IBERANI 11
11
Abet mbakwi paga waganggo nogogwaarak wone
1Nit niniki abet mbakwi eebe ngge o? Nit niniki abet mbakwi eebe nogo ti, nit yi mendek ndi mendek niniki luunik wonogwe nogo, abet aret waagun mbakwi, ndi, ninigen kaga'lek kwe, abet aret wonage mbakwi, eekwi ti aret o. 2It aa'nduk ninombomini nogo ti, Ala yoragagerak wone nogo, ”Abet aret kogo o,” yinuk, abet mbakwi iinok, Ala nen, ”Aap yi obeelom aret o,” yinuk, inombake nagagerak.
3Nit ninenggaanom wakkoolik kwe, at Ala oone paga nen mbogut-nggween wakkagagerak nogo eebe ninigen kogo logonet, abet mba'nuk, nineenu ogwe me, yi mendek ndi mendek ninigen kaga'lek nogo paga nen, yi mendek ndi mendek ninigen kogwe yi wakkagagerak kogo o.
4At Kayin nogo nen amendek maluk negen Ala ake pi wagagerak kwe, Kaben perak, Ala yoreegerak nogo, ”Abet aret yo'negi,” mba'nuk, amendek obeelom mendek warogo Ala ake pi wage enegen kage nagagirik, ”Aap yi obeelom aret kagi,” yinuk, yereegerak Ndi, at Kaben nogo ti, muk kambeegerak kwe, at abet mba'nuk eereegerak wone nogo ti, mbininggo monggoorak.
5Aap Enok kunduk, iniki abet mbareegerak paga kambulik Ala nen eenik wonok laganeegerak kagak, oreewi nen kwaareegwaarak mendek lek aret kogogwaarak. Wonok lagangga'lek kagak, ”At Ala imbirak iniki kunik wonagagerak o,” yinuk, Ala wone mbanak paga kogo monggoorak nogo lek a? 6”Ala abet aret menggerak me, nit at owagam nogwe niinok, onggo wo'niraagin o,” yinuk, abet mbako logonet, at owagam nagak eekwi niinok, inikilom nimombake menggerak kwe, aap ambit-ambi abet mbaka'lek kagak, at owagam nage kenok perak, Ala inikilom ombarigin abu lek o.
7Aap Nu kunduk, peebi eeriyak awo kin kaga'lek kagak, Ala nen kurumbi yoge mbareegi, ”Yi abet aret eeriyak yo'nege kagi,” yinuk, ayuk wuke logonet, akwe-apuri inom inagap ndaruwak nduk, o yiiro wureegerak. Ala nen, ”Kit aakumi maluk eekwi onggo niyo paga ndonggongginabigin o,” yinuk, yoragagerak nogo, ineenu aruwak nduk, Nu abet mba'nuk yiiro wuke mbareegi, at Ala nen nit abet mbakwi paga obeelom eerogo pinanege nogo ndak-ndak, at Nu iniki abet mbareegerak paga obeelom eerogo pereegerak.
8Ndi, at Abarakam kunduk, Ala nen, ”Nggween ambi kat unde logonok nduk, wokkirigin me, nak o,” yoge mbareegi, o ti eenggo'lek kagak, ”Abet aret wo'nirigin,” mba'nuk, nagagerak. 9-10O wokkirigin yoreegim nogome aret nagagerak logonet kwe, ”O yi ti lek o. Ala nen o tini alik ambi mondok logorak mendek ogobakkigirikit koombunuk, ogobakkigireegerak nogome, an aret unde eeppanigin o,” yinuk, abet mba'nuk, tokkage logonet, Itak Yakup inom kolaawak nduk, yoragagerak me, it inom aap nggiru kwak ooliya wuppunuk, ya nogo yegak nda nogo yegak nugu nogogwaarak.
11At kwe Tara kunduk, abu kweegelo aagaluk ndariyak meek aret kwe, ”Ala yegetak ndak-ndak eeke menggerak me, abet aret ee'nabigin kagi,” mbareegerak paga agabolo ki eeppege mbareegi, aagaluk aret ndareegerak. 12Ndi, aap Abarakam nogo apuluk ndaka'lek me, kambeegerak negen wonagagerak kwe, akwe nogo nen iniki abet mbareegerak paga ombowologwe laaluguragan mbogut paga wonogwe inom, mbini kale'ngga yi aa'nggi paga wonage ineenggi lingginiyak meek nogo inom, nogo ndak-ndak aap ambit Abarakam ombowologwe aret wigannogogwaarak.
13It aap ti abok aret, ”Wokkiraagin o,” yoragagerak wone nogo, agalu'mok negen o nda taati wage inigen nakkogo nogogwaarik, ”Nogo yi aret ee'ninabi wage kogo o,” yinuk, iniki ale'nggen mbako logonet, ”Nit aap o nggween paga yime ninawarak wonogwe lek o. Aap nggiru negen aret ogoorik o,” yinuk, wone yugu eebe liirogon woolik kwe, ”Abet aret wo'niraagin o,” yinuk, iniki abet mbareegwaarak ti paga, eebe waganeegwaarak negen aret logonet, kambit nogo nogogwaarak. 14It aakumi togop yogwe paga inanggween alik ngget mendek kwaakkologo logonet, yogo menggaarak iigo o. 15It aap ti, inawi alom paga mbo pereegwaarak nogo, iniki aberak logonetak en, yungguninuk inawi alom paga nanetak kwe, togop mbarulik o. 16It iniki nen, ”Nit ninawi abe mbogut paga kola nawok lak ao,” yinuk, miippunuk, kambit nogo mbareegwa, Ala nen it iniki mbareegwaarak nogo ndak-ndak inawi abe koota negen pipuk eerogo piyareegerak wonage me, it nen, ”Ninogoba o, yinuk, yo'nogo logorak op aret,” mbake menggerak.
17-19Ala nen Abarakam abut mbanikit nduk yoge logonet, ”Kaput warogo an nake kani kumbu o,” yoge mbareegi, Abarakam nen, ”Kaput Itak paga nen kombowologwe apit wigannarugun o, yinuk, yo'nege mbaki, abet aret mbakirak kwe, Waru o, yo'nege me, nonggop togon wari?” ti mbarulik. Ata, ”Ala nen kanggaatak ineenik eerogo mippiige menggerak neenu me, togop aret eenik eerogo mippigin kagi,” yinuk, abet mbake logonet, ”Naput ambolom ndarak yi kagak aret warikit,” mbareegerak. Ndi, Ala nen kanggaatak ineenik agago mippiige menggerak abet mbareegerak nogo ndak-ndak, iniki nen abu warikit mbareegerak ti paga abet aret wakerak mba'nuk, Ala nen eenik agago mippereegerak negen aret mbaruwok o.
20Aap Itak nen, ”O peebi Ala nen togop eekkinabigin o,” yinuk, Ala nen yoreegerak nogo abet mbake logonet, ale'nggen Yakup Etau imbirak inoba piyareegerak.
21Ndi, Yakup kunduk, kambikit nduk eeke logonet, ”Ala nen eeriyak yo'niragagerak nogo eerigin aret o,” yinuk, abet mba'nuk, Yutup apuri inalitak lombok ale'nggen inoba piige nagagirik, owaanggun paga anep kumbunuk Ala alut eereegerak.
22Ndi, Yutup kunduk kambuurak eeke mbareegi, Ala nen wone yoreegerak nogo abet mbake nagagirik, yorage logonet, ”Kit Iterali mendek o Metit yime logomunggup lek o. Wundi namunggup aret me, wundi nogo logonet, an nowak nenenak inom wonok namunggup o,” yinuk, eenik logonet, wone abet mbareegerak paga awoneninu kilirogo yoragagerak.
23Muta agalo-ogoba kunduk Ala nen eeriyak wone yugu nogo abet mba'nuk, elege Muta nda'nagagerak amuni mbanak kigirikwe kogo nogogwaarik, aap nggwok wone lengganeegerak nogo inagabiti mbaka'lek logonet, kumaappi nogogwaarak kagak, tut kenagan peneneegerak.
24Ti'nuk, peebi Muta nogo tawe age nagagirik, wone yoragagerak nogo mban abet mbake nagagirik, ”Piraawon apuluk nogo aagaluk yo'niriyak ti neebi o,” mba'nuk, 25-26”Peebi Ala nen onggo wo'nirigin o,” yinuk, iniki aberak logonet, ”O Metit yime yi mendek ndi mendek abe mban wonage yi, iya lek o. Ata, ninowe endagembogut Keritut nen peebi ee'ninaburak tokkogwe ti meek ninombakwi kwe, peebi ee'ninaburak ambi wonage me, iya o,” mba'nuk, maluk eerit nogo logonet, ne ambit iluk inikilom mbako menggaarak mendek nogo mbo punuk, Ala apuri aaninggin-paaninggin inoba piige nogo, ”An ninom aret eeppanugo logowak o,” yinuk, miippunuk, Iterali wonogwe me, nagagerak.
27Ala nen yoreegerak nogo, abet aret mbake nagagirik, ”Aap nggwok anini nen nooke kenok, ti, nooruwak aret o,” yinuk, o Metit mbo punuk, agabiti lek aret wundi nagagerak. At ninigen kaga'lek mendek nogo, enegen kage negen aret eereegerak me, mondok ogogumbuk a'nuk, mugurok nage nagagerak. 28At melaikat aakumi inooke menggerak nogo nen, it aakumi o Metit mendek manggu ndarak inoorit nage logonet, Iterali mendek inom inooke kero nduk, at Ala yoreegerak nogo, Muta nen abet mba'nuk, ndomba Patika lako logonet, tu nggambe paga amiya labunogo pit nagagerak.
29Ala nen yoragagerak nogo abet mbako logonet, nggween woloonak paga nugu mengga kwak, Iterali mendek nogo niyo Merah yenggenak paga wunda nogo mbareegwa, it Metit mendek nen togop aret wunda nawok nduk, eekwi me, niyo ndonggoninabeegerak o.
30Ala nen yoragagerak nogo abet mbako logonet, o Yeriko yengget-wangget eekwi iigak, nogo 6 yippunuk 7 paga yugum pak wurik nogo langgu-langgu wambeegerak. 31Kwe yawukak Arakap kunduk, Ala nen it Iterali mendek eeppiige nogo, aruk konembunuk, iniki abet aret mbake nagagirik, aap o pekkaawok nduk nogogwaarak nogo, iniki obeelom paga kumaappiyareegerak me, peebi it aap Ala wone taganeegwaarak nogo inooko logonet, at teppereegwaarak.
32Ndi, ambi ngge inom yokkira o. Lek o. It aap Nggireyon kunduk, Mbarak kunduk, Timeton kunduk, Yepeta kunduk, Ndawut kunduk, Temuwin kunduk, Ala wone yorogo nogogwaarak nabi-nabi kunduk, it abok aret togop mban iniki abet mbareegwaarak paga, iya negen eeko nogogwaarak mbininogo yokkiroorak op aret kwe, oonegen lek age me mbo o. 33It aap ti, Ala nen yoragagerak abet mbareegwaarak paga, it aap nggwok alik mendek inom wim nambuko logonet tebenogo piinok, obeelom eerit nogo logowak nduk koonogo piigwi, Ala nen yoragagerak nogo ndak-ndak aret waganggwi, nggeewo aakumi inooka singa nogo inambe keele maarogo piigwi, 34kani omoonuk eyak ambik kwe, naganak-paganak eerogo pugwi, tege wooluwak paga inooriyak nduk eekaatak kwe, melak togon wappatinuk nggarek yogwe, ndeyak aganakaatak kwe inomaawi eekkologwe, ndi, waka'ngget a'nuk wim nambuko logonet aap inanebenu alik mendek mondok mugogo wumbiigwi, eerit nogo nogogwaarak.
35It kumi ando inaagalogwe kanggaatak ineenik agago wogorogwe, ndi, it ando perak, ”Peebi nineenik mondok logorak mippinanigin me, ninili eerogo teppinaniyak mage o. Mondok-mondok ninooko logonip o,” yinuk, iniki mondok alik negen taganak-mbaganak eerogo inookwi iinok kanggwi, 36it ando miyuk-meya eerogo piinok yawi inookwi, ando mbutigeele paga ineenggi-iniyok maarogo piinok, o mbuuluk me mambiigwi, 37it ando yugum paga iniki togu eerogo inookwi, ando nggege paga inobate mbanogo piigwi, ando tege wooluwak paga inookwi, ando inayum abu lek kenok, ndomba-kambin inagabolo mbelenogo inayum negen yirippunuk, mbi abu nugwi iigak, ”Aap maluk me,” nduk, inogole yogo logonet, maluk eerogo piigwi, eeko nogogwaarak. 38Aap ti abu obeelom aret me, o maluk nggween paga yime nugu logorak meek kwe, kagak, karume inom, iinggaame inom, mbaganit nugu logonet, ”O nggeeme nogo yi na o,” yinuk, mbuun ambena inom, ndoome inom, ugun nogo yit nugu nogogwaarak.
39-40It aap ti abok aret Ala yoragagerak nogo abet mbako logonet, eerit nogo nogogwaarak paga Ala nen, ”Aap yi obeelom aret,” inombake nagagerak kwe, at Ala nen nit awo niigak it inaa'nduk obeelom eeppiyoorak mbarulik o. Ata, nit ninom ambugwi obeelom eeppinaniyak op mbareegerak me, wone yoragagerak nogo, eeppiiga'lek kagak, kambit nogo nogogwaarak.
Currently Selected:
IBERANI 11: WNO
Highlight
Copy
Compare
Share
Want to have your highlights saved across all your devices? Sign up or sign in
