WAYU 13
13
Nggeewo negen anini warak ineebe yo'nggok mbere'ndak nen eekwi iyareegerak wone
1Ti eeke kage nagarik, nggeewo negen ambi niyo nggwok yenggenak me nen wundi wage kagarak. Ndi, at nggeewo negen nogo ti, aruk alom me eyak 10, ndi, anobak 7, wonage kagarak. Ndi, eyak 10 nogo paga nggare-nggare mendaarak makoota abok yirik, ndi, anobak 7 nogo paga Ala endage miyuk-meya eerogo pugwi liiru mbanak wonage kagarak. 2Ndi, nggeewo pogom anini ambik niyome nen wundi wage kagarak eebe nogo ti, nggeewo harimau negen aret me, iyok ti, pagi yo'nggok beruang iyok pogom, ndi, eyagarin nogo ti, nggeewo singa eyagarin nde eerak nogo pogom wonage kagarak. At waalo nggwok tinambe pogom nogo nen, ”An nomaawi inom, an wone lengganogo yorage minggim inom, abok aret kat unde eeppagagi o,” yinuk, yoge kagarak. 3Kage nagarik, nggeewo anobak ando nogo kagak, anobak ambit nogo wako mbaka, mondok kambuurak nduk eeke kagarak kwe, lek age mbaki, it aakumi nggween paga mendek abok aret wigu logonet, at mban amugurok nogwe iigirak. 4Mugurok nogo logonet, waalo nggwok nogo nen at nggeewo niyome nen wundi wagaarak nogo, awone kiliregerak me, waalo nggwok nogo tiyappunuk, alut eekwi, ndi, nggeewo nogo kunduk alut eeko logonet, ”Nggeewo yi kokwak ambi wonogwe mondok lek me, taani nen at inom wim namburiyak mbakop? Mondok lek aret o,” yinuk, tiyappugwi, eekwi iigirak.
5At nggeewo anini warak niyome nen wundi wagaarak nogo nen tut 42 penengge kagak, wogoppake logonet, Ala miyuk-meya eerogo pege logowak nduk, waalo nggwok nogo nen awone kilirege kagarak. 6Awone kilirege mbaki, nggeewo nogo nen at Ala eebe inom, at endage inom, at minggim inom, ndi, it mbogut paga menggaarak inom, it abok aret at oone paga miyuk-meya eerogo piinet nage kagarak. 7It aap inanebunu alitak lombok inom, inoone alitak inom, inagabolo alitak inom, yi aakumi ndi aakumi abok aret at abu'me tebenogo piinok, at mban mondok tiyanak logowak nduk, waalo nggwok nogo nen awone nggeewo nogo kiliregerak me, at nggeewo nogo nen it abet mbareegwaarak Ala apuri inom wim nambuke logonet, tebenogo piige kagarak. 8Ala andomba wareegwaarak nogo nen o maan mbogut-nggween yi awo wakkaga'lek kagak, it mondok-mondok ineenik aganaburak mbuku paga inendage liiru mbanak wonage lek kenok, it abok aret nggeewo nogo alut eekwi iigirak.
9-10”At Ala nen, It an napuri kenok keele maarinakwi, kambuwak nduk mbuti tege paga inookwi, eeko logogun o, yinuk, koonogo pereegerak nogo aret eekkinakwi me, Yi nonggop ee'ninakwi o? yinuk, kiniki lek-lek eekkinake kenok, abet mbareegutak nogo mbo pugup o. Ata, Ala nen obeelom eeppinaniyak yereegerak nogo abet aret eeppinanigin o, yinuk, kiniki kwippunuk, kinogogumbuk logonet, waganggo logonip o, yinuk, kinaruk wonage kenok, liirogon aret konenggo logonip o,” yinuk, yo'nege kagarak.
11Ti'nuk, peebi nen nggeewo ambi nggween enoona nen lagi wage kagarak. Ndi, at nggeewo nogo aruk alom me eyak mbere ndomba eyak pogom kwe, oone perak, waalo nggwok oone nogo pogom ari kagarak. 12Nggeewo aa'nduk niyo yenggenak me nen lagi wagaarak awone kiliregerak li'luk eerogo wagangge nagaarik, it aakumi nggween paga wonogwe nogo abok aret yorage logonet, ”Kit nen nggeewo aa'nduk lagi wagaarak anobak ambi wako mbaka, kambuurak nduk eekerak kwe, lek agaarak nogo mban alut eeko logonip o,” yinuk, oone omaawi paga nabek togon yorage kagarak. 13Ndi, nggeewo peebi nggween enoona lagi wagaarak nogo nen inagabiti warak eerubok mendek iya tit eerit nage logonet, aakumi abok inenggaanom paga kani kunik mbogut paga nen nggween paga wuppi wage kagarak. 14Ndi, at nggeewo aa'nduk lagi wagaarak oone kiliregerak paga, inagabiti warak eerubok mendek iya tit eerit nage logonet, ”Nore nggeewo ambi mbuti tege paga wakaarak kwe, eenik agaarak nogo, ogut wakkagak ambi ogobakkigirogo punuk, at mban alut eeko logonip o,” yinuk, inambokan lagangge logonet, yorage mbaki, 15nggeewo aa'nduk lagi wagaarak nogo ogut wakkagak ogobakkigirogo pogo mbaka, oone yuwak nduk, ambebubu inikime pu eerogo mambege mbaki, oone warak age nagaarik, ”Nalut eeka'lek o,” yinuk, anini nen inoorit nage kagarak. 16At nggeewo ti'nen it aap inendage warak inom, inendage lek inom, ineenggi warak inom ineenggi lek inom, wee'lek mendek inom, aakumi inayeloman inom, abok aret ineenggi abe'nggan paga ilik, inenggaawak paga a, ineenu ogo logowak nduk liiru mbanogo piige nagaarik, yorage logonet, 17”It aakumi an nendage liiru mbanak ilik, an nanomor liiru mbanak a, eerak wonage lek kenok, inamendek onggo mbanggologwe, ndi, yi mendek ndi mendek kunggwi, eeko logorak mondok mage o,” yinuk, lengganogo yorage kagarak.
18Kage nagarik, at wone yo'nege nogo nen ambinom yo'nege logonet, ”Kat wone lengganogo yorage kagandak nogo ti, it aap iniki warak nen mban kin kogo logogun o. At nggeewo nogo nen liiru mbanggerak nogo ti, aakumi nen eekwi inanomer liiru mbanak 666 aret me, it aakumi iniki warak kenok, Yi aret kagi o, yinuk, liippogo logowak nduk yorage logonu o,” yinuk, yo'nege kagarak.
Currently Selected:
WAYU 13: WNO
Highlight
Copy
Compare
Share
Want to have your highlights saved across all your devices? Sign up or sign in
