1 Korintus 15
15
Kristus ebe waragoam Allah en elalugap
pesi wene
1Narilak norokhwi. Yogodak e, an en wene mesik honogola eberak henebaik. An en wene op wene mo’gulhentau wegimu, wegeptik e, henede op wene ai pam hurle egeptik welegep ai o. 2Op wene mo’gulhentau wegi wene aiat hene’gik ’betesogo tenak wolorogup holuk e, ai pamat delhenebiso yo. Asogo a’geat de, his we ’burlat almasogo henede Allah pam he’berik poluk wolorogup holuk e, mia o.
3 #
Yes. 53:5-12
Wene naduk an mo’gulnegisema, wegi a’geat de, his pobuk mo’gulhentegis ai re, ebe disogo epegi. Nis wiak togu lege a’ge paget, at Kristus nene’gik o’go worua oluk pelal wokho pegesa hegitsogoat ebe werigisa ai o. 4#Mzm. 16:8-10; Mat. 12:40; Per. 2:24-32Werigisema re, ebe werak owikmu pei legesa. Pei legesema re, agauwa ’biren werak welagarik oruakma agauwa henaganak a’ge pam Allah en elalugaptegei. Elalugaptegei ai re, pageat Allah iak pelal wokho pegesa hegitsogoat elalugaptegei ai o. 5#Mat. 28:16-17; Mrk. 16:14; Luk. 24:34-36; Yoh. 20:19Elalugaptegeimu re, at Kefas il houwagoluk orogolema inaga. E’berlik e, is enebe 12 ebano enil houwagoluk onorogolema inagayat. 6E’berlik e, is at e’berlik no’gu legesa a’ge enebe 500, ye, logon eneminat, mesik erlige enil houwagoluk onorogolema inagayat. Is enil hegesa a’ge ai, enebe pema lok akhit yogodak enelaluk oruak a’geat de, logon wei o’gwe nak e, enebe waregesa. 7Arat inotluk pobuk e, Yakobus il houwagoluk orogolemayat inaga. Pobuk e, at en yo’go onoboluk peragenebesi a’ge ebano logon enemin enebe ’berlek en enil houwagoluk onorogolema inagayat o. 8#Per. 9:3-6Asogo onorogolema inetil waga lagarik, pobuk ebe pobuk e, an malik enede we’gerlak erlakma dagagai ’gela’ge dagagi a’geat de, norogolema inagama nil hegi o. 9#Per. 8:3Nis Yesus en yo’go nonoboluk peraknenebesi a’ge ononuk oruak a’geat de, an nak e, nonuk erlak o. An en Allah eiyagai odoktak a’ge e’gin-pe’gin tagenebasu legi ai paget an en,
“Nebe Yesus en yo’go noboluk peraknobou waga a’ge o,” oluk, u re, mia o. 10Asogo u mia a’geat de, at Allah ebabut op en yo’go nebesimu disogo egirik welegi o. Yo’go nebesi ai we ’burlat nebesi erlak ai en e, is logon ’berlegat yabuk weiyat ’gela’ge wogukhwe, an nak e, a’bik ’gela’geat wasu legi o. A’ge re, asogo wasu legi ai re, an en wasu legi puk. Allah ebabut op en, ne’biregat welat wasu o. 11Yabuk ai ebe re, an nemin, is logon enemin, op wene mo’gulentil no’gu lege aiat o. Wene aiat mo’gulhontogwiam, his en demat oluk wegep ai o.
Aphwami waretil lagai a’ge eba Allah en enelalugapsogo edigenebil louwa wene
12At Kristus waragoam, pobuk Allah en elalugaptegei, oluk mo’gulhontogu lege a’geat de, his logon en e,
“Aphwami waragaiam Allah en enelalugabonobua erlak o,” oluk ogu legep ai nopaget. 13Aphwami waragaiam Allah en enelalugabenebisellep erlakma re, at Kristus waraga a’ge ai ogo elalugaptelip erlagat o. 14At Kristus waragama Allah en elalugaptelip erlakma re, nis en wene we ’burlat mo’gulontogullo yo. Ye, his en ogo re, wene demat oluk wegep ai re, we ’burlat welep o. 15Nis en wene Allah paget obok ’belo’gogulat e,
“At en e, Kristus elalugaptegeimu nenil hege o,” oluk mo’gulontogu lege. A’ge re, aphwami waragaiam Allah en enelalugabenebisellep erlak wellepma re, at Kristus elalugaptelip erlagat o. Ye, at elalugaptelip erlakma re, is pema en e,
“His en ogulat, Allah en asogo tegeimu nenil hege o, oluk ogu legep ai re, henepenen enat heniak eseiyat ogu legep o,” oluk hegitsogoat mo’gulnentelep o. 16Aphwami waragaiam Allah en enelalugabenebelip erlak wellepma re, at Kristus ebe elalugaptelip erlagat o. 17At Kristus Allah en elalugaptelip erlakma re, his en,
“Wene ai demat o,” oluk wegep ai, we ’burlat welepma re, his wiak togu legep a’ge ai, wene henebam wellep o. 18Ai ’gela’ge, is logon Kristus emin hwedik welat waregesa a’ge ai re, nal elebat o. 19Nis en e,
“Obapnonobua o,” oluk nenede Kristus ebam he’berik pegerik nonogola nenagai hogu lege ai o. A’ge re, yogodak ya nenelaluk welat nak asogo opogu lomultik e, pobuk nenelalugapnenebelip erlak wellepma re, is aphwami ado pema en,
“Eige. Nede e,” oluk is logon mo’gulonto erlakma en, nis nak mo’gulnontogullep o.
20Asogo a’geat de, at Kristus waragama en, Allah en demat elalugap pesimu oruak o. Asogo elalugap pesimu oruak ai re, so’boru naduk-naduk dorogwi ai ’gela’ge, is waregesa a’ge, at Kristus naduk elalugap pesi ai o. 21At ap mesik en waragai edip mo’gulegei ai ’gela’ge, at ap mesik en enelaluk agai edip mo’gulegei ai o. 22At Adam emin hwedik welat e, nenebe ’berlegat waraga lege ai ’gela’ge, nis Kristus emin hwedik oruakma re, Allah en nenebe ’berlegat nenelalugapnonobuayat o. 23Asogo a’geat de, Allah en nenebale’gwe lo’bok hegit-hegit nenelalugapnonobua o. So’boru naduk-naduk dorogwi ai ’gela’ge, at Kristus naduk elalugap pesimu no oluk e, at ebe wema ai erlige, nis Kristus osi a’ge nenelalugapnonobua o. 24Nenelalugapnonobuarik e, o ologun pam arat ema o. Ai erlige re, at Kristus en enebe ’gain welagai a’ge ai emin, eiye welagai a’ge ai emin, enanni welagai a’ge ai emin, modogat erlagap poluk e, di a’ge yu a’ge, at eragam oruak a’ge ’berlegat nenaik Allah eragam welemagoluk e’gikmu pouwa o. 25#Mzm. 110:1Asogo pouwa ai, at Allah en Kristus eselei a’ge ’berlegat oyuk en al ’besilogo onobouwagoluk eragam onobouma ai owan oruakhwe, at Kristus ebe ’gain modogat welema o. 26Eselei a’ge ebe pobuk oyuk en al ’besilogo erlagap pouwa ai, ebe re, waragai edip aiat o. 27#Mzm. 8:6Allah iak pelal disogo wokho oruak,
“Di a’ge yu a’ge ’berlegat at eragam arat onobou waga o,”
oluk egesema pelal wogo oruak.
“’Berlegat eragam onobou waga o,” oluk egesema oruak a’geat de, at Allah en onobou wago a’ge u’gwarek ebe Kristus eragam ’gwilo erlak, oluk enagat oruak o. 28Di a’ge yu a’ge ’berlegat Allah en omlogo eragam onobou wagoam e, at ’Gain Allah ematek onuk logo welat di owi yu owi at eragam welemagoluk, at omlogo u’gwarek en e,
“Naik. Hat en di a’ge yu a’ge ’berlek arat an neragam nebegen ai re, an yogodak hat heragam sebelogo welegi o,” oluk mo’gulema.
29Wene mesik e, is aphwami waregesa a’ge pobuk enelalugabonobua modok erlak wellepma re, is enebaget is ado ik olomu ’belabonobogwi ai re, no’gosogo togwi epegep. Nopaget ik olomu ’belabonobogulom. 30Ye, nis ogo re, hup erlige yuk o’gwe modok no’gu lege ai, nopaget no’gulom epegep. Asogo no’gullo erlagat o. 31Narilak norokhwi. Henede nonue ’gain Onuk Logo a’ge Kristus Yesus ebam he’berik poluk nemin hwedik welege ai en, an his honomot wasu legi oluk epasulat disogo mo’gulhentaik. An e, nin erlige nan erlige nebe watnobuogoluk togukhwe nepe mosogo welegi o. 32#Yes. 22:13An o Efesus yema welat, aphwami wam seiye ebabut wiak a’ge emin yeik pogwi ’gela’ge nemin yeik pogu lege ai, aphwami ’gwiangma a’ge paget yeik pogwi ’gela’ge yeik pelema re, no a’ge sabuthwerlele epegep. Aphwami waregesa a’ge enelalugabenebelip erlak wellepma re, is pema en egesa ’gela’geat, disogo olu o,
“Nis nenebe o tonoat waromulmu re,
yogodak ya we lodu nenelaluk welat, seni nouwogoluk
nonogola nenagaisogo welat no’gu lomok o,”
oluk egesa ’gela’geat olu o. 33Aphwami en ogulat e,
“Is logon enebabut wiak a’ge enemin hwedik togup holuk e, his henebabut op a’ge wiak ema o,” oluk ogwi ai demat oluk, honu’gwarek en henebe lalogup o. 34Wiak togu legep a’ge ai ukpoluk e, yogodak henebabut heberlemis o. His logon Allah ebe heneperlak welegep ai en, hene’gerli weriogoluk mo’gulhentegis o.
“Aphwami werak a’ge Allah en enebe yu ’gela’geat enelalugabonobua o,”
oluk mo’gulentesi wene
35Asogo a’geat de, hat ap mesik en wene hin wokniasulat e,
“Aphwami waregesa a’ge ai Allah en no’gosogo enelalugabonobua epegen. Enelalugabonoboluk e, enebe no’gorak a’ge enelalugabonobua,” oluk e’gen ai re, 36hede erlak enat e’gen ai o. Di a’ge yu a’ge owi ’gwiangma pelogo ’belabise legen a’ge ai re, aphwami waragai ’gela’ge, owi ai agap muk ago erlak holuk e, ebe ’baktu mia o. 37Owi ’gwiangma pelogo ’belabise legen ai re, ebe pobuk ’baktagalat ema a’ge pelogo ’belabise legen puk. We, gandum e’gen de a? At e, di a’ge yu a’ge e’gen owi de a, e’gen nak pelogo ’belabise legen o. 38Pelogo ’belabisoam e, at Allah ede opoluk enat ebe agauwak hwaliso. Di owi yu owi ebe lo’bok hundomok agauwak hwalisoat o. 39Di a’ge yu a’ge elaluk a’ge ’berlek e, ebe mesik a’ge puk. We, aphwami nenebe muat, wam ebe muat, sue ebe muat, hiane ebe muat. 40Ye, di a’ge yu a’ge ’bogorl pam a’ge oruagat, ’gwiangma a’ge oruagat. A’ge re, ’bogorl pam a’ge orogole lo’bok op o, oluk ogwi ai muat. Ye, ’gwiangma a’ge orogole lo’bok op o, oluk ogwi ai muat o. 41Mo op yeriso ai muat o. Dugwi op yeriso ai muat o. Hwesagal op dialiso ai muat o. Asogo a’geat de, hwesagal ai ebe lo’bok hun domogat dialiso yo.
42Ai ’gela’ge, Allah en aphwami werak a’ge asogoat enelalugabonobua o. Nenebe werak muk agai a’ge ai, owi ’gwiangma pelogo ’belabogwi ’gela’ge, ’gwiangma sebelnonobolukmu re, pobuk nenebe muk ago erlak a’ge nenelalugapnonobua o. 43Nenebe werak nenanni erlak enebit hogwi a’ge ai, ’gwiangma sebelnonobolukmu re, pobuk nenebe nenannisogo oruakhwe erliknonobu a’ge nenelalugapnonobua o. 44Nenebe waragaiam nenagap ’gwiang a’geat ’gwiangma sebelnonobogwi o. A’ge re, pobuk at Allah Arogun en nenebe nenelaluk modok wolomul a’ge nenelalugapnonobua o. Nenagap ’gwiang a’ge welege yu re, Allah Arogun en nenelalugapnenebisoam nenebeat wolomul o. 45#Kej. 2:7Wene asogo oluk, Allah iak pelal wogulat e,
“Ap Adam naduk a’ge ai, ebe elaluk a’ge walhesi,”
oluk pelal wokho pegesa. A’geat de, ap Adam pobuk a’ge ai, Arogun en enelalugabenebiso a’ge waga. 46Allah en, ap naduk nadugat walhesi ai re, at pobuk mu a’ge ai Arogun en nenelalugapnonobua ai a’ge walhesi puk. Nenagap ’gwiangma a’ge naduk walhesirikmu en, Arogun en nenelalugapnonobua a’ge ai pobuk waga. 47Allah en naduk nadugat ap Adam ai ebe ’gwiang a’ge walhesimu re, ebabut ’gwiangma a’geat o. A’geat de, ap Adam pobuk a’ge ai ’bogorl pam enat waga. 48Is aphwami logon enebe ’gwiangma egesa a’ge enebe re, at Allah en naduk nadugat Adam ebe ’gwiang a’ge walhesi a’ge ai ’gela’geat oruak o. A’geat de, is logon enebe ’bogorl pam egesa a’ge enebe re, at pobuk ’bogorl pam en waga a’ge ai ’gela’geat oruak o. 49Nis yogodak, at Allah en Adam ebe ’gwiang a’ge walhesi a’ge ai nenemin hegitsogo welege ’gela’ge, pobuk at ’bogorl pam a’ge ai nenemin hegirat wolomul o.
50Narilak norokhwi. Wene yu mo’gulhentaik. Nenebe nenagap ’gwiang a’ge waragai a’ge yu emin e, Allah en eragam nonobouema eba eiye omul modok erlak o. Ye, nenebe muk agai a’ge yu emin pobuk nenebe otok modok wolomul a’ge eiye omul modok erlagat o. 51#1Tes. 4:15-17A’geat de, wene Allah ogola hisogo a’ge yu mo’gulhentaik. Nis nenebe ’berlegat waromul erlak a’geat de, nenebe lo’bok mu a’geat taknonobouwa o, oluk demat mo’gulhentegis. 52Mesik erligeat, enil hopnik poluk dek ogwi ’gela’ge, ’bi’gong iak ologun ’goboksogo ’bagua o. Asogo ’bagosoam e, aphwami waregesa a’ge enebe muk om erlakma en onotok modok welema a’ge agauwak heli’gogo enelalugabonoboluk e, nis ’berlegat nenebe muat taknonobouwa o. 53Nenebe muk aga lege a’ge yu, muk agai erlak a’ge sum ’buktogwi ’gela’ge ’buktogulat, nenebe waraga lege a’ge yu, waragai erlak a’ge ’buktogulat, tul o. 54#Yes. 25:8Nenebe muk aga lege a’ge yu, muk agai erlak a’ge ’buktogulat, ye, waraga lege a’ge yu, waragai erlak a’ge ’buktogulat, tul o. Asogo ’buktul ai pam, wene disogo oluk pelal wokho pegesa a’ge ai demat ema o,
“Di a’ge yu a’ge haumsogo no’gwi ’gela’ge,
At Allah anni emarik e, waragai a’ge edip ai,
erlagap pouwa o.”
55 #
Hos. 13:14
Asogo erlagap poluk, iak esegen wokhasulat,
“Waragai a’ge edip yu, hanni ’ge.
Hiak en ’balenebise legen ano hiak anni ’ge,”
oluk egeimu pelal wokho pegesa a’ge ai demat ema o. 56Waragai a’ge edip iak en lebilnenebiso ai ebe re, nis wiak togu lege ai pam iak en lebilnenebisoam waraga lege aiat o. Ye, wiak togu lege a’ge anni aga ai ebe re, wene Allah en nenesa’go weregei ai pam anni aga o. 57A’ge re, nonue ’gain Onuk Logo a’ge Yesus Kristus tegei ai pam, Allah en nenanniapnenebasuam nenanni aga lege oluk, nenaik Allah hau worogu lomok o. 58Ai enat, narilak norokhwi. Henebe nede. Henede hurlesogoat, ha’buksogo wolomup. Nonue ’gain Onuk Logo a’ge emin hwedik welat e, at ebaget di bele yu bele togwiam alemat ema erlak o, oluk, loksogoat togwi modok wolomup o.
Currently Selected:
1 Korintus 15: Wul
Highlight
Copy
Compare
Share
Want to have your highlights saved across all your devices? Sign up or sign in
