1 Tesalonika 1
1
Hau warenebegei wene
1 #
Per. 17:1
His Allah eiyagai o Tesalonika odoktogulat, nenaik Allah emin, nonue ’gain Onuk Logo a’ge Yesus Kristus emin, emin hwedik welegep a’ge, narilak norokhwi. An Paulus, Silas Timotius e’birek enemin en, wene yu pelal wokho hene’bek perakpou wege ai o. Nenaik Allah ebabut op ano en op a’ge wokhentasulat, henede ha’bugaphenebiselat, togu lemak o.
Allah eiyagai o Tesalonika a’ge enede Allah ebam he’berik poluk enebabut togu legesa wene
2Nis en se’ban his ’berlek henebaget hononuk ’balogo ogulat e, Allah hau worogwi modogat welege o. 3Nenaik Allah ilem se’ban asogo ogulat e, his henede Allah pam he’berik welat henebabut togu legep a’ge emin, aphwami logon henedesogo welat, henannisogo lerontogu legep a’ge emin, henede en e,
“Nonue ’gain Onuk Logo a’ge Yesus Kristus en obapnonobua o,” oluk, henepe mosogo welegep a’ge emin, nis en his togu legep a’ge ai paget his henebaget meme u erlakma en, eberak modok welege. 4Narilak norokhwi o. His henebe Allah en edesogo welat polikhenebesimu welegep ai nenalugat o. 5Nis op wene woluk mo’gulhentau wege ano re, neniak pam nak mo’gulhontogu lege puk. We, Allah Arogun ano nonogola welat, annisogo letnentasukhwe, nonogola en,
“Wene yu demat o,” oluk nenedemu pobi tigerik enat mo’gulhontogu lege ai. Nis o eba nenemin welat, his henebaget togu lege ano henalugat o. 6#Per. 17:5-9His di obotut yu obotut takhonobogukhweat de, honogola henagai hogu lemagoluk Allah Arogun en henede ’gagalegeimu, henagai hogulat, op wene wegeptik e, nis nenebabut wogulat, nonue ’gain Onuk Logo a’ge ebabut wogulat, tigep ai o. 7-8Nonue ’gain Onuk Logo a’ge en tegei wene ano his oruakma eba en wiyaletil etil o Makedonia, Akhaya, laga ai o. A’ge re, ai nak puk. His henede Allah pam he’berigep a’ge eba, honobok op oluk, o di owi yu owi ’berlegat lagama enalukmu re, nis en pobuk honobok mo’gulonto a’ge erlak aga o. Ai en e, aphwami o Makedonia a’ge emin, o Akhaya a’ge emin, op wene demat oluk wegesa a’ge ’berlek en e,
“Is op togwi o,” oluk, henebabut wokho togwi ai o. 9-10Is en ogo wene disogo ogwiat,
“Is aphwami o Tesalonika a’ge en, Paulus lak enebe wogenebigisarik e,
Demat o, Allah elaluk modok welago a’ge aiat o, oluk eragam welat, at ebaget togulat, at omlogo ’bogorl pam en ’buma a’ge ai ebe yetharok welat, tuogoluk e, dogwi asua ukpoluk, onolukhwe edenogo Allah wogegisarik oruak o. Allah en omlogo waragama elalugaptegei a’ge, ebe Yesus aiat o. Ye, Allah olot het emarik wene aphwami enebam pasulat, nis Yesus ai enat delnonobua o,” oluk, honobok op ogwiat o.
Currently Selected:
1 Tesalonika 1: Wul
Highlight
Copy
Compare
Share
Want to have your highlights saved across all your devices? Sign up or sign in
