YAKOBUT 1
1
YAKOBUT NEN LIIRU MBANEEGERAK WONE
1An Yakobut nen kit Yakuri kinanebunu 12 mendek, yi o ndi o mbaganit nogogutak nogo, ninogoba Ala ninowe endagembogut Yetut Keritut imbirak inayeloman logonet, keyage wappinagagi o.
Abet mbakwi inom, iniki warak inom, yoragagerak wone
2Nowe-nawot o. Aaninggin-paaninggin kinoba age kenok, kinikilom mbako logonip o. 3Kit abet mbakwi kiinok, kinabut mbangge me, aaninggin-paaninggin kinoba age kagak, kiniki kwi'ndak waganggo logonet, ”Niniki nu'lek ee'ninaburak nduk eeke kagi,” yinuk, ale'nggen mbako logonip o. 4Kit kiniki mondok kole eekkinake, ndi, abu obeelom eekkinake, eeke nogo ambi yobok yigin lek o. Abok ndak-ndak eekkinaburak nduk aaninggin-paaninggin kinoba age me, kiniki kwi'ndak logonet, waganggo logonip o. 5Kit nen eeriyak ambi kineenggo'lek kenok, Ala yo'nip o. Yogwi kiinok, at ogogumbuk lek yanggonak paga yi aakumi ndi aakumi abok aret kalo logonogo wogorage menggerak nogo nen eeriyak nduk kineenu eekkinabigin. 6Kit Ala yogo logonet, kiniki yungguppegak yaga'lek mondok abet mbako logonet, yogo logonip o. Aap ambi iniki yungguppegak eeke logonet, Ala yoge kenok ti, o wiya wage logonet, niyo mogoninuk eeke menggerak nogo pogom, aap ti iniki togop aret eeke menggerak o. 7-8Aap ti iniki mbere logonet, yi eeriyak ndi eeriyak koonit nage me, iniki tayenak logogin lek o. Iniki mbere logonet, Ala yoge me, ”Wo'nirigin lek kagi,” yinuk, mbake logowak o.
Ineenggi lek ineenggi warak wone
9-11Oonegen wundi wage logonet, mo andi nen iri'ngga-kale'ngga teebat age nagaatik, mono-mono wangge logonet, etenggen maluk negen age minggi kwak, it aap ineenggi warak eekkoloorak nduk, eerit nugwi iinok, ineebe togop aret lek arugun me, kit noreewi Ala apuri ando kineenggi lek me kinendage tebenak wonogwe nogo, kineenggi warak age logonet, kinendage tiyak ari kenok, ”Ala nen aret eeppanege o,” yinuk, kiniki tebenak logonet, kiniki ale'nggen mbakwi, ndi, kit ando kineenggi warak me, kinendage tiyanak wonogwe nogo, kinamendek lek age logonet, kinendage tebek ari kenok, ”Iri'nggakale'ngga lek age minggi kwak, ninendage togop aret lek age me, op aret o,” yinuk, kiniki obeelom logonet, kiniki ale'nggen mbakwi, eeko logonip o.
Niniki abut mbangge, niniki nggagangge eeke kenok, eeko logorak wone
12It aakumi inabut mbangge kagak nu'lek wonogwe kenok, inale'nggen aret mbako logowak o. It aakumi inabut mbangge kagak nu'lek wonogwe nogo, op eekwi iinok, nggenat eeruwak nggare-nggare mendaarak negen makoota yippiigo mengga kwak, it aakumi Ala iniki kunik eekwi nogo, ”Kineenik mondok logorak mendek wokkiraagin o,” yinuk, abok yoragagerak nogo wogoraagin o. 13At Ala nen, ”An maluk ambi eerikit,” mbake, ndi, aakumi maluk eeruwak nduk, iniki nggaganogo piige, eekeelik me, aap ambit-ambi iniki nggagangge kenok, ”Yi Ala nen niniki nggagangge o,” yinuk, yuurak ti mondok lek o. 14Nit niniki nggagangge nogo ti, aap ambi maluk eeruwak nduk, oone amburu puk-puk niikkenok nage minggi kwak, nit niniki nen eeriyak uugwe mba'nuk aret eekwi o. 15Ndi, kwe ambi elege inikime logombunuk, ndake nagaatik, ti'nuk, elege nogo kangge menggerak nogo kwak, nit iniki nen aret maluk eeriyak uugwe mba'nuk, eebe eeko nogootik, ti'nuk, nineebe aret kanggo monggorak.
16Nowe-nawot o. Kit an niniki kunik me, kit kiniki nomonggolaagup o. 17Ninabuwa nen obeelom eeppinanege inom, wo'niroorak mbake nogo mondok ndak-ndak wo'nirage inom, abok aret agi nen aret wuppinani wage menggerak. Yi o ndi o abok aret eya eeke menggerak alom at ninogoba Ala nen aret, wuppinani wage menggerak. At ambi agak eeke logonet, ne ambi paga o yumaak negen age, ne ambi paga o eya negen age, eekeelik mondok itok eya mban aret menggerak. 18At Ala nen yi mendek ndi mendek wakkaakit mbareegerak nogo tebenak kagak, it aakumi mban tiyanak logowak nduk, ”Aap aa'nduk ogobakkigirikit o,” yinuk, oone yereegerak nogo paga iniki mbareegerak nogo ndak-ndak eeke logonet, aa'nduk nit aakumi aret ogobakkigi'ninabeegerak.
”Kinaruk mban konenggwi a, eebe aret eekwi a?” yoragagerak wone
19-20Nowe-nawot o. Kit an niniki kunik me, wone yi liirogon waganggo logonip o. Nit abe koonak mban eeko logorak Ala nen ninombareegerak nogo ti, ninanini paga eeriyak lek me, kit abok aret wone mbet-mbet konenggo logorak op aret kwe, yuurak kenok perak, liippunuk yogwe, kinanini mbet-mbet wungga'lek liirogon eekwi, eeko logonip o. 21Eeriyak lek mendek peyak wurik pogom kagak ugun eekwi, ndi, yi maluk ndi maluk eekwi, eeko monggotak nogo abok aret mbo punuk, kiniki yanggonak logonet, wone ninagap ndariyak wone Ala nen ninikime awi yappinanege menggerak wone nogo mban liirogon waganggo logonip o.
22Ala wone kinaruk mban konenggwi kenok, kit aret kinambokan laganggologwe me, kinaruk mban konenggak eeko logorak ti mage o. Ata, konembunuk, eebe aret eeko logonip o. 23Kit Ala wone liippunuk, eeka'lek we kinaruk mban konenggwi kenok ti, aap ambi wukagi paga etenggen pekkolage nogo pogom kit aret o. 24Etenggen pekkolage nagaatik, nage logonet, ”Netenggen togop kagarak o,” yinuk, abe'naga'lek mbet-mbet kobak age menggerak kwe, 25Ala nen wone lengganogo li'luk eerogo yo'niragagerak nogo paga pilanogo wondet agago pinanege menggerak wone nogo kit li'lak pekkologo logomonggotik, kobak aga'lek liirogon wappunuk eeko logomonggotak kenok, kiniki ale'nggen ambik aret logomunggup o.
26Kit ambi nen, ”An Ala wone liippunuk eeke agarik o,” yogo monggotak kwe, kinamili irip paga ugun agan nugwi nogo, wam kunda ambe nggerenggo mengga kwak, kit togop aret kinambe liirogon arum wonaga'lek kenok, kit aret kinambokan laganggologwe, ndi, ”An Ala wone liippunuk eeke agarik o,” yogo monggotak nogo ti, aanom warogo aret eekwi, eeko monggotak kiigi o. 27Ninogoba Ala enggaanom paga at oone liippunuk mondok abe eeko logorak ti, it wologwe-komologwe inagalo inogoba kanggaatak wenabela inom, kumi togwe inom, iniki aaninggin wonogwe iinok, inabuwa nen yeenggwaaranet nogwe, it aakumi iniki maluk nen maluk eeruwak nduk kiniki nggagani wogwe iyo, tum wakkologwe, eeko logonip o.
Currently Selected:
YAKOBUT 1: WNO
Highlight
Copy
Compare
Share
Want to have your highlights saved across all your devices? Sign up or sign in
