PILIPI 3
3
Ala nen aret obeelom agago pinaniyak yoragagerak wone
1Noreewi o. ”Kinowe endagembogut kinom kunik logonet, kiniki ale'nggen aret logonip o,” yinuk, wone irip paga yokkiragi ti aret o. An aa'nduk liiru mbanggiragagirak nogo ndak-ndak peebi mbanggiroorak neebi mbakeelik o. Kit kiniki nu'lek logobagip nduk, mbanggiroorak op aret mbake agarik o. 2It aap nggeewo negen maluk lombok eeko menggaarak nogo, kiya wogo logonet, ”Kinagabolo mbaninip o,” yinuk, yokkira wogwe iyo, liippunuk kiniki tum wako logonip o. 3”Ndogop eeppaneegwaarak o,” yinuk, niniki ti paga panggombunuk, tiyappega'lek logonet, Aberiniki nen ninikime yo'nirage kagak, Ala alut eekwi, Keritut Yetut ee'ninabeegerak nogo tiyappugwi, eeko monggoorak nogo ti, ninagabolo abe mbanak nit aret o. 4It ando nen, ”Neebe ndogop eeppaneegwaarak o,” yinuk, ti paga iniki panggombunuk, tiyappatiyak mbakwi nogo ti, mbuuluk eeppiyareegwaarak kagak mbakwi, ndi, an perak, iya lombok eeppaneegwaarak me, niniki ti paga panggombunuk, tiyappatiyak op aret kwe, ti paga nen ambi eekkoloorak lek mba'nuk mbo pereegirak nogo yi aret o.
5An ndarak neegak nogo 7 yippunuk, 8 paga nagabolo mbaneegwaarak. Neebe ti, Iterali mendek aret kwe, nanebunu ti, Mbeniyamin mendek aret o. Nagalo-nogoba kunduk ti, Iberani mendek aret. Ndi, Muta wone lengganak li'lak eeka an Pariti mendek aret wonagagirak. 6Wone ti nogo niniki kundugu lombok logonet, Ala apuri piyak-payak eerogo inoorit nege nagagirak. Obeelom eekkolaawak nduk, Muta wone ndak-ndak eeko menggaarak nogo, an togon ndak-ndak aret eeke nagagirak me, aakumi ambi nen inoone noba panega'lek aret wonogogwaarak. 7Ti paga op eekkolaakit nduk, eeke nagagirak kwe, yogondak Keritut wone wagangge nagagirik, ”Keritut nen obeelom eeppaniyak kagak wone aa'nduk nogo ti we aanom warogo eerit nage nagagirak kagi,” yinuk, mbo pereegirak. 8-9”Ndi, an nowe Keritut Yetut neenu ariyak ti mondok iya me, yi mendek ndi mendek eeriyak abok aret we aanom warogo eerit nage logorak kagi,” mbake nagagirik, Muta wone ndak-ndak eeke nagagirak nogo paga obeelom eekkoloorak ti neebi o. Ata, Keritut abet mbakwi paga Ala nen nit obeelom eerogo pinanege nogo mendek, ”Muk eeppagagirak me, Keritut kimbirak kiniki kunik wonage keegi o,” yinuk, yo'niruwak nduk, Keritut kolage nagagirik, an yi eekak ndi eekak eeke nagagirak nogo abok aret, ”Yi inambeebuk pogom aret kagi,” yinuk, mbo pereegirak. 10-11At Keritut eebe inom, ndi, Keritut ninake kangge mbareegi, Ala omaawi paga eenik agago mippereegerak nogo inom, ”Liippatikit lak ao,” mbake logonet, o age yobok paga an kambunuk nogo menggam nen neenik agago mippanuwak nduk, at Keritut iniki yanggonak kagak, aaninggin-paaninggin oba punuk, wako mbareegwa, kambunuk, eenik agagerak nogo kwak, an ndak-ndak neegak, eeppaniyak op aret mbake agarik o.
Mbe agan nogo logonet, kola noorak wone
12An niniki muk kole ee'nake, ndi, nabelan-kabelan abu wo'nege, eereegerak me nduk yokkirage ti lek o. Ata, Keritut Yetut nen ee'nabikit nduk kwaa'nabeegerak nogo, ”Aret kolaakit o,” yinuk, nengga loolo aret mugurok nage agarik o. 13At nen ee'naburak nduk, mii'nabeegerak nogo ti, muk ee'nabeegerak me nduk, yokkiragi ti lek o, noreewi. Ata, an aa'nduk eeke nagagirak nogo, nggonenogo nambokan mbo punuk, ngget mendek ee'naburak koonogo pereegerak nogo, kola naakit nduk eeke logonet, 14Keritut Yetut eereegerak paga at Ala ninom mbogut paga logowok nduk, yonggo pinaneegerak nogo mban nengga loolo agago punuk, mbe agan mugurok nage agarik o.
15Kit kiniki muk kole agaarak kenok ninom togop aret mbe agan nogo logowok o. Ndi, kit ando togop eeriyak mbaka'lek kenok, eeko logobagip nduk, Ala nen aret eekkinabigin me, 16nit abok niniki ambit eeppunuk, kola noorak nduk, wone aa'nduk waganeegurak nogo mbo punuk, niniyok paga yungguninuk woroorak ti mage o. Ata, abeko logonet, mondok mugurok nogo logowok o.
17-18Noreewi o. It aap ando apit nogo nen, ”Keritut eyo karo-karo paga kambeegerak wone woorak nineebi o,” yinuk, iniki alik koonit nogo menggaarak me, ”Ala inom ogoorak wonogwe o,” yinuk, ko'lukii'me yokkirage minggirak nogo, yogondak ambinom le ari logonet yokkiragi o. It aap ti togop eerit nogwe me, an eeke minggi kwak, kit ndak-ndak eeko logonet, it kinoreewi ando nen nit eeko monggoorak nogo kokwak eekwi iinok, liirogon aret inarum logonip o. 19It aap ti nen nggween paga mendek mban abekwi, inaanogum ake mban tiyappugwi, inenggali ariyak kagak wogoppakwi, eeko menggaarak me, Ala nen mondok lek eerogo piyaagin kwe, 20nit perak, ninawi ninaworak mbogut paga wonage me, ninagap ndakak ninowe Yetut Keritut mbogut paga nen, ”Mbet-mbet worawak lak ao,” yinuk tokkogo ogoorik o. 21Wambi wage logonet, at omaawi paga yi mendek ndi mendek abok aret at abu'me logowak nduk, tebemborogo menggerak nogo paga nen ninagabolo maluk pili age menggerak yi, nggonenogo mbo punuk, obaane'me at agabolo mondok alik ngget mendek nogo aret yippinanigin o.
Currently Selected:
PILIPI 3: WNO
Highlight
Copy
Compare
Share
Want to have your highlights saved across all your devices? Sign up or sign in
