1 Korintus 13
13
“Aphwami enebe henedesogo wolom o,”
oluk mo’gulentesi wene
Wene mo’gulhentegis ai obat a’geat de, op a’ge on tugulom a’ge mesik mo’gulhentaik ai o. 1An en aphwami ena’gul onuk lo’bok logon eniak pam eselat, malaikat Allah en yo’go ’belagonobou wago a’ge ebano eniak pam eselat, eselarat de, aphwami enebe nedesogo weleik erlak holuk e, an we, sogoluak wei a’ge emin, lok a’ge emin, ik ogola ne’gak erlakma o’borlogouk ’golok eselat, erledeng eselat, tiso ’gela’ge tagalom o. 2#Mat. 17:20; 21:21; Mrk. 11:23Ye, Allah iak opsogo nak mo’gulentasulat, wene aphwami onogola hisogo welago a’ge ai ’berlegat naluk eselat, di wene yu wene ’berlegat naluk welat, nede Allah pam modok he’berik poluk e, dom mesik ebalema en henokho momu ’bok louwagoluk mo’gulom a’ge elirat welat, eselarat de, aphwami logon enebe nedesogo weleik erlak holuk e, we ’burlat osolom o. 3Di a’ge yu a’ge an ne’gikmu a’ge ’berlegat aphwami ena’ge erlak a’ge so’burentasulat, nebe modok wusogo odouk e nouwagoluk nepenen enat tiselat, tagalarat de, aphwami logon enebe nedesogo weleik erlak holuk e, we, ’burlat almasogo tagalom o.
4Aphwami logon enebe enedesogo welat e, enepe mosogo welagai ai o. Asogo enedesogo welat e, enebabut op, ’bou togwi erlak welat, onu’gwarek en logo pogulat, erlikhorlogulat, togwi erlak ai o. 5Asogo welat e, ene’gerli erlak tugulat, di a’ge yu a’ge onu’gwarek enebaget logo pogulat, onolot het horogat welat, is logon en wiagabonobogwiam e, wene e’gen dogo poluk welat, togwi erlak o. 6Asogo enedesogo welat e, is logon en hegitsogo tu erlakma en wiak ebele tugukhwe onogola enagai ho erlakma en welat, hegitsogo ogwiam nak e, onogola enagai hogwi o. 7Enedesogo welat, di wene yu wene enebam agoam e, enepe mosogo welat, enede Allah ebam he’berik welat, op ema oluk onogola enagai hogulat, enede ha’buksogo welat, togwi ai o.
8Asogo togulomtik e, agauwa mesik erlige re, Allah iak mo’gulontogwi ai a’ge pobuk mo’gulonto a’ge erlak agalat, aphwami eniak eneperlak a’ge elalin ogwi ai a’ge pobuk u a’ge erlak agalat, di wene yu wene enaluk welagai a’ge ai pobuk enaluk om a’ge erlak agalat, tua a’geat de, aphwami enebe enedesogo welagai ai a’ge nak e, erlak om a’ge erlakma en modok-modok welema o. 9Ai re, o yogodak e, wene ado pema nak nenaluk welat, Allah iak ado pema nak mo’gulontogulat, togu lege ai o. 10A’ge re, pobuk ebe elemik lau ’gu agoam, yogodak ado pema akhit nak oruak a’ge ai erlak ema o.
11An nebe malik wei a’ge pam e, niak malik wei a’ge eniaksogo eselat, nede malik wei a’ge enede ’gela’ge welat, nede malik wei a’ge en enede eberogwi ’gela’ge eberiselat, taga legi a’geat de, yogodak nebe narlue egirik e, nebabut malik wei a’ge enebabut ’gela’ge ano arat ukpegi o. 12Yogodak ya re, is enapunak il orlomongtak a’ge enil yethogwi ’gela’ge, arogun a’ge nak yethogu lege o. A’geat de, pobuk ebeat pobisogo yethul o. Yogodak e, wene ado pema nak nenaluk welege o. A’geat de, pobuk at Allah en an nebe pobisogo aluk ai ’gela’ge, an en at Ebe pobisogo naluk eik o.
13Modok-modok welema re, nenede Allah pam he’berik welege ai emin, op ema oluk nonogola nenagai hogu lege ai emin, aphwami enebe nenedesogo welege ai emin, wene ebe henagan eriayat welema o. A’geat de, ebe logo ’gela’ge re, aphwami enebe nenedesogo wolom aiat o.
Currently Selected:
1 Korintus 13: Wul
Highlight
Copy
Compare
Share
Want to have your highlights saved across all your devices? Sign up or sign in
