WAYU 20
20
1000 tahun paga logonet, eeko logorak kagagerak wone
1Ti'nuk, melaikat ambi mbuun ambena tu paariyak nduk, kunci inom, mbutigeele nggwok inom, eenggime wonok, mbogut paga nen wambi wage nagaarik, 2at waalo tinambe negen o maan togon aakumi inambokan lagangge menggerak Tile, Ibilit nogo, pigogo mbutigeele nogo paga maappunuk, 1000 tahun logowak nduk, 3o mbuun ambena wuppege logonet, ”O peebi ne ambit iluk piinogo teppagarak kwe, yogondak aakumi inambokan lagangga'lek 1000 tahun paga keele maarak yime aret logot o,” yinuk, tu kunci narogo mbo wuppege kagarak.
4Kage nagarik, wone lengganogo yorogo menggam i ndoonak ambik nogo paga aakumi kwi'ndak wonogwe nogo nen aakumi inawone amburu mbanogo inowak loonggo logowak nduk, unde eeppiige kagarak. Ti kage nagarik, it Ala wone mugurok nogo logonet, Yetut wone paganogo yoragagerak nogo abet mba'nuk, yorogwe iigak, inenggaanok mbanogo piyareegwaarak nogo inom, ndi, it ando nen, ”At nggeewo aa'nduk lagi wagaarak eebe inom, ogut ogobakkigirik nogo inom, nit alut eerugun lek o,” yinuk, ”Nggeewo endage nogo ti, nit ninenggaawak paga inom, nineenggi paga inom, liiru mbaniyak lek o,” yinuk, yogo nogogwaarak nogo inom, ineenik a'nuk Keritut inom, tiyanak aakumi inarum wonogwe iigak, 1000 tahun aret age kagarak. 5Aa'nduk ineenik agago mippiyoorak nogo it aret o. Ndi, it ando kambeegwaarak nogo perak, 1000 tahun eeppunuk, ineenik agago mippiyoorak nduk wonogwe iigirak. 6It inaa'nduk ineenik agago mippiyamenggerak nogo, maluk eeka'lek Ala ake leenak logonet, iniki ale'nggen nggwok aret logogun o. It aa'nduk muk kambeegwaarak me, peebi kambugun lek o. Ala unde a'nuk, Keritut Ala imbirak inake eerit nugwi, ndi, Keritut inom aakumi inarum wonogwe, eekwi iigak, 1000 tahun aret age kagarak.
Ibilit mondok-mondok kani omoonu'me nappuurak wone
7-8Ti kage nagarik, at wone yo'nege menggerak nogo nen ambinom yo'nege logonet, ”1000 tahun eeppunuk, yi aakumi ndi aakumi inanebunu lombok o Magok inom, o Nggok inom, irip-irip time abok aret kuwak eeppunuk, wim eeriyak inikime nggaganogo mambiinet nege logowak nduk, Ibilit keele maarak mbuun ambena wonage nogo piinogo nippi wage kagarak. Piinogo nippi woramenggerak aakumi inikime nggaganogo manabit nage mbariminggi, mbiini niyo aa'nggi paga niyanak nogo pogom aakumi togop aret kuwak eerugun o,” yinuk, yo'nege kage nagarik, 9aakumi togop aret karume kobak paga lombok time kuwak eeppunuk, it abet mbareegwaarak Ala apuri nogo inookwi, ndi, o koota Ala inikilom mbake minggim nogo lek eerogo pugwi, eeruwak nduk, oo'nggut panggeko mbaka, kani mbogut paga nen wunuk agan wambi wage logonet, aakumi nogo mondok pup eerogo piige kagarak. 10Ndi, at aakumi inambokan lagangge menggerak Ibilit nogo, pigogo kani omoonuk wunuk mban ari minggim at nggeewo anini warak aa'nduk lagi wagaarak inom, at ore peebi lagi wagaarak pilit wone agan nege nagaarak nogo inom, imbirak wonogome nogome mbo nappege mbaki, liingge-kiyoma kani eyak andi nen mondok yagan yobak-nggolak wakwi iigirak.
Age yobok paga inowak loonogo onggo wogorage kagagerak wone
11Ti eekwi iige nagarik, wone lengganogo yorage minggim i nggwok ndoonak yanggwi lombok nogo paga aap ambi awo kwi'nage kagak, mbogut-nggween eenggi-iyok lek, lek age mbaki, ti'nuk, peebi obaane'me ari wage koolik. Mondok-mondok lek aret age kagarak. 12-13Kage nagarik, it aap inendage lek inendage warak kambeegwaarak inom, it niyo nen ndonggoninabeegerak inogoma inom, kambit nogogwaarak inogoma kambunuk nogo menggam wonogwe nogo abok aret, wone lengganogo yorage minggim i nggwok ogobakkigirik yanggwi lombok nogo paga aap ambi kwi'ndak wonage nogo, owagam mi'nari wogo mbaka, at i ndoonak paga kwi'ndak wonage nogo nen it eeko nogogwaarak inom, aakumi mondok-mondok ineenik aganaburak inendage inom, mbuku alitak paga mbanak wonage me, imbirak waganogo piingge nagaarik, it kangga'lek ineenik logonet eeko nogogwaarak liiru mbanak nogo pekkagak inowak loonogo onggo ndak-ndak aret wogorage kagarak. 14-15Ti eeke kage nagarik, it ando ineenik aganaburak mbuku nogo paga inendage mbanak lek kenok, kani omoonu me nappiige logonet, kanggo menggaarak alom inom, kambunuk nogo menggam inom, abok aret waganogo kani omoonuk wunuk mban ari minggim nogome mbo nappiige kagarak o. ”Ne mbere kambuurak o,” yinuk, liiru mbanak nogo ti, ambi we ineenik logonuk, laalu kanggwi, ndi, ambi kani omoonu'me mondok-mondok nappiige, eeriyak ti nduk aret liiru mbaneegerak o.
Currently Selected:
WAYU 20: WNO
Highlight
Copy
Compare
Share
Want to have your highlights saved across all your devices? Sign up or sign in
