WAYU 22
22
1-2Ti kage nagarik wonage me, melaikat nogo nen, an yo'nege logonet, ”Ala inom, at andomba inom, niyo aakumi ineenik aganake menggerak eneeri mili lombok wone lengganogo yorogo menggam abu'me nen, kilak togon wungge nagaarik, o koota tu yarak eraaninu wage ti, kenegen pekket o,” yinuk, yo'nege mbaki, pekkage me, niyo nggwok wage nogo aa'nggi yibagan-anebagan eyo aakumi ineenik aganake menggerak awi yarak me, tut ambi paga ne ambit anggen yi'nage, tut ambi paga ne ambit anggen yi'nage, togop aret eerit nage logonet, 1 tahun paga ne 12 paga aret anggen yi'nage kagarak. Ndi, eyoongga nogo ti, yi aakumi ndi aakumi andi aganake kero inake aret wonage kagarak. 3Yi mendek ndi mendek pulunogo pereegerak maluk wonage nogo tigitogon obeelom eerogo pegerak me, o nogo ti, obeelom mban aret wonage kagarak.
Ndi, Ala inom, at aput ndomba nogo inom, imbirak it wone lengganogo yorogo menggam o oolo taati wonogwe iigak, at Ala ayeloman abok aret at owagam ninggippunuk logonet, at mban alut eekwi iigirak. 4At mban alut eeko logonet, it nen at etenggen liippugwi, ndi, at nen at endage inenggaawak paga liiru mbanogo piige, eekwi iigirak o. 5Time o kiip age, o wege, eeka'lek o liingge mban wonage kagak, it aakumi nen Ala eya paga nugu logonet, ”O eya aruwak nduk, oonegen wundi wage, ndi, ndi wuninggwi eeruwak lak ao,” mbaka'lek it aap inendagembogut negen mondok-mondok tiyanak aret wonogwe iigirak.
Yetut woroorak wone
6Ti eekwi iige nagarik, at wone yo'nege nogo nen ambinom yo'nege logonet, ”At Aberiniki it aap nabi-nabi inikime logonet yorage kagak aakumi yorogo logowak nduk, nappi wagagerak ninogoba Ala nogo nen logonuk lek mbet-mbet eeriyak wone nogo, at ayeloman ineenu aruwak nduk, ayonggo nugu menggaarak melaikat ambi nappi wagaarak wone yokkegerak nogo abok aret, Yi abet aret yo'negerak me a'me nggelok yigin o, yinuk, mbake logot o.
7Napuri o. An mbet-mbet woraagin o, yinuk, yegerak me yokkigi o. Ndi, an wone yokkege neegak, liiru mbanggendak nogo ti, it aakumi liippunuk, mugurok nogwe iinok, iniki ale'nggen aret mbako logogun o,” yinuk, yo'nege kagarak.
8Wone agan wagaarak naruk konengge, eerit wagaarak nenegen kage, eekirak nogo ti, an Yaya aret me, naruk konengge, nenegen kage, eeke nagarik, at peebi eeriyak wone yo'negerak melaikat nogo alut eerikit nduk, abu'me tebe ari mbaki, 9at nen an yo'nege logonet, ”Togop eerugun o. It koreewi Ala wone yorogo nogogwaarak nabi-nabi inom, it wone liiru mbanggendak liippunuk mugurok nogo logomenggaarak nogo inom, kat inom, an kit pogom Ala ayeloman aret me, Ala mban alut eeke logot o,” yinuk, 10yo'nege nagaarik, ”Yokkege neegak liiru mbanggendak nogo eeriyak abu aret panggo yi wagaarak me, wone ti, kumaapporogo logorak mage o. Ata, yi aap ndi aap yoranet nege logot o. 11Yoranet nege keegak kwe, it maluk eeko logowok mbakwi kenok, maluk aret eekwi, ndi, eeriyak lek mendek kagak ugun-ugun eerit nogo logowok mbakwi kenok, ugun aret eerit nogwe, ndi, it ando maluk eeka'lek obeelom mban eeko logowok mbakwi kenok, obeelom mban eerit nogwe, ndi, ando kikak naka'lek Ala ake leenak mban logowok mbakwi kenok, Ala ake leenak wonogwe, eekkologo logowak o,” yinuk, yo'nege kagarak.
12-13Yo'nege kage nagarik, at Yetut nen, ”O maan aa'nduk togon wonagagirak alom Alpa inom, peebi irip paga mondok logorak Omega inom, ti an mban aret me, an logonuk lek mbet-mbet wage logominggirik, yi aap ndi aap eeko nogogwaarak ndak-ndak inalitik-inalitak onggo wogora woraagin me, liippogo logonip o,” yinuk, yo'nege kagarak.
14Yo'nege kage nagarik, ”At Ala nen kinambogoyum koorak wonogwe kiinok, eyo ineenik aganake menggerak anggen nonggo logobagip nduk, o koota tu paarak mban wonage yime nowagam unggwi woraanip yokkirage neyaamunggup o,” yinuk, yereegerak me, it aap inambogoyum kulinik kookkologo menggaarak nogo, iniki ale'nggen mbakak o koota unggwi nogwe iigak kwe, 15it nggeewo pogom eeko menggaarak inom, magagirak iyagalo inom, yawukak mbabilu inom, aap inooka inom, kugi eeka inom, yi aap ndi aap pilit puguniyak inikilom mbako logonet, pilit-pilit pugungga inom, it perak, o koota paga unggwi naga'lek yagat endekem time aret, ”Ao,” mbakak pengge agan nugwi iigirak.
16Ti eekwi iige nagarik, at Yetut nen an yo'nege logonet, ”Kit an napuri yi awi ndi awi kuwak eerit nogo monggotak nogo, peebi eeriyak wone paganogo yokkira woraawak nduk, nayonggo nugu menggaarak melaikat ambi nappi wagarak nogo ti, an Yetut nen aret o. O weerikit nduk eeke kagak, laaluguragan ambiret kere ari nogo pogom anebunu Ndawut mendek wiganak ombooluk an aret o,” yinuk, 17yo'nege mbaki, melaikat nogo nen ambi yo'nege logonet, ”It yi aakumi ndi aakumi niyo abu aganake kenok, niyo ineenik aganake menggerak nogo mendek onggo lek we aret tookkola woraawak nduk, Aberiniki inom, Ala andomba akwe nogo inom, imbirak nen, Wa'nip o, yinuk, muk yorogo agaarik o. Ndi, it wone yi konembunuk abet mbakwi iinok, Na wa'nip o, yinuk, wiirogo logowak nduk, yoret o,” yinuk, yo'nege kagarak.
Irip paga yoge kagagerak wone
18Ti yo'nege nagaarik, ambinom yo'nege logonet, ”Wone yokkege neegak liiru mbanggendak nogo aakumi konembunuk, wone alik ambi inom nabenogo pugwi iinok, aakumi andi-pandi aganaburak kugi inanebunu 7 porogo wonogwe iige nagandik, liiru mbanggendak nogo nen inooruwak nduk, Ala nen nappiya woraagin o. 19Ndi, wone yokkege neegak liiru mbangge logonet, Ala minggim o koota abu obeelom nogome unggunuk, eyo aakumi ineenik aganake menggerak anggen nonggo logogun o, yinuk, mbuku paga liiru mbanak yi, aakumi nen konembunuk, ando waganggo logonet, Ando ti woorak lek o, yinuk, mbo pugwi iinok, at Ala nen, O koota obeelom nogome eyo anggen nogo kit na unggwi woroorak lek o. Endekem aret logonip o, yinuk, yoraagin.
20At wone keenu a'nok nduk, paganogo yokkegerak nogo nen, An logonuk lek mbet-mbet wagi o, yinuk, abet aret ari kagarak me, wone abu aret yokkigi o,” yinuk, yo'nege kagarak. Kage nagarik, an nen, ”Noweeluk Yetut mbet-mbet woraawak lak ao,” yinuk, ”Amin” yagarak.
21Ndi, ”Kit kinowe Yetut nogo nen kit abok kinabuwa mbake logonet, kinarum logogin aret o,” yinuk, ”Wa. Amin,” yokkiragi o.
Currently Selected:
WAYU 22: WNO
Highlight
Copy
Compare
Share
Want to have your highlights saved across all your devices? Sign up or sign in
