OROMA 14
14
”Kinoweewi inabok mbaniyak mage o,” yoragagerak wone
1Aap ambi abet mbake kwe, iniki awo kole aga'lek kinenggela'me unggwi wage kenok, kinom kuwak eeriyak op aret kwe, at iniki mba'nuk nen agan nage nogo perak, ti paga wone wariyak lek mbo pinip o. 2Aap ambi nen iniki abet mba'nuk, ”Yi mendek ndi mendek ugun noorak op aret,” mbake nagaatik, nengge menggerak kwe, at ambi nen iniki abet mbake nogo awo kole aga'lek me, ”We mbi-mbiingga mban naakit,” mbake nagaatik, nengge menggerak. 3At yi mendek ndi mendek ugun nengge menggerak nogo nen, at we mbi-mbiingga mban nengge nogo, meek eerogo punuk abok mbaniyak lek o. Ndi, at mbi-mbiingga mban nengge nogo nen, at ugun nengge menggerak nogo Ala nen, ”Aap yi kunduk an naput aret,” yinuk, ari me, abok mbaniyak lek mban o. 4Kit nen aap alik ambi ayeloman kagak, ”Kat maluk o,” yinuk, yoriyak op mbakop? Ayeloman obeelom eeke kenok, tiyappege, ndi, maluk eeke kenok, tebeppege, eeke nogo ti, at ogoba nen mban aret eeke menggerak kwe, at ninowe endagembogut yeenggwaage kenok perak, obeelom eeremenggerak me, ogoba nen tiyappigin mbaki o.
5It ando nen, ”Ne yi paga yi mendek ndi mendek eeriyak mage o,” yogwe, ndi, it ando nen, ”Yi eyom ndi eyom ugun eeko logorak nduk, wonage o,” yinuk, yogwe, eekwi me, kit kinalitak lombok kiniki nen mban liirogon koombunuk, eeko logonip o. 6Kit ando nen, ”Ne yi paga yi eekak ndi eekak eeriyak mage o,” yinuk yogwe nogo ti, ”Ninowe endagembogut mban alut eeko logorak o,” yinuk yogwe ti, op aret yogwe o. Kit ando nen yi mendek ndi mendek ugun nonggo logorak mbakwi nogo ti, ”Ala wa,” yinuk, nunggwi me, ninowe endagembogut alut eeko logonet aret nunggwi o Ndi, kit mbi-mbiingga mban nunggwi nogo ti, kit kunduk, ”Ala wa,” yinuk, nonggo monggotak me, ninowe endagembogut alut eeko logonet aret nonggo monggotak. 7Ti eeko monggoorak nogo ti, nineenik logorak inom, kambuurak inom, nit ninobalombok ninake mban koombunuk eeko monggoorak lek o. 8Nineenik logorak kenok ti, ninowe endagembogut ake mban logorak o. Ndi, kambuurak kenok ti, at ake mban kambuurak me, kanggwi kenok, nineenik wonogwe kenok, ninowe endagembogut ake mban aret o. 9It kambeegwaarak inom, nineenik wonogwe inom, ninowe endagembogut mi'na'nuk abu'me pinanikit nduk, at Keritut kangge mbareegi, eenik agago mippereegerak me, nineenik logorak inom, kambuurak inom, at ake mban aret o. 10Togop me, kit nonggop nduk, nabok-kabok yogo logonet, kinoreewi miyuk-meya eerogo piigo ogotik? Nit abok ninowak loonogo ninawone amburu mbanigin Ala nogo enggaanom mippinanigin lek nduk, yogo ogotik? Lek o. 11Ala nen yoge kagak, aap ambi nen ari logonet,
”An neenik nitok minggirak me,
yi aakumi ndi aakumi abok aret nabu'me tebe yinuk,
nayuk wuko logonet,
Kat ninogoba Ala aret, yinuk, paganogo yo'nirugun o,
yinuk, an kinogoba Ala nen aret yokkiragi o,”
yereegerak liiru mbaneegerak me, 12nit abok ninalitak lombok eeko logomonggoorak nogo, Ala nen, ”Paganogo yo'ninip o,” yinuk, yo'nirage mbariminggi, paganogo yorugun o.
”Kinoreewi maluk eerukwak, inaru non mbanogo piyoorak mage o,” yoragagerak wone
13Nit abok eeko logomonggoorak nogo, Ala enggaanom paganogo yorugun me, nit nen ambi ninom nabok-kabok yogo logorak mage o. Ata, nit ambi eekwi niinok, ninoreewi nggelenogo piigwi, inaru non mbanogo piigwi, eerumonggoorak paga it maluk eekwi iyo, ”Liippogo logowok o,” yinuk, kiniki koonggo logonip o. 14Yi mendek ndi mendek aburen mage ageelik o. Aakumi nen, ”Yi mage o,” yinuk, iniki aberak wonogwe iinok ti, ”Mage mendek aret age menggerak o,” yinuk, an nen yokkirage lek o. Ata, ninowe Yetut nimbirak ambit a'nuk yo'nege kenok, ”Abet aret kagi,” yinuk, yokkirage agarik o. 15Kinoreewi nen noorak lek mbakwi iigak, kit nunggwi paga iniki wakkologwe iinok, ”Inoreewi inabuwa mbaka'lek logonet, nunggwi iigo,” kinombarugun o. Togop me, Keritut abok inake aret kambeegerak me, kit nunggwi paga kinoreewi maluk eerogo piyoorak ti mage o, noreewi. 16-17Nit we yi mendek ndi mendek nunggwi paga Ala nen liippinaninuk abu'me pinanigin lek o. Ata, Aberiniki nen obeelom eeppinanege, niniki ambit lambunogo pinanege, ale'nggen alik negen ninoba pinanege, eeke menggerak me, kit nen, ”Yi op eeriyak,” mba'nuk eekwi kwe, aakumi nen, ”Maluk eeko agaarik o,” yinuk, kinombariyak kenok, eeriyak mage o. 18Wone yi Keritut ake eerit nage logonet, liirogon eekwi kiinok, Ala nen ale'nggen kinombarigin me, it aakumi nen togon, ”Op aret eekwi o,” yinuk, kinombako logogun o.
19Ti kenok, aakumi iniki ambit lambunogo piinet nugwi, aakumi iniki eyak wat-wat yogwe, eeriyak wone ti mendek kenok mban liirogon eerit nogo logowok o. 20Yi mendek ndi mendek nunggwi nogo paga at Ala nen eeginabit nage nogo tebenogo puurak mage o. Yi mendek ndi mendek noorak ti, maluk lek noorak op mban aret kwe, nonggo monggotak paga kinoreewi inaru non mbanogo piyookwak me, noorak mage o. 21Kinoreewi iniki awo kole aga'lek nogo, tu paga iniyogobit lik togon yigeebu wuppiyookwak, kit wam nunggwi inom, eyoonggen anggur amburu nunggwi inom, yi mendek ndi mendek eeko monggotak abok aret eeka'lek puk logorak op aret o. 22Kit kiniki abu kole agaarak mendek nogo nen eeko logorak op mbakwi nogo ti, ”An Ala nimbirak mban ninobalombok eeko logogun o,” yinuk, eeko logorak op aret o. Ndi, eeko logorak op mba'nuk eekwi kiinok, kiniki piirik logonet, eeko logorak mage o. Ata, kiniki ale'nggen logonet aret eeko logorak op kwe, 23”Yi op noorak o,” yinuk, kiniki abeka'lek mbere logonet eeko monggotak kenok ti, maluk aret eeko monggotak me, kit nen, ”Yi mage ilik, op noorak a?” yinuk, kiniki mbere logonet nunggwi kenok ti, kit abet aret ugun noorak mbaka'lek kiniki mbere logonet nunggwi me, Ala nen eebi kinombake kagak nonggo monggotak kagi o.
Currently Selected:
OROMA 14: WNO
Highlight
Copy
Compare
Share
Want to have your highlights saved across all your devices? Sign up or sign in
