlak o. We, wene nogola selak, op nak taga legi, oluk epasu legi o,” oluk mo’gulentesirik e, mesik ik ’galma re, 2ap Allah eiye a’ge onue ’gain onuk Ananias en e, is ap logon Paulus eragam welegesa a’ge en emde ’baksogo woruagoluk mo’gulentesi. 3#Mat. 23:27,28Mo’gulentasuam, at Paulus en, ap Allah eiye a’ge ’gain ano mo’guleselat e,
“O hebat wiak a’geat de, op oluk a’bosu ’gut a’ge worogwi ai ’gela’ge, hagap petne nak op ’gela’ge welat hede ’biren welegen eba re, Allah en hat wathobuayat o. Hat en e, wene Allah en nenesa’go weregei wene ano tenak welat, wene ai hegitsogo tu erlakma en de, wene an nebam poluk hosi en an watnobuagoluk mo’gulentigen ai nopaget,” oluk mo’gulesi. 4Asogo mo’gulesimu, is ap eba welegesa a’ge en e,
“Ap Allah eiye a’ge onue ’gain yu hogola en mi-miarak poluk wene yagigen ai nogorlok o,” oluk mo’gulegisa. 5#Kel. 22:28Asogo mo’gulegisema, at Paulus en e,
“I. Narilak. Allah iak pelal wokho pasulat e,
Honuelak ’gaindek tenentarok welagai a’ge ai honogola en mi-miarak poluk wene yagentagup o,
oluk pelal wokho pegesema oruak a’geat de, at ebe Allah eiye a’ge onue ’gain oruak oluk an neperlak enat egimu o,” oluk mo’gulentesi.
6 #
Per. 26:5; Fil. 3:5 Pobuk at Paulus en, is ap wene edip ’belo’gogu legesa a’ge ebano enebe pema re, Saduki a’ge eniak wogu legesa a’ge, ye, nin pema re, Farisi a’ge eniak wogu legesa a’ge, oruakma il enak a’ge pobirak onoboluk e, iak loksogoat disogo mo’gulentesi,
“Malik logwe. Nue nari o. An nebe Farisi a’ge. Ap Farisi a’ge enat dogoma a’ge welegi. Welat e, aphwami waragai a’ge pobuk Allah en demat enelalugabonobua oluk pobi taga legi ai en wene nebam pegesema yu i o,” oluk mo’gulentesi. 7-8#Mat. 22:23; Mrk. 12:18; Luk. 20:27Is Saduki a’ge en e,
“Is aphwami waragai a’ge Allah en enelalugabonobua erlak. Malaikat Allah en yo’go ’belabonobou wago a’ge enebe erlagat. Mu’gat ogo erlagat o,” oluk ogu legesa. Ye, is Farisi eniak wogu legesa a’ge en e,
“’Berlek eba re, oruak nak o,” oluk ’baksogo ogu legesa. Asogo ogu legesa ai en, at Paulus en wene asogo mo’gulentasuam e, is Farisi eniak wogu legesa a’ge emin, Saduki eniak wogu legesa a’ge emin, enemin en is-is eniak sagalholuk, enebe me’gerigisarik hwerli ’bal-’bal ’bigisa. 9Eniak asogo logat sagalogulat e, is ap Farisi a’ge Allah iak pelal wogo enaluk a’ge ebano pema akhit inotluk eniak hurle wiak, is Saduki a’ge ebano wene yagontogulat e, disogo mo’gulentigisa,
“Nis nonogola en e, ap yu wene ebam pukmuat opogu lege o. At omu’gat en mo’gulesimu oso hwi a? At e, malaikat Allah en yo’go ’belagonobou wago a’ge ebano mesik en mo’gulesimu oso hwi a. Asogo demat mo’gulosoam oso a’geat wolom o,” oluk, 10eniak logat sagalogulat e, Paulus ebe pema akhit en lis, pema akhit en lis, woruano oluk, is ap tentara esan logolhogu legesa a’ge onue ’gain ano en, osi is ap ebano ene’bek poluk, Paulus ebe ene’gerlakma en delogo o ningsogo werikmu ebano woluk ’guagoluk mo’gulentesi.
11Asogo mo’gulentesimu woluk ’gwigisema re, o ai erlige huba’go, nonue ’gain Onuk Logo a’ge Paulus eragam inla ’goluk e, disogo mo’gulesi,
“Hat en e, wene an nebaget o Yerusalem yema ’baksogo mo’gulentigen ai ’gela’ge, pobuk o Roma eba asogoat ’baksogo mo’gulentai lagun ai en e, hede ha’buksogo wolomup o,” oluk mo’gulesi.
At Paulus ebe woruogoluk obok ’baligisa wene
12Loruk o’gwe ap Yahudi a’ge enebe logon odoktak poluk e, Paulus ebe woruogoluk obok ogulat e, disogo egesa,
“Nis en Paulus ebe woru erlak welat e, ik emin, so’boru emin, no erlak wolomultik en, arat werak poluk en nouwok o,” oluk ho’buk ’balogo wene ’baligisa. 13Obok asogo egesa ai re, ap enebe 40, logon eneminat welat en de, egesa. 14Asogo egesarik, ap Allah eiye onuelak ’gaindek ebano emin, enarluedek ebano emin, ene’bek legesarik e, disogo mo’gulentigisa,
“At Paulus ebe owan woru erlak welat, di a’ge yu a’ge nul erlak, oluk, ho’buk ’baligerik en wege. 15Holuk e, his ap wene edip ’belo’gogwi a’ge enemin en e, at tentara onue ’gain ano en, Paulus ebe hene’bek woluk wemagoluk surat disogo oluk wokho perakpomup o,
Nis en Paulus emdema se’geksogo wouwagoluk ebe nene’bek woluk worogun en ’gonu mo’gulhogu lege o, oluk perakpomup o. Asogo perakpagupmu, at en demat oluk hene’bek woluk weigoluk wagoma, nis Paulus ebe woruogoluk ebela pam hou salultik wolomul ani o,” oluk 16obok asogo ’balogwiam, at Paulus erei en dogo a’ge omlogo mesik eba welat esa’go hwelegei. Esa’go holholuk, o ningsogo werikmu ano lagarik e, Paulus hoso’bi mo’guloso ’gwegei. 17Hoso’bi mo’guloso ’gwegeimu, at Paulus en ap tentara a’ge ’gain mesik ebe worlhesirik e, disogo mo’gulesi,
“Nue. Ap souwe a’ge yu en, honue ’gain ano wene mesik mo’gulom a’ge oruak o. Holuk e, hat en at e’bek woluk lak o,” oluk mo’gulesi. 18Asogo mo’gulesimu, at en ap souwe a’ge ano woluk e, ap tentara onue ’gain ano e’bek lagarik disogo mo’gulesi,
“Paulus e’gik herle werak oruak a’ge ano en worlniesirik e,
Malik yu en wene at en mesik mo’gulom a’ge oruak o, oluk he’bek woluk wemagoluk yo’go nebesimu woluk wegi ai o,” oluk mo’gulesi. 19Asogo mo’gulesimu, ap tentara onue ’gain ano en malik ano e’gik tin-ten woluk enematekma legesarik disogo mo’gulesi,
“Wene no wene mo’gulneigoluk wegen. Mo’gulnemin da,” oluk hin wokhesi. 20Hin wokhasuam, at en e,
“Is ap Yahudi a’ge eniak la’bulogo ogulat e, eniak eseiyat Paulus emdema se’geksogo wouwogoluk ’gela’ge, hat loruk o’gwe en ebe woluk, is ap wene edip ’belo’gogwi a’ge odoktak oruakma ene’bek lagun en ’gonu mo’gulhomul egesa ai o. 21A’ge re, hat e, wene is egesa a’ge ai, hwelak poluk togun o. Ap enebe 40 a’ge logon eneminat, welat en Paulus ebe woruogoluk obok ’baligisarik hou selak wolomul egesa o. Is en e,
Paulus ebe woru erlak welat, so’boru emin, ik emin, no erlakma en wolomultik e, arat werak poluk en de, nul ani o, oluk ho’buk ’baligisarik oruak o. Asogo welat, yogodak is en e,
Wene at en o’go no’gosogo mo’gulnontouwa, oluk yethiarok oruak o,” oluk mo’gulesi. 22Asogo mo’gulesimu, ap tentara a’ge onue ’gain ano en e, malik ano disogo mo’gulesi,
“Hat en e, wene ano arat ’baksogoat mo’gulegis, oluk, is mu a’ge logon mo’gulentagun o,” oluk esa’go wusogo togolik perakpesi.
At Paulus ebe o Kaisarea ’gain a’ge Feliks gubernur e’bek perakpou wegesa wene
23Asogo tegeitik, ap tentara esan logolhogu legesa a’ge onue ’gain ano en e, ap ’gaindek at eragam welegesa a’ge enebe ’biren worlentesirik e, disogo mo’gulentesi,
“His en ap tentara a’ge enebe 200 emin, wam kuda pam enebe hweriogo welat weim obogwi a’ge enebe 70 emin, segen wa’gun pam waronobogwi a’ge enebe 200 emin, enemin esanat odoktak onoboluk e, yogodak huba’go jam 9 o Kaisarea lagup a’ge pulogo onobomup o. 24Pulogo onoboluk, at Paulus ebe delogo wam kuda o’borl pam hweriogo poluk, ap ’gain Feliks gubernur ano e’bek woluk lagup en e, wam kuda at ebaget mesik pomubat o,” oluk mo’gulentesi.
25Asogo mo’gulentesirik, surat disogo oluk ’balogo pesi,
26“’Gain gubernur Feliks nue. An Klaudius Lisias en surat yu ’balogo he’bek perakpou wegi ai o. 27Ap ai ap Yahudi a’ge en tenak poluk worua ’galma re, aphwami en,
At ebe o Roma owirak a’ge, oluk mo’gulnegisema, an en nosi tentara a’ge yo’go enebegirik wogonoboluk legirik ebe delegis o. 28Ebe delegistik, No’gosogo tegeimu en wene ebam pogwi, oluk naluk emagoluk a’ge Allah paget wene edip ’belo’gogwi a’ge ene’bek woluk legi. 29Woluk legirik, edip palo tige a’ge re, at ebe woru ’gela’ge mesik tu erlagat. Ye, e’gik herle woru ’gela’ge ogo, mesik tu erlagat hegi o. We, wene is en ebam pegesa ai re, is aphwami Yahudi en togwi a’ge pagerat ebam pegesema o. 30A’ge re, aphwami en,
Ap Yahudi a’ge en Paulus ebe woruogoluk obok ’baligisema o, oluk hoso’bi mo’gulnosu egesema en, ebe hat he’bek perakpou wegi ai o. Perakpou wegirik e, pobuk is ap wene ebam pogwi a’ge ai, hat hilem umagoluk enesa’go wusogo perakpou wegi ai o,”
oluk at Feliks en surat ’balegei.
31’Balegeimu re, osi tentara a’ge ebano en Paulus ebe woluk wemagoluk yo’go enebesi ’gela’geat woluk wegesa. O ai erlige huba’goat, Paulus woluk e, o Antipatris wegesa. 32Woluk wegesarik e, is wam kuda o’borl pam wom erlak a’ge en,
“His wam kuda o’borl pam wegep a’ge holuk, Paulus ebe woluk lit o,” oluk peragonoboluk e, is togolik o kota Yerusalem o ningsogo werikmu ano legesa. 33Legesema, is woluk wegesa a’ge ebano o Kaisarea wegesarik e, surat ’belak a’ge ano ap ’gain gubernur wogotluk e, Paulus ebe ano ogo wogegisa. 34Asogo wogegisema, surat ’belak a’ge ano onuk mo’gulegeitik e, Paulus ebam hin wokhasulat,
“Hat howi re, o ’geba no,” oluk hin wokhesimu, at en e,
“An nowi o propinsi Kilikia a’ge o,” oluk mo’gulesi. 35Asogo mo’gulesimu, at en e,
“Holuk e, ap wene hebam pogwi a’ge ai enebe pobuk wagai holuk en de, hemdema waik ani o,” oluk mo’gulesirik, at osi en, Paulus ebe o lok at Herodes weregeimu ebano ’gwelakpoluk tenak welemagoluk mo’gulentesi.
Currently Selected:
Peragenebesi 23: Wul
Highlight
Copy
Compare
Share
Want to have your highlights saved across all your devices? Sign up or sign in
