1 Tesalonika 2
2
At Paulus en aphwami o Tesalonika a’ge en emin welat taga laga a’ge pobuk enede ebesogo mo’gulentesi wene
1Narilak norokhwi. His henede en e,
“Is Paulus lak nene’bek wegesa ai re, we ’burlat wom erlak o,” oluk honu’gwarek henalugat o.
2 #
Per. 16:19-24; 17:1-9 His hene’bek owan wom erlakma en, o Filipi eba oruakma, aphwami eba a’ge en onogola mi-miarak nonoboluk di obotut yu obotut taknonobogu legesa. Asogo a’geat de, nenaik Allah en iak op wene ano nonogorlok erlaksogo mo’gulhentaumagoluk taknenebesimu wegerik mo’gulhontogwi oruakma aphwami a’bik en,
“Wene ai nenebit o,” oluk, ogukhweat de, nenannisogo mo’gulhontogu lege ano, henalugat o. 3Wene mo’gulhontogulat henesa’go worogu lege ai re, his nal emagoluk wene dagansogo mo’gulhontogulat, nenede ’biren welat mo’gulhontogulat, neniak eseiyat lalogo mo’gulhontogulat, togu lege erlak o. 4At e, we, at Allah enat nenebabut ’balogo en e,
“Op wene ai, hisat woluk no’gu lorogup o,” oluk, yo’go nenebesi hegitsogoat mo’gulontogulat, aphwami enede opsogo mo’gulontogu lege puk. Erlak o. We, Allah nenebabut ’baliso a’ge ano ede opsogo mo’gulontogu lege o. 5Nis nenede en e, di a’ge yu a’ge nenematek nenebam wellep, oluk opogulat, neniak pam en nak erlebesogo mo’gulontogu lege erlak ai, his henalugat o. Ye, Allah alugat holuk e, at enat,
“Ai demat o,” oluk u ai o. 6His en nis erliknonobogulat, is pema en ogo erliknonobogulat, aphwami a’ge en asogo erliknonobuagoluk ogu lege erlak o. We, at Kristus en yo’go nonoboluk peraknonobou wagama wene eiye welat neniak ningsogo mo’gulhonto a’ge hegirat welege o. 7Asogo a’geat de, enialak en enemalik alnanosogo wogonoboluk tenentarok welagai ai ’gela’ge, nis his henemin welat alnanosogo tenhentarok welat togu lege ai o. 8Nis en his henebe nenedesogo welege ai en, Allah iak ai nak so’buthentige puk. Erlak o. We, henebe nenede hwedik en, nonogola nenagai hogulat, nenebe eminat wokhentige ai o. 9Narilak norokhwi. Nis Allah iak op wene ai mo’gulhontogwiam, di a’ge yu a’ge paget, his logon henebam seget ema no oluk, nis nonu’gwarek en hup erlige nenannisogo togulat, set li-lagaiksogo togulat, togu lege ano, henalugat o.
10His wene demat oluk wegep a’ge nis nenemin welat e, aphwami en,
“Is wiak tigisa o,” oluk, wene nenebam po erlakma en degelogo welat, hegitsogo nak togu lege ano, his Allah eminat henalukmu re,
“Ai demat o,” oluk u ai o. 11-12His Allah eragam ’gwi laguptik erliktogumu eba ’goluk wolorogup en yo’go henebesi a’ge ano ogola agai epasu a’ge hegitsogoat togu lorogup en e, nis en enaiklak en eneiyagai enesa’go worogwi ’gela’ge, henebe lo’bok henesa’go worogulat, henede sebelogulat, henede ’gagalogulat, togu lege ano, his henalugat o.
13Nis en wene Allah iak ano mo’gulhentigema, his en e,
“Wene ai aphwami eniak a’ge erlak o. We, Allah iagat o,” oluk wegep ai re, demat Allah iagat wegep o. Ai en nis mo u erlakma en Allah hau worogwi modok welege o. At Allah en his henede Kristus ebam he’berik pegep a’ge henede ’gagaliso modok welago yo.
14 #
Per. 17:5
Narilak norokhwi. Is Allah eiyagai logon Kristus Yesus emin hwedik welat, o Yudea eba odoktogwi a’ge, onu’gwarek enarilak Yahudi a’ge enat di obotut yu obotut tagonobogu legesa hegitsogoat, his honu’gwarek henarilak enat di obotut yu obotut takhonobogwi o. 15#Per. 9:23,29; 13:45,50; 14:2,5,19; 17:5,13; 18:12Is ap Yahudi a’ge enat, is ap pageat Allah iak mo’gulontogu legesa a’ge enebe waronobogulat, nonue ’gain Onuk Logo a’ge Yesus ebe worogulat, tigisa ’gela’geat, nis di obotut yu obotut taknonobogwi ai, Allah en op oluk epasu erlak. Is ai aphwami enemin wiak nak welat, 16Allah en is aphwami o’borl o’gwe a’ge delonobuagoluk nis en op wene mo’gulentil lagaimu, aphwami en is ene’gebela’gwe ’balogwi ’gela’ge, is aphwami Yahudi a’ge en e,
“Wene op wene ai mo’gulentagup o,” oluk wene ’balogwi ai o. Asogo togulat, nin hwedik nan hwedik wiak togwi a’ge ano ebam louksogo togwi ai en, Allah olot het agalat, wene lok a’ge enebam pesi ai o.
At Paulus aphwami o Tesalonika a’ge pobuk
entai laigoluk tegei wene
17Narilak norokhwi o. Nis en e, his henematekma honoboluk wegerik, yogodak ya we lodu paget nenebe walegat welege a’geat de, nenede his henemin mesikmu welege ’gela’ge ai o. Asogo welat e,
“Onorogole nenil entai lolo e,” oluk, page enat nonogola nenagai a’bik opogulat hene’bek womogoluk walhogu legerigat o. 18Walhogulat e, an Paulus nu’gwarek agauwa naduk mesik weigoluk walhasulat, pobuk mesik weigoluk walhasulat, tegis a’geat de, Iblis en ne’gebela’gwe ’balegeimu en mo egi ai o. 19Nis en e,
“Op ema o,” oluk nonogola nenagai hogu lege ai re, salak enebaget no. Nonue ’gain Onuk Logo a’ge Yesus ebe wemarik e,
“Op tigep o,” oluk, at ilem enagat taknonoboma nenalong ema ai, edip ’ge pam en no. Edipmu a’ge paget puk. His henebe henebagerat nenalong ema o. 20Nonogola nenagai hogulat, nenalong agalat, togu lege ai his henebe henebagerat o.
Currently Selected:
1 Tesalonika 2: Wul
Highlight
Copy
Compare
Share
Want to have your highlights saved across all your devices? Sign up or sign in
