2 Timotius 4
4
1-2At Kristus Yesus ebe pobuk ’gwiangma selakmasogoat wemarik e, aphwami nenebe nenelaluk welege a’ge emin, waregesa a’ge emin, ’berlegat wene nenebam pasulat, no’gorliselat, tua o. Pasu lemarik, di aphwami yu aphwami ’berlegat eragam onoboluk at ebe ’gain welema ai en, an en, nenaik Allah emin, Yesus emin, e’birek enil pam, hat en dem wene aphwami mo’gulentasu lorogun en e, hesa’go wusogo mo’gulheik o. Aphwami op wene mo’gulentasuam holu enagai oruakhwe emin, enebit oruakhwe emin, holuagoluk wene ai ningsogo mo’gulentasu lomup o. Hogola ’buk om erlakma en mo’gulentasulat e, wiak togwiam hiak ’baksogo mo’gulentasulat, enesa’go weriselat, enede ago wusogo mo’gulentasulat, taga lomup o. 3Pobuk, is aphwami en dem wene enesa’go dokhumsogo hologwi erlak welat, wene we a’ge enesa’go holu enagai en, mo’gulontogu lemagoluk is logon enebe a’bigat yo’go onoboluk, odogonobua ai o. 4Is ai dem wene ai ogwiam enesa’go dopno holuk, nonung ’belo’gogwi wene ai ’belo’gogwiam nak e, enesa’go dainsogo hologu lema ani o. 5Is asogo togukhweat de, hat e, di a’ge yu a’ge paget hebabut heberlak welat, hebam di obotut yu obotut hasulat, hepe mosogoat wolomup o. Op wene mo’gulentil no’gwi a’ge aiat logo poluk e, Allah en,
“Disogo lerentasu lomup o,” oluk, yo’go hebesi a’ge ai mesik ukpo erlakma en hegitsogo taga lomup o.
6Aphwami en an nebe Allah paget nemep namogo watnobua ano arat horok lau waga o. Asogo watnobumu, an nebe naik e’bek lo hegirat agama welegi o. 7Sa omut oruak, sa omut erlak, pungtak lagai ’gela’ge, an nede Allah pam he’berik modok welat, at ebaget nannisogoat op til waga legirik e, hwerli pam arat lau wegi o. 8Aphwami onomut walhogwiam, onomut a’bik a’ge o’go op a’ge wogontogwi ’gela’ge, an nebe arat lasuam, nonue ’gain Onuk Logo a’ge en e, wene nenebam pasulat, no’gorliselat, hegitsogo tua ai erlige, at en e,
“Hat hegitsogoat taga legenma o,” oluk, o’go op a’ge mesik woknema a’ge oruak o. A’ge re, an nak woknema puk. Is logon onogola en e,
“Yesus welep e,” oluk, enagai en yetharok welagai a’ge ogo ’berlegat nenemin woknontouwayat o.
At Paulus en e, “Timotius, ne’bek manup o,”
oluk mo’gulesi wene
9-11 #
2Kor. 8:23; Gal. 2:3; Kol. 4:14; Tit. 1:4; Flm. 1:24 #
Per. 12:12,25; 13:13; 15:37-39; Kol. 4:10,14; Flm. 1:24 At Demas ano ’gwiangma a’ge yema agai en, an uknoboluk o Tesalonika ’bok lagama o. Ye, at Kreskes, o Galatia lasulat, Titus o Dalmatia lasulat, tigisema re, at Lukas nak nemin welege ai en, hat perleneat ne’bek worogun en e, hannisogo walhasu lomup o. Asogo walhasu loroguntik werinogoluk holuk e, Markus ano ebabut e, an Allah paget tisoam opsogo letnio ebelerak ai en e, ebe e’gik wok-wok ne’bek manup o. 12#Per. 20:4; Efe. 6:21,22; Kol. 4:7,8Ye, at Tikhikus ano, o Efesus louwagoluk perakpegimu o. 13#Per. 20:6Hat wagalat e, ’bogoyum sogwei sum o’borl o’gwe ’buktaga legi a’ge ano emin, wene pelal wogo a’ge pema ebano, wasulat, ebe logo re, wene wam domba wam agap no’gorlak a’ge pam pelal wogo a’ge ano emin, o Troas at Karpus owi pam eba poluk wegi a’ge ebano ’berlegat woluk manup o.
14 #
Mzm. 62:12; Rom. 2:6; 1Tim. 1:20 Ye, at Aleksander tembaga a’ge ’besie ’gela’ge hele’giso a’ge ano en, an loksogoat wiagapnebegeimu welegi o. A’ge re, at nonue ’gain Onuk Logo a’ge en at tegei ai hegitsogoat wene ebam pouwa a’ge oruak o. 15At ai dem wene nis en mo’gulogu lege a’ge neniak sagalogo ukpoluk taga laga ai en, hat hebabut heberlogo wolomup.
16Aphwami en wene nebam poluk, nemdema naduk wogwiam, an en e,
“An nebam pukmuat o,” oluk wene nebam no’gorlisoam, is ’berlegat an neragam mesik welegesa erlagat uknoboluk lebegesa ai paget, Allah en wene enebam po erlakma en welemak, oluk se’ban eselegi. 17Asogo a’geat de, an en dem wene dokhumsogo mo’gulentasuam, is o’borl o’gwe a’ge enebe ’berlegat enesa’go holuagoluk, nonue ’gain Onuk Logo a’ge an neragam welat, nanniapnebesirik, singa orlomene ’gela’ge anni a’bik a’ge ano emdema oruakma delnobu ’gela’ge, watnebelip a’ge delnebegei ai o. 18Asogo delnebegeitik, pobuk aphwami en di wiak yu wiak taknobouwogoluk togwiam, at enat delnebise lemarik e, delogo woknoboluk ’bogorl pam, at eragam wolomulmu eba ’gwik ai paget, at erliktogwi modok wolomok o, oluk, demat u ’gela’ge,
“Amin,” egi ai o.
Wene ologun wusogo hau warenebegei wene
19 #
Per. 18:2; 2Tim. 1:16-17 Hwe Priskila emin, ogun Akwila emin, ap Onesiforus eiyagai enebe ’berlegat enemin,
“Paulus en hau wathenebegei,” oluk mo’gulontomup o. 20#Per. 19:22; 20:4; 21:29; Rom. 16:23 At Erastus ano o Korintus mo egei ai o. Ye, at Trofimus ano ebam ou oruak en, o Miletus poluk wegi ai o. 21Hat e, o moru nasuam sogwei wiak ago ano owan om erlak oruakhwe, ya pamat perleneat weigoluk hannisogo walhasu lomup o. At Ebulus emin, Pudes emin, Linus emin, hwe Klaudia emin, nenarilak nonorokhwi Allah eiyagai a’ge logon ’berlek en hau wathebigisa o. 22Nonue ’gain Onuk Logo a’ge en hede tenhiarok welat e, at ebabut op ano en, henebe ’berlegat tenhentarok welemak o.
Currently Selected:
2 Timotius 4: Wul
Highlight
Copy
Compare
Share
Want to have your highlights saved across all your devices? Sign up or sign in
