OROMA 9
9
Ala nen Iterali mendek miirinabeegerak wone
1-3Ala nen, an nanebunu Iterali mendek nowe-nawot abok aret pulunogo piinok, Keritut inom ogoorogo piyareegerak me, kanggwi iyo, ”Inobaane'me Ala nen an aret pulunogo panuwak lak, ao,” yinuk, niniki abu puru ari logonet, inabuwa nen inale mbannaga'lek aret agarik o. An Keritut ninikime wonage me, pilit yokkirage lek o. Abet aret yokkirage me, Aberiniki eenu aret o. 4It Iterali mende nogo, at Ala nen miirinake nagagirik, at apuri aganake, at tiyanak menggerak, ”Wi,” yuwak nduk eeginake, peebi eeriyak wone abu nggaruk togon yorage, wone, ”Yogop ee'nu, ndogop ee'nu,” yinuk, lengganirage, Ala alut eeko logonet, eeko logorak wone mamunirage, ”Yogop eerigin o. Ndogop eerigin o,” yinuk, wone yorage, eereegerak. 5Ndi, it inombomini Abarakam inom, Itak inom, Yakup inom, inombooluk Keritut nogo aakumi pogom aret nda'nagagerak me, yi mendek ndi mendek abu'me kagak at mondok tiyanak wonage at eebe Ala aret me, ”Wa,” yinuk, keyage wakak mban eeko logowok o. Amin!
6At Ala nen it aakumi Iterali mendek abok aret miirinabulik me, Abarakam abok yoreegerak nogo, ”Mbeyok yereegerak o,” yinuk, an yokkirage lek o. 7At Ala nen Abarakam yoge logonet, ”Itak apurilogwe ndaganabemenggerak nogo mban kat kombowologwe yugun o,” yoreegerak me, it Abarakam ombowologwe nogo ti, it abok at abe ombologwe lek o. 8-9Ala nen at Abarakam nogo yoge logonet, ”Tara ka woraagin o, yinuk, kooneegirak nogo ndak-ndak a'me lik yi wage logonet, wulaga ambi ndarigin o,” yinuk, yoreegerak me, ti yoreegerak nogo ti, we aakumi ineebe wiganit wogogwaarak nogo paga at Abarakam abe ombologwe lek o. Ata, Abarakam abok yoreegerak nogo paga ndarak kenok, ”Abarakam abe ombowologwe aret o,” yinuk, yoreegerak kogo o.
10At Abarakam yoreegerak nogo mban lek o. Ata, kwe Iribeka inom yoreegerak. Kwe Iribeka aagalogwe kulu'mbere aret ndaganabeegerak nogo, inogoba ninombo Itak aret me, 11-12it wologwe nogo awo nda'naga'lek iigak, maluk eeriyak obeelom eeriyak awo ineenggo'lek kagak, Ala nen wulaga ambit mban miireegerak nogo ti, at iniki nen mban koombunuk, miireegerak mbaruwak nduk, kwe Iribeka yoge logonet, ”Kaagalogwe ndaganabemenggendak nogo owe nen awoluk abu'me logogin o,” yinuk, yoreegerak. Ti kenok, Ala nen miireegerak nogo ti, it imbirak ambi eereegwaarak paga miirinabulik o. Ata, at iniki mba'nuk aret awoluk ti mban miireegerak kogo o. 13”Yakup niniki kunik wonage kwe, Etau perak, neebi negen agarik o,” yinuk, liiru mbanak nogo ndak-ndak aret eereegerak kogo ogoorik o.
14Ti eereegerak kenok, nit nonggop negen yuwok mbakop? Ala iniki liippunuk lek ugun eeke menggerak me nduk, yogo ogotik? Ti mondok lek o. 15At Ala nen Muta yoge logonet, ”Aakumi an inabuwa mbake kenok, inabuwa mbarigin aret o. Ndi, an nen obeelom eeppiyoorak mbake kenok, obeelom eeppiyaagin aret o,” yoreegerak me, 16it aakumi nen iniki mbakwi paga inom, it eekkologwe paga inom, Ala nen liippiinok, obeelom eeppiigeelik o. Ata, iniki mba'nuk nen mban ninabuwa nen obeelom eeppinanege menggerak kogo ogoorik. 17Ti kenok, Ala nen at Pirawun nogo yoge logonet, ”An nomaawi inom, an nendage inom, ineenu a'nuk, yi awi ndi awi wiganit nage logowak nduk, kat mippagareegirak o,” yinuk, yereegerak liiru mbanak nogo paga nen, 18”At Ala iniki nen aret ambi abuwa mbarikit mbake kenok, abuwa mbake, ndi, ambi iniki omaawi eerogo pikit mbake kenok, iniki omaawi eerogo pege, eeke menggerak o,” yinuk, yokkirage agarik o.
At Ala inabuwa nen obeelom eeppiige, ndi, anini nen mondok inooke, eeke menggerak wone
19Ala nen mban iniki koombunuk togop eeke menggerak me, kit nen, ”Ti kenok, nit maluk eekwi alom Ala aret me, maluk eekwi niinok, at nen mbe'niroorak op mbaken? Ndi, Ala iniki mba'nuk eeke menggerak kagak alik eeriyak op me nduk ari agandik?” yinuk, yo'nugwi kiigirak me, 20wologwe! Kit ta mba'nuk yogo ogotik? Wone onggo Ala yoriyak op mba'nuk yogo ogotik? Yi mendek ndi mendek ogobakkigirik nogo nen ogobakkigika nogo yogo logonet, ”Kat nonggop togon ogobakkigi'nake agandik?” yoriyak op mbakop? 21Togolowok ogobakkigika nogo nen iniki mba'nuk ogobakkigike logonet, purok ambit mendek aret waganogo togolowak ambi iya negen eeriyak nduk ogobakkigike, ndi, ambi we ugun eekak yuurak nduk, ogobakkigike, eeke menggerak lek mba'nuk yogo ogotik? 22Iniki mba'nuk nen aret eeke menggerak ti kokwak, Ala ti ndak-ndak aret eeke menggerak me, at anini eeppiige menggerak inom, at omaawi inom, ”Neyaawak o,” yinuk, it at anini eeppiige logonet, ineebe pup eerogo piyaakit mbaketak mendek iniki kwippunuk mondok liirogon eeppiige menggerak. 23Ti eeppiige menggerak nogo ti, at ninabuwa mbake logonet, Ala ninom tiyanak logorak nduk leenogo pinaneegerak nogo at mondok obeelom tiyanak logonet, oba ngginik kagak obeelom eeppinanegak mban eeke nagagerak nineenu aruwak nduk, iniki mondok liippunuk eeke menggerak. 24-26Ninom tiyanak logorak nduk leenogo pinaneegerak nogo ti, nit aret o. Ndi, nit Yakuri mendek mban lek o. At Ala nen Oteya yoge kagak at nen aakumi nen yorage logonet,
”It aakumi inambik aret kwe,
nowe-nawot negen yoraagin o.
Ndi, it an niniki kunik lek mendek aret kwe
niniki kunik aganabigin o.
Kit aap kinambik o, yinuk, yorage nagage'nom nogome nen aret,
Ala ineenik eeginake menggerak apuri kit aret yoraagin o,”
yinuk, liiru mbaneegerak nogo ndak-ndak it endekem konenggulik mendek ninom aret leenogo pinaneegerak me nduk, yereegerak kogo ogoorik. 27It Iterali wigannarit wogogwaarak nogo inawone Yetaya nen ari logonet,
”It Iterali mendek nogo mbini kale'ngga pogom wigak yemenggaarak kwe, 28yi aakumi ndi aakumi abok maluk eekwi iinok, at Ala nen abera'lek wonogwe me mondok nggwik togon inoori wage logonet, ambitak mban inagap ndarigin,”
yinuk, yereegerak nogo ti, 29ne ambi ari logonet,
”At Ala aap waka'ngget pogom aret me, nit ninanebunu mendek ando inabuwa nen teppiyareegerak nogo teppiyanetak lek nen, o Torom inom, o Nggoromora inom, inooreegerak pogom nit abok aret pup eerogo ninoori woraanetak kwe, teppinaneegerak me, iya!”
yinuk, yereegerak.
It aakumi Iterali mendek nogo abet mbakwi paga obeelom agago piige menggerak wone
30Ti kenok, wone ambi yi aret yokkirawi o. It endekem konenggulik mendek nogo at Ala nen obeelom agago piyaawak nduk eekkologo logolik kwe, abet mbareegwaarak paga obeelom agago piyareegerak. 31Ndi, nit Ala mii'ninabeegerak mendek perak, obeelom eerit nugwi paga eeppinanuwak mbareegurak kwe, eeppinanulik me, 32-33nonggop nduk eeppinanulik mbakop? Lek o. Abet mbakwi paga obeelom eeppinaniyak kagak, nit eekkologwe paga eeppinanigin nduk eekoorak mendek, eeppinanulik me, ninenggali aret aga o. At Ala nen ari logonet,
”Yugum ambi iniyogobit lik togon eeginake logonet,
yigeebu wanggo logowak nduk,
put Tiyon paga pigirak yi kaanip o.
Aap ambi nen iniki yugum ti paga panggombunuk,
abet mbake kenok, enggali arigin lek o,”
yinuk, yereegerak liiru mbanak nogo ti, nit nen aret niniyogobit lik togon eeppako logonet, yigeebu wambeegurak me, ogoorik o obak!
Currently Selected:
OROMA 9: WNO
Highlight
Copy
Compare
Share
Want to have your highlights saved across all your devices? Sign up or sign in
